រដ្ឋាភិបាលកម្ពុជា រឭកជាថ្មីដល់ប្រទេសវៀតណាម កុំឲ្យរំលោភបំពានចូលទឹកដីកម្ពុជា នៅតាមបណ្ដោយព្រំដែនប្រទេសទាំងពីរដែលពុំទាន់បញ្ចប់ការបោះបង្គោលព្រំដែននោះ។ គណបក្សប្រឆាំងវិញយល់ឃើញថា រដ្ឋាភិបាលត្រូវមានកាតព្វកិច្ចក្នុងការការពារបូរណភាពទឹកដីពីការរំលោភបំពានរបស់ប្រទេសជិតខាង។
បើទោះបីជាកន្លងមក រដ្ឋាភិបាលកម្ពុជា ដឹកនាំដោយគណបក្សប្រជាជនកម្ពុជា និងរដ្ឋាភិបាលវៀតណាម តែងអះអាងថា មិត្តភាពរវាងកម្ពុជា-វៀតណាម ជាមិត្តភាពប្រពៃណីយូរអង្វែង និងជាអ្នកជិតខាងល្អក្តី ប៉ុន្តែជាទូទៅគេឃើញវៀតណាម តែងមានប្រៀបមកលើកម្ពុជា ជាពិសេសក្នុងរឿងបូរណភាពទឹកដីនេះតែម្ដង។
ជាក់ស្ដែង ចាប់តាំងពីខែតុលា ឆ្នាំ២០១១ រហូតមកទល់ពេលបច្ចុប្បន្ន កម្ពុជាបានផ្ញើលិខិត និងកំណត់ទូតទៅកាន់រដ្ឋាភិបាលវៀតណាម មិនតិចជាង ២៣លើកនោះទេ ដើម្បីទទូចឲ្យរដ្ឋាភិបាលកុម្មុយនិស្តវៀតណាម ឈប់រំលោភបំពានចូលតំបន់តាមបណ្ដោយព្រំដែនដែលប្រទេសទាំង២ មិនទាន់ឯកភាពខណ្ឌសីមារួចរាល់។
ការរំលោភបំពានទាំងនោះ មានដូចជាការជីកស្រះ ការសង់អគារ និងផ្លូវបេតុងនៅខេត្តរតនគិរី ការធ្វើផ្លូវ និងប៉ុស្តិ៍រដ្ឋបាលនៅតំបន់ដាក់ដាំ-ដាក់ហ៊ូត នៅខេត្តមណ្ឌលគិរី ការធ្វើផ្លូវនៅខេត្តស្វាយរៀង ការសាងសង់ប៉ុស្តិ៍យោធានៅខេត្តកណ្ដាល និងការធ្វើប៉ុស្តិ៍នៅច្រកទ្វារវិញហួយដុង ជាប់បង្គោលព្រំដែនលេខ ២៦០ ទល់មុខច្រកទ្វារទ្វេភាគីកំពង់ក្រសាំង ក្នុងស្រុកបូរីជលសារ ខេត្តតាកែវ ជាដើម។
រដ្ឋាភិបាលកម្ពុជា ទទូចជាថ្មីឲ្យវៀតណាម បញ្ឈប់ការសាងសង់ផ្លូវសំណង់នានាជាបន្ទាន់ និងធ្វើឲ្យស្ថានភាពបរិស្ថាននៅតំបន់ទាំងអស់នោះមានសភាពដូចដើមវិញ ព្រមទាំងចាត់វិធានការរារាំងកុំឲ្យពលរដ្ឋវៀតណាម ចូលមកដាំដុះ ឬធ្វើសកម្មភាពនៅតំបន់ព្រំដែនទាំងឡាយណាដែលមិនទាន់បញ្ចប់ការខណ្ឌសីមា និងបោះបង្គោលព្រំដែនរួច។
ប្រធានគណៈកម្មការចម្រុះកិច្ចការព្រំដែន លោក វ៉ា គឹមហុង មិនទាន់ដឹងនៅឡើយ តើភាគីវៀតណាម ឆ្លើយតបយ៉ាងណាចំពោះការស្នើរបស់កម្ពុជា ពេលនេះ ដោយលោកឲ្យទាក់ទងទៅក្រសួងការបរទេសវិញ។
អាស៊ីសេរី មិនអាចទាក់ទងអ្នកនាំពាក្យក្រសួងការបរទេស លោក ជុំ សុន្ទរី បាននៅឡើយទេ នៅថ្ងៃទី១៩ ខែសីហា។
បើទោះជាកន្លងមកកម្ពុជា បានផ្ញើកំណត់ទូតឲ្យវៀតណាម ជាបន្តបន្ទាប់ក្តី ប៉ុន្តែភាគីវៀតណាម ហាក់មិនបានគោរពតាមនោះឡើយ។ ត្រង់ចំណុចនេះ លោក វ៉ា គឹមហុង បញ្ជាក់ថា តាមផ្លូវច្បាប់អន្តរជាតិ កំណត់ទូតទាំងអស់នេះគឺជាតឹកតាងមួយដែលបញ្ជាក់ពីការមិនឯកភាពរបស់កម្ពុជា ចំពោះការរំលោភបំពានរបស់ប្រទេសជិតខាង ដែលលោកថា វាមានសារប្រយោជន៍សម្រាប់ប្រើប្រាស់នៅពេលអនាគត៖ «ការដែលបានទឹកដីដោយការរំលោភ ឬកាន់កាប់បណ្ដោះអាសន្ន ទឹកដីនោះគឺមិនបានន័យថា ជាទឹកដីរបស់លោកទេ ព្រោះថា យើងមានការតវ៉ា។ នេះហើយក្ដីក្ដាំនៅប្រាសាទព្រះវិហារ គាត់ចូលកាន់កាប់ ប៉ុន្តែយើងតវ៉ា តុលាការវិនិច្ឆ័យទៅ លោកកាន់កាប់មែនតើកម្ពុជា សុខចិត្តពីកាលណា វាសំខាន់ណាស់សម្រាប់ផ្លូវច្បាប់អន្តរជាតិ»។
ប្រទេសកម្ពុជា មានព្រំដែនគោកជាប់នឹងប្រទេសវៀតណាម ប្រវែង ១.២៧០គីឡូម៉ែត្រ លាតសន្ធឹងពីខេត្តកំពត នៅប៉ែកខាងត្បូងរហូតដល់ខេត្តរតនគិរី នៅប៉ែកឦសានប្រទេស។ បច្ចុប្បន្ន រដ្ឋាភិបាលប្រទេសទាំង២ បោះបង្គោលព្រំដែនសម្រេចបាន ៨៣ភាគរយហើយ នៃបង្គោលព្រំដែនសរុបចំនួន ៣១៤បង្គោល។ លោក វ៉ា គឹមហុង បញ្ជាក់ថា កម្ពុជានៅបន្តចរចាជាមួយវៀតណាម ដើម្បីឈានដល់ការបោះបង្គោលដែលនៅសេសសល់ឲ្យចប់សព្វគ្រប់។
អ្នកនាំពាក្យគណបក្សសង្គ្រោះជាតិ លោក យឹម សុវណ្ណ យល់ឃើញថា រដ្ឋាភិបាលត្រូវមានកាតព្វកិច្ចក្នុងការការពារបូរណភាពទឹកដីនៅពេលមានការរំលោភបំពានពីប្រទេសជិតខាង។ លោក យឹម សុវណ្ណ ថា នេះជាសញ្ញាណមួយគួរឲ្យព្រួយបារម្ភ ហើយថា បើប្រទេសវៀតណាម នៅតែមិនបញ្ឈប់ការរំលោភបំពានទេ រដ្ឋាភិបាលគួរតែយកបញ្ហានេះប្ដឹងទៅកាន់តុលាការអន្តរជាតិឲ្យជួយដោះស្រាយ៖ «យើងត្រូវរកវិធានការថា បើគេនៅបន្តធ្វើតទៅទៀត តើរដ្ឋាភិបាលកម្ពុជា ត្រូវធ្វើយ៉ាងម៉េច អ៊ីចឹងហើយបានជាគណបក្សសង្គ្រោះជាតិ ចង់យកចំណុចឯកភាពជាតិ សាមគ្គីជាតិជាធំ ដើម្បីកុំឲ្យបរទេសមើលស្រាលលើយើង យើងត្រូវបញ្ចប់ភាពខុសគ្នានៅក្នុងប្រទេសយើង កសាងរបបប្រជាធិបតេយ្យសេរីពហុបក្ស យើងមានឯកភាពជាតិ សាមគ្គីជាតិ ពេលនោះយើងខ្លាំង បរទេសមិនងាយយើងទៀត»។
ប្រធានគណៈកម្មការចម្រុះកិច្ចការព្រំដែន លោក វ៉ា គឹមហុង មានប្រសាសន៍ថា ក្នុងពេលនេះ រដ្ឋាភិបាលមិនទាន់គិតទៅដល់ការប្ដឹងទៅកាន់តុលាការអន្តរជាតិនោះទេ គឺត្រូវប្រឹងប្រែងចរចាជាមួយភាគីវៀតណាម ជាមុនសិន។ ទោះជាយ៉ាងណា លោកថា ទៅថ្ងៃអនាគតរឿងរ៉ាវព្រំដែនប្រែប្រួលយ៉ាងណាទៀតនោះ លោកក៏មិនហ៊ានសន្និដ្ឋានថាបែបណានោះដែរ គឺអាចទៅតុលាការក៏ថាបាន។
ក្នុងរឿងព្រំដែននេះ ផ្ទៃក្នុងរបស់កម្ពុជា នៅមិនទាន់មានការឯកភាពគ្នានៅឡើយចំពោះផែនទី ដែលរដ្ឋាភិបាលកំពុងយកទៅប្រើប្រាស់ក្នុងការបោះបង្គោលព្រំដែនជាមួយប្រទេសវៀតណាម។ បក្សប្រឆាំងតែងទទូចឲ្យរដ្ឋាភិបាលបើកចំហឲ្យមានការចូលរួមរបស់ភាគីពាក់ព័ន្ធក្នុងការងារពិនិត្យ និងបោះបង្គោលព្រំដែន។ ទោះជាយ៉ាងណា រដ្ឋាភិបាលមិនត្រឹមតែមិនអនុញ្ញាតឲ្យបក្សប្រឆាំងចូលរួមនោះទេ តំណាងរាស្ត្រ និងមន្ត្រីបក្សប្រឆាំងមួយចំនួនថែមទាំងត្រូវបានរដ្ឋាភិបាលចាប់ខ្លួន ដោយសារការបញ្ចេញយោបល់រិះគន់ទៅលើការងារបោះបង្គោលព្រំដែនរបស់រដ្ឋាភិបាលទៀតផង។ រដ្ឋាភិបាលចោទប្រកាន់ពួកគេថា បានញុះញង់ធ្វើឲ្យមានភាពវឹកវរក្នុងសង្គម និងបង្កឲ្យមានជម្លោះជាមួយប្រទេសជិតខាងជាដើម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។