Opens in new windowចាប់ពីថ្ងៃទី៨ ខែកញ្ញា នេះតទៅ រដ្ឋាភិបាលនឹងចាប់ខ្លួនអ្នកដែលអ្នកនិយាយថា រដ្ឋាភិបាលប្រើប្រាស់ផែនទីក្លែងក្លាយ ឬផែនទីចោរ និងថា បើទុកឲ្យមានអ្នកនិយាយដូចនេះ នឹងធ្វើឲ្យផ្ទុះសង្គ្រាមថែមទៀតផង។
ទោះជាមានការព្រមានបែបនេះក្ដី មន្ត្រីគណបក្សប្រឆាំងមិនទាន់ជឿថា ផែនទីដែលរដ្ឋាភិបាលប្រើប្រាស់នោះ ត្រឹមត្រូវកម្រិតណានោះទេ។
លើសពីការព្រមាននេះ លោកនាយករដ្ឋមន្ត្រី ហ៊ុន សែន ថានឹងចុះចេញពីតំណែង ហើយដើរចូលពន្ធនាគារ ប្រសិនបើផែនទីរដ្ឋាភិបាលកំពុងប្រើប្រាស់មិនដូចនឹងផែនទីរបស់បារាំង ឲ្យខ្ចីនោះ៖ «ខ្ញុំព្រះករុណាខ្ញុំ បានប្ដេជ្ញាចិត្តរួចហើយថា ប្រសិនបើផែនទីមកពីបារាំង ខុសគ្នាផែនទីដែលចុះហត្ថលេខាជាមួយវៀតណាម ខ្ញុំព្រះរុណាខ្ញុំនឹងចុះចេញពីតំណែងភ្លាម មិនធ្វើជានាយករដ្ឋមន្ត្រីតទៅទៀត ហើយក៏ស្ម័គ្រចិត្តចូលទៅមន្ទីរឃុំឃាំង រង់ចាំតុលាការកាត់ទោស ព្រោះនេះជាការទទួលខុសត្រូវជាប្រវត្តិសាស្ត្រ ក្នុងនាមជាកូនប្រុស ហ៊ានស៊ីហ៊ានសង»។
សារព្រមានម្ដងហើយម្ដងទៀតរបស់ លោក ហ៊ុន សែន នៅពេលនេះ បន្ទាប់ពីរដ្ឋាភិបាលផ្ទៀងផ្ទាត់ឃើញថា ផែនទីខ្លួនកំពុងប្រើប្រាស់ដូចគ្នាទៅនឹងផែនទី យូ.ធី.អឹម (UTM) ១៨ផ្ទាំងរបស់អង្គការសហប្រជាជាតិ ស្ដីពីអាមេរិក ទម្លាក់គ្រាប់បែកនៅកម្ពុជា និងដូចគ្នាទៅនឹងផែនទីរបស់ប្រទេសបារាំង ចំនួន ២៦ផ្ទាំង ដែលផែនទីទាំងនោះមានខ្នាត ១/១០០.០០០ ដូចគ្នា។
លោក ហ៊ុន សែន ដែលកំពុងកាន់អំណាចជិត ៣០ឆ្នាំមកហើយនោះ និយាយចំៗថា បើអ្នកណាមិនឲ្យលោកបានសុខពីរឿងផែនទីនេះ លោកក៏មិនឲ្យគេបានសុខដែរ និងប្រាប់ឲ្យដៃគូប្រកួតប្រជែងនយោបាយ កុំយករឿងផែនទីជាអាជីវកម្មនយោបាយ។ លោកបន្តថា រដ្ឋាភិបាលនឹងធ្វើការចាប់ខ្លួនមិនរើសមុខ និងគ្មានការលើកលែងលើអ្នកណាម្នាក់ឡើយ៖ «ខ្ញុំសុំបញ្ជាក់ថា ខ្ញុំមិនអត់ឱនឲ្យអ្នកណាមួយដែលបន្តប្រើពាក្យផែនទីមិន ត្រឹមត្រូវ ផែនទីក្លែងក្លាយ ផែនទីចោរ ហើយក៏សុំបញ្ជាក់ បើគេមិនឲ្យខ្ញុំសុខ ខ្ញុំក៏មិនឲ្យគេសុខដែរ អ៊ីចឹងមន្ត្រីទាំងអស់ អ្នកអនុវត្តច្បាប់ទាំងអស់ ត្រូវចាប់ខ្លួននៅហ្នឹង ចំពោះអ្នកណាក៏ដោយដែលប្រើពាក្យនេះ»។
