អ្នករាយការណ៍ពិសេសអង្គការសហប្រជាជាតិ ទទួលបន្ទុកសិទ្ធិមនុស្សប្រចាំកម្ពុជា លោក សុរិយា ស៊ូប៊ែឌី (Surya Subedi) បានលើកឡើងនៅក្នុងជំនួបរវាងលោក និងមេដឹកនាំគណបក្សសង្គ្រោះជាតិ លោក សម រង្ស៊ី និងលោក កឹម សុខា ថា វាជាការល្អណាស់ដែលគណបក្សជាប់ឆ្នោតទាំងពីរបានបញ្ចប់វិបត្តិនយោបាយកាលពីខែកក្កដា ឆ្នាំ២០១៤នោះ។
លោកបញ្ជាក់ថា មេដឹកនាំគណបក្សសង្គ្រោះជាតិបានប្រាប់គាត់ថា គណបក្សទាំងពីរកំពុងធ្វើកំណែទម្រង់ដើម្បីពង្រឹងស្តង់ដារប្រជាធិបតេយ្យ ឲ្យមានការគោរពច្បាប់ ឬនីតិរដ្ឋ និងមានការគោរពសិទ្ធិមនុស្សយ៉ាងពិតប្រាកដនៅកម្ពុជា ដែលបញ្ហាទាំងនេះលោកធ្លាប់បានលើកឡើងនៅក្នុងរបាយការណ៍របស់លោកនៅពេលកន្លងមក។
ការថ្លែងរបស់លោក សុរិយា ស៊ូប៊ែឌី នេះ នៅបន្ទាប់ពីលោកបានជួបមេដឹកនាំគណបក្សសង្គ្រោះជាតិ គឺលោក សម រង្ស៊ី និងលោក កឹម សុខា នៅវិមានរដ្ឋសភា នៅព្រឹកថ្ងៃទី២០ មករា។
អ្នករាយការណ៍ពិសេសអង្គការសហប្រជាជាតិ ទទួលបន្ទុកសិទ្ធិមនុស្សប្រចាំកម្ពុជា លោក សុរិយា ស៊ូប៊ែឌី ជំរុញឲ្យគណបក្សពីរគោរពកិច្ចព្រមព្រៀងបញ្ចប់ភាពជាប់គាំងនយោបាយកាលពីថ្ងៃទី២២ កក្កដា នោះ ដើម្បីអភិវឌ្ឍន៍ប្រទេសជាតិ លទ្ធិប្រជាធិបតេយ្យ និងការគោរពសិទ្ធិមនុស្ស។
លោក សុរិយា ស៊ូប៊ែឌី មានប្រសាសន៍ថា បន្ទាប់ពីជួបជាមួយថ្នាក់ដឹកនាំគណបក្សសង្គ្រោះជាតិ លោកមានភាពរីករាយជាខ្លាំងចំពោះដំណើរការបន្តនៃវប្បធម៌សន្ទនាគ្នារវាងគណបក្សសង្គ្រោះជាតិ និងគណបក្សប្រជាជនកម្ពុជា ដែលជំរុញស្ថានការណ៍អភិវឌ្ឍប្រទេសជាតិមានការរីកចម្រើនទៅមុខ ឬកម្ពុជា ស្ថិតនៅលើផ្លូវឈានទៅរកលទ្ធិប្រជាធិបតេយ្យ។ លោកបញ្ជាក់ថា កិច្ចព្រមព្រៀងទាំងឡាយលើការកែប្រែរដ្ឋធម្មនុញ្ញ ឬវិសោធនកម្មបទបញ្ជាផ្ទៃក្នុងរបស់សភា ដូចជាការបង្កើតឲ្យមានមេដឹកនាំភាគតិចនៅក្នុងសភា និងការអនុវត្តកំណែទម្រង់ គណៈកម្មាធិការជាតិរៀបចំការបោះឆ្នោត និងច្បាប់បោះឆ្នោត ។ល។ ៖ «ខ្ញុំសង្ឃឹមថា គ្មាននរណាម្នាក់នឹងដើរលើផ្លូវខុសទៀតឡើយនៅលើការអនុវត្តដំណើរការកំណែទម្រង់នានា ដែលត្រូវសម្រេចឲ្យបាននៅចុងខែកុម្ភៈ ឆ្នាំ២០១៥ នេះ»។
