សង្គម​ស៊ីវិល​បារម្ភ​ពី​ការ​គំរាម​កំហែង​ទៅ​លើ​សកម្មជន​បក្ស​នយោបាយ

សង្គម​ស៊ីវិល​សម្ដែង​ការ​ព្រួយ​បារម្ភ​ចំពោះ​ការ​គំរាម​កំហែង បំភិត​បំភ័យ ដែល​អាជ្ញាធរ​មូលដ្ឋាន​នៅ​កន្លែង​មួយ​ចំនួន​ធ្វើ​ទៅ​លើ​សកម្មជន ឬ​អ្នក​គាំទ្រ​គណបក្ស​សង្គ្រោះ​ជាតិ។ សេចក្តី​ថ្លែងការណ៍ ការ​គំរាម​កំហែង ឬ​បំភ័យ​ណា​មួយ​នោះ ជា​ទង្វើ​រំលោភ​ច្បាប់ និង​រំលោភ​សិទ្ធិ​ប្រជាពលរដ្ឋ ក្នុង​សង្គម​ប្រជាធិបតេយ្យ។

0:00 / 0:00

គណៈកម្មាធិការ​ប្រព្រឹត្តិកម្ម​សិទ្ធិ​មនុស្ស​កម្ពុជា នៅ​ថ្ងៃ​ទី៥ ខែ​សីហា បាន​ចេញ​សេចក្តី​ថ្លែងការណ៍​មួយ ដោយ​អំពាវនាវ​ឲ្យ​គណបក្ស​ជាប់​ឆ្នោត​ទាំង​ពីរ​គណបក្ស ចេញ​សេចក្តី​ណែនាំ​ជា​សាធារណៈ ទៅ​អ្នក​គាំទ្រ​របស់​ខ្លួន និង​អាជ្ញាធរ​មូលដ្ឋាន កុំ​ឲ្យ​ប្រព្រឹត្ត​អំពើ​ដែល​បង្ក​ការ​ភ័យ​ខ្លាច ភាព​រំជើបរំជួល​ក្នុង​សង្គម ដែល​អាច​ប៉ះពាល់​ដល់​ការ​សាមគ្គី និង​ភាព​សុខដុម​នៃ​សង្គម​ទាំង​មូល ក្នុង​ពេល​ដែល​កម្ពុជា នឹង​រៀបចំ​រាជ​រដ្ឋាភិបាល​ថ្មី​នា​ពេល​ខាង​មុខ។

សមាជិក​គណៈកម្មាធិការ​ប្រព្រឹត្តិកម្ម​សិទ្ធិ​មនុស្ស​កម្ពុជា និង​ជា​ប្រធាន​ផ្នែក​អង្កេត​សមាគម​អាដហុក (Adhoc) លោក នី ចរិយា មាន​ប្រសាសន៍​ថា បរិយាកាស​ក្រោយ​ការ​បោះ​ឆ្នោត​មិន​ទាន់​មាន​ភាព​ល្អ​ប្រសើរ​ទេ ដោយសារ​ពលរដ្ឋ​ម្ចាស់​ឆ្នោត​មួយ​ចំនួន​ដែល​គាំទ្រ​បក្ស​សង្គ្រោះ​ជាតិ រង​នូវ​ការ​បំភ័យ​ពី​អាជ្ញាធរ​ភូមិ​ឃុំ និង​ពី​ក្រុម​ការងារ​ពង្រឹង​បក្ស​របស់​គណបក្ស​ប្រជាជន​កម្ពុជា។ លោក​បន្ត​ថា អាជ្ញាធរ​មូលដ្ឋាន​ជា​អ្នក​មាន​សមត្ថកិច្ច​ក្នុង​កិច្ច​ការពារ​ពលរដ្ឋ​ទូទៅ មិន​មែន​ជា​អ្នក​បម្រើ​បក្ស​កាន់​អំណាច​ឡើយ។

លោក​បញ្ជាក់​ថា ពេល​ដែល​លទ្ធផល​បណ្ដោះ​អាសន្ន​មិន​ទាន់​បាន​បង្ហាញ​ដោយ គ.ជ.ប ហេតុ​នេះ​ការ​រក្សា​សន្តិសុខ​សង្គម និង​ទប់ស្កាត់​រាល់​ការ​គំរាម​កំហែង​ទៅ​លើ​ពលរដ្ឋ​ជា​ប្រការ​ចាំ​បាច់ ដែល​អាជ្ញាធរ​មាន​សមត្ថកិច្ច​ត្រូវ​អនុវត្ត៖ «ខ្ញុំ​ចង់​ជម្រាប​ពលរដ្ឋ និង​អាជ្ញាធរ​មូលដ្ឋាន​ឲ្យ​បញ្ឈប់​ការ​រើសអើង ត្រូវ​ចាំ​ថា យន្តការ​នៃ​ការ​បោះ​ឆ្នោត ធ្វើ​ឡើង​ដើម្បី​រើស​មេ​ដឹក​នាំ​ដោយ​អហិង្សា មិន​មែន​ធ្វើ​សង្គ្រាម​ប្រឆាំង​គ្នា​ទេ ហើយ​អាជ្ញាធរ​មូលដ្ឋាន​មាន​តួនាទី​ការពារ​ពលរដ្ឋ​ទូទៅ មិន​មែន​ការពារ​តែ​ពលរដ្ឋ​បក្ស​ខាង​ណា​មួយ​នោះ​ទេ»

