ប្រធាននិងអនុប្រធានគណបក្សសង្គ្រោះជាតិ បានទៅធ្វើពិធីសំណេះសំណាលជាមួយសកម្មជន និងប្រជាពលរដ្ឋចូលរួមជាច្រើនពាន់នាក់ នៅភូមិពោធិ៍លើ ឃុំត្រើយស្លា ស្រុកស្អាង ខែត្រកណ្ដាល ពុំមានការរារាំងពីអាជ្ញាធរមូលដ្ឋានដូចកាលពីមុនទៀតទេ។
ប្រធានប្រតិបត្តិខែត្រកណ្ដាល លោក ភួង សុខា មានប្រសាសន៍ថា នៅរសៀលថ្ងៃទី២៦ កុម្ភៈ នេះ លោក សម រង្ស៊ី និងលោក កឹម សុខា បានទៅជួបសំណេះសំណាលជាមួយប្រជាពលរដ្ឋនៅក្នុងឃុំត្រើយស្លា ដើម្បីជម្រាបជូនពីគោលជំហរគណបក្សសង្គ្រោះជាតិ និងការវិវត្តន៍ថ្មីនៃស្ថានភាពនយោបាយឲ្យអ្នកគាំទ្រខ្លួនបានដឹង។ លោក ភួង សុខា បញ្ជាក់ថា មូលហេតុដែលគ្មានការរំខាន ឬរារាំងពីសមត្ថកិច្ចមូលដ្ឋាននេះ ដោយសារលោកបានជួបអភិបាលខែត្រកាលពីថ្ងៃទី២៥ កុម្ភៈ ដើម្បីពិភាក្សាគ្នាអំពីការជួបជុំនេះ។
ការរៀបចំពិធីជួបជុំគ្នារបស់ថ្នាក់ដឹកនាំគណបក្សសង្គ្រោះជាតិ កាលពីថ្ងៃទី២១ មករា ត្រូវបានកងកម្លាំងសមត្ថកិច្ចជាច្រើននាក់ និងមានការរំខាន ដែលមេដឹកនាំគណបក្សសង្គ្រោះជាតិ បានលុបចោលការជួបជុំគ្នានេះវិញ។ ការជួបជុំនៅថ្ងៃទី២៦ កុម្ភៈ នេះ ស្ថិតនៅក្នុងឃុំត្រើយស្លា ដដែល តែនៅទីតាំងខុសគ្នា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។