ប្រធានបក្សប្រឆាំងបានយកផែនទីពីប្រទេសបារាំង បន្ទាប់ទិញពីបណ្ណាល័យមួយនៅក្នុងប្រទេសនេះ ដែលជាផែនទីគ្របដណ្ដប់តាមព្រំដែនប្រទេសកម្ពុជា-វៀតណាម មានខ្នាត ១/១០០.០០០ (មួយលើមួយរយពាន់)។ ទោះបែបនេះក្តី មន្ត្រីជំនាញកិច្ចការព្រំដែននៃរដ្ឋាភិបាល មិនទាន់ឆ្លើយតបយ៉ាងណានៅឡើយទេ ព្រោះលោកមិនទាន់បានឃើញផែនទីនោះ។
ផែនទីទាំងផ្ទាំងៗដែលលោក សម រង្ស៊ី អះអាងថា ជាផែនទីច្បាស់លាស់បង្ហាញពីព្រំប្រទល់ប្រទេសកម្ពុជា-វៀតណាមនោះ លោក សម រង្ស៊ី នឹងយកទៅផ្ទៀងផ្ទាត់ទៅនឹងបង្គោលព្រំដែនតាមខ្សែបន្ទាត់ប្រទេសវៀតណាម និងកម្ពុជា។
ថ្លែងប្រាប់ក្រុមអ្នកកាសែតក្រោយពិធីប្រកាសចាប់ផ្ដើមទទួលវិភាគទានគម្រោងទូរទស្សន៍ព្រះអាទិត្យ នៅថ្ងៃទី២៧ ខែមិថុនា លោក សម រង្ស៊ី ថា លោកនឹងស្នើឲ្យគណបក្សមានអាសនៈនៅក្នុងសភា បង្កើតគណៈកម្មការចម្រុះមួយផ្ទៀងផ្ទាត់ផែនទីនេះទៅនឹងការបោះបង្គោលព្រំដែនកម្ពុជា-វៀតណាម។ លោកបន្តថា មូលហេតុដែលលោកយកផែនទីនេះមកជជែក ព្រោះប្រទេសបារាំង ជាអ្នកធ្វើកាលពីសម័យអាណានិគមបារាំង៖ «ឥឡូវនេះមានអស់ហើយឯកសារ ផែនទីហ្នឹង គឺច្បាស់។ យើងនឹងបង្កើតគណៈកម្មការចម្រុះផ្ទៀងផ្ទាត់ បើគេខ្វះអីយើងឲ្យគេ ហើយបើយើងខ្វះអីគេអាចបង្ហាញយើង អ៊ីចឹងយើងនឹងមានមូលដ្ឋានគ្រប់ជ្រុងជ្រោយហើយ»។
លោក សម រង្ស៊ី បញ្ជាក់ឲ្យដឹងថា មាត្រដ្ឋានផែនទីខ្នាត ១/១០០.០០០ មានន័យថា មួយសង់ទីម៉ែត្រលើផែនទី ស្មើមួយគីឡូម៉ែត្រលើផ្ទៃដីពិត។ មួយមិល្លីម៉ែត្រលើផែនទី ស្មើ ១០០ម៉ែត្រលើផ្ទៃដី។
មាត្រា២ នៃរដ្ឋធម្មនុញ្ញចែងថា បូរណភាពទឹកដីរបស់ព្រះរាជាណាចក្រកម្ពុជា មិនអាចរំលោភបានជាដាច់ខាតក្នុងព្រំដែនរបស់ខ្លួន ដែលមានកំណត់ក្នុងផែនទី ១/១០០.០០០ ធ្វើនៅចន្លោះឆ្នាំ១៩៣៣-១៩៥៣ ហើយដែលត្រូវទទួលស្គាល់ជាអន្តរជាតិនៅចន្លោះឆ្នាំ១៩៦៣-១៩៦៩។
ទេសរដ្ឋមន្ត្រីទទួលបន្ទុកកិច្ចការព្រំដែន លោក វ៉ា គឹមហុង មិនបញ្ចេញប្រតិកម្មណាមួយចំពោះផែនទីដែលលោក សម រង្ស៊ី គ្រោងយកមកជជែកនោះទេ ព្រោះលោកមិនទាន់បានឃើញផែនទីនោះនៅឡើយ។ លោកបន្តថា សកម្មភាពរបស់លោក សម រង្ស៊ី មិនមែនជារឿងប្លែកនោះទេសម្រាប់រូបលោកដែលធ្វើកិច្ចការព្រំដែនអស់ច្រើនឆ្នាំមកហើយ៖ «ខ្ញុំអត់មានសមត្ថភាពឆ្លើយទេរឿងហ្នឹង ចាំមើលផែនទីសិន ថ្ងៃណាគាត់ (លោក សម រង្ស៊ី) ឲ្យមើល ចាំខ្ញុំមើល!»។
នៅរយៈពេលចុងក្រោយនេះ បញ្ហាព្រំដែនកម្ពុជា-វៀតណាម កើតច្រើនកន្លែង។ បញ្ហាព្រំដែននេះដែរជំរុញឲ្យរដ្ឋាភិបាលក្រុងភ្នំពេញ ផ្ញើកំណត់ទូតទៅរដ្ឋាភិបាលក្រុងហាណូយ។
ក្នុងចំណោមកំណត់ទូតចំនួន៣ ដែលផ្ញើទៅកាន់ស្ថានទូតវៀតណាម ផ្សេងៗគ្នា គឺនៅថ្ងៃទី១២ ទី១៤ និងទី១៧ ខែមិថុនា ក្នុងនោះកំណត់ទូតចំនួន២ គឺពាក់ព័ន្ធទៅនឹងរឿងអាជ្ញាធរវៀតណាម ជីកស្រះចំនួន ៨ ចូលក្នុងទឹកដីកម្ពុជា ក្នុងខេត្តរតនគិរី។
កំណត់ទូតមួយទៀត គឺពាក់ព័ន្ធនឹងអាជ្ញាធរវៀតណាម ជីកដីធ្វើគ្រឹះសម្រាប់សាងសង់ប៉ុស្តិ៍យោធានៅភូមិព្រែកស្បូវ ឃុំសំពៅពូន ស្រុកកោះធំ ខេត្តកណ្ដាល។ ប៉ុន្តែរដ្ឋាភិបាលវៀតណាម មិនទាន់ឆ្លើយតបជាដុំកំភួននៅឡើយ ដោយគ្រាន់តែលើកឡើងថា រង់ចាំមើលរបាយការណ៍ពីថ្នាក់មូលដ្ឋានសិន។ លោក សម រង្ស៊ី រំពឹងថា ផែនទីដែលលោកយកពីប្រទេសបារាំងនេះ កម្ពុជានឹងមានប្រៀបលើផ្លូវច្បាប់ទៅជជែកជាមួយប្រទេសដែលចង់រំលោភអធិបតេយ្យភាពកម្ពុជា ហើយលោកស្នើឲ្យអ្នកស្នេហាជាតិទាំងអស់ ចូលរួមតវ៉ាតតាំង និងធ្វើជាសាក្សីទាំងអស់គ្នានៅពេលផ្ទៀងផ្ទាត់ផែនទីនោះ ទៅនឹងបង្គោលព្រំដែនកម្ពុជា-វៀតណាម។
បក្សប្រឆាំងចាប់ផ្ដើមប្រមូលប្រាក់វិភាគទានសម្រាប់បើកទូរទស្សន៍ជាផ្លូវការ
គម្រោងបង្កើតទូរទស្សន៍ព្រះអាទិត្យ របស់គណបក្សប្រឆាំងចាប់ផ្ដើមកៀរគររកថវិកាជាផ្លូវការហើយ នៅថ្ងៃទី២៧ ខែមិថុនា ឆ្នាំ២០១៥ ដើម្បីឈានទៅបង្កើតទូរទស្សន៍នេះនៅចុងឆ្នាំ២០១៥។
ពិធីប្រកាសចាប់ផ្ដើមទទួលវិភាគទានគម្រោងទូរទស្សន៍ព្រះអាទិត្យធ្វើនៅទីស្នាក់ការកណ្ដាលគណបក្សសង្គ្រោះជាតិ។ អ្នកគាំទ្រប្រមាណ ១.០០០នាក់ចូលរួមក្នុងពិធីនេះ។ អ្នកខ្លះបានយកថវិកាទៅចូលរួម អ្នកផ្សេងទៀតផ្ញើតាមប្រព័ន្ធធនាគារ តាមប្រព័ន្ធផ្សេងទៀត ឬក៏តាមមិត្តភ័ក្ដិ មានទាំងក្នុងស្រុក និងក្រៅស្រុក។
លោក សម រង្ស៊ី ប្រធានគណបក្សសង្គ្រោះជាតិ ដែលបានចូលរួមទ្រទ្រង់ថវិកាចំនួន ៣.០០០ដុល្លារដើម្បីបង្កើតទូរទស្សន៍ព្រះអាទិត្យ ថ្លែងអះអាងថា ទូរទស្សន៍បក្សសង្គ្រោះជាតិ នឹងផ្សាយព័ត៌មានពិតដែលកើតឡើងគ្រប់ទីកន្លែងឲ្យសាធារណជនបានដឹង។ លោកបន្តទៀតថា ប្រសិនប្រជាពលរដ្ឋខ្មែរគ្រប់រូបចូលវិភាគទានតែ ៥.០០០ ឬ ១០.០០០រៀល ទូរទស្សន៍ព្រះអាទិត្យ នឹងអាចដំណើរការទៅបានតាមគម្រោង៖ «លុយនេះគឺលុយញើសឈាមប្រជាពលរដ្ឋខ្មែរ ញើសឈាមមួយតំណក់ៗគឺមានតម្លៃច្រើនលើសលប់។ ទឹកចិត្តសំខាន់ជាងទឹកលុយបងប្អូន! ឲ្យតែបងប្អូនចូលលុយតែម្នាក់បន្តិចៗ តែចូលឲ្យបានទូទាំងប្រទេស យើងឃើញទូរទស្សន៍ព្រះអាទិត្យបានឆាប់ហើយ»។
ទូរទស្សន៍ព្រះអាទិត្យរបស់គណបក្សសង្គ្រោះជាតិ ត្រូវការថវិកា ៣លានដុល្លារដើម្បីដំណើរការទៅរួច។ គិតចាប់ពីថ្ងៃទី២៥ ខែមិថុនា ដល់ល្ងាចថ្ងៃ២៧ ខែមិថុនា គណបក្សនេះប្រមូលថវិកាបានជាង ១៦ម៉ឺនដុល្លារ ពីគ្រប់មជ្ឈដ្ឋាននានា ទាំងក្នុងនិងក្រៅប្រទេស។
គណបក្សសង្គ្រោះជាតិ ប្រកាសដល់អ្នកចង់ចូលរួមថវិកាដើម្បីបង្កើតទូរទស្សន៍ថា ត្រូវយកថវិកាមកបង់នៅទីស្នាក់ការកណ្ដាលគណបក្សសង្គ្រោះជាតិ រាជធានីភ្នំពេញ។ គណបក្សនេះគ្មានមន្រ្តី ឬសកម្មជនរូបណាមួយដើររៃអង្គាសថវិកាតាមផ្លូវ តាមផ្សារ ឬទីសាធារណៈឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។