ទន្ទឹម​នឹង​នេះ ពលរដ្ឋ​រស់​នៅ​សង្កាត់​ចាក់អង្រែលើ ដែល​សុំ​មិន​បញ្ចេញ​ឈ្មោះ បាន​ឲ្យ​ដឹង​ថា នៅ​ថ្ងៃ​ទី៥ ខែ​សីហា ក្រុម​អាជ្ញាធរ​ភូមិ​សង្កាត់ បាន​ប្រមូល​ប្រជាពលរដ្ឋ​ឲ្យ​ជួប​ជុំ​គ្នា ដើម្បី​ពង្រឹង​ស្មារតី និង​បញ្ចុះ​បញ្ចូល​ពលរដ្ឋ​ទាំង​នោះ​ឲ្យ​ផ្ដិត​មេ​ដៃ​ទទួល​យក​លទ្ធផល​នៃ​ការ​បោះ​ឆ្នោត ដែល​ផ្សព្វផ្សាយ​ដោយ​គណបក្ស​ប្រជាជន​កម្ពុជា៖ «សង្កាត់​ចាក់អង្រែលើ ហ្នឹង បង្ខំ​ឲ្យ​ពលរដ្ឋ​ផ្ដិត​មេ​ដៃ​គាំទ្រ​ថា គណបក្ស​ប្រជាជន​កម្ពុជា ឈ្នះ​ឆ្នោត​ហ្នឹង គេ​កំពុង​ផ្ដិត​ឥឡូវ​ហ្នឹង»

វិទ្យុ​អាស៊ីសេរី មិន​អាច​ទាក់ទង​មន្ត្រី​ក្រសួង​មហាផ្ទៃ និង​មន្ត្រី​គណបក្ស​កាន់​អំណាច ដើម្បី​សុំ​ការ​បកស្រាយ​ពី​បញ្ហា​នេះ​បាន​ទេ នៅ​ថ្ងៃ​ទី៥ ខែ​សីហា ឆ្នាំ​២០១៣។

ទោះ​យ៉ាង​ណា​ក្តី លោក​នាយក​រដ្ឋមន្ត្រី ហ៊ុន សែន កាល​ពី​ថ្ងៃ​ទី២ ខែ​សីហា នៅ​ខេត្ត​កណ្ដាល មាន​ប្រសាសន៍​ថា អ្នក​នយោបាយ​គេ​ឈ្លោះ​តតាំង​គ្នា​ក្តៅ​គគុក​តាម​ប្រព័ន្ធ​ផ្សព្វផ្សាយ​មែន ប៉ុន្តែ​គេ​នៅ​តែ​អាច​ហូប​បាយ​រួម​តុ​នឹង​គ្នា ចាប់​ដៃ​គ្នា ពិភាក្សា​គ្នា​ពី​រឿង​ប្រទេស​ជាតិ​ជាមួយ​គ្នា​បាន។ ផ្អែក​លើ​កត្តា​នេះ​ហើយ ទើប​លោក​អំពាវនាវ​ឲ្យ​ពលរដ្ឋ​ជៀសវាង​ឲ្យ​បាន​នូវ​ការ​ប្រើ​ហិង្សា បន្ទាប់​ពី​លទ្ធផល​នៃ​ការ​បោះ​ឆ្នោត​ត្រូវ​បាន​ប្រកាស​នោះ។

ទាក់ទង​នឹង​ការ​ភ័យ​ខ្លាច​ក្រោយ​ការ​បោះ​ឆ្នោត​វិញ កាល​ពី​ថ្ងៃ​ទី២៨ ខែ​កក្កដា ពលរដ្ឋ​នៅ​ភ្នំពេញ ផ្អើល​ទិញ​ស្បៀង​ទុក​បម្រុង ដោយសារ​តែ​ឃើញ​រដ្ឋាភិបាល​ចល័ត​ទ័ព​ក្នុង​រាជធានី​ភ្នំពេញ និង​ការ​បិទ​ផ្លូវ​ជុំវិញ​ផ្ទះ លោក ហ៊ុន សែន។ នៅ​ថ្ងៃ​ទី៣១ ខែ​កក្កដា ពេល​ដែល លោក ហ៊ុន សែន ចុះ​ជួប​កម្មករ​ធ្វើ​ស្ពាន​អាកាស​នៅ​ស្ទឹងមានជ័យ ពលរដ្ឋ​នៅ​ស្ទឹងមានជ័យ ក៏​ភ័យ​ខ្លាច​ម្តង​ទៀត។ ភាព​ភ័យ​ខ្លាច​នេះ ដោយសារ​មាន​កង​ការពារ និង​កង​រាជ​អាវុធហត្ថ​ចុះ​ទៅ​ទីនោះ​ជាច្រើន ដោយ​មិន​ប្រាប់​ជា​មុន ហើយ​បិទ​ផ្លូវ​មិន​ឲ្យ​ធ្វើ​ចរាចរណ៍​ជា​សាធារណៈ ជា​ពិសេស​តំបន់​នោះ​ជា​ទី​ដែល​កើត​មាន​អំពើ​ហិង្សា​ក្នុង​ថ្ងៃ​បោះ​ឆ្នោត បន្ទាប់​មាន​ការ​តវ៉ា​របស់​ប្រជាពលរដ្ឋ មាន​ការ​បាញ់​ឡើង​លើ និង​ដុត​ឡាន​កង​រាជ​អាវុធហត្ថ​អស់ ២​គ្រឿង​នោះ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖

ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។