ប៉ុន្តែ សំណើរបស់បក្សប្រឆាំងនោះ ត្រូវបានតំណាង គ.ជ.ប បដិសេធ ដែលជាហេតុធ្វើឱ្យបក្សប្រឆាំងយល់ថា វាមានភាពអាថ៌កំបាំងនៅពីក្រោយករណីនេះ។
ការផ្ទៀងផ្ទាត់រាប់សំឡេងឆ្នោតនៅទីស្នាក់ការរបស់ គ.ជ.ប នៅថ្ងៃទី១៦ សីហា បានជួបប្រទះការមិនចុះសម្រុងគ្នា រវាងតំណាងគណបក្សសង្គ្រោះជាតិ ជាមួយតំណាង គ.ជ.ប ជាថ្មីម្តងទៀត ហើយគណបក្សសង្គ្រោះជាតិ បានច្រានចោលលទ្ធផលបោះឆ្នោតបណ្ដោះអាសន្ន និងទាមទារឲ្យមានការបង្កើតក្រុមស៊ើបអង្កេតឯករាជ្យមួយជាបន្ទាន់។
កាលពីថ្ងៃទី១៥ សីហា កន្លងទៅ គណបក្សសង្គ្រោះជាតិ បានធ្វើពហិការមិនចូលរួមក្នុងករណីដោះស្រាយបណ្ដឹង ចំពោះខេត្តក្រចេះ ម្តងហើយ។ នៅថ្ងៃទី១៦ សីហា គឺជាករណីដោះស្រាយបណ្ដឹងនៅខេត្តចំនួនបីទៀត គឺខេត្តបាត់ដំបង សៀមរាប និងខេត្តកណ្ដាល ក៏នៅតែមានករណីមិនចុះសម្រុងគ្នាដែរ ត្រង់ថា ខាងគណបក្សសង្គ្រោះជាតិ បានស្នើសុំឱ្យខាង គ.ជ.ប ផ្ទៀងផ្ទាត់ឡើងវិញចំពោះទម្រង់ ១១០២ ១១០៤ និង ១១០៨ ប៉ុន្តែខាង គ.ជ.ប បានយកតែទម្រង់ ១១០២ និង ១១០៤ មកផ្ទៀងផ្ទាត់តែប៉ុណ្ណោះ។ មិនតែប៉ុណ្ណោះ ខាងបក្សសង្គ្រោះជាតិ ក៏បានស្នើសុំឱ្យ គ.ជ.ប បើកកញ្ចប់សុវត្ថិភាព "ក" ប៉ុន្តែនៅតែមិនមានការយល់ព្រមពីខាង គ.ជ.ប ឡើយ។
អ្នកនាំពាក្យគណបក្សសង្គ្រោះជាតិ លោក យឹម សុវណ្ណ បានមានប្រសាសន៍ថា គណបក្សសង្គ្រោះជាតិ បានធ្វើការស្នើសុំឱ្យ គ.ជ.ប យកទម្រង់ ១១០២ និង ១១០៨ ដែលនៅក្នុងកញ្ចប់មកធ្វើការផ្ទៀងផ្ទាត់ ប៉ុន្តែ គ.ជ.ប បានបដិសេធ។ លោកបន្តថា ខាងគណបក្សលោកបានស្នើសុំឱ្យ គ.ជ.ប បើកសវនាការមួយ ដើម្បីដោះស្រាយឱ្យចំបញ្ហា ដើម្បីរក្សាភាពត្រឹមត្រូវ និងយុត្តិធម៌ មិនមែនគ្រាន់តែផ្ទៀងផ្ទាត់នោះទេ។
លោក យឹម សុវណ្ណ៖ «ឈ្មោះប៉ោង ឈ្មោះស្ទួនរាប់ម៉ឺនរាប់សែននាក់ ដែលយើងដាក់ភស្តុតាងទាំងជុងៗ អត់យកមកដោះស្រាយបញ្ហាទេ តែឈ្លេចយកបញ្ហាដ៏តូចមួយមកធ្វើ រួចយកមកចាក់ប្រព័ន្ធផ្សព្វផ្សាយ ដើម្បីបំភាន់មតិសាធារណៈជាតិ និងអន្តរជាតិ ថាបានដោះស្រាយរួចហើយ»។
ជាងនេះទៅទៀត លោកបានបញ្ជាក់ថា ប្រសិនបើ គ.ជ.ប គ្មានអ្វីដែលអាថ៌កំបាំងនោះទេ គ.ជ.ប ត្រូវតែដោះស្រាយរាល់បណ្ដឹងដែលមានទាំងអស់ឱ្យចំបញ្ហា មិនមែនគ្រាន់តែធ្វើឱ្យតែល្អមើលនោះទេ។ លោកក៏បានបន្តថា ក្នុងនាមគណបក្សសង្គ្រោះជាតិ ដែលចូលរួមនៅក្នុងឱកាសនេះ គឺគ្រាន់តែចូលរួមដើម្បីបង្ហាញថា គណបក្សសង្គ្រោះជាតិ គឺជនរងគ្រោះ។
បេក្ខជនតំណាងរាស្ត្រខេត្តកណ្ដាល លោក អេង ឆៃអ៊ាង បានឱ្យដឹងថា គ.ជ.ប ត្រូវមានចំណាត់ការចំពោះករណីរាប់សន្លឹកឆ្នោតមិនបានការឡើងវិញ ពីព្រោះនៅក្នុងការិយាល័យខ្លះមានសន្លឹកឆ្នោតមិនបានការទាំងនោះច្រើនជាងធម្មតា។ មិនតែប៉ុណ្ណោះ ការផ្ទៀងផ្ទាត់នៅក្នុងខេត្តកណ្ដាល គឺមិនមានគ្រប់ ១៩៩ការិយាល័យនោះទេ ដោយមានបាត់ការិយាល័យមួយចំនួន៖ «ហើយបាត់ការិយាល័យ ៨ទៀត នៅសង្កាត់តាខ្មៅ ហើយដោយសារអ្វី គឺដោយសារនៅសង្កាត់តាខ្មៅ ហ្នឹង អត់មានទម្រង់ ១១០៨»។
ចំពោះការផ្ទៀងផ្ទាត់ចំពោះភាពមិនប្រក្រតីនេះ លោក ទេព នីថា បានឱ្យដឹងថា គ.ជ.ប បានអនុវត្តទៅតាមនីតិវិធីតែប៉ុណ្ណោះ ហើយការប្រព្រឹត្តទៅដោយភាពល្អប្រសើរ។ លោកបន្តថា ចំពោះនៅខេត្តកណ្ដាល គឺនៅមានខ្វះ ៨ការិយាល័យ ដែលមិនទាន់បានផ្ទៀងផ្ទាត់៖ «ការផ្ទៀងផ្ទាត់ជារួម យើងទទួលបានលទ្ធផលល្អ។ ការផ្ទៀងផ្ទាត់នៅខេត្តកណ្ដាល នេះ គឺជាការផ្ទៀងផ្ទាត់ទម្រង់ ១១០២ និងទម្រង់ ១១០៨។ ការផ្ទៀងផ្ទាត់នេះ គឺនៅសល់ ៨ការិយាល័យចុងក្រោយ គឺនៅទម្រង់ ១១០៨ នៅក្នុងកញ្ចប់»។
លោកក៏បានបន្ថែមទៀតថា ខាង គ.ជ.ប ផ្ទៀងផ្ទាត់ទម្រង់បណ្ដឹងទាំងអស់ទៅតាមអ្វីដែលខាងគណបក្សសង្គ្រោះជាតិ បានដាក់ជូន ប៉ុន្តែមិនអាចធ្វើការស្នើសុំអ្វីដែលមិនមាននៅក្នុងពាក្យបណ្ដឹងនោះទេ។ លោកបានបន្តទៀតថា ចំពោះកញ្ចប់សុវត្ថិភាព "ក" ខាង គ.ជ.ប អាចបើកបាននៅក្នុងករណីដែលមានបណ្ដឹងធ្ងន់ធ្ងរ រហូតឈានទៅដល់ការបោះឆ្នោតឡើងវិញ ទើបខាង គ.ជ.ប អាចបើកបាន៖ «ហើយនៅក្នុងកញ្ចប់សុវត្ថិភាព "ក" ហ្នឹង មានទីមួយ គឺមានសន្លឹកឆ្នោតដែលនៅសល់ សន្លឹកឆ្នោតដែលបោះហើយ មានបញ្ជីឈ្មោះដែលបោះហើយ មានទម្រង់ ១១០១ ១១០២ និង ១១០៨ នៅក្នុងហ្នឹង ហើយមានត្រាសម្ងាត់ មានឯកសារជាច្រើនទៀតនៅក្នុងនេះ»។
ទោះបីយ៉ាងណាក៏ដោយ ក៏ លោក យឹម សុវណ្ណ នៅតែអះអាងថា ការប្រព្រឹត្តទៅនៃការផ្ទៀងផ្ទាត់ចំពោះខេត្តទាំងបី នៅថ្ងៃទី១៦ សីហា នៅតែមិនអាចចុះសម្រុងគ្នាបានដដែល។ ដោយខាងគណបក្សសង្គ្រោះជាតិ សូមឱ្យសមាជិកខាង គ.ជ.ប ទាំង ៩រូប ឱ្យមកដោះស្រាយនៅចំពោះមុខគណបក្សសង្គ្រោះជាតិ ដើម្បីស្វែងរកដំណោះស្រាយសមស្រប។
ជាងនេះទៅទៀត នៅថ្ងៃទី១៦ សីហា នេះដែរ គណបក្សសង្គ្រោះជាតិ ក៏បានចេញសេចក្តីថ្លែងការណ៍មួយ ដោយសូមឱ្យបង្កើតក្រុមស៊ើបអង្កេតឯករាជ្យមួយជាបន្ទាន់ ដើម្បីធ្វើការស្រាវជ្រាវរាល់ភាពមិនប្រក្រតីនៃការបោះឆ្នោត និងស្នើសុំដោយទទូច ឱ្យ គ.ជ.ប បើកកញ្ចប់សុវត្ថិភាព "ក" ដើម្បីឱ្យមានការផ្ទៀងផ្ទាត់នូវភាពមិនប្រក្រតីនៃទម្រង់លេខ ១១០៤ ជាមួយទម្រង់លេខ ១១០២ និង ១១០៨ ឱ្យបានត្រឹមត្រូវ ដើម្បីការពារឆន្ទៈពិតប្រាកដរបស់ប្រជាពលរដ្ឋខ្មែរដែលជាម្ចាស់ឆ្នោត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។