ក្រុមការងារប្រតិបត្តិនៃគណបក្សសង្គ្រោះជាតិ ប្រចាំខេត្តព្រះវិហារ កំពុងអំពាវនាវឱ្យមន្ត្រីរដ្ឋាភិបាល និងអង្គការសិទ្ធិមនុស្សក្រៅរដ្ឋាភិបាលនានា ចុះស៊ើបអង្កេតឱ្យបានច្បាស់លាស់ ជុំវិញករណីផ្ទុះគ្រាប់មីនសម្លាប់អ្នកភូមិជាំស្រែ ឃុំយាង ចំនួន ៦នាក់ និងរបួសម្នាក់នោះថា តើវាជាគ្រាប់មីនដែលកប់ក្រោមដីនៅសេសសល់ពីសង្គ្រាមពិតប្រាកដ ឬក៏យ៉ាងណា?
ការអំពាវនាវនេះ ដោយសារតែគេអះអាងថា ក្នុងចំណោមប្រជាពលរដ្ឋចំនួន ៦នាក់ ដែលស្លាប់ដោយសារផ្ទុះមីនប្រឆាំងរថក្រោះ កាលពីថ្ងៃទី១៤ ខែសីហា នោះ គឺមាន ៣នាក់ ជាសកម្មជននយោបាយរបស់គណបក្សសង្គ្រោះជាតិ ប្រចាំឃុំយាង នៃស្រុកជាំក្សាន្ត។
ប្រធានប្រតិបត្តិរបស់គណបក្សសង្គ្រោះជាតិ ប្រចាំខេត្តព្រះវិហារ គឺលោក សឹង សាន់ដេ។ លោកបានមានប្រសាសន៍ថា លោកមានចំណុចសង្ស័យខ្លះៗទៅលើការផ្ទុះមីនប្រឆាំងរថក្រោះនៅក្នុងឃុំយាង ដែលមានសកម្មជននៃគណបក្សរបស់លោក ៣នាក់ បានស្លាប់នោះ អាចមិនមែនជាគ្រាប់មីនចាស់ដែលកប់ក្រោមដីសេសសល់ពីសម័យសង្គ្រាម ក៏ប៉ុន្តែ វាអាចជាចេតនារបស់ជនណាមួយដែលស្អប់ខាងនយោបាយ។
លោក សឹង សាន់ដេ បានបញ្ជាក់ថា អ្វីដែលលោកសង្ស័យ គឺនៅត្រង់ថា កន្លែងដែលផ្ទុះគ្រាប់មីននោះជាផ្លូវដែលប្រជាពលរដ្ឋតែងចេញចូលទៅធ្វើស្រែជាច្រើនឆ្នាំមកហើយ ក៏ប៉ុន្តែ មិនធ្លាប់មានអ្នកណាម្នាក់គ្រោះថ្នាក់ដោយសារគ្រាប់មីនទេ៖ «ខ្ញុំសង្ស័យ បើប្រជាពលរដ្ឋគាត់ដើរទៅមករហូតអីចឹង អត់ដែលមានបញ្ហា ដល់ពេលល្ងាចហ្នឹង ម្ដេចក៏មានបញ្ហាកើតឡើង? អីចឹងសង្ស័យប្រហែលមានគេដាក់ ឬយ៉ាងណា? ខ្ញុំមិនហ៊ានសន្និដ្ឋានការពិតទេ ពីព្រោះយើងមិនបានឃើញទិដ្ឋភាពជាក់ស្ដែង។ សូមអំពាវនាវឱ្យអង្គការសិទ្ធិមនុស្សក្រៅរដ្ឋាភិបាលក៏ដោយ សូមមេត្តាជួយស៊ើបអង្កេតស្រាវជ្រាវករណីហ្នឹងផង ហេតុអ្វីបានជាប្រជាពលរដ្ឋគាត់ទៅធ្វើស្រែរាល់ឆ្នាំ មិនដែលមានបញ្ហាកើតឡើង ស្រាប់តែពេលនេះមានបញ្ហាកើតឡើងដូច្នេះ»។
លោក សឹង សាន់ដេ ក៏បានអំពាវនាវដល់កងយោធា និងក្រុមបោសសម្អាតមីន (CMAC) ឱ្យជួយបោសសម្អាតផងដែរ ប្រសិនបើទីនោះសម្បូរគ្រាប់មីនដែលសេសសល់ពីសង្គ្រាមពិតមែន។
ប្រធានក្រុមការងាររបស់គណបក្សសង្គ្រោះជាតិ ប្រចាំឃុំយាង លោក មាស សាលឿត បានមានប្រសាសន៍ថា ក្នុងចំណោមប្រជាពលរដ្ឋចំនួន ៦នាក់ នៅភូមិជាំស្រែ ដែលស្លាប់ដោយសារផ្ទុះមីនប្រឆាំងរថក្រោះ កាលពីថ្ងៃទី១៤ ខែសីហា កន្លងទៅ មាន ៣នាក់ គឺជាសកម្មជនរបស់លោក ដែលមិនចំហ។ លោក មាស សាលឿត បានបញ្ជាក់ថា បុរស ៣នាក់ ដែលជាសកម្មជនបានស្លាប់នោះ គឺ ឈ្មោះ ឡុង សំបឿន អាយុ ៤៩ឆ្នាំ ឈ្មោះ ថង រ៉ាវុធ អាយុ ៣៧ឆ្នាំ និងម្នាក់ទៀត ឈ្មោះ ស៊ុយ ចាន់ អាយុ ៣៤ឆ្នាំ។
