សហជីព​អំពាវនាវ​កម្មករ​ចូល​រួម​ទាមទារ​ឲ្យ​គ.ជ.ប​ផ្ដល់​យុត្តិធម៌​ដល់​ម្ចាស់​ឆ្នោត

សហជីព​សេរី​កម្មករ​នៃ​ព្រះរាជាណាចក្រ​កម្ពុជា អំពាវនាវ​ដល់​កម្មករ​កម្មការិនី​ជា​សមាជិក​ប្រមាណ ១០​ម៉ឺន​នាក់ និង​កម្មករ​គាំទ្រ​ដទៃ​ទៀត ឲ្យ​ចូល​រួម​ធ្វើ​ពហិការ ឬ​ផ្អាក​ធ្វើ​ការ​ថែម​ម៉ោង ចាប់​ពី​ថ្ងៃ​ព្រហស្បតិ៍ ទី៥ កញ្ញា រហូត​ដល់​ថ្ងៃ​កំណត់​ធ្វើ​បាតុកម្ម​អហិង្សា​របស់​គណបក្ស​សង្គ្រោះ​ជាតិ នៅ​ថ្ងៃ​ទី៧ កញ្ញា ខាង​មុខ​នេះ។ មន្ត្រី​តំណាង​ខាង​រោងចក្រ​កាត់​ដេរ បាន​បង្ហាញ​ថា បញ្ហា​នេះ​នឹង​មាន​ផល​ប៉ះពាល់​ខ្លះៗ​លើ​វិស័យ​វាយនភ័ណ្ឌ។

0:00 / 0:00

0:00 / 0:00

សេចក្តី​អំពាវនាវ​របស់​សហជីព​សេរី​កម្មករ មាន​គោលដៅ​ស្រប​គ្នា​ជាមួយ​បក្ស​ប្រឆាំង ដែល​ទាមទារ​ឲ្យ​គណៈកម្មាធិការ​ជាតិ​រៀប​ចំ​ការ​បោះ​ឆ្នោត (គ.ជ.ប) និង​ក្រុម​ប្រឹក្សា​ធម្មនុញ្ញ ផ្តល់​យុត្តិធម៌​ដល់​ម្ចាស់​ឆ្នោត និង​ទាមទារ​ឲ្យ​ដោះ​លែង​បុគ្គលិក​សហជីព​សេរី​កម្មករ រួម​ទាំង​កម្មករ​សរុប ៨​នាក់ ដែល​កំពុង​ជាប់​ឃុំ​ខ្លួន។

ប្រធាន​សហជីព​សេរី​កម្មករ លោក ជា មុនី មាន​ប្រសាសន៍​នៅ​ថ្ងៃ​ព្រហស្បតិ៍ ទី៥ កញ្ញា ថា នេះ​ជា​សារ​មួយ​ដែល​បង្ហាញ​ថា ម្ចាស់​ឆ្នោត​ចង់​បាន​យុត្តិធម៌ ជា​ពិសេស​កម្មករ​ចង់​បាន​ភាព​ប្រសើរ​ឡើង​ក្នុង​ជីវភាព​រស់នៅ និង​សិទ្ធិ​ការងារ ការ​គោរព និង​ផ្តល់​នូវ​សេចក្តី​ថ្លៃថ្នូរ ហើយ​ទាំងអស់​នេះ ភាគ​ច្រើន​នៃ​កម្មករ​បាន​រំពឹង​ទៅ​លើ​បក្ស​សង្គ្រោះ​ជាតិ។

ក្រុម​កម្មករ​ភាគ​ច្រើន​បាន​គាំទ្រ​សេចក្តី​អំពាវនាវ​នេះ បើ​ទោះ​បី​ពួក​គេ​ដឹង​ថា ការ​ផ្អាក​មិន​ធ្វើ​ការ​បន្ថែម​ម៉ោង នឹង​បាត់​បង់​ប្រាក់​ចំណូល​មួយ​ផ្នែក នៅ​ពេល​ដែល​ជីវភាព​របស់​ពួក​គេ​កំពុង​ស្ថិត​ក្នុង​ភាព​យ៉ាប់យ៉ឺន​យ៉ាង​ណា​ក្តី។

កម្មការិនី​នៅ​រោងចក្រ អេ.អែស.ឌី (ASD) ស្ថិត​នៅ​ខណ្ឌ​ពោធិ៍សែនជ័យ ជាយ​រាជធានី​ភ្នំពេញ លោកស្រី គឹម សាន បាន​ឲ្យ​ដឹង​ថា ទោះ​បី​មាន​ការ​ខាត​បង់​ប្រយោជន៍​ផ្ទាល់​ខ្លួន​ខ្លះ តែ​សង្ឃឹម​ថា​អ្វីៗ​ទៅ​ថ្ងៃ​មុខ នឹង​មាន​ភាព​ប្រសើរ​ជាង​ពេល​នេះ។

ទាក់ទង​ទៅ​នឹង​ដំណើរ​ការ​នៃ​ផលិតកម្ម​ក្នុង​វិស័យ​កាត់​ដេរ​នេះ​វិញ លោក ជាតិ ខេមរា មន្ត្រី​ជាន់​ខ្ពស់​នៃ​សមាគម​រោងចក្រ​កាត់​ដេរ​កម្ពុជា មាន​ប្រសាសន៍​ថា បើ​សិន​កម្មករ​ធ្វើ​ពលិការ​មិន​ធ្វើ​ការ​បន្ថែម​ម៉ោង​មែន​នោះ អ្នក​ខាត​បង់​ដំបូង​គេ គឺ​កម្មករ​ខ្លួន​ឯង បន្ទាប់​មក​ប៉ះពាល់​ទៅ​ដល់​រោងចក្រ​ណា​ដែល​ត្រូវ​ចេញ​ផលិតផល​ប្រញាប់​ប្រមាណ ២០% ក្នុង​ចំណោម​ជាង ៧០០​រោងចក្រ។

តែ​ទោះ​យ៉ាង​ណា លោក​ថា ការ​ធ្វើ​ពហិការ​របស់​កម្មករ​នេះ មិន​អាច​យូរ​អង្វែង​បាន​ទេ ព្រោះ​ពាក់ព័ន្ធ​នឹង​បញ្ហា​ជីវភាព។

លោក ជា មុនី ពន្យល់​ថា ក្រុម​កម្មករ​ស្ម័គ្រ​ចិត្ត​លំបាក​ពេល​នេះ ដើម្បី​ប្រយោជន៍​ជាតិ និង​ខ្លួន​ឯង​ផ្ទាល់​ទៅ​ថ្ងៃ​មុខ។

ក្រសួង​ការងារ និង​បណ្ដុះ​បណ្ដាល​វិជ្ជាជីវៈ កាល​ពី​ពេល​ថ្មីៗ​នេះ បាន​អំពាវនាវ​ដល់​អង្គការ សហជីព​កម្មករ​និយោជិក និង​និយោជក​ទាំងអស់ ត្រូវ​រក្សា​ភាព​នឹងនរ ស្ងៀមស្ងាត់ កុំ​ចូល​រួម​បាតុកម្ម​តាម​ការ​ញុះញង់ និង​អូស​ទាញ​របស់​អ្នក​នយោបាយ។

ប៉ុន្តែ មេ​ដឹក​នាំ​កម្មករ​ជឿ​ថា ការ​អំពាវនាវ​របស់​ក្រសួង​ការងារ នោះ នឹង​ពុំ​មាន​ប្រសិទ្ធភាព​ទប់ស្កាត់​ចរន្ត​កម្មករ​កម្មការិនី មិន​ឲ្យ​ចូល​រួម​បាតុកម្ម​អហិង្សា​នោះ​ឡើយ។

ក្រៅ​ពី​សហជីព​សេរី​កម្មករ សហជីព​ផ្សេង​ទៀត​ក៏​មាន​គម្រោង​ចង់​ចូល​រួម​ធ្វើ​បាតុកម្ម​អហិង្សា​គាំទ្រ​គណបក្ស​សង្គ្រោះ​ជាតិ ដែរ បើ​សិន​ជា​គណបក្ស​នេះ​ធ្វើ​មហា​បាតុកម្ម​អហិង្សា​នៅ​ថ្ងៃ​ទី៧ កញ្ញា ទៅ​តាម​ការ​គ្រោង​ទុក​មែន​នោះ។

ពលរដ្ឋ​នៅ​ពោធិ៍សាត់​បារម្ភ​ចំពោះ​ការ​ធ្វើ​មហា​បាតុកម្ម​អហិង្សា​របស់​បក្ស​សង្គ្រោះ​ជាតិ

ដោយ ជិន ជេដ្ឋា

ប្រជាពលរដ្ឋ និង​អាជីវករ​ជាច្រើន​នៅ​ផ្សារ​ពោធិ៍សាត់ បាន​សម្ដែង​ក្ដី​បារម្ភ​ចំពោះ​ការ​ធ្វើ​មហា​បាតុកម្ម​អហិង្សា​របស់​គណបក្ស​សង្គ្រោះ​ជាតិ នៅ​ព្រឹក​ថ្ងៃ​ទី​៧ ខែ​កញ្ញា ឆ្នាំ​២០១៣ ខាង​មុខ ថា​អាច​នឹង​ឈាន​ដល់​ការ​ប្រើ​អំពើ​ហិង្សា ប្រសិន​បើ​កម្ដៅ​នយោបាយ​ឡើង​ខ្លាំង​នៅ​ពេល​នោះ។

ពួក​គាត់​បញ្ជាក់​ថា ប្រសិន​បើ​ការ​ធ្វើ​មហា​បាតុកម្ម​នោះ​ឈាន​ដល់​ការ​ផ្ទុះ​អាវុធ ឬ​ប្រើ​អំពើ​ហិង្សា មិន​ថា​តែ​ប្រជាពលរដ្ឋ​នៅ​ភ្នំពេញ នោះ​ទេ សូម្បី​តែ​នៅ​តាម​បណ្ដា​ខេត្ត​ក៏​មាន​ផល​ប៉ះពាល់​ខ្លាំង​ដែរ។ ក៏ប៉ុន្ដែ មន្ត្រី​គណបក្ស​សង្គ្រោះ​ជាតិ អះអាង​ថា អំពើ​ហិង្សា​នឹង​មិន​អាច​កើត​មាន​នោះ​ទេ ព្រោះ​គណបក្ស​សង្គ្រោះ​ជាតិ មាន​ក្រម​សីលធម៌ និង​មាន​បញ្ជា​ផ្ទៃ​ក្នុង​ត្រឹមត្រូវ ដើម្បី​រៀប​ចំ​មហា​បាតុកម្ម​អហិង្សា។

ក្រុម​ប្រជាពលរដ្ឋ អាជីវករ និង​អ្នក​រត់​ម៉ូតូ​ឌុប​នៅ​ខេត្ត​ពោធិ៍សាត់ ជា​ច្រើន បាន​ឲ្យ​ដឹង​នៅ​ថ្ងៃ​ទី​៥ កញ្ញា ថា ពួក​គាត់​ទន្ទឹង​រង់ចាំ​មើល​លទ្ធផល​នៃ​ការ​ធ្វើ​មហា​បាតុកម្ម​អហិង្សា​របស់​គណបក្ស​សង្គ្រោះ​ជាតិ ទាំង​ទឹក​ចិត្ត​ភ័យ​ខ្លាច ថា​អាច​នឹង​កើត​មាន​អំពើ​ហិង្សា ព្រម​ទាំង​បាន​ស្នើ​ដល់​អ្នក​នយោបាយ​ខ្មែរ​ទាំងអស់ ឲ្យ​ចេះ​រួប​រួម​គ្នា និង​ធ្វើ​អ្វី​ត្រូវ​មាន​ស្មារតី​ទទួល​ខុស​ត្រូវ​ខ្ពស់។

អាជីវករ​លក់​មាស និង​ប្ដូរ​ប្រាក់ អ្នកស្រី ហួត គឹមលាង មាន​ប្រសាសន៍​ថា អ្នកស្រី​មិន​សូវ​បាន​តាម​ដាន​ស្ដាប់​ព័ត៌មាន​អំពី​រឿង​នយោបាយ​ច្រើន​នោះ​ទេ ដោយសារ​តែ​រវល់​រឿង​ធ្វើ​អាជីវកម្ម​ពេក ក៏ប៉ុន្តែ អ្នកស្រី​បាន​ឮ​គេ​និយាយ​តៗ​គ្នា​ថា គេ​នឹង​ធ្វើ​មហា​បាតុកម្ម​នៅ​ភ្នំពេញ។ អ្នកស្រី​ខ្លាច​កើត​មាន​អំពើ​ហិង្សា ឬ​ការ​បង្ក្រាប​ណា​មួយ​កើត​ឡើង ដែល​នាំ​ឲ្យ​មាន​អស្ថិរភាព​សង្គម ហើយ​អាជីវកម្ម​របស់​អ្នកស្រី​ក៏​ត្រូវ​ប៉ះពាល់​ខ្លាំង​ដែរ៖ «អត់​ចង់​ឲ្យ​មាន​ការ​បាតុកម្ម អត់​ចង់​ឲ្យ​មាន​អីចឹង​ទេ ចង់​ឲ្យ​ធម្មតា យើង​អាច​រក​ស៊ី​ដូច​ពី​មុន»

៥-កញ្ញា-២០១៣៖ អាជីវករ​លក់​ក្រូច​នៅ​ផ្សារ​ពោធិ៍សាត់ អ្នកស្រី ឈុន សុខឃឿន។
៥-កញ្ញា-២០១៣៖ អាជីវករ​លក់​ក្រូច​នៅ​ផ្សារ​ពោធិ៍សាត់ អ្នកស្រី ឈុន សុខឃឿន។

អាជីវក​រលក់​ក្រូច​ពោធិ៍សាត់ អ្នកស្រី ឈុន សុខឃឿន មាន​ប្រសាសន៍​ថា នៅ​មុន​ថ្ងៃ​បោះ​ឆ្នោត​ជាតិ​អាណត្តិ​ទី​៥ អ្នកស្រី​អាច​រក​ប្រាក់​ចំណូល​បាន​ពី ១​លាន ទៅ ២​លាន​រៀល​ក្នុង​រយៈពេល ២​ថ្ងៃ ដែល​អ្នកស្រី​បាន​ដឹក​ក្រូច​ពី​ចម្ការ​មក​លក់​នៅ​ផ្សារ​ពោធិ៍សាត់ ក៏ប៉ុន្តែ នៅ​ក្រោយ​ថ្ងៃ​បោះ​ឆ្នោត អ្នកស្រី​មិន​សូវ​ឃើញ​មាន​មនុស្ស​មក​ផ្សារ​ទេ ហើយ​ការ​លក់​ដូរ​ក៏​មិន​សូវ​ដាច់​ដូច​មុន​ដែរ៖ «ឮ​តែ​គេ​ថា​មាន​ធ្វើ​បាតុកម្ម​ដែរ តែ​ធ្វើ​នៅ​ក្នុង​វត្ត​ពាសញែក វា​អត់​ប៉ះពាល់​អី​ទេ គ្រាន់​តែ​ថា​លក់​អត់​សូវ​ដាច់ អត់​សូវ​មាន​ប្រជាជន​ដើរ​ប៉ុណ្ណឹង»

ចំណែក​អ្នក​រត់​ម៉ូតូ​ឌុប​ម្នាក់​ដែល​កំពុង​អង្គុយ​លើ​ម៉ូតូ​ចាំ​ម៉ូយ​ជិះ នៅ​ច្រក​ចេញ​ផ្សារ​ពោធិ៍សាត់ លោក ឡេង ហឿន មាន​ប្រសាសន៍​ថា លោក​ទន្ទឹង​រង់ចាំ​មើល​លទ្ធផល​នៃ​ការ​ធ្វើ​មហា​បាតុកម្ម​នេះ​ដែរ ប៉ុន្តែ​លោក​មិន​ចង់​ឲ្យ​អ្នក​នយោបាយ និង​អ្នក​ចូល​រួម​ធ្វើ​បាតុកម្ម ប្រើ​អំពើ​ហិង្សា​នោះ​ទេ៖ «ដូច​ថា​កុំ​ឲ្យ​មាន​សង្គ្រាម កុំ​ឲ្យ​មាន​ជ្រួល​ច្របល់​អីចឹង។ យើង​ធ្វើ​ម៉េច​ឲ្យ​ប្រជាជន​បាន​សុខ​សាន្ត រក​ស៊ី​តាម​របៀប​របប​យើង​ធម្មតា​ទៅ បាន​ប៉ុណ្ណា​ហូប​ប៉ុណ្ណឹង​ទៅ»

ឆ្លើយ​តប​នឹង​ក្ដី​បារម្ភ​នេះ ប្រធាន​ក្រុម​ការងារ​គណបក្ស​សង្គ្រោះ​ជាតិ ប្រចាំ​ខេត្ត​ពោធិ៍សាត់ លោក ងឹម ញ៉េង បញ្ជាក់​ថា ការ​ធ្វើ​មហា​បាតុកម្ម​អហិង្សា​នៅ​ព្រឹក​ថ្ងៃ​ទី​៧ កញ្ញា ខាង​មុខ​នឹង​មិន​អាច​កើត​មាន​អំពើ​ហិង្សា​នោះ​ទេ ព្រោះ​គណបក្ស​សង្គ្រោះ​ជាតិ មាន​ក្រម​សីលធម៌ និង​វិន័យ​ផ្ទៃ​ក្នុង​សម្រាប់​បាតុករ៖ «វា​មិន​មែន​គ្រាន់​តែ​ជា​ការ​បញ្ចេញ​មតិ​ទាមទារ​តវ៉ា​ដើម្បី​រក​យុត្តិធម៌​ជូន​ម្ចាស់​ឆ្នោត​តែ​មួយ​មុខ​ប៉ុណ្ណឹង​ទេ ក៏ប៉ុន្តែ វា​បង្ហាញ​អំពី​វប្បធម៌​អហិង្សា​សម្រាប់​ជាតិ​ខ្មែរ​ទាំង​មូល ហើយ​ខ្ញុំ​សង្ឃឹម​ថា វប្បធម៌​អហិង្សា​ហ្នឹង​នឹង​កើត​ឡើង​នៅ​ថ្ងៃ​ទី​៧ ខែ​កញ្ញា ហ្នឹង​ទៅ»

អ្នក​វិភាគ​នយោបាយ​ឯករាជ្យ លោក​បណ្ឌិត សុខ ទូច មាន​ប្រសាសន៍​ថា ក្ដី​បារម្ភ​របស់​ប្រជាពលរដ្ឋ និង​អាជីវករ​នៅ​តាម​បណ្ដា​ខេត្ត គឺជា​ការ​ពិត ពីព្រោះ​ភ្នំពេញ​ជា​បេះ​ដូង​នៃ​សេដ្ឋកិច្ច​យ៉ាង​សំខាន់​សម្រាប់​ប្រទេស​កម្ពុជា។ ដូច្នេះ ប្រសិន​បើ​មហា​បាតុកម្ម​ធ្វើ​នៅ​ភ្នំពេញ មាន​បញ្ហា​នោះ នៅ​តាម​បណ្ដា​ខេត្ត​ក៏​មាន​ផល​ប៉ះពាល់​ដែរ៖ «ក្នុង​ករណី​គណបក្ស​សង្គ្រោះ​ជាតិ ចង់​បាន​ការ​ចែក​អំណាច​នោះ ស៊ី.ភី.ភី (CPP) នឹង​ស្វាគមន៍ ក៏ប៉ុន្តែ​បើ​សិន​ជា​គណបក្ស​សង្គ្រោះ​ជាតិ នៅ​តែ​ចង់​រក​យុត្តិធម៌​ឲ្យ​ម្ចាស់​ឆ្នោត ហើយ​នីតិវិធី​ផ្លូវ​ច្បាប់ យើង​ឃើញ​ថា ចប់​សព្វ​គ្រប់​អស់​ហើយ អីចឹង​បាតុកម្ម​ហ្នឹង​នឹង​អាច​ឈាន​ទៅ​ដល់​ការ​ប្រើ​អំពើ​ហិង្សា»

ក្រោយ​ការ​ប្រកាស​ជំហរ​របស់​គណបក្ស​សង្គ្រោះ​ជាតិ ក្នុង​ការ​ធ្វើ​មហា​បាតុកម្ម​អហិង្សា​នៅ​ទូទាំង​ប្រទេស គេ​ឃើញ​មាន​ក្រសួង និង​ស្ថាប័ន​របស់​រដ្ឋ បាន​ចេញ​សេចក្ដី​ណែនាំ​ជា​បន្តបន្ទាប់​ដល់​ប្រជាពលរដ្ឋ ជា​ពិសេស​កម្មករ កម្មការិនី​រោងចក្រ កុំ​ឲ្យ​ការ​រំជើបរំជួល ឬ​ជឿ​តាម​ការ​អូសទាញ​របស់​អ្នក​នយោបាយ ដែល​បង្ក​ឲ្យ​មាន​សកម្មភាព​តវ៉ា​ផ្សេងៗ​នៅ​ក្នុង​ប្រទេស ដើម្បី​ទុក​លទ្ធភាព​ឲ្យ​អ្នក​នយោបាយ​ចរចា​គ្នា​ដោយ​សន្តិវិធី៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖

ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។