លោកនាយករដ្ឋមន្ត្រី ហ៊ុន សែន បានបញ្ចេញប្រតិកម្មភ្លាមៗទៅមេដឹកនាំគណបក្សប្រឆាំង ដែលបានរិះគន់លោក នៅខណៈទាំង លោក សម រង្ស៊ី និងលោក កឹម សុខា កំពុងបំពេញទស្សនកិច្ចនៅបរទេសនោះ។ លោក ហ៊ុន សែន ប្រកាសថា មេដឹកនាំគណបក្សប្រឆាំងទាំងពីរ កំពុងតែបង្កឲ្យមានអស្ថិរភាពសង្គម។ លោកព្រមានថា មេដឹកនាំទាំងពីរនឹងប្រឈមមុខផ្លូវច្បាប់ ហើយលោកនឹងមិនលើកលែងឲ្យទៀតនោះទេ។
លោកនាយករដ្ឋមន្ត្រី ហ៊ុន សែន ចោទប្រកាន់មេដឹកនាំគណបក្សសង្គ្រោះជាតិ ថាជាអ្នកកេងចំណេញនយោបាយពីអស្ថិរភាពនយោបាយនៅកម្ពុជា។ លោកព្រមានថា សំណុំរឿងមេដឹកនាំបក្សប្រឆាំងមិនទាន់បញ្ចប់នោះឡើយ ទុកឲ្យតុលាការជាអ្នកចាត់ចែង ហើយលោកក៏មិនទទួលយកការស្នើសុំលើកលែងទោសពី លោក សម រង្ស៊ី ទៀតដែរ។
លោក ហ៊ុន សែន បានបញ្ចេញសារនយោបាយទាំងកំហឹងបែបនេះ ធ្វើឡើងនៅក្នុងវីដេអូផ្សាយផ្ទាល់នៅតាមគណនីហ្វេសប៊ុក (facebook) របស់លោកមានរយៈពេលជាង ៤០នាទីនៅល្ងាចថ្ងៃទី១២ វិច្ឆិកា។ លោក ហ៊ុន សែន ថែមទាំងប្រកាសឲ្យអ្នកគាំទ្រលោកងើបឡើង ដើម្បីតទល់ទៅនឹងសកម្មភាពគណបក្សប្រឆាំងទៀតផង៖ «ការញុះញង់ឲ្យខ្ញុំព្រះករុណាខឹង ការញុះញង់ឲ្យមានបញ្ហានេះ បញ្ហានោះកើតឡើង ដូចជាបាតុកម្មនៅញីវយ៉ក និងបាតុកម្មនៅទីក្រុងប៉ារីស ដែលខ្ញុំព្រះករុណាខ្ញុំនិយាយត្រង់ៗថា បើគ្មានបាតុកម្មនៅញីវយ៉ក និងគ្មានបាតុកម្មនៅប៉ារីស ដែលរៀបចំដោយបក្សប្រឆាំងទេ វាក៏គ្មានបាតុកម្មនៅទីក្រុងភ្នំពេញដែរ។ នេះជាសិទ្ធិនយោបាយដូចគ្នា ហើយសូមអ្នកគាំទ្រគណបក្សប្រជាជន អ្នកគាំទ្ររដ្ឋាភិបាលដើម្បីត្រៀមខ្លួនដើម្បីឆ្លើយតបចំពោះទង្វើអាក្រក់របស់បក្សប្រឆាំង និងអ្នកគាំទ្ររបស់គេ»។
ការបញ្ចេញសារនយោបាយជាថ្មីរបស់ លោក ហ៊ុន សែន នៅពេលនេះ ធ្វើឡើងភ្លាមៗបន្ទាប់ពី លោក សម រង្ស៊ី និងលោក កឹម សុខា លើកឡើងថា កំពុងបំពេញទស្សនកិច្ចនៅឯបរទេស។ លោក កឹម សុខា ថ្លែងថា រដ្ឋាភិបាលជប៉ុន មានតួនាទីសំខាន់ណាស់សម្រាប់ជួយរកដំណោះស្រាយពីស្ថានភាពនយោបាយនៅកម្ពុជា។
ដោយឡែក លោក សម រង្ស៊ី ប្រធានគណបក្សសង្គ្រោះជាតិ ថ្លែងប្រាប់ក្រុមអ្នកសារព័ត៌មាននៅប្រទេសជប៉ុន កាលពីថ្ងៃទី១១ វិច្ឆិកា ថា រដ្ឋាភិបាលទីក្រុងភ្នំពេញ នឹងប្រើប្រាស់មធ្យោបាយគ្រប់ប្រភេទ ដើម្បីរារាំងមិនឲ្យមានការបោះឆ្នោតនៅឆ្នាំ២០១៨ ដោយសារតែព្រួយបារម្ភពីការចាញ់ឆ្នោត។
លោក សម រង្ស៊ី បន្តថា ក្តីបារម្ភរបស់រដ្ឋាភិបាលលោកនាយករដ្ឋមន្ត្រី ហ៊ុន សែន នេះ បន្ទាប់ពីលទ្ធផលបោះឆ្នោតបណ្ដោះអាសន្ននៅប្រទេសមីយ៉ាន់ម៉ា ឬភូមា (Myanmar/Burma) បង្ហាញថា គណបក្សប្រឆាំងដែលដឹកនាំដោយ អ្នកស្រី អ៊ុង សាន ស៊ូជី (Aung San Suu Kyi) បានឈ្នះឆ្នោត។
លោក សម រង្ស៊ី បន្តថា យុទ្ធសាស្ត្ររបស់ លោក ហ៊ុន សែន ដើម្បីអាចរក្សាអំណាចបានទៅទៀតនោះ គឺបង្កើតឲ្យមានឧបសគ្គដើម្បីរារាំងការបោះឆ្នោតនៅឆ្នាំ២០១៨ ខាងមុខ។ លោកបន្តទៀតថា ដើម្បីអាចបង្កឧបសគ្គមិនឲ្យមានការបោះឆ្នោតនោះ រដ្ឋាភិបាលព្យាយាមបង្កើតអំពើហិង្សាដើម្បីអាចឈានទៅដល់ការធ្វើរដ្ឋប្រហារ ឬក៏ការប្រកាសអាសន្នថ្នាក់ជាតិណាមួយ។ លោកស្នើឲ្យប្រទេសម្ចាស់ជំនួយកម្ពុជា ជាពិសេសប្រទេសជប៉ុន ជួយតាមដាន និងធានាថា ការបោះឆ្នោតដែលមានលក្ខណៈប្រជាធិបតេយ្យ ត្រូវតែកើតឡើងនៅកម្ពុជា នៅឆ្នាំ២០១៨ ខាងមុខ។
ទោះយ៉ាងណាក៏ដោយ លោ ហ៊ុន សែន បានព្រមានទៅលោក សម រង្ស៊ី ត្រូវប្រយ័ត្នប្រយែងពីការធ្វើសេចក្ដីថ្លែងការណ៍ និងចោទប្រកាន់លោក ជាមេដឹកនាំក្បត់ជាតិ ឬផ្ដាច់ការនោះ ព្រោះថាសំណុំរឿងលោក សម រង្ស៊ី និងលោក កឹម សុខា មិនទាន់បញ្ចប់នៅឡើយ៖ «យើងអាចចាត់ចំណាត់ការផ្លូវច្បាប់ បើសិនឯកឧត្ដមនៅតែបន្តម្ដងហើយម្ដងទៀត។ លើកមុនឯកឧត្ដមតែងរត់ចេញពីប្រទេស ខ្ញុំបានសុំលើកលែងទោសឲ្យឯកឧត្ដម២ដង តែលើកនេះសង្ឃឹមថា ឯកឧត្ដមមិនអាចរត់រួចតទៅទៀតទេ។ បើសិនជាមានការចាំបាច់ យន្តការច្បាប់មិនអាចផ្ដល់ជូនឯកឧត្ដមបានតទៅទៀតទេ»។
ឆ្លើយតបនឹងការលើកឡើងនេះ អនុប្រធានស្ដីទីគណបក្សសង្គ្រោះជាតិ លោក ប៉ុល ហំម សុំមិនធ្វើអត្ថាធិប្បាយនោះឡើយ។ ទាក់ទងស្ថិរភាពសង្គមវិញ លោក ប៉ុល ហំម អះអាងថា គណបក្សសង្គ្រោះជាតិ មានគោលការណ៍ធ្វើឲ្យប្រទេសមានស្ថិរភាពនយោបាយ និងដើរលើគន្លងប្រជាធិបតេយ្យពិតប្រាកដ៖ «ធ្វើម៉េចឲ្យសន្តិភាព ឲ្យមានការអភិវឌ្ឍ ដោះស្រាយផលប៉ះពាល់ពីការអភិវឌ្ឍ ហើយអភិវឌ្ឍលទ្ធិប្រជាធិបតេយ្យឲ្យបានពេញលេញ»។
ប្រធានវេទិកាអនាគត លោក អ៊ូ វីរៈ លើកឡើងថា លោក ហ៊ុន សែន ថ្លែងសារនយោបាយនៅពេលនេះ គ្មានអ្វីខុសឆ្គងធ្ងន់ធ្ងរនោះទេ ប៉ុន្តែ លោក ហ៊ុន សែន ព្រមានមេដឹកនាំគណបក្សប្រឆាំងពីការប្រើប្រាស់ផ្លូវច្បាប់ដើម្បីចាប់ចងនេះ មិនមែនជារឿងត្រឹមត្រូវនោះទេ ហើយមេដឹកនាំខ្មែរ ត្រូវបញ្ឈប់ការលាបពណ៌គ្នា និងវាយប្រហារគ្នាដោយពាក្យមិនសមរម្យនោះ៖ «ខ្ញុំថាអាចគ្រោះថ្នាក់ដែរ ព្រោះថា តាំងពីដើមវាមានការប៉ះទង្គិចគ្នា មានក្រុមកាន់ដំបង ក្រុមឆក់ឱកាស ក្រុមខិលខូចយកឱកាសហ្នឹងទៅវ៉ៃបាតុករត្រឹមត្រូវ»។
ការព្រមានរបស់ លោក ហ៊ុន សែន ទៅលើមេដឹកនាំគណបក្សប្រឆាំងនេះ មិនមែនជារឿងលើកទី១ នោះទេ។ ក្រៅពីនេះទៀត អ្នកវិភាគលើកឡើងថា លោក ហ៊ុន សែន តែងតែព្រមានទៅដៃគូប្រកួតប្រជែង និងជាការបង្ហាញឥទ្ធិពលរបស់ខ្លួនក្នុងការក្ដោបក្ដាប់អំណាច។ អ្នកវិភាគសង្កត់ធ្ងន់ថា ជោគជ័យរបស់បក្សប្រឆាំងនៅភូមា ក៏ជាមេរៀនមួយសម្រាប់គណបក្សកាន់អំណាចនៅកម្ពុជា ដើម្បីរកវិធីទប់ស្កាត់បក្សប្រឆាំងនៅមុនការប្រកួតមកដល់ដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។