សមាជិកក្រុមប្រឹក្សាខេត្ត ក្រុង ស្រុក ខណ្ឌ របស់គណបក្ស សម រង្ស៊ី នៅខេត្តកំពង់ចាម បានហៅការដក ឬលុបឈ្មោះពួកគាត់ចេញពីសមាជិកភាពនៃក្រុមប្រឹក្សា ដោយស្ថិតនៅក្រោមហេតុផលថា ពួកគាត់បានឈរឈ្មោះជាសមាជិកភាពគណបក្សសង្គ្រោះជាតិ នោះ គ្រាន់ជាបញ្ហានយោបាយ។ ចំណែកអាជ្ញាធរខេត្ត មិនបានបកស្រាយច្រើននោះទេជុំវិញបញ្ហានេះ ដោយគ្រាន់តែបញ្ជាក់ថា ខាងខេត្ត គឺធ្វើទៅតាមសេចក្តីសម្រេចរបស់ក្រសួងមហាផ្ទៃ។
ក្រុមប្រឹក្សាខេត្ត ក្រុង ស្រុក ខណ្ឌ របស់គណបក្ស សម រង្ស៊ី ចំនួន ៨៧រូប នៅខេត្តកំពង់ចាម ត្រូវបានក្រសួងមហាផ្ទៃ ដកសិទ្ធិពីសមាជិកភាពរបស់ខ្លួនចេញ ដោយសារពួកគាត់បានប្ដូរទៅឈរឈ្មោះនៅគណបក្សសង្គ្រោះជាតិ។ លើសពីនេះ ក្រុមប្រឹក្សាទាំងនោះក៏បានសម្ដែងអារម្មណ៍មិនពេញចិត្តចំពោះចំណាត់ការរបស់អាជ្ញាធរខេត្ត ដែលបានកាត់ផ្តាច់ប្រាក់ខែរបស់ពួកគាត់នៅប្រចាំខែមីនា ទៀតផង។
សមាជិកក្រុមប្រឹក្សាគណបក្ស សម រង្ស៊ី ខេត្តកំពង់ចាម មួយរូប គឺលោក កៅ ចេស្តា មានប្រសាសន៍ថា ពួកគាត់ទាំង ៨៧នាក់ ដែលជាក្រុមប្រឹក្សាខេត្ត ក្រុង ស្រុក ខណ្ឌ នោះ ត្រូវបានក្រសួងមហាផ្ទៃ ចេញសេចក្តីសម្រេចមួយកាលពីថ្ងៃទី២០ មីនា ដើម្បីដកសិទ្ធិចេញពីតំណែងក្រុមប្រឹក្សារបស់គណបក្ស សម រង្ស៊ី ដោយសារតែពួកគាត់បានឈរឈ្មោះជាក្រុមប្រឹក្សាខេត្ត ក្រុង ស្រុក ខណ្ឌ នៃគណបក្សសង្គ្រោះជាតិ។
លោកបន្តថា ក្នុងសេចក្តីសម្រេចនោះមិនបានបញ្ជាក់រឿងផ្តាច់ប្រាក់ខែសម្រាប់ខែមីនា នោះទេ ប៉ុន្តែអាជ្ញាធរខេត្តបែរជាផ្តាច់ប្រាក់ខែនោះពីពួកគាត់ទៅវិញ រហូតដល់មាននៅស្រុកខ្លះបានធ្វើការតវ៉ាខ្លាំង ទើបព្រមបើកប្រាក់ប្រចាំខែមីនា ជូន ប៉ុន្តែចំពោះក្រុមប្រឹក្សាខេត្តនៅតែមិនទទួលបានប្រាក់ខែប្រចាំខែមីនា ដដែល។
លោកបន្ថែមទៀតថា ការដកសិទ្ធិរបស់ក្រុមប្រឹក្សាខេត្ត ក្រុង ស្រុក ខណ្ឌ របស់គណបក្ស សម រង្ស៊ី ពីសំណាក់ក្រសួងមហាផ្ទៃ និងការមិនបើកប្រាក់ខែឱ្យនោះ គឺជាចេតនានយោបាយច្រើនជាងការអនុវត្តច្បាប់ទៅវិញ៖ «មានស្រុកច្រើនហ្នឹងបានតវ៉ា ដូចក្រុងកំពង់ចាម ស្រុកកំពង់សៀម ស្រុកមេមត់ អីហ្នឹង គេបានតវ៉ាទៅ គេបើកឱ្យ ចំណែកខេត្តហ្នឹង គឺដាច់ខាតហ្មងគឺមិនឱ្យ វាមានលក្ខណៈខុសគ្នាអ៊ីចឹង។ អ៊ីចឹងបានថារឿងនេះមិនមែនជារឿងនេះទេ ជាចេតនានយោបាយ គេមិនចង់ឱ្យយើងនៅក្នុងក្រុមប្រឹក្សាហ្នឹងប៉ុន្មានទេ ប៉ុន្តែគ្រាន់តែច្បាប់គេតម្រូវឱ្យមានក្រុមប្រឹក្សាស្រុកខេត្តទេ ពីព្រោះនៅក្រុមប្រឹក្សាស្រុកខេត្តហ្នឹង មានតួនាទីសំខាន់ណាស់ក្នុងការទារផលប្រយោជន៍ប្រជាពលរដ្ឋ ដូចជាករណីរំលោភផ្សេងៗ»។
លោក កៅ ចេស្តា ចង់ឱ្យរាជរដ្ឋាភិបាលពិចារណាឡើងវិញចំពោះបញ្ហានេះ ជាជាងធ្វើអ្វីមួយដែលប្រាសចាកពីគោលការណ៍នៃច្បាប់ ហើយនៅតែប្រព្រឹត្តរឿងដែលខុសដដែលៗនោះ។
នាយករដ្ឋបាលសាលាខេត្តកំពង់ចាម លោក គឹម គុណវុឌ្ឍ បានមានប្រសាសន៍បញ្ជាក់ដោយខ្លីថា ខាងលោកធ្វើទៅតាមលិខិតរបស់ក្រសួងមហាផ្ទៃ និងរុញបញ្ហានេះឱ្យទៅសួរក្រសួងមហាផ្ទៃ៖ «ព្រោះអាហ្នឹងមានការណែនាំមួយរបស់ក្រសួងមហាផ្ទៃ ហើយមើលច្បាប់អង្គការដែលមាននៅក្នុងហ្នុង អ្នកដែលចេញពីគណបក្សនយោបាយមួយទៅឈរឱ្យគណបក្សនយោបាយមួយទៀត វាអស់សិទ្ធិពីគណបក្សនយោបាយចាស់ហើយ។ ខ្ញុំមិនច្បាស់ទេ ប៉ុន្តែសុំសួរទៅមហាផ្ទៃ សួរទៅមហាផ្ទៃ គេដឹងហើយ»។
វិទ្យុអាស៊ីសេរី មិនអាចទំនាក់ទំនងអ្នកនាំពាក្យនៃក្រសួងមហាផ្ទៃ គឺលោក ខៀវ សុភ័គ បានទេនៅថ្ងៃទី២ មេសា។
ប៉ុន្តែ នាយកប្រតិបត្តិនៃគណៈកម្មាធិការដើម្បីការបោះឆ្នោតដោយសេរី និងយុត្តិធម៌នៅកម្ពុជា ហៅកាត់ថា ខុមហ្វែ្រល (COMFREL) លោក គល់ បញ្ញា មានប្រសាសន៍ថា ត្បិតតែមិនមានច្បាប់ណាចែងអំពីតំណែងក្រុមប្រឹក្សារាជធានី ខេត្ត ក្រុង ស្រុក ខណ្ឌ ដូចតំណែងតំណាងរាស្ត្រក៏ដោយ ក៏ប៉ុន្តែគេក៏ត្រូវអនុលោមទៅតាមគោលការណ៍ដែលមានស្រដៀងគ្នាទៅនឹងតំណែងតំណាងរាស្ត្រដែរ។ លោកបន្តថា ក្រសួងមហាផ្ទៃ មិនអាចរុះរើ ឬដកសិទ្ធិ ឬក៏ផ្តាច់ប្រាក់ខែចំពោះតំណែងក្រុមប្រឹក្សាខេត្ត ក្រុង ស្រុក ខណ្ឌ របស់គណបក្សមួយ ដោយសារតែគាត់បានទៅឈរឈ្មោះជាបេក្ខភាពឱ្យគណបក្សថ្មីនោះទេ នៅក្នុងកំឡុងពេល ៦ខែមុនការបោះឆ្នោតមកដល់នោះ។
លោក គល់ បញ្ញា៖ «ជាចរិតរៀបនយោបាយច្រើនជាងដែលក្រសួងមហាផ្ទៃ ធ្វើអ៊ីចឹងដែលចរិតនយោបាយដាក់ទៅគណបក្សផ្សេង ដែលមិនមែនជាគណបក្សកាន់អំណាច ពីព្រោះវាមិនមែនជាច្បាប់ តែចែងពីបញ្ហានេះច្បាស់លាស់ បើគ្មានច្បាប់អ៊ីចឹង គេត្រូវគោរពទៅសិទ្ធិរបស់ក្រុមប្រឹក្សាហ្នឹងដែលជិតបោះឆ្នោត អ៊ីចឹងវាធម្មតាទេ គាត់មិនទៅឈរឈ្មោះប្រកួតប្រជែងឱ្យគណបក្សរបស់គាត់ណាថ្មី ឬក៏ចាស់ដដែល ធម្មតាគាត់អាហ្នឹង។ បើគាត់ចេញចូលមុនហ្នឹងមុន ៦ខែ មុនការបោះឆ្នោត បានថាគាត់មិនដើរតាមគណបក្សតាមអីអ៊ីចឹងទៅ គេអាចដកចេញពីសមាជិក ឬអាចបាត់បង់សមាជិក ទើបគេអាចនិយាយពីការដកបេក្ខភាពរបស់គាត់។ ប៉ុន្តែនៅក្នុងកំឡុងនេះ គេមិនអាចរុះរើបានទេ គេអត់អាចរុះរើអ៊ីចឹងបានទេណា៎»។
លោកបន្ថែមទៀតថា ការធ្វើដូចនេះអាចជាការរំលោភសិទ្ធិទៅលើសមាជិកភាពរបស់សមាជិកក្រុមប្រឹក្សាទាំងនោះ ហើយជាការបង្កើតបញ្ហាឱ្យកាន់តែមានច្រើន និងអាចធ្វើឱ្យមានការតវ៉ាណាមួយកើតឡើង ដោយសារតែការមិនពេញចិត្តទៅនឹងសេចក្តីសម្រេចរបស់ក្រសួងមហាផ្ទៃ កាលពីថ្ងៃទី២០ ខែមីនា នោះទៀតផង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។