ការប្រកាសធ្វើបាតុកម្មនេះ ខណៈដែលបក្សប្រជាជនកម្ពុជា ប្រកាសពីជំហរបោះបង់គោលបំណង ក្នុងការបង្កើតគណៈកម្មការដោះស្រាយភាពមិនប្រក្រតីនៅថ្ងៃបោះឆ្នោត។
លោក កឹម សុខា អនុប្រធានគណបក្សសង្គ្រោះជាតិ មានប្រសាសន៍ថា មហាបាតុកម្មអហិង្សានោះនឹងប្រព្រឹត្តនៅថ្ងៃទី៧ ខែកញ្ញា ខាងមុខ។ បាតុកម្មនោះ នឹងចាប់ផ្ដើមដំបូងនៅរាជធានីភ្នំពេញ ដែលគ្រោងនឹងមានអ្នកចូលរួមប្រមាណ ២ម៉ឺននាក់។ លោកបន្តថា ប្រសិនបើគណៈកម្មាធិការជាតិរៀបចំការបោះឆ្នោត (គ.ជ.ប) នៅតែបន្តប្រកាសលទ្ធផលឆ្នោតជាផ្លូវការ ដោយមិនដោះស្រាយភាពមិនប្រក្រតី ហើយរដ្ឋាភិបាលពុំព្រមបង្កើតគណៈកម្មការចម្រុះ ដើម្បីស៊ើបអង្កេតលទ្ធផលឆ្នោតទេ ពេលនោះបាតុកម្មទ្រង់ទ្រាយធំនៅទូទាំងប្រទេស នឹងកើតឡើងព្រមៗគ្នាជាបន្តបន្ទាប់ទៀត។
លោក កឹម សុខា អះអាងថា ការចាប់ផ្ដើមធ្វើនៅទីក្រុងភ្នំពេញ នេះ ជាការសាកល្បងក្នុងជំហានទីមួយប៉ុណ្ណោះ៖ «ភាពមិនប្រក្រតីនៅស្មុគស្មាញអ៊ីចឹង យើងបដិសេធមិនទទួលស្គាល់លទ្ធផលហ្នឹង ហើយនឹងបន្តធ្វើបាតុកម្មធំៗតទៅមុខទៀត ដើម្បីប្រឆាំងនឹងភាពមិនប្រក្រតីហ្នឹង។ យើងនឹងឃើញចាប់ពីស្អែកទៅ យើងនឹងធ្វើការហ្វឹកហាត់។ យើងហ្វឹកហាត់ៗបាតុករយើង ហើយយើងនឹងធ្វើសមជើងសាកល្បង និងបន្តបន្ទាប់ មុនដល់ថ្ងៃធ្វើហ្នឹង»។
លោក កឹម សុខា ឲ្យដឹងទៀតថា ក្រុមបាតុករនឹងត្រូវហ្វឹកហ្វឺនពីបច្ចេកទេសនៃការធ្វើបាតុកម្មដោយអហិង្សា ចាប់ពីថ្ងៃព្រហស្បតិ៍ ទី២៩ សីហា តទៅ ហើយអ្នកដែលបង្កឲ្យមានបាតុភាពកើតឡើងជាទម្រង់ហិង្សាក្នុងពេលធ្វើបាតុកម្មនោះ អ្នកនោះគឺជាអ្នកទទួលខុសត្រូវ។
ការប្រកាសធ្វើមហាបាតុកម្មរបស់គណបក្សសង្គ្រោះជាតិ នេះ គឺចំពេលដែលមន្ត្រីរបស់គណបក្សប្រជាជនកម្ពុជា បញ្ជាក់ជំហរថា ការបង្កើតឲ្យមានគណៈកម្មការចម្រុះស៊ើបអង្កេតអំពីលទ្ធផលបោះឆ្នោត ត្រូវបរាជ័យ។
លោក ជាម យៀប មន្ត្រីជាន់ខ្ពស់របស់គណបក្សកាន់អំណាច មានប្រសាសន៍ថា ការបង្កើតឲ្យមានគណៈកម្មការចម្រុះ កើតចេញពីគណបក្សប្រឆាំងនេះ នឹងពុំមានន័យអ្វីឡើយ ព្រោះមន្ត្រីគណបក្សជំទាស់ពុំមានបំណងពិតប្រាកដក្នុងការបង្កើតឲ្យមានរចនាសម្ព័ន្ធ ដើម្បីទម្លាយភាពជាប់គាំងនេះទេ។
លោកគិតថា ការទាមទាររបស់គណបក្សប្រឆាំងឲ្យមានអង្គការសហប្រជាជាតិ ចូលរួមក្នុងគណៈកម្មការនោះ គឺវាហួសព្រំដែន ហើយក៏ផ្ទុយនឹងច្បាប់របស់ប្រទេសកម្ពុជា ដែរ។ ក៏ប៉ុន្តែ វាហាក់គ្រប់គ្រាន់រួចទៅហើយ ដែលមានត្រឹមគណៈកម្មការជាតិរៀបចំការបោះឆ្នោត និងក្រុមប្រឹក្សាធម្មនុញ្ញជាអាជ្ញាកណ្ដាលនោះ៖ «គឺចាំបាច់ត្រូវមានក្រុមប្រឹក្សាធម្មនុញ្ញ និង គ.ជ.ប ទេ។ អាហ្នឹង គឺរដ្ឋធម្មនុញ្ញ និងច្បាប់បោះឆ្នោត បានទទួលសិទ្ធិដល់គេតែពីរហ្នឹងទេ។ ចំណែកយើងៗទៅធ្វើអីសួរមើល ព្រោះខ្ញុំបានដឹកនាំគណៈប្រតិភូរបស់គណបក្សប្រជាជន ម្ដងរួចមកហើយ និយាយគ្មានបានផលទេ ខាតតែពេលវេលា។ ប៉ុន្តែ បង្កើតថាតែបង្កើតទៅ តែខ្លួនឥតព្រមមានសុឆន្ទៈ ដើម្បីសម្របសម្រួលបង្កើតផង។ សុទ្ធតែយកអង្គការសហប្រជាជាតិ មកធ្វើ អង្គការសហប្រជាជាតិ មានស្អីដែលត្រូវអង្គការសហប្រជាជាតិ មានច្បាប់ឯណា អង្គការសហប្រជាជាតិ មកដោះស្រាយបញ្ហាហ្នឹង»។
ចំណែក លោក ផៃ ស៊ីផាន រដ្ឋលេខាធិការនៃទីស្ដីការគណៈរដ្ឋមន្ត្រី វិញ ព្រមានថា ប្រសិនបើការធ្វើមហាបាតុកម្មនេះនាំឲ្យប៉ះពាល់ដល់សន្តិសុខជាតិ ឬឈានដល់ហិង្សាកើតឡើង សមត្ថកិច្ចនឹងចាត់វិធានការប្រឆាំងបាតុកម្មនេះ។ ចំណែកមេដឹកនាំការធ្វើបាតុកម្មនេះ នឹងត្រូវប្រឈមចំពោះមុខច្បាប់៕
ទស្សនៈពលរដ្ឋចំពោះការសម្រេចរបស់បក្សនយោបាយទាំងពីរ និងជម្រើសធ្វើបាតុកម្ម
ដោយ សុ ជីវី
ប្រជាពលរដ្ឋជាច្រើនក្នុងរាជធានីភ្នំពេញ បានបង្ហាញទស្សនៈផ្សេងៗគ្នាចំពោះការសម្រេចរបស់គណបក្សនយោបាយធំៗទាំងពីរ គឺគណបក្សប្រជាជនកម្ពុជា និងគណបក្សសង្គ្រោះជាតិ នៅពេលនេះ។
ពួកគាត់បារម្ភថា ការទាត់ចោលសំណើបង្កើតគណៈកម្មការស៊ើបអង្កេតលើភាពមិនប្រក្រតីក្នុងការបោះឆ្នោត និងជម្រើសធ្វើបាតុកម្ម នឹងរុញច្រានស្ថានការណ៍នៅក្រោយការបោះឆ្នោតកាន់តែឡើងកម្ដៅបន្ថែមទៀត ព្រមទាំងបង្កភាពភ័យខ្លាចនៅក្នុងសង្គមជាទូទៅ។ យ៉ាងណា ពួកគាត់ទទូចអោយគណបក្សទាំងពីរមានការសម្របសម្រួលគ្នាភ្លាមៗមួយ ដើម្បីរកច្រកដោះស្រាយមុនពេលជម្លោះនយោបាយឈានដល់ភាពធ្ងន់ធ្ងរ។
សូមស្ដាប់មតិប្រជាពលរដ្ឋដែលបានផ្ដល់សម្ភាសដូចតទៅ៖
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។