អនុប្រធានគណបក្សសង្គ្រោះជាតិ លោក កឹម សុខា បានថ្លែងកាលពីថ្ងៃទី២៣ មេសា ថា គណបក្សសង្គ្រោះជាតិ នឹងបន្តការចរចាជាមួយគណបក្សប្រជាជនកម្ពុជា ថ្នាក់បច្ចេកទេសបន្តទៀត។
លោក កឹម សុខា មានប្រសាសន៍ពីសហរដ្ឋអាមេរិកមកថា គណបក្សសង្គ្រោះជាតិ នឹងមិនចរចាតាមទូរស័ព្ទជាមួយលោក ហ៊ុន សែន ទៀតឡើយ។ លោកអះអាងថា តំណាងគណបក្សសង្គ្រោះជាតិ នឹងជួបតំណាងគណបក្សប្រជាជនកម្ពុជា ដើម្បីពិនិត្យមើលកិច្ចព្រមព្រៀងកាលពីមុនបន្តទៀត។
លោក កឹម សុខា៖ «យើងត្រូវរៀបចំរបៀបវារៈដើម្បីជជែកគ្នា ពិនិត្យនូវសេចក្ដីព្រាងកាលលើកមុនឡើងវិញមើល តើមានស្អីដែលយើងអាចជជែកគ្នាបានតទៅទៀត»។
លោក សម រង្ស៊ី ជាប្រធានគណបក្សសង្គ្រោះជាតិ និងលោក ហ៊ុន សែន អនុប្រធានគណបក្សប្រជាជនកម្ពុជា បានបរាជ័យក្នុងការចរចាតាមទូរស័ព្ទ កាលពីថ្ងៃទី៩ មេសា ខណៈលោក កឹម សុខា អវត្តមានក្នុងប្រទេសកម្ពុជា។ ក៏ប៉ុន្តែមេដឹកនាំគណបក្សