ភរិយា​លោក មាជ សុវណ្ណារ៉ា ប្ដឹង​លោក ហ៊ុន ម៉ាណែត ពី​បទ​ធ្វើ​ទារុណកម្ម​ឃុំឃាំង​ខុសច្បាប់

ភរិយា​លោក មាជ សុវណ្ណារ៉ា មន្ត្រី​ជាន់ខ្ពស់​គណបក្ស​សង្គ្រោះ​ជាតិ ប្ដឹង​លោក ហ៊ុន ម៉ាណែត កូនប្រុស​លោក​នាយករដ្ឋមន្ត្រី ហ៊ុន សែន ទៅ​តុលាការ​សហព័ន្ធ​អាមេរិក នៅ​ក្រុង​ឡូស អែនជឺឡេស (Los Angeles) ពី​បទ​ធ្វើ​ទារុណកម្ម និង​អំពើ​ភេរវកម្ម។

មេធាវី​លោក មាជ សុវណ្ណារ៉ា បាន​ដាក់​បណ្ដឹង​នេះ ស្រប​ពេល​ដែល លោក ហ៊ុន ម៉ាណែត​កំពុង​មាន​វត្ត​មាននៅ​សហរដ្ឋអាមេរិក។

មេធាវី​អាមេរិកាំង​២​រូប បាន​សុខចិត្ត​ទទួល​ការពារ​ក្ដី​ឲ្យ​លោក មាជ សុវណ្ណារ៉ា គឺ​ក្រោយ​ពី​បាន​ពិនិត្យ​យ៉ាង​យកចិត្តទុកដាក់​ថា ការ​ផ្ដន្ទាទោស​ឲ្យ​ជាប់ពន្ធនាគារ ចំនួន​២០​ឆ្នាំ​នៅ​ប្រទេស​កម្ពុជា​នេះ គឺជា​រឿង​អយុត្តិធម៌។ ភរិយា​លោក មាជ សុវណ្ណារ៉ា គឺ​អ្នកស្រី មាជ ជេមី សង្ឃឹមថា ករណី​នេះ​អាច​ឈ្នះ៖ «គាត់​បាន​ជូនដំណឹង​កាលពី​ថ្ងៃ​សុក្រ​ថា គេ​បាន​ដាក់​ពាក្យ​បណ្តឹង​រួចហើយ។ មេធាវី​ទាំងពីរ​ថា បើ​មិន​ឈ្នះ គាត់​អត់​កាន់​ក្ដី​នោះ​ទេ។ ដើមដំបូង​មក លោក ម័រតុន សក្លា (Morton Sklar) ពឹង​គាត់​ច្រើនដង​ហើយ​តែ​គាត់​មិន​ព្រម ប៉ុន្តែ​ក្រោយ​គាត់​សិក្សា​ទៅ​ឃើញ​ថា គ្រួសារ​ខ្ញុំ មាជ សុវណ្ណារ៉ា មាន​ប្រពន្ធ​និង​កូន​បី​នាក់​នៅ​តូចៗ​និង​មាន​ផលវិបាក​ខ្លាំង»។

ក្នុង​ពាក្យ​បណ្តឹង​ទៅ​តុលាការ​សហព័ន្ធ​អាមេរិក មេធាវី​តំណាង​ឲ្យ​ភរិយា​លោក មាជ សុវណ្ណារ៉ា ចោទ​រដ្ឋាភិបាល​កម្ពុជា និង​លោក ហ៊ុន ម៉ាណែត ​មេបញ្ជាការ​រង​នៃ​កងទ័ព​ជើងគោក ជា​អ្នកទទួលខុសត្រូវ ពី​បទ​ធ្វើ​ទារុណកម្ម តាមរយៈ​ការ​ឃុំ​ឃាំង​ខ្លួន​ស្រេច​តែ​អំពើ​ចិត្ត ក្រៅច្បាប់ ឃុំខ្លួន​រយៈពេល​យូរ និង​អំពើ​ភេរវកម្ម​អន្តរជាតិ។ ក្នុង​បណ្ដឹង​នោះ ក៏​បាន​ទាមទារ​ការ​ខូចខាត ដែល​បង្ក​ឲ្យ​ប៉ះពាល់​ដោយ​ចេតនា​លើ​ផ្លូវ​ចិត្ត ការ​វាយ​ដំ ការ​ចាប់​ដាក់​ពន្ធនាគា​រ និង​បាត់បង់​សិទ្ធិ​រស់នៅ​ជួបជុំ​ក្រុម​គ្រួសារ។

លោក មាជ សុវណ្ណារ៉ា គឺជា​មន្ត្រី​ម្នាក់​ក្នុងចំណោម ១១​នាក់​របស់​គណបក្ស​សង្គ្រោះ​ជាតិ ដែល​តុលាការ​បាន​ផ្ដន្ទាទោស​ឲ្យ​ជាប់ពន្ធនាគារ​២០​ឆ្នាំ កាលពី​ឆ្នាំ ២០១៥ ក្រោម​បទ​ចោទ​ដឹកនាំ​កុបកម្ម​នាំ​ឲ្យ​មាន​អំពើ​ហិង្សា នៅ​ស្ពាន​នាគ​ក្បែរ​ទីលាន​ប្រជាធិបតេយ្យ កាលពី​ខែ​កក្កដា ឆ្នាំ​២០១៤។ កាលពី​ថ្ងៃ​ទី ១១ មេសា លោក​មេធាវី ជូង ជូងី ដែល​ការពារ​ក្ដី​ឲ្យ​លោក មាជ សុវណ្ណារ៉ា បាន​ប្ដឹង​សារទុក្ខ​ទៅ​តុលាការ​កំពូល ប្រឆាំង​សាលក្រម​នៃ​តុលាការ​ក្រុងភ្នំពេញ ដែល​មិន​អនុញ្ញាត​ឲ្យ លោក​បាន​ចេញទៅ​ក្រៅ​ប្រទេស ដើម្បី​ព្យាបាល​ជំងឺ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖

ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។