ការព្រមានចាប់ខ្លួនរបស់ លោក ហ៊ុន សែន នេះ ត្រូវបាន លោក កែម ឡី អ្នកសិក្សាស្រាវជ្រាវការអភិវឌ្ឍសង្គមយល់ថា គ្មានប្រសិទ្ធភាពយូរអង្វែងឡើយ ប៉ុន្តែត្រឹមតែធ្វើឲ្យប្រជាពលរដ្ឋសង្ស័យចំពោះការងាររបស់រដ្ឋាភិបាលរឿងផែនទីទៅវិញទេ។ លោក កែម ឡី ទាមទារឲ្យ លោក ហ៊ុន សែន បង្ហាញថា ការបញ្ជាឲ្យចាប់ខ្លួននេះ រដ្ឋាភិបាលកម្ពុជា យោងលើច្បាប់អ្វីខ្លះ?៖ «នៅពេលគាត់ចង់ចាប់អ្នកណាដែលនិយាយថា ផែនទីក្លែងក្លាយ គាត់យោងច្បាប់អី?»។
ការព្រមានរបស់ លោក ហ៊ុន សែន ដូចនេះ ក្រោយពេលតំណាងរាស្ត្រគណបក្សសង្គ្រោះជាតិ លោក អ៊ុំ សំអាន ធ្លាប់រិះគន់ថា រដ្ឋាភិបាលកម្ពុជា ប្រើប្រាស់ផែនទីក្លែងក្លាយ។
ដោយឡែកមន្ត្រីជាន់ខ្ពស់នៃគណបក្សសង្គ្រោះជាតិ លោក អ៊ូ ច័ន្ទឫទ្ធិ ហៅការព្រមាននេះថា ជាការបំបិទសិទ្ធិសេរីភាពក្នុងការបញ្ចេញមតិរបស់ពលរដ្ឋខ្មែរ។ លោក អ៊ូ ច័ន្ទឫទ្ធិ មិនទាន់ជឿថា ផែនទីរបស់រដ្ឋាភិបាលកំពុងប្រើប្រាស់ត្រឹមត្រូវកម្រិតណានោះទេ។ លោកបន្តថា គណបក្សរបស់លោកកំពុងប្រមូលឯកសារពាក់ព័ន្ធ ដើម្បីធ្វើការបន្ថែមលើការងារនេះ៖ «ក្នុង ដំណាក់កាលនេះ យើងមិនអាចប្រកាសថា តើផែនទីដែលរដ្ឋាភិបាលប្រើប្រាស់ត្រឹមត្រូវកម្រិតណាទេ? ខ្ញុំយល់ថា បើរដ្ឋាភិបាលថា ផែនហ្នឹង (ផែនទីរដ្ឋាភិបាលកំពុងប្រើប្រាស់) ក្លែងក្លាយ ឬមិនក្លែងក្លាយ បង្ហាញការពិតទៅចប់ហើយ មិនបាច់ទៅគំរាមចាប់អ្នកនេះ អ្នកនោះទេ»។
អ្នកវិភាគសង្គម លោក កែម ឡី ទាមទារឲ្យ លោក ហ៊ុន សែន យកផែនទីពីអង្គការសហប្រជាជាតិ ផលិតឡើងនៅចន្លោះឆ្នាំ១៩៣៣ និងឆ្នាំ១៩៥៣ បោះពុម្ពដោយក្រុមភូមិសាស្ត្រឥណ្ឌូចិន (Indo-China Geographic Service) ដែលត្រូវបានប្រគល់ជូនអង្គការសហប្រជាជាតិ នៅឆ្នាំ១៩៦៤ មកបង្ហាញសិន និងយកអ្នកជំនាញផ្នែកផែនទីទៅផ្ទៀងផ្ទាត់រវាងផែនដី និងផែនទី ថាតើត្រឹមត្រូវនឹងបង្គោលព្រំដែនដែលរដ្ឋាភិបាលបានវាស់វែងជាមួយនឹងវៀតណាម ដែរឬយ៉ាងណា មុននឹងព្រមានចាប់ខ្លួនអ្នករិះគន់?៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។