ព្រះអង្គម្ចាស់ ស៊ីសុវត្ថិ ធម្មិកោ បញ្ជាក់នៅថ្ងៃទី២៦ ឧសភា ថា ព្រះអង្គនឹងផ្ញើចុតហ្មាយមួយទៅព្រះមហាក្សត្រីជាផ្លូវការ នៅថ្ងៃទី២៩ ខែឧសភា ដើម្បីលាឈប់ពីតួនាទីជាព្រះរាជលេខាផ្ទាល់របស់សម្ដេចម៉ែ និងផ្តាច់ខ្លួនចេញទាំងស្រុងពីព្រះរាជខុទ្ទកាល័យព្រះមហាក្សត្រ។
ព្រះអង្គពន្យល់ពីមូលហេតុដែលលាឈប់ថា ដោយសារតែព្រះអង្គចង់ឲ្យស្ថាប័នព្រះមហាក្សត្រជាស្ថាប័នឯករាជ្យ មិនជាប់ពាក់ព័ន្ធនឹងបញ្ហានយោបាយ និងមិនចង់ឲ្យអ្នកនយោបាយអូសទាញស្ថាប័នព្រះមហាក្សត្រ ឬបញ្ចេញព្រះនាមព្រះមហាក្សត្រ ឬព្រះនាមរបស់ព្រះមហាក្សត្រី មកក្នុងឆាកនយោបាយទេ។ មួយវិញទៀត ការផ្តាច់ខ្លួនចេញពីស្ថាប័នព្រះមហាក្សត្រ ក៏ដើម្បីឲ្យព្រះអង្គអាចចូលរួមប្រឡូកក្នុងគណបក្សសង្គ្រោះជាតិ បាន ១០០%៖ «ខ្ញុំការពារព្រះកិត្តិនាមព្រះកិត្តិយសរបស់លោក ហេតុហ្នឹងហើយ បានខ្ញុំសម្រេចចិត្តផ្តាច់ខ្លួនចេញពីព្រះរាជខុទ្ទកាល័យ ហើយនិងពីព្រះរាជលេខាផ្ទាល់របស់សម្ដេចម៉ែ ដើម្បីចូលមកបម្រើគណបក្សសង្គ្រោះជាតិ»។
ព្រះអង្គម្ចាស់ ស៊ីសុវត្ថិ ធម្មិកោ បានឈរឈ្មោះជាបេក្ខជនតំណាងរាស្ត្រគណបក្សសង្គ្រោះជាតិ មណ្ឌលព្រះសីហនុ សម្រាប់ការបោះឆ្នោតជាតិនាខែកក្កដា ខាងមុខ។
លោក ហង្ស ពុទ្ធា នាយកគណៈកម្មាធិការអព្យាក្រឹត្យ និងយុត្តិធម៌ ដើម្បីការបោះឆ្នោតដោយសេរី និងត្រឹមត្រូវនៅកម្ពុជា និចហ្វិក (NICFEC) យល់ថា ការលាឈប់របស់ព្រះអង្គម្ចាស់ ស៊ីសុវត្ថិ ធម្មិកោ ជាសញ្ញាមួយវិជ្ជមាន ហើយបង្ហាញពីការទទួលខុសត្រូវខ្ពស់របស់ព្រះអង្គ ដែលហ៊ានចូលប្រឡូកក្នុងនយោបាយ ហើយហ៊ានលះបង់តួនាទី ឬឋានន្តរសក្តិឯទៀត ដែលសព្វថ្ងៃកម្រឃើញឥស្សរជន ឬអ្នកនយោបាយខ្លះលាលែងដូចព្រះអង្គ៖ «ការសម្រេចចិត្តលាលែងការងារដែលពាក់ព័ន្ធនឹងស្ថាប័នព្រះមហាក្សត្រនេះ ខ្ញុំគិតថាជាជម្រើសរបស់ព្រះអង្គផ្ទាល់។ ប៉ុន្តែ ក៏បានបង្ហាញឲ្យឃើញនូវភាពច្បាស់លាស់របស់ព្រះអង្គ ត្រង់ថាហ៊ានធ្វើហ៊ានទទួលខុសត្រូវ ដែលសព្វថ្ងៃយើងកម្រនឹងឃើញឥស្សរជន ឬអ្នកនយោបាយខ្លះគាត់លាលែងណាស់»។
ទន្ទឹមនឹងការផ្តាច់ខ្លួនចេញពីស្ថាប័នព្រះមហាក្សត្រ ព្រះអង្គម្ចាស់ ស៊ីសុវត្ថិ ធម្មិកោ ក៏បានដាក់លិខិតប្រកាសទ្រព្យសម្បត្តិ និងបំណុលដាក់ទៅអង្គភាពប្រឆាំងអំពើពុករលួយរួចហើយ កាលពីថ្ងៃទី២៥ ខែឧសភា កន្លងទៅ។ ការដាក់លិខិតប្រកាសនេះ ធ្វើឡើងតែប៉ុន្មានថ្ងៃប៉ុណ្ណោះ បន្ទាប់ពីព្រះអង្គបដិសេធដាច់អហង្ការមិនចុះញ៉ម ឬមិនព្រមប្រកាសទ្រព្យសម្បត្តិឡើយ ដោយសម្អាងហេតុផលថា ព្រះរាជវាំងជាទីដែលព្រះអង្គគង់បំពេញការងារ មិនមែនជាកន្លែងដែលមានឱកាសប្រព្រឹត្តអំពើពុករលួយ ដូចស្ថាប័នរដ្ឋាភិបាល ឬស្ថាប័នតុលាការទេ។ បើទោះជាមានការព្រមានពីអង្គភាពប្រឆាំងអំពើពុករលួយ ចាប់ព្រះអង្គដាក់ពន្ធនាគារ។
ព្រះអង្គម្ចាស់ ស៊ីសុវត្ថិ ធម្មិកោ ពន្យល់ថា ការប្រកាសទ្រព្យសម្បត្តិ និងបំណុលទៅអង្គភាពប្រឆាំងអំពើពុករលួយពេលនេះ មិនមែនព្រះអង្គខ្លាចការចាប់ដាក់ច្រវាក់នោះទេ តែជាសារមួយដែលបង្ហាញថា អង្គភាពប្រឆាំងអំពើពុករលួយ ជាឧបករណ៍របស់គណបក្សប្រជាជនកម្ពុជា ដោយសារតែអង្គភាពនេះរករឿងព្រះអង្គមិនប្រកាសទ្រព្យសម្បត្តិ នាគ្រាដែលព្រះអង្គចូលរួមជាមួយគណបក្សសង្គ្រោះជាតិ៖ «ហេតុអីអង្គភាពប្រឆាំងអំពើពុករលួយមិនលើកករណីរបស់ខ្ញុំពីឆ្នាំ២០១១ ហេតុអីបានលើកឆ្នាំ២០១៣ ពេលដែលខ្ញុំចូលគណបក្សសង្គ្រោះជាតិ។ អាហ្នឹងហើយដែលខ្ញុំចង់ឆ្លុះបញ្ចាំងឲ្យឃើញ។ ឥឡូវមតិជាតិ អន្តរជាតិ ដឹងហើយថាអង្គភាពប្រឆាំងអំពើពុករលួយ គឺជាអង្គភាពមួយជាឧបករណ៍មួយរបស់គណបក្សប្រជាជន។ ខ្ញុំបានជោគជ័យហើយ ដូច្នេះខ្ញុំបំពេញទៅឲ្យគេទៅ ដើម្បីឲ្យឯកឧត្តម ឱម យ៉ិនទៀង គាត់សម្រាន្តឲ្យស្រួល»។
យ៉ាងណា ការលើកឡើងរបស់ប្រធានអង្គភាពប្រឆាំងអំពើពុករលួយ លោក ឱម យ៉ិនទៀង ចាត់ទុកបន្ទូលព្រះអង្គម្ចាស់ ស៊ីសុវត្ថិ ធម្មិកោ ជាបន្ទូលបង្កាច់បង្ខូច និងលាបពណ៌អង្គភាពប្រឆាំងអំពើពុករលួយ ភ្ជាប់ទៅជារឿងនយោបាយ។
អង្គភាពប្រឆាំងអំពើពុករលួយ បានជូនដំណឹងទៅគ្រប់ស្ថាប័នពាក់ព័ន្ធ ឲ្យប្រកាសទ្រព្យសម្បត្តិ និងបំណុលចាប់ពីថ្ងៃទី១ ដល់ថ្ងៃទី៣១ ខែមករា ឆ្នាំ២០១៣ ហើយមានមន្ត្រីជាប់កាតព្វកិច្ចជិត ៣ម៉ឺននាក់ បានប្រកាសទ្រព្យសម្បត្តិ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។