ការថ្លែងដូច្នេះរបស់ លោក សុរិយា ស៊ូប៊ែឌី នេះ នៅបន្ទាប់ពីលោកនាយករដ្ឋមន្ត្រី ហ៊ុន សែន ប្រកាសកាលពីថ្ងៃទី១៩ មករា បានផ្តាំផ្ញើទៅប្រធានគណបក្សសង្គ្រោះជាតិ លោក សម រង្ស៊ី ថា វប្បធម៌សន្ទនាដែលបានព្រមព្រៀងគ្នារវាងថ្នាក់ដឹកនាំគណបក្សទាំងពីរកាលពីថ្ងៃទី២២ កក្កដា ឆ្នាំ២០១៤ នោះ មិនមានប្រសិទ្ធភាពទេ។ លោក ហ៊ុន សែន ក៏ប្រកាសពីតំណាងរាស្ត្រគណបក្សសង្គ្រោះជាតិ ចំនួន ៧រួប កំពុងជាប់បណ្ដឹងអាជ្ញានៅតុលាការដែរ។ លោកបញ្ជាក់ថា កិច្ចព្រមព្រៀងកាលពីថ្ងៃទី២២ កក្កដា នោះ មិនបាននិយាយបញ្ចប់ពីបណ្ដឹងនេះដែរ។
នៅក្រោយកិច្ចជំនួបរវាងលោក សុរិយា ស៊ូប៊ែឌី ជាមួយលោក សម រង្ស៊ី និងលោក កឹម សុខា នេះ។ មេដឹកនាំគណបក្សទាំងពីរបានជួបប្រធានរដ្ឋសភា លោក ហេង សំរិន ភ្លាមៗដែរ។
នៅក្រោយពេលជំនួបបញ្ចប់រវាងលោក សម រង្ស៊ី លោក កឹម សុខា និងលោក ហេង សំរិន នោះ លោក សម រង្ស៊ី មិនបានធ្វើអត្ថាធិប្បាយអ្វីច្រើនឆ្លើយនឹងសំណួរអ្នកសារព័ត៌មានឡើយ។ លោក សម រង្ស៊ី គ្រាន់តែបញ្ជាក់ថា គណបក្សសង្គ្រោះជាតិ នៅតែគោរពស្មារតីកិច្ចព្រមព្រៀងស្មារតីដែលមានចែងក្នុងច្បាប់ និងបទបញ្ជាផ្ទៃក្នុងរបស់សភា៖ «យើងបានពិភាក្សាជាមួយ លោក ហេង សំរិន ធ្វើយ៉ាងណាឲ្យស្ថាប័នសភាធ្វើការជាមួយគ្នា ប្ដូរគំនិតគ្នា និងរួមគ្នាធ្វើការនៅក្នុងសភា»។
ចំណែកឯលោក ហេង សំរិន វិញ ក៏មិនបានឆ្លើយតបសំណួរអ្វីច្រើនដល់អ្នកសារព័ត៌មានដែរ។ លោកបញ្ជាក់យ៉ាងខ្លីថា ជំនួបរវាងលោក និងប្រធាន អនុប្រធានបក្សសង្គ្រោះជាតិ លោក សម រង្ស៊ី និងលោក កឹម សុខា នោះ គឺនិយាយពីស្ថានជំងឺរបស់លោក ប៉ែន សុវណ្ណ។ ចំពោះអភ័យឯកសិទ្ធិតំណាងរាស្ត្រគណបក្សសង្គ្រោះជាតិ ៧រួប ដែលលោក ហ៊ុន សែន បានលើកឡើងកំពុងជាប់បណ្ដឹងនៅតុលាការនោះវិញ លោក ហេង សំរិន អះអាងថា ជាសិទ្ធិរបស់តុលាការ៖ «ការដកអភ័យឯកសិទ្ធិ ឬយ៉ាងណា ជាដំណើរការរបស់តុលាការ»។
អ្នកឃ្លាំមើលផ្នែកអភិវឌ្ឍន៍សង្គម លោកបណ្ឌិត កែម ឡី មានប្រសាសន៍ថា ដើមចមដែលធ្វើឲ្យមេដឹកនាំគណបក្សជាប់ឆ្នោតទាំងពីរបានវាយប្រហារឆ្លងឆ្លើយគ្នាខ្លាំងៗ ចុងក្រោយនេះ ដោយសារតែបក្សទាំងពីរមិនគោរពកិច្ចព្រមព្រៀងដោយវប្បធម៌សន្ទនាជាធំនោះ៖ «ដោយសារមេដឹកនាំគណបក្សទាំងពីរមិនបានជជែកគ្នាអំពីបញ្ហា ហើយពួកគេភាគច្រើនជជែកគ្នាទៅលើព័ត៌មានចចាមអារ៉ាមដែលមិនពិត ដូច្នេះមិនអាចត្រូវគ្នាទេ»។
លោក សុរិយា ស៊ូប៊ែឌី បញ្ជាក់ថា លោកមើលឃើញថា គណបក្សទាំងពីរកំពុងតែវិវឌ្ឍទៅល្អ ដោយយកវប្បធម៌សន្ទនាក្នុងការដោះស្រាយបញ្ហា ដើម្បីរួមគ្នាអភិវឌ្ឍន៍សេដ្ឋកិច្ច ពង្រឹងលទ្ធិប្រជាធិបតេយ្យដែលធ្វើឲ្យប្រជាពលរដ្ឋចំណេញទាំងអស់គ្នា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។