ប្រទេសទាំងពីរបានព្រមព្រៀងអភិវឌ្ឍន៍ខេត្តតាមតំបន់ព្រំដែន និងតភ្ជាប់ពាណិជ្ជកម្មរួមគ្នាក្នុងពេលភាគីទាំងពីរនៅមិនទាន់បានដោះស្រាយជម្លោះនៅក្បែរប្រាសាទព្រះវិហារ លើផ្ទៃដីជាង ៤គីឡូម៉ែត្រក្រឡា ដែលភាគីថៃ ទាមទារថា ជារបស់ខ្លួននៅឡើយ។
ក្នុងជំនួបនោះ លោកឧបនាយករដ្ឋមន្ត្រី ហោ ណាំហុង រដ្ឋមន្ត្រីក្រសួងការបរទេសកម្ពុជា មានប្រសាសន៍ថា ភាគីទាំងពីរបានឯកភាព និងព្រមព្រៀងជាមួយគ្នា អភិវឌ្ឍន៍រួមគ្នាលើវិស័យជាច្រើនតាមខេត្តចំនួន ៧ នៅតាមបណ្ដោយព្រំដែនកម្ពុជា-ថៃ។ មានដូចជាវិស័យពាណិជ្ជកម្មថៃ បានព្រមព្រៀងទិញកសិផលពីកម្ពុជា ឬរួមគ្នាបង្កើតតំបន់សេដ្ឋកិច្ចពិសេសតាមខេត្តជាប់ព្រំដែន មានខេត្តកោះកុង ជាដើម។
ក្រៅពីនេះ កម្ពុជា-ថៃ ក៏បានព្រមព្រៀងបើកច្រកព្រំដែនថ្មី តាមខេត្តជាប់ព្រំដែនបន្ថែមទៀត ដើម្បីបម្រើសេវាដឹកជញ្ជូនទំនិញ សម្រួលដល់ការធ្វើពាណិជ្ជកម្មរវាងប្រជាពលរដ្ឋ ឬអ្នកជំនួញប្រទេសទាំងពីរថែមទៀត។
តាមរយៈកិច្ចប្រជុំនេះ លោក ហោ ណាំហុង បញ្ជាក់ថា ភាគីថៃ ក៏ត្រៀមផ្ដល់ជំនួយដល់កម្ពុជា សម្រាប់ពង្រីក ឬស្ថាបនាផ្លូវជាតិតាមខេត្តជាប់ព្រំដែន មានខេត្តកោះកុង ជាដើម។ អភិវឌ្ឍន៍វិស័យសុខាភិបាល និងអគ្គិសនីឲ្យបានច្រើននៅថ្ងៃអនាគត៖ «ប្រទេសថៃ បានយល់ស្របទទួលទិញនូវកសិផលប្រជាជនយើងនៅតាមព្រំដែន ជាពិសេសពោត ដំឡូងឈើ តាមតម្លៃទីផ្សារ ដោយអត់មានការរឹតត្បិត។ យើងបានឯកភាពគ្នាបង្កើតតំបន់សេដ្ឋកិច្ចពិសេសនៅខេត្តបន្ទាយមានជ័យ និងខេត្តកោះកុង»។
យ៉ាងណាក៏ដោយ លោក ចាន់ សុវ៉េត មន្ត្រីស៊ើបអង្កេតជាន់ខ្ពស់សមាគមអាដហុក ហាក់មិនមានជំនឿថា កម្ពុជាទទួលបានផលចំណេញគាប់ប្រសើរពីផែនការអភិវឌ្ឍន៍រួមគ្នានៅតាមព្រំដែនកម្ពុជា-ថៃទេ ព្រោះលោកកត់សម្គាល់ថា រាល់កិច្ចប្រជុំ ឬការចុះកិច្ចព្រមព្រៀងផ្សេងៗ រវាងមន្ត្រីកម្ពុជា-ថៃ មានដូចជាបញ្ឈប់សកម្មភាពបាញ់សម្លាប់ពលរដ្ឋខ្មែរឆ្លងដែនទៅប្រទេសថៃ ជាដើម ថៃមិនបានគោរពតាមទេ។
បន្ថែមលើនេះ លោក ចាន់ សុវ៉េត បានបង្ហាញក្តីព្រួយបារម្ភពីការបាត់បង់ទឹកដីកម្ពុជា តាមព្រំដែនទៅឲ្យប្រទេសថៃ នៅគ្រាព្រំដែនប្រទេសទាំងពីរ មិនទាន់កំណត់ច្បាស់លាស់នោះ៖ «តើការអភិវឌ្ឍទាំងឡាយនៅតាមបន្ទាត់ព្រំដែននេះ សម្រាប់ដើម្បីជាខែលក្នុងការបំពានយកទឹកដី ឬក៏ជាចំណុចមួយដើម្បីធ្វើឲ្យពលរដ្ឋទាំងសងខាង អាចទទួលបាននូវការអភិវឌ្ឍ ឬក៏កាត់បន្ថយភាពក្រីក្រ។ អាហ្នឹងវាហាក់បីដូចជានៅមានមន្ទិលសង្ស័យច្រើន ពីព្រោះកន្លងផុតមក ថៃមិនទាន់បានធ្វើអីជាសញ្ញាណមួយដើម្បីបញ្ជាក់ថា ថៃមានភាពស្មោះត្រង់ជាមួយប្រទេសកម្ពុជា នៅឡើយដែរ ហើយមួយទៀតនោះបញ្ហាការអភិវឌ្ឍវាទាល់តែយើងប្រទេសជិតខាងហ្នឹង បានកំណត់សម្គាល់ទៅលើព្រំដែនច្បាស់លាស់ហើយ។ ចុះបើព្រំដែននៅមិនមានភាពច្បាស់លាស់ នៅមានតំបន់ស តំបន់មិនច្បាស់លាស់ នៅមានកន្លែងខ្លះបាត់បង្គោលឡាក់បង្គោលអី? អ៊ីចឹងធ្វើការអភិវឌ្ឍយ៉ាងដូចម្ដេច? ខ្ញុំនៅតែមានការព្រួយបារម្ភដដែលរឿងហ្នឹង»។
ដូចគ្នាដែរ លោក កែម ឡី អ្នកស្រាវជ្រាវការអភិវឌ្ឍសង្គម និងជាអ្នកវិភាគបញ្ហាសង្គមឯករាជ្យ ក៏មិនទាន់មានទំនុកចិត្តទៅលើផែនការអភិវឌ្ឍតំបន់ព្រំដែនរួមគ្នារវាងកម្ពុជា-ថៃ អាចនាំឲ្យកម្ពុជា ទទួលបានផលចំណេញច្រើនទេ។ លោកបន្តថា កន្លងមក ការចុះកិច្ចព្រមព្រៀងផ្សេងៗជាមួយថៃ កម្ពុជាមិនបានតាមដានការអនុវត្តកិច្ចព្រមព្រៀងរបស់ខ្លួនជាមួយថៃ ឲ្យបានដិតដល់ទេ។
អ្នកស្រាវជ្រាវរូបនេះ មានការព្រួយបារម្ភពីជំនួយអភិវឌ្ឍន៍តាមព្រំដែនរបស់ភាគីថៃ នាំឲ្យកម្ពុជា ខាតបង់ ពិសេសបញ្ហាបូរណភាពទឹកដីតាមព្រំដែន៖ «រឿងគេជួយហ្នឹងជាធម្មតាយើងអាចយកជំនួយផ្សេងៗ ទៅអភិវឌ្ឍតាមព្រំដែន ហើយជំនួយរបស់ប្រទេសជិតខាងអាចយកមកធ្វើអភិវឌ្ឍន៍នៅទីក្រុងវិញជាការប្រសើរជាង ពីព្រោះអ្នកផ្ដល់ជំនួយ គឺភាគច្រើនមានចំណង។ អាហ្នឹងត្រូវមានការប្រុងប្រយ័ត្ន។ មួយទៀត ខ្ញុំមានការព្រួយបារម្ភ បើសិនជាការអភិវឌ្ឍរួមគ្នានៅតាមព្រំដែនគួរជៀសវាង ពីព្រោះថៃ យើងត្រូវមើលល្បិចកលគាត់ផង ពីព្រោះគាត់ព្យាយាមអភិវឌ្ឍន៍តាមព្រំដែនជាបន្តបន្ទាប់មក ក្រែងលោយើងជាប់ផុត នៅពេលដីនៅជុំវិញប្រាសាទព្រះវិហារ គេបបួលអភិវឌ្ឍន៍រួមអីយើងជាប់ផុងទៅអភិវឌ្ឍរួមជាមួយគេ អាហ្នឹងវាជាកត្តាស៊ីជម្រៅមួយដែលយើងត្រូវទប់ស្កាត់ដែរ»។
កិច្ចប្រជុំគណៈកម្មការចម្រុះអភិវឌ្ឍន៍តាមព្រំដែន និងការតភ្ជាប់ពាណិជ្ជកម្មកម្ពុជា-ថៃ នៅថ្ងៃទី១១ ខែមិថុនា ភាគីកម្ពុជា ដឹកនាំដោយលោកឧបនាយករដ្ឋមន្ត្រី ហោ ណាំហុង រដ្ឋមន្ត្រីការបរទេស និងសមភាគីថៃ ដឹកនាំដោយលោក ស៊ូរ៉ាពង្ស រដ្ឋមន្ត្រីការបរទេសថៃ។
លោក ហោ ណាំហុង បានបញ្ជាក់ថា ការបង្កើតគណៈកម្មការចម្រុះនេះ ជាគំនិតផ្ដួចផ្ដើមរវាងលោកនាយករដ្ឋមន្ត្រី ហ៊ុន សែន និងអ្នកស្រី យ៉ីងឡាក់ នាយករដ្ឋមន្ត្រីថៃ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។