ស្របពេលដែលអ្នកនយោបាយកំពុងខ្វល់ខ្វាយរឿងឃោសនា ដើម្បីទាក់ទាញអ្នកគាំទ្របក្សខ្លួនក្នុងការបោះឆ្នោតជាតិនៅខែកក្កដា ខាងមុខនេះ ក្រុមនារីៗក៏ខ្វល់ខ្វាយឃោសនាទាក់ទាញអ្នកនយោបាយឲ្យជួយលើកស្ទួយសិទ្ធិនារីក្នុងតួនាទីក្នុងឆាកនយោបាយឲ្យស្មើបុរសដែរ។
ដើម្បីឲ្យចំនួននារីអាចចូលប្រឡូកក្នុងឆាកនយោបាយកើនឡើង មជ្ឈមណ្ឌលសិទ្ធិមនុស្សកម្ពុជា និងតំណាងស្ត្រីមួយចំនួន នឹងរៀបចំកិច្ចពិភាក្សាមួយនៅថ្ងៃទី២៨ មីនា ដើម្បីឲ្យបក្សនយោបាយនានាបង្កើនបេក្ខភាពស្ត្រីក្នុងបញ្ជីបេក្ខភាពរបស់ខ្លួន ឲ្យបានច្រើនក្នុងពេលបោះឆ្នោតខាងមុខនេះ។
កិច្ចពិភាក្សានេះ នឹងផ្ដោតលើយន្តការ និងវិធីលើកកម្ពស់ការចូលរួម និងភាពជាតំណាងរបស់ស្ត្រីក្នុងឆាកនយោបាយថ្នាក់ជាតិ ក្នុងគោលបំណងឲ្យអ្នកធ្វើការពាក់ព័ន្ធអ្នកតំណាងរាស្ត្រ និងការចូលរួមរបស់ស្ត្រី រួមទាំងគណបក្សនយោបាយ រួមគ្នាពិភាក្សាលើវិធីជាក់ស្តែងឲ្យមានចំនួនស្ត្រីក្នុងការងារនយោបាយឲ្យបានច្រើន។
អ្នកស្រី ជរ ច័ន្ទធីតា អ្នកសម្របសម្រួលគម្រោងលើកស្ទួយសមាសភាពស្ត្រី ក្នុងវិស័យនយោបាយនៅកម្ពុជា នៃមជ្ឈមណ្ឌលសិទ្ធមនុស្សកម្ពុជា អ្នកស្រីមានប្រសាសន៍នៅថ្ងៃទី២៧ មីនា ថា កិច្ចពិភាក្សានោះនឹងជំរុញឲ្យចំនួនបេក្ខភាពស្ត្រីក្នុងឆាកនយោបាយ បានយ៉ាងហោចណាស់បានចំនួន ៣០% ដែរ នៅពេលបោះឆ្នោតជាតិខាងមុខនេះ៖ «យើងនឹងលើកឡើងនូវអនុសាសន៍ផ្សេងៗអាចរួមមានជាយន្តការ ជាគំនិតផ្ដួចផ្ដើម ដើម្បីរំលេចថា តើយើងធ្វើបែបម៉េច ដើម្បីលើកកម្ពស់ស្ត្រី និងវិស័យនយោបាយហ្នឹង។ បញ្ហាដែលយើងលើកឡើង គឺស្ត្រីនៅមានកម្រិតទាបក្នុងវិស័យនយោបាយនៅឡើយ ទាំងថ្នាក់ជាតិ និងថ្នាក់ក្រោមជាតិ...»។
ចំណែកអ្នកស្រី រស់ សុភាព នាយកប្រតិបត្តិអង្គការយេនឌ័រ និងអភិវឌ្ឍន៍ដើម្បីកម្ពុជា បានបន្ទរថា ទោះបីជាប្រទេសកម្ពុជា សព្វថ្ងៃ ប្រកាន់យករបបនយោបាយបែបលទ្ធិប្រជាធិបតេយ្យយ៉ាងណាក្ដី ក៏រដ្ឋាភិបាលមិនសូវគិតគូរលើកស្ទួយសិទ្ធិស្ត្រីក្នុងឆាកនយោបាយដែរ។
អ្នកស្រី រស់ សុភាព ដែលជាអនុប្រធានដឹកនាំនៃគណៈកម្មាធិការលើកស្ទួយស្ត្រីក្នុងវិស័យនយោបាយ ក៏បានរិះគន់គណបក្សនយោបាយទាំងអស់ដែរថា មានការរើសអើងចំពោះស្ត្រីក្នុងការដាក់បេក្ខជនក្នុងបញ្ជីបេក្ខភាពរបស់បក្សនៅឡើយ៖ «នៅក្នុងគណបក្សនយោបាយ ក៏យ៉ាងដូច្នេះដែរ ក្នុងគណបក្សនីមួយៗគេមានហៅថាចលនាស្ត្រី ហើយចលនាស្ត្រីគ្រាន់តែមានទេ ក៏ប៉ុន្តែមិនសូវយកចិត្តទុកដាក់ទេ។ ហើយគណបក្សនយោបាយដែលជាបុរសហ្នឹង មានការរើសអើងស្ត្រីផងដែរ ធ្វើឲ្យស្ត្រីហ្នឹងលំបាកក្នុងការិយាល័យរបស់គាត់ អ៊ីចឹង ធ្វើឲ្យស្ត្រីហ្នឹងប្រឈមគ្រប់យ៉ាង»។
ការអះអាងនេះ ហាក់ស្របនឹងបេក្ខភាពស្ត្រីក្នុងឆាកនយោបាយបច្ចុប្បន្ន។ របាយការណ៍នៃគណៈកម្មាធិការជាតិរៀបចំការបោះឆ្នោត បង្ហាញថា បេក្ខភាពស្ត្រីចូលរួមការបោះឆ្នោតឃុំ សង្កាត់ ឆ្នាំ២០១២ មានចំនួនប្រហែល ២ពាន់នាក់ប៉ុណ្ណោះ។ ក្នុងនោះ បេក្ខភាពស្ត្រីគណបក្សប្រជាជន មានច្រើនជាងគេ គឺជិត ១.៨០០នាក់ បក្ស សម រង្ស៊ី ស្ថិតនៅលំដាប់ទី២ គឺចំនួនប្រហែល ២៣០នាក់ បក្សសិទ្ធិមនុស្ស ចំនួន ១២នាក់ បក្សហ៊្វុនស៊ិនប៉ិច ចំនួន ៥នាក់ និងបក្ស នរោត្តម រណឫទ្ធិ ចំនួន ៣នាក់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។