លោក អ៊ូ វីរៈ បានបញ្ជាក់ក្នុងសេចក្ដីថ្លែងការណ៍កាលពីថ្ងៃពុធ ទី១៨ ខែធ្នូ ថា៖ ការស្តីបន្ទោសលើប្រជាពលរដ្ឋវៀតណាម និងប្រទេសវៀតណាមចំពោះបញ្ហានានាដែលកម្ពុជា ប្រឈមនៅពេលបច្ចុប្បន្ន គឺជាគ្រោះថ្នាក់និងជាការខ្ជះខ្ជាយពេលវេលា។ លោកបន្តថា គ្រប់គណបក្សនយោបាយ និងបុគ្គលសាធារណៈទាំងអស់ គួរទទួលខុសត្រូវក្នុងការលុបបំបាត់ការរើសអើងជាជាងការចាក់សាំងលើភ្លើង។ ក្នុងនាមជាអង្គការសិទ្ធិមនុស្ស លោកត្រូវតែលើកឡើងពីបញ្ហាទាំងនេះ និងបង្ហាញពីករណីរំលោភបំពានសិទ្ធិមនុស្សរបស់គណបក្សកាន់អំណាច ក៏ដូចជាគណបក្សប្រឆាំង...។
កាលពីថ្ងៃទី១២ ខែធ្នូ មជ្ឈមណ្ឌលសិទ្ធិមនុស្សកម្ពុជា បានប្រតិកម្មចំពោះសម្ដីរបស់លោក សម រង្ស៊ី ប្រធានគណបក្សសង្គ្រោះជាតិ ដែលបានថ្លែងទៅកាន់អ្នកគាំទ្រនៅខេត្តសៀមរាប ថា លោក ហ៊ុន សែន អន់ជាងអ្នកស្រី យីងឡាក់ ស៊ីណាវ៉ាត់ (Yingluck Shinawatra) នាយករដ្ឋមន្ត្រីថៃ ដែលហ៊ានរំលាយសភា និងអនុញ្ញាតឲ្យមានការបោះឆ្នោតឡើងវិញនៅប្រទេសថៃ។ ក្នុងលិខិតដដែលនោះ ក៏បានលើកឡើងអំពីការប្រើពាក្យ "យួន" ថាជាពាក្យសម្ដីបង្អាប់បង្អោន និងការរើសអើងពូជសាសន៍វៀតណាម។
ពាក់ព័ន្ធនឹងបញ្ហានេះ សមាជិកក្រុមប្រឹក្សាភិបាលនៃមជ្ឈមណ្ឌលសិទ្ធិមនុស្សកម្ពុជា លោកបណ្ឌិត កែម ឡី បានអះអាងថា ការថ្លែងជាសាធារណៈរបស់លោក អ៊ូ វីរៈ គឺជារឿងបុគ្គល ហើយលោកមិនយល់ស្របចំពោះការប្រើពាក្យ "យួន" នេះ ថាគឺជាពាក្យសម្ដីបង្អាប់បង្អោន និងរើសអើងដល់ពលរដ្ឋវៀតណាម នោះទេ។
លោកបណ្ឌិត កែម ឡី ដែលជាអ្នកវិភាគឯករាជ្យសង្គមដែរនោះ បានបន្តថា ពាក្យយួននេះ ត្រូវបានគេប្រើជាសាមញ្ញនៅកម្ពុជា ជាយូរយារណាស់មកហើយ មិនដែលរដ្ឋាភិបាលវៀតណាម ចេញប្រកាសជាផ្លូវការមិនឲ្យប្រើនោះទេ រហូតមកដល់ពេលនេះ។
ក្រោយពីការផ្សព្វផ្សាយលិខិតចំហនោះមក មជ្ឈមណ្ឌលសិទ្ធិមនុស្សកម្ពុជា ទទួលរងការរិះគន់ជាច្រើនតាមរយៈបណ្ដាញផ្សព្វផ្សាយសង្គមថា ពាក្យ "យួន" ពុំមែនជាពាក្យសម្ដីបង្អាប់បង្អោនដល់វៀតណាម នោះទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។