បក្ស​​ប្រឆាំង​​ប្រកាស​ធ្វើ​បាតុកម្ម​បក្ស​ប្រជាជន​ប្រកាស​ការពារ​លទ្ធផល​ឆ្នោត

គណបក្ស​សង្គ្រោះ​ជាតិ បាន​ប្រកាស​ច្រានចោល​លទ្ធផល​បោះ​ឆ្នោត​ផ្លូវការ​ដែល​ចេញ​ដោយ​គណៈកម្មាធិការ​ជាតិ​រៀបចំ​ការ​បោះ​ឆ្នោត (គ.ជ.ប) និង​ប្រកាស​ធ្វើ​មហា​បាតុកម្ម ៣​យប់ ៣​ថ្ងៃ​ជាប់ៗ​គ្នា នៅ​សប្ដាហ៍​ក្រោយ បើ​សិន​ជា​គ្មាន​ដំណោះស្រាយ​សម​ស្រប​ណា​មួយ​ដើម្បី​រក​យុត្តិធម៌​ជូន​ម្ចាស់​ឆ្នោត។

0:00 / 0:00

0:00 / 0:00

ការ​ប្រកាស​នេះ ធ្វើ​ឡើង​ដើម្បី​ឆ្លើយ​តប​នឹង គ.ជ.ប ដែល​ប្រកាស​លទ្ធផល​ឆ្នោត​ផ្លូវការ​នៅ​ថ្ងៃ​ទី​៨ ខែ​កញ្ញា បង្ហាញ​ថា គណបក្ស​សង្គ្រោះ​ជាតិ ចាញ់​ឆ្នោត​ដោយ​ទទួល​បាន​អាសនៈ​សភា ៥៥​ទល់​នឹង​គណបក្ស​ប្រជាជន​កម្ពុជា ដែល​បាន​អាសនៈ​សភា​ចំនួន ៦៨។

មហា​បាតុកម្ម​របស់​គណបក្ស​សង្គ្រោះ​ជាតិ នឹង​កើត​ឡើង​ជា​លើក​ទី​២ នៅ​ថ្ងៃ​អាទិត្យ ទី​១៥ ខែ​កញ្ញា ត​ទៅ រយៈពេល ៣​យប់​បី​ថ្ងៃ ដោយ​មិន​សម្រាក ដើម្បី​ទាមទារ​ឲ្យ​បក្ស​កាន់​អំណាច​យល់​ព្រម​បង្កើត​គណៈកម្មការ​ស៊ើប​អង្កេត​ពី​ភាព​មិន​ប្រក្រតី​ក្នុង​ដំណើរ​ការ​បោះ​ឆ្នោត។ ការ​សម្រេច​នេះ កើត​ឡើង​ក្នុង​កិច្ច​ប្រជុំ​គណៈកម្មការ​អចិន្ត្រៃយ៍​របស់​បក្ស​ប្រឆាំង គឺ​រយៈពេល ១​ម៉ោង បន្ទាប់​ពី គ.ជ.ប ប្រកាស​លទ្ធផល​ឆ្នោត​ផ្លូវ​ការ​តាម​រយៈ​ប្រព័ន្ធ​ផ្សព្វផ្សាយ​រដ្ឋ​ចប់​សព្វគ្រប់។

ក្នុង​សន្និសីទ​កាសែត​ផ្សព្វផ្សាយ​ពី​ជំហរ​របស់​បក្ស​សង្គ្រោះ​ជាតិ នៅ​ថ្ងៃ​ទី​៨ ខែ​កញ្ញា ប្រធាន​គណបក្ស​លោក សម រង្ស៉ី មាន​ប្រសាសន៍​ថា ប្រទេស​ម្ចាស់​ជំនួយ​ធំៗ មក​ពី​ប្លុក​ប្រជាធិបតេយ្យ ដូចជា ជប៉ុន កូរ៉េ​ខាង​ត្បូង សហគមន៍​អឺរ៉ុប និង​សហរដ្ឋ​អាមេរិក នឹង​មិន​ទទួល​ស្គាល់​លទ្ធផល​បោះ​ឆ្នោត​នេះ​ទេ។

លោក​បន្ត​ថា ប្រជាពលរដ្ឋ​ក៏​មិន​អាច​ទទួល​យក​លទ្ធផល​នេះ​ដែរ ហើយ​គណបក្ស​ប្រឆាំង​នឹង​បន្ត​តវ៉ា​ចាប់​ពី​ថ្ងៃ​ទី​១៥ ខែ​កញ្ញា ត​ទៅ រហូត​ដរាប​ណា​ពលរដ្ឋ​ម្ចាស់​ឆ្នោត​ទទួល​បាន​នូវ​យុត្តិធម៌​តាម​រយៈ​ការ​បង្កើត​គណៈកម្មការ​ឯករាជ្យ​ស៊ើប​អង្កេត​ពី​ភាព​មិន​ប្រក្រតី​នៃ​ការ​បោះ​ឆ្នោត។ លោក​បញ្ជាក់​ថា គណបក្ស​សង្គ្រោះ​ជាតិ នៅ​តែ​បង្ហាញ​ជំហរ​ចង់​ចរចា​ជាមួយ​បក្ស​កាន់​អំណាច ប៉ុន្តែ​ការ​ចរចា​នោះ គឺ​ត្រូវ​តែ​បង្កើត​គណៈកម្មការ​ឯករាជ្យ​ស៊ើប​អង្កេត​ពី​ភាព​មិន​ប្រក្រតី​ក្នុង​ដំណើរ​ការ​បោះ​ឆ្នោត។

ទន្ទឹម​នឹង​នេះ អនុ​ប្រធាន​គណបក្ស លោក កឹម សុខា លើក​ឡើង​ថា ការ​បង្កើត​គណៈកម្មការ​ឯករាជ្យ​មួយ​ដើម្បី​ស៊ើប​អង្កេត ជា​រឿង​មួយ​សម​ហេតុផល​បំផុត ព្រោះ​ថា ម្ចាស់​ឆ្នោត​មិន​អស់​ចិត្ត​ទេ​នៅ​ពេល​ដែល គ.ជ.ប ប្រកាស​លទ្ធផល​ឆ្នោត​ទាំង​ភាព​មិន​ប្រក្រតី​ជា​ច្រើន​មិន​ទាន់​ដោះស្រាយ​ចប់​អស់​នោះ។

ឆ្លើយ​នឹង​សំណួរ​អ្នក​កាសែត​ដែល​សួរ​ថា តើ​គណៈកម្មការ​ឯករាជ្យ​នោះ​ស្រប​ច្បាប់ ឬ​ទេ? លោក កឹម សុខា តប​ថា កម្ពុជា​ធ្លាប់​ដោះស្រាយ​បញ្ហា​ជា​ច្រើន​ដោយ​ផ្អែក​លើ​ស្ថានភាព​នយោបាយ។ លោក​រំលឹក​ថា កាល​ពី​ឆ្នាំ​១៩៩៣ កម្ពុជា​ធ្លាប់​ធ្វើ​ឲ្យ​ប្រទេស​មួយ​មាន​នាយករដ្ឋ​មន្ត្រី ២​នាក់​ម្តង​រួច​ហើយ កាល​គណបក្ស​ប្រជាជន​កម្ពុជា ចាញ់​ឆ្នោត ម្យ៉ាង​ទៀត រដ្ឋាភិបាល​ក៏​បាន​បង្កើត​ក្រុម​យុវជន​ស្ម័គ្រ​ចិត្ត​វាស់វែង​ដីធ្លី​ដែល​មិន​មាន​ក្នុង​ច្បាប់​ដែរ ហេតុ​អ្វី​កម្ពុជា បង្កើត​គណៈកម្មការ​ដោះស្រាយ​ពី​ភាព​មិន​ប្រក្រតី​នៃ​ការ​បោះ​ឆ្នោត​មិន​បាន?

ទោះ​យ៉ាង​ណា​ក្តី មន្ត្រី​បក្ស​ប្រជាជន​កម្ពុជា ធ្លាប់​បាន​បដិសេធ​ជា​ច្រើន​ដង​ច្រើន​សា​មក​ហើយ​ថា ការ​បង្កើត​គណៈកម្មការ​ឯករាជ្យ​ដើម្បី​ដោះស្រាយ​ពី​ភាព​មិន​ប្រក្រតី​ក្នុង​ដំណើរ​ការ​បោះ​ឆ្នោត​នេះ ជា​រឿង​មិន​អាច​ទៅ​រួច​ទេ ហើយ​ក៏​មិន​មាន​ក្នុង​ច្បាប់​កម្ពុជា​ដែរ។

ទាក់ទង​នឹង​បញ្ហា​នេះ អ្នក​វិភាគ​ឯករាជ្យ លោក​បណ្ឌិត ឡៅ ម៉ុងហៃ មាន​ប្រសាសន៍​ថា ដំណោះស្រាយ​នយោបាយ​ជា​ច្រក​តែ​មួយ​គត់​ដែល​អាច​ដោះស្រាយ​បញ្ហា​ពេល​នេះ​បាន។ លោក​បន្ត​ថា បើ​សិន​ជា​គណបក្ស​ទាំង​ពីរ​បន្ត​ចរចា​គ្នា​មិន​ត្រូវ នោះ​អ្នក​ដែល​រង​ទុក្ខ​ពិត​ប្រាកដ​ជា​ប្រជាពលរដ្ឋ​ទូ​ទៅ និង​ប្រទេស​ជាតិ​ទាំង​មូល។ លោក​បញ្ជាក់​ថា បើ​មិន​មាន​ដំណោះស្រាយ​ត្រឹមត្រូវ គណបក្ស​កាន់​អំណាច​នឹង​ខាត​បង់​យ៉ាង​ច្រើន ទាំង​ជំនឿ​ទុក​ចិត្ត​ពី​សំណាក់​ប្រជាពលរដ្ឋ និង​ប៉ះពាល់​កេរ្តិ៍​ឈ្មោះ​លើ​ឆាក​អន្តរជាតិ។

ថ្នាក់​ដឹកនាំ​គណបក្ស​ប្រឆាំង​នឹង​ធ្វើ​ដំណើរ​ទៅ​កៀរគរ​ពលរដ្ឋ​ជា​ថ្មី​ឲ្យ​មក​ចូល​រួម​មហា​បាតុកម្ម​ចាប់​ពី​ថ្ងៃ​ទី​៩ ខែ​កញ្ញា ដោយ​គ្រោង​នឹង​ចុះ​ទៅ​កាន់​ខេត្ត​កណ្ដាល។ ថ្ងៃ​ទី​១០ ខែ​កញ្ញា ចុះ​ទៅ​ផ្សារ​អូរឫស្សី ថ្ងៃ​ទី​១១ ខែ​កញ្ញា ទៅ​ខេត្ត​សៀមរាប និង​ថ្ងៃ​ទី​១២ កញ្ញា ទៅ​ខេត្ត​បាត់ដំបង។

ក្នុង​មហា​បាតុកម្ម​កាល​ពី​ថ្ងៃ​ទី​៧ ខែ​កញ្ញា គណបក្ស​ប្រឆាំង​ប្រមូល​បាន​ថវិកា​ជាង ១​ម៉ឺន​ដុល្លារ​អាមេរិក ទឹក​សុទ្ធ​រាប់​រយ​យួរ ម្ហូប​អាហារ​ពី​សំណាក់​ក្រុម​អ្នក​គាំទ្រ​បាតុកម្ម។ មន្ត្រី​បក្ស​សង្គ្រោះ​ជាតិ មិន​ទាន់​បញ្ជាក់​ពី​របៀប​ធ្វើ​បាតុកម្ម និង​ចំនួន​អ្នក​ចូល​រួម​ធ្វើ​បាតុកម្ម​លើក​ទី​២ នៅ​ឡើយ ប៉ុន្តែ​បក្ស​ប្រឆាំង​ប្រកាស​ថា ធ្វើ​តាម​ឆន្ទៈ​រាស្ត្រ។ នៅ​ក្នុង​ពេល​គណបក្ស​សង្គ្រោះ​ជាតិ ប្រកាស​មិន​ទទួល​ស្គាល់​លទ្ធផល​បោះ​ឆ្នោត​នេះ គណបក្ស​ប្រជាជន​កម្ពុជា បាន​ប្រកាស​ថា នឹង​ប្ដេជ្ញា​ការពារ​លទ្ធផល​នៃ​ការ​បោះ​ឆ្នោត​នេះ។

គណបក្ស​ប្រជាជន​ប្រកាស​ការពារ​លទ្ធផល​ឆ្នោត

ស្រប​ពេល​ដែល​គណបក្ស​ប្រឆាំង​ប្រកាស​មិន​ទទួល​ស្គាល់​លទ្ធផល​ឆ្នោត និង​ដាក់​គម្រោង​ធ្វើ​បាតុកម្ម​បន្ត​ទៀត​នោះ គណបក្ស​ប្រជាជន​ក៏​បាន​ប្រកាស​ជំហរ​យ៉ាង​មុត​មាំ​ដើម្បី​ការពារ​លទ្ធផល​ឆ្នោត​នេះ។

សេចក្ដី​ថ្លែងការណ៍​របស់​គណបក្ស​ប្រជាជន​ចេញ​ផ្សាយ​នៅ​ថ្ងៃ​អាទិត្យ ទី​៨ កញ្ញា បាន​ប្រកាស​ភ្លាមៗ​​ក្រោយ​ពី គ.ជ.ប ប្រកាស​លទ្ធផល​ឆ្នោត​ជា​ផ្លូវការ ដោយ​ស្វាគមន៍​លទ្ធផល​ឆ្នោត​ដែល​គណបក្ស​ប្រជាជន​កម្ពុជា ទទួល​បាន ៦៨​អាសនៈ ឈ្នះ​លើ​គណបក្ស​សង្គ្រោះ​ជាតិ ដែល​បាន​ទទួល ៥៥​អាសនៈ ​ក្នុង​ចំណោម​កៅអី​ទាំង ១២៣​របស់​រដ្ឋសភា។

គណបក្ស​ប្រជាជន​បាន​ប្រកាស​ជា​ឱឡារិក​ទទួល​យក​លទ្ធផល​ឆ្នោត​ជា​ផ្លូវការ​នេះ ហើយ​ថែម​ទាំង​ប្ដេជ្ញា​ការពារ​លទ្ធផល​ឆ្នោត​នេះ។

មន្ត្រី​ជាន់​ខ្ពស់​របស់​គណបក្ស​ប្រជាជន និង​ជា​បេក្ខភាព​តំណាងរាស្ត្រ​មណ្ឌល​បាត់ដំបង លោក ឈាង វុន មាន​ប្រសាសន៍​ដោយ​មោទនភាព​ថា គណបក្ស​លោក​មិន​ញញើត​នឹង​ការ​គំរាម​ធ្វើ​បាតុកម្ម​ប្រឆាំង​លទ្ធផល​ឆ្នោត​របស់​គណបក្ស​សង្គ្រោះ​ជាតិ​នោះ​ទេ ហើយ​ថា នេះ​ជា​ការ​ប្រកាស​ដដែលៗ​តាំង​ពី​មុន​បោះ​ឆ្នោត​មក​ម្ល៉េះ។

លោក ឈាង វុន៖ «រាជ​រដ្ឋាភិបាល​កម្ពុជា ត្រូវ​បាន​បង្កើត​ឡើង​ដោយ​រដ្ឋាភិបាល​ឈ្នះ​ឆ្នោត គាត់​មាន​សិទ្ធិ​ចូល​រួម មិន​ចូល​រួម​ចំណែក​ក្នុង​រចនា​សម្ព័ន្ធ​រដ្ឋ​សភា​មែន នៅ​ក្នុង​រចនាសម្ព័ន្ធ​រដ្ឋ​សភា​ត្រូវ​ទទួល​តួនាទី​សភា​របស់​គណបក្ស​សំឡេង​ភាគ​តិច ដើម្បី​អនុវត្ត​លទ្ធិប្រជាធិបតេយ្យ ហើយ​លទ្ធិប្រជាធិបតេយ្យ​ហ្នឹង ត្រូវ​ចង្អុល​ប្រាប់​គណបក្ស​ទាំង​អស់​ក្នុង​សភា​ថា គណបក្ស​ឈ្នះ​ឆ្នោត​ដឹកនាំ​នយោបាយ​ជាតិ ដឹកនាំ​រដ្ឋាភិបាល»

អ្នក​វិភាគ​ឯករាជ្យ លោក​បណ្ឌិត សុខ ទូច មាន​ប្រសាសន៍​ថា ការ​ខ្វែង​គំនិត​គ្នា​លើ​លទ្ធផល​បោះ​ឆ្នោត​នៅ​ពេល​នេះ នឹង​ឈាន​ទៅ​ដល់​ការ​ប្រើប្រាស់​សំឡេង​ប្រជាពលរដ្ឋ​ធ្វើ​ជា​ដំណោះស្រាយ និង​ការ​ប្រើ​ប្រាស់​កម្លាំង​កងទ័ព​ការ​ពារ​ផលប្រយោជន៍​សន្លឹក​ឆ្នោត។

លោក សុខ ទូច៖ «ដូច​នេះ​បង្ហាញ​ពី​ភាព​ទាល់ច្រក​របស់​អ្នក​នយោបាយ ហើយ​អ្នក​នយោបាយ ទាំង​ក្រុមប្រឹក្សា​ធម្មនុញ្ញ ទាំង​ព្រះមហាក្សត្រ ទាំង គ.ជ.ប ក៏​មិន​ចេញ​មុខ​ដោះស្រាយ ហេតុ​នេះ​ហើយ​យើង​ឃើញ​ថា ទិដ្ឋភាព​នយោបាយ​វា​ហាក់​ដូច​ជា​អ្នក​នយោបាយ​គ្មាន​លទ្ធភាព​នឹង​ដោះស្រាយ​ទេ»

ទោះ​យ៉ាង​ណា គណបក្ស​ប្រជាជន​បាន​វាយ​តម្លៃ​ខ្ពស់​ដល់ គ.ជ.ប ដែល​បាន​ជម្នះ​រាល់​ការ​លំបាក​ស្មុគស្មាញ​នានា​ក្នុង​ការ​បំពេញ​តួនាទី​របស់​ខ្លួន​បាន​ល្អ​ប្រសើរ​ដោយ​ប្រកាន់​ភ្ជាប់​នូវ​ជំហរ​ឯករាជ្យ អព្យាក្រឹត និង​តម្លាភាព។

ការ​លើក​សរសើរ​នេះ ក៏​ស្ថិត​នៅ​ចំណុច​ផ្ទុយ​គ្នា​ពី​គណបក្ស​សង្គ្រោះ​ជាតិ​ដែល​តែង​តែ​ចោទ​ប្រកាន់​ស្ថាប័ន គ.ជ.ប នេះ​ថា កំពុង​ធ្វើ​ការ​លម្អៀង​ទៅ​គណបក្ស​កាន់​អំណាច៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖

ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។