ទោះយ៉ាងណា សមត្ថកិច្ចប្រចាំមូលដ្ឋានបានឱ្យដឹងថា គេមិនបានរកឃើញអ្វីដូចការអះអាងរបស់ក្រុមការងារគណបក្សសង្គ្រោះជាតិ និយាយនោះទេ។
អធិការរងនគរបាលស្រុកជាំក្សាន្ត លោក សៃ ស៊ឹម បានមានប្រសាសន៍ថា លោកបានចុះពិនិត្យ និងស្រាវជ្រាវដល់ក្រុមគ្រួសាររបស់អ្នកស្លាប់ទាំងនោះ ហើយមិនមានអ្នកណាម្នាក់អះអាងថា ក្នុងចំណោមអ្នកស្លាប់ទាំង ៦នាក់ និងរបួសម្នាក់នោះ មានខ្លះ គឺជាសកម្មជនគណបក្សនយោបាយទេ។ លោកអធិការរងដដែលបានបញ្ជាក់ទៀតថា ចំពោះគ្រាប់មីនទៀតសោត ក៏មិនមែនជាមីនដាក់ថ្មីដែរ ពីព្រោះតំបន់ដែលផ្ទុះនោះ គឺជាអតីតសមរភូមិប្រទាញប្រទង់គ្នារវាងកងទ័ពរដ្ឋាភិបាល និងកម្លាំងខ្មែរក្រហមជាយូរមកហើយ៖ «មីនហ្នឹង គឺសល់ពីសម័យសង្គ្រាម កន្លែងហ្នឹង គឺជាតំបន់ប្រទាញប្រទង់ពីសម័យខ្មែរក្រហម។ ចាប់ពីមុនឆ្នាំ១៩៩៣ កន្លែងហ្នឹង គឺទាហានរបស់រដ្ឋាភិបាលផង ជាកន្លែងរបស់ខ្មែរក្រហមផង។ វាមានមីនថ្មីមកពីណា?»។
ប្រភពពីប្រជាពលរដ្ឋផ្សេងទៀត ដែលបានទៅពិនិត្យ បានទទួលស្គាល់ថា កន្លែងដែលផ្ទុះមីននោះ គឺជាផ្លូវដែលប្រជាពលរដ្ឋតែងធ្វើដំណើរ ក៏ប៉ុន្តែ អ្នកភូមិដែលគ្រោះថ្នាក់ដោយសារផ្ទុះមីនកាលពីថ្ងៃទី១៤ ខែសីហា កន្លងទៅ គឺបាននាំគ្នាជិះលើគោយន្ត ១គ្រឿង ធ្វើដំណើរទៅស្រែ ហើយគោយន្តនោះបានផុងស្លុះជ្រៅទៅក្នុងដី បណ្ដាលឱ្យប៉ះចំគ្រាប់មីនចាស់ដែលនៅសេសសល់ពីសម័យសង្គ្រាម ហើយកប់ជ្រៅនៅក្នុងដី។
ទោះយ៉ាងណា អ្នកសម្របសម្រួលរបស់សមាគមការពារសិទ្ធិមនុស្សអាដហុក (ADHOC) ខេត្តព្រះវិហារ លោក ឡោ ច័ន្ទ បានឱ្យដឹងថា អង្គការអាដហុក មានគម្រោងបញ្ជូនអ្នកស៊ើបអង្កេតមួយក្រុមពីទីក្រុងភ្នំពេញ ដើម្បីចុះស្រាវជ្រាវករណីនោះឱ្យបានច្បាស់លាស់។ លោក ឡោ ច័ន្ទ បានបញ្ជាក់ថា លោកក៏មានការសង្ស័យខ្លះៗចំពោះករណីនោះ នៅពេលដែលទទួលព័ត៌មានថា មានអ្នកស្លាប់ខ្លះ គឺជាសកម្មជននៃគណបក្សនយោបាយផងនោះ។
លោក ឡោ ច័ន្ទ៖ «នេះជាការមន្ទិលសង្ស័យរបស់អង្គការសិទ្ធិមនុស្សទេ គឺមានការចាប់អារម្មណ៍យ៉ាងខ្លាំងទៅនឹងករណីនេះ ពីព្រោះវាផ្ទុះកើតឡើងចំសមាជិក ក៏ដូចជាសកម្មជនរបស់គណបក្សសង្គ្រោះជាតិ ស្របពេលដែលថ្មីនេះមានការគំរាមកំហែង ក៏ដូចជាព័ត៌មានក្រៅផ្លូវការដែលអង្គការអាដហុក ខេត្តព្រះវិហារ ទទួលបានថា មានការចង់បណ្ដេញចេញប្រជាពលរដ្ឋ ដែលមាននិន្នាការគណបក្សប្រឆាំងហ្នឹង គឺវាស្របពេលពេក»។
លោក ឡោ ច័ន្ទ បានបញ្ជាក់ទៀតថា ក្រុមការងាររបស់សមាគមការពារសិទ្ធិមនុស្សអាដហុក មានគម្រោងនឹងចុះស៊ើបអង្កេតករណីនេះនៅសប្ដាហ៍ក្រោយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។