លោកនាយករដ្ឋមន្ត្រី ហ៊ុន សែន ថ្លែងបញ្ជាក់ជាសាធារណៈថា កិច្ចព្រមព្រៀងនយោបាយរវាងគណបក្សប្រជាជនកម្ពុជា និងគណបក្សសង្គ្រោះជាតិ កាលពីថ្ងៃទី២២ កក្កដា មិនមែនជាកិច្ចព្រមព្រៀងបញ្ចប់ដំណើរការរបស់តុលាការ លើរឿងក្ដីទាក់ទងព្រហ្មទណ្ឌទេ។
សារនយោបាយរបស់លោកនៅពេលនេះ គឺទាក់ទងនឹងការចាប់ខ្លួនសកម្មជននយោបាយ និងសកម្មជនដីធ្លីថ្មីៗនេះ។
សារនយោបាយរបស់លោកនាយករដ្ឋមន្ត្រី ហ៊ុន សែន ធ្វើឡើងនៅក្នុងពិធីប្រគល់សញ្ញាបត្រដល់និស្សិតបច្ចេកវិទ្យានៃសកលវិទ្យាល័យ អាយ.អាយ.ស៊ី (IIC) នៅវិទ្យាស្ថានជាតិអប់រំ នៅព្រឹកថ្ងៃទី២០ វិច្ឆិកា។
សាររបស់ លោក ហ៊ុន សែន ជាការឆ្លើយតបទៅនឹងការរិះគន់របស់ស្ថាប័នជាតិ អន្តរជាតិ ដោយចោទប្រកាន់ថា រាជរដ្ឋាភិបាលចាប់ខ្លួនសកម្មជនសិទ្ធិមនុស្ស និងនយោបាយធ្វើជាឧបករណ៍បង្ក្រាបបក្សប្រឆាំង ឬធ្វើជាចំណាប់ខ្មាំង និងរំលោភកិច្ចព្រមព្រៀងនយោបាយថ្ងៃទី២២ កក្កដា៖ «ខ្ញុំសុំបញ្ជាក់ទៅវិញ កិច្ចព្រមព្រៀងថ្ងៃទី២២ មិនមែនជាកិច្ចព្រមព្រៀងបញ្ចប់នូវរឿងក្ដីក្នុងតុលាការទេ។ រាប់ទាំងខ្ញុំប្រាប់ឯកឧត្ដម សម រង្ស៊ី ថារឿងនេះ គឺមិនអាចមានអ្នកណារំលត់បណ្ដឹងអាជ្ញាបានទេ។ ឥឡូវគ្រាន់តែសមាជិកសភាមានអភ័យឯកសិទ្ធិ។ បន្ទាប់ពីអស់អភ័យឯកសិទ្ធិទៅ គេយកទៅកាត់ទោសតែដដែលហ្នឹង។ អត់ពន្លត់បានទេ ហើយនរណាទៅពន្លត់? ហើយកិច្ចព្រមព្រៀងថ្ងៃទី២២ ខែកក្កដា មិនមែនជាកិច្ចព្រមព្រៀងរំលត់បណ្ដឹងអាជ្ញាទេ។ សូមកុំភ័ន្តច្រឡំ។ មើលឡើងវិញទៅ»។
លោកថ្លែងថា កិច្ចព្រមព្រៀងនយោបាយនោះគ្រាន់តែជាការទប់ស្កាត់មន្ត្រីបក្សប្រឆាំង ដែលពាក់ព័ន្ធនឹងករណីរបស់តុលាការឱ្យនៅក្រៅឃុំប៉ុណ្ណោះ។ លោកផ្ដាំទៅអ្នករិះគន់ថា កុំចោទគណបក្សប្រជាជន និងរដ្ឋាភិបាលពាក់ព័ន្ធនឹងរឿងតុលាការចាប់ខ្លួនសកម្មជនទាំងនោះ។ លោក ហ៊ុន សែន បញ្ជាក់ថា ដោយសារតែគណបក្សប្រជាជន និងរាជរដ្ឋាភិបាល មិនមានសិទ្ធិលើតុលាការនោះហើយ ទើបតុលាការមានសិទ្ធិចាប់ ហើយលោកមិនអាចរារាំងបាន។
មន្ត្រីនាំពាក្យគណបក្សសង្គ្រោះជាតិ លោក យឹម សុវណ្ណ ថ្លែងថា មតិលើកឡើងទាំងប៉ុន្មាន គ្រាន់តែជាការបញ្ចេញមតិរបស់សង្គមស៊ីវិល សហគមន៍អន្តរជាតិ និងតំណាងរាស្ត្រ៖ «អាហ្នឹងមិនមែនជាចោទប្រកាន់អី។ ប្រសិនជារឿងហ្នឹងវាមិនពិតទេ ឲ្យវាទៅតាមខ្យល់ទៅ។ ប៉ុន្តែបើរឿងហ្នឹងវាអ៊ីចឹងមែន អាហ្នឹងមិនដឹងធ្វើម៉េចទេ មានតែនាំគ្នាដោះស្រាយទៅ។ មិនមែនជាការចោទប្រកាន់អីទេ អាហ្នឹងជាការបញ្ចេញមតិ ដែលជាការមើលឃើញរបស់ប្រជាពលរដ្ឋទូទៅ។ អ្នកណាមើលឃើញយ៉ាងម៉េច អាហ្នឹងជារឿងរបស់គេ។ ប៉ុន្តែយើងត្រូវថ្លឹងថ្លែងទាំងអស់គ្នា»។
ប្រធានផ្នែកអង្កេតនៃអង្គការការពារសិទ្ធិមនុស្សអាដហុក (adhoc) លោក នី ចរិយា ថ្លែងថា ការចាប់ខ្លួនសកម្មជនទាំងជាង ១០នាក់នោះ មិនទាក់ទងនឹងបទល្មើសព្រហ្មទណ្ឌទេ៖ «ដោយសារតែយើងឃើញថា ការចាប់ខ្លួនតំណាងសហគមន៍បឹងកក់ទាំងអស់នេះ គឺមិនបានអនុលោមទៅតាមច្បាប់ព្រហ្មទណ្ឌ។ គឺថានៅក្នុងច្បាប់ព្រហ្មទណ្ឌ មិនអនុញ្ញាតឲ្យអនុវត្តទេ។ នៅពេលណាដែលមានបទល្មើសណាមួយកើតឡើងទាក់ទងទៅនឹងច្បាប់ដោយឡែក ដែលមានចែងនៅក្នុងច្បាប់ដោយឡែក អ៊ីចឹងយើងត្រូវពិនិត្យសកម្មភាពរបស់តំណាងសហគមន៍ដែលគាត់មកតវ៉ា មានទ្រង់ទ្រាយជាការជួបជុំ ដើម្បីធ្វើការតវ៉ា។ អ៊ីចឹងត្រូវតែប្រើប្រាស់ច្បាប់ស្ដីអំពីការធ្វើបាតុកម្មដោយសន្តិវិធី។ អ៊ីចឹង ការធ្វើបាតុកម្មដោយសន្តិវិធីថា តើមានបទល្មើសត្រង់ណា ដែលជាបទល្មើសព្រហ្មទណ្ឌ ដែលត្រូវផ្ដន្ទាទោសតាមបាតុកម្មដោយសន្តិវិធីវាអត់មាន»។
លោក ហ៊ុន សែន បញ្ជាក់ថា បញ្ហាចាប់ខ្លួននេះមិនបានរាំងស្ទះដល់ដំណើរការចរចា ដើម្បីជំរុញការរៀបចំច្បាប់ស្ដីពីការចាត់តាំង និងការប្រព្រឹត្តទៅនៃគណៈកម្មាធិការជាតិរៀបចំការបោះឆ្នោត និងវិសោធនកម្មបទបញ្ជាផ្ទៃក្នុងសភានោះទេ។ លោកថ្លែងទៀតថា រឿងនេះយកល្អកុំចាក់សាំងលើភ្លើង ហើយដំណើរការអ្វីៗទៅតាមច្បាប់ ព្រោះទន្ទឹមនឹងប្រជាធិបតេយ្យ ក៏ត្រូវពង្រឹងនីតិរដ្ឋដែរ៖ «មិនអាចទេ ហើយក៏មិនយោគយល់បានដែរ ឬក៏អាចអត់ឱនឲ្យបានដែរ។ អារឿងអីឡើងបិទផ្លូវៗ អាហ្នឹងដល់ពេលវេលាដែលអាជ្ញាធរមានសមត្ថកិច្ចគេត្រូវធ្វើ គេចាត់ការហើយ អារឿងបិទផ្លូវៗហ្នឹង។ បិទស្មានថាស្រួលណាស់ហ្នឹង ប៉ះតែមានអ្នកជំងឺអីកំពុងតែនេះ ឯងបិទផ្លូវ។ រួចស្អីក៏នយោបាយដែរ។ អារឿងព្រហ្មទណ្ឌសោះ កាឡៃទៅនយោបាយ។ អើ! បើកាឡៃទៅនយោបាយ ស្រេចតែធ្វើមិនដឹងតែម្ដង ឲ្យតុលាការគេលេងយ៉ាងម៉េចលេងទៅ។ ប៉ុន្តែ ទោះបីជាយើងដឹង ក៏មិនដឹងទៅធ្វើម៉េចដែរ បើអាហ្នឹងសិទ្ធិតុលាការ និយាយឲ្យត្រង់ៗតែម្ដង»។
រហូតមកដល់ពេលនេះ មានសកម្មជនដីធ្លី និងសកម្មជននយោបាយចំនួនជិត ២០នាក់ហើយដែលតុលាការចាប់ខ្លួនផ្ដន្ទាទោសពីបទព្រហ្មទណ្ឌ ក្នុងការធ្វើបាតុកម្ម។ ក្នុងនោះក៏មានប្រធាននាយកដ្ឋានព័ត៌មាន និងប្រព័ន្ធផ្សព្វផ្សាយរបស់គណបក្សសង្គ្រោះជាតិ ដែរ គឺលោក មាជ សុវណ្ណារ៉ា។
សារនយោបាយរបស់លោកនាយករដ្ឋមន្ត្រី ហ៊ុន សែន ក៏ព្រមានឱ្យដឹងដែរថា សមាជិកសភាដែលមានរឿងនៅតុលាការ តុលាការធ្វើអីមិនបានទេនៅពេលដែលសមាជិកសភាមានអភ័យឯកសិទ្ធិ ប៉ុន្តែទុកក្រោយឆ្នាំ២០១៨។ ប៉ុន្តែចាំដល់អស់អភ័យឯកសិទ្ធិ តុលាការកោះទៀត ព្រោះមិនមានអ្វីរំលត់បណ្ដឹងអាជ្ញាហ្នឹងបានទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។