ប្រធានគណបក្សខ្មែររួបរួមជាតិ និងជាអតីតមេទ័ពមកពីគណបក្សហ៊្វុនស៊ិនប៉ិច លោក ញឹក ប៊ុនឆៃ បដិសេធនឹងព័ត៌មានថា លោកមិនស្មោះត្រង់នឹងរដ្ឋាភិបាលដែលដឹកនាំដោយលោកនាយករដ្ឋមន្ត្រី ហ៊ុន សែន រហូតលោកត្រូវបានដកតំណែងពីទីប្រឹក្សារដ្ឋាភិបាល ឋានៈស្មើឧបនាយករដ្ឋមន្ត្រី។
លោក ញឹក ប៊ុនឆៃ ផ្ដល់បទសម្ភាសន៍ដល់អាស៊ីសេរី នៅគេហដ្ឋានរបស់លោកផ្ទាល់ក្នុងខណ្ឌជ្រោយចង្វារ នៅថ្ងៃទី១៣ មិថុនា ថា លោកនៅតែស្មោះនឹងលោក ហ៊ុន សែន ដដែល ហើយលោកមិនអន់ចិត្តនឹងការដកតួនាទី អង្គរក្ស និងអាវុធទាំងអស់របស់លោកនោះឡើយ។
ទោះជាយ៉ាងណាក៏ដោយ លោក ញឹក ប៊ុនឆៃ អះអាងថា លោកបានជួបផ្ទាល់ជាមួយលោក ហ៊ុន សែន ពន្យល់ពីការយល់ច្រឡំនេះរួចហើយ។ លោកបន្តថា លោកបាននិយាយតាមប្រព័ន្ធទូរស័ព្ទជាមួយមិត្តភ័ក្ដិរបស់លោកនៅស្រុកបារាយណ៍ ខេត្តកំពង់ធំគឺលោក អ៊ី គឹមអៀង ប៉ុន្តែខ្សែទូរស័ព្ទច្រឡំចូលលេខរបស់អនុប្រធានគណបក្សសង្គ្រោះជាតិ លោក អេង ឆៃអ៊ាង ទៅវិញ ដោយខ្លឹមសារសន្ទនានោះ លោកប្រាប់ឲ្យអ្នកគាំទ្ររបស់លោកនៅស្រុកបារាយណ៍ បោះឆ្នោតឲ្យក្រុមលោក អ៊ី គឹមអៀង ដែលជាក្រុមការងារគណបក្សខ្មែររួបរួមជាតិ នៅស្រុកបារាយណ៍ ខេត្តកំពង់ធំ។
កាលពីថ្ងៃទី៥ មិថុនា ព្រះមហាក្សត្របានចេញព្រះរាជក្រឹត្យត្រាស់បង្គាប់បញ្ចប់មុខតំណែង លោក ញឹក ប៊ុនឆៃ ពីទីប្រឹក្សារាជរដ្ឋាភិបាល ដែលមានឋានៈស្មើឧបនាយករដ្ឋមន្ត្រី ក្រោយលទ្ធផលបោះឆ្នោតបឋមបង្ហាញថា គណបក្សខ្មែររួបរួមជាតិរបស់លោក បានជាប់ឆ្នោតជាមេឃុំមួយក្នុងខេត្តបន្ទាយមានជ័យ ក្នុងចំណោមឃុំសង្កាត់ចំនួន ១.៦៤៦ ទូទាំងប្រទេស។
សូមស្ដាប់បទសម្ភាសន៍បន្ថែមជាមួយលោក ញឹក ប៊ុនឆៃ៖
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។