គណបក្សប្រជាជនកម្ពុជា និងគណបក្សសង្គ្រោះជាតិ បានចាត់ទុកការជួបគ្នាចរចាអំពីការកែទម្រង់ការបោះឆ្នោតនៅពេលខាងមុខ ទទួលបានជោគជ័យ ហើយថា នឹងអាចឈានដល់ជំនួបថ្នាក់ដឹកនាំកំពូលនៃគណបក្សទាំងពីរខាងមុខនេះទៀត។ ក៏ប៉ុន្តែអ្នកវិភាគនយោបាយបានលើកឡើងថា ការជួបចរចានេះ មិនមានមូលដ្ឋានរឹងមាំដើម្បីឈានទៅដល់ការដោះស្រាយវិបត្តិនយោបាយបាននៅឡើយ។
ការបោះឆ្នោតឡើងវិញ ឬបោះឆ្នោតមុនអាណត្តិ មិនបានលើកមកជជែកនៅក្នុងរបៀបវារៈនៃជំនួបថ្នាក់បច្ចេកទេសរវាងគណបក្សសង្គ្រោះជាតិ និងគណបក្សប្រជាជនកម្ពុជា នៅវិមានព្រឹទ្ធសភា ថ្ងៃទី១៨ កុម្ភៈ ដែលមានរយៈពេលជាងពីរម៉ោងនោះទេ។
ទោះបីជាយ៉ាងនេះក្ដី ប្រធានក្រុមដឹកនាំការចរចាមកពីគណបក្សសង្រ្គោះជាតិ លោក សុន ឆ័យ បានចាត់ទុកថា ជំនួបរវាងតំណាងគណបក្សទាំងពីរទទួលបានជោគជ័យ ពីព្រោះគណបក្សទាំងពីរបានយល់ព្រមបង្កើតគណៈកម្មការចម្រុះដើម្បីរៀបចំក្របខ័ណ្ឌកំណែទម្រង់ការបោះឆ្នោតនៅពេលខាងមុខ។ នៅក្នុងជំនួបនេះ គណបក្សសង្គ្រោះជាតិមិនបាននិយាយអំពីការចូលប្រជុំសភា ឬមិនចូលនោះទេ ដោយលោក សុន ឆ័យ បញ្ជាក់ថា គ្រាន់តែជំនួបថ្នាក់ក្រុមបច្ចេកទេសប៉ុណ្ណោះ។
«សំឡេង»
ប្រធានក្រុមដឹកនាំនៃគណបក្សប្រជាជនកម្ពុជា និងជារដ្ឋលេខាធិការក្រសួងមហាផ្ទៃ លោក ព្រុំ សុខា បានបញ្ជាក់ថា ការជួបគ្នាថ្នាក់បច្ចេកទេសនេះ គឺអនុវត្តតាមស្មារតីសេចក្ដីប្រកាសរួមនៃជំនួបកំពូលរវាងគណបក្សទាំងពីរ កាលពីថ្ងៃទី១៦ កញ្ញា ឆ្នាំ២០១៣ ដែលព្រមព្រៀងគ្នាលើក្របខ័ណ្ឌកំណែទម្រង់ការបោះឆ្នោតពេលខាងមុខ។ នៅត្រង់ចំណុចនេះ អ្នកយកព័ត៌មានបានចោទសួរថា តើគណបក្សប្រជាជនកម្ពុជា ទទួលស្គាល់ថា ការបោះឆ្នោតកាលពីថ្ងៃទី២៨ កក្កដា នោះ មានភាពមិនត្រឹមត្រូវដូចគណបក្សប្រឆាំងចោទប្រកាន់នោះ ឬយ៉ាងណា?
លោក ព្រុំ សុខា មិនបានឆ្លើយតបចំពោះបញ្ហានេះទេ ប៉ុន្តែលោកបញ្ជាក់ថា ជាបទពិសោធន៍ ការកែទម្រង់ការបោះឆ្នោតនេះ រដ្ឋាភិបាលបានធ្វើជាបន្តបន្ទាប់តាំងពីឆ្នាំ១៩៩៨ មក។
«សំឡេង»
លោក សុន ឆ័យ បានលើកឡើងថា នៅក្នុងជំនួបចរចានេះ គណបក្សសង្គ្រោះជាតិ ក៏បានលើកពីការសុំឲ្យដោះលែងអ្នកទាំង ២១នាក់ ដែលកំពុងជាប់ឃុំនៅពន្ធនាគារត្រពាំងផ្លុង នៅខែត្រកំពង់ចាម នោះដែរ ប៉ុន្តែបញ្ហានេះស្ថិតនៅក្នុងការពិភាក្សាបន្តទៀត។ រីឯលោក ព្រុំ សុខា បានអះអាងថា ការដោះលែង ឬយ៉ាងណានោះជាសមត្ថកិច្ចរបស់តុលាការ។
អ្នកជំនាញផ្នែកវិទ្យាសាស្ត្រនយោបាយនិងជាអ្នកវិភាគឯករាជ្យ លោកបណ្ឌិត សុខ ទូច មានប្រសាសន៍ថា ជំនួបរវាងគណបក្សទាំងពីរនេះ ហាក់ពុំមានលទ្ធផលអ្វីជាធំដុំទេ តែការទទួលបានជោគជ័យ នៅត្រង់ថា អ្នកនយោបាយគណបក្សទាំងពីរងាករកការចរចានៅក្រោយពេលបែរខ្នងដាក់គ្នាកន្លងមក។
«សំឡេង»
ក្រោយពេលបញ្ចប់ការជួបចរចានេះ ក្រុមការងារគណបក្សទាំងពីរបានចេញសេចក្ដីប្រកាសព័ត៌មានមួយរួមគ្នា ហើយចែកជូនអ្នកសារព័ត៌មាន។ នៅក្នុងសេចក្ដីប្រកាសរួមនៃកិច្ចប្រជុំនោះមាន ៣ចំណុច គឺទី១ ភាគីទាំងពីរយល់ព្រមបង្កើតគណៈកម្មការចម្រុះមួយដោយមានសមាសភាពស្មើគ្នាមកពីគណបក្សដែលមានអាសនៈក្នុងរដ្ឋសភា ដើម្បីសិក្សានិងរៀបចំក្របខ័ណ្ឌកំណែទម្រង់ការបោះឆ្នោតពេលខាងមុខស្របតាមគោលការណ៍លទ្ធិប្រជាធិបតេយ្យ និងនីតិរដ្ឋ សំដៅធានាឲ្យការបោះឆ្នោតប្រព្រឹត្តទៅប្រកបដោយសេរី ត្រឹមត្រូវ និងយុត្តិធម៌។
ទី២ រៀបចំការកែទម្រង់ការបោះឆ្នោតនេះ គណៈកម្មការចម្រុះត្រូវរៀបចំឲ្យមានសិក្ខាសាលាថ្នាក់ជាតិ និងអន្តរជាតិ រួមទាំងដៃគូអភិវឌ្ឍន៍គណបក្សនយោបាយដែលបានចុះបញ្ជី សង្គមស៊ីវិលដែលមានជំនាញលើការងារបោះឆ្នោត ព្រមទាំងតួអង្គពាក់ព័ន្ធ និងទី៣ ក្នុងកិច្ចដំណើរការនៃកំណែទម្រង់ការបោះឆ្នោតនេះ ត្រូវបង្កលក្ខណៈឲ្យមានការគាំទ្របច្ចេកទេស និងហិរញ្ញវត្ថុពីដៃគូអភិវឌ្ឍន៍អង្គការជាតិនិងអន្តរជាតិ។
ជំនួបចរចារវាងគណបក្សទាំងពីរនៅថ្ងៃទី១៨ កុម្ភៈ នេះ ជាជំនួបលើកទី៨ហើយ ក្នុងនោះរួមទាំងជំនួបថ្នាក់ដឹកនាំកំពូលចំនួនពីរលើកផង។ តំណាងគណបក្សទាំងពីរបានបញ្ជាក់ថា ជំនួបថ្នាក់បច្ចេកទេសនេះ នឹងអាចជួបគ្នា ឬអាចឈានដល់ជំនួបថ្នាក់កំពូលទៀត ក៏ប៉ុន្តែគេមិនបានបញ្ជាក់អំពីកាលបរិច្ឆេទជាក់លាក់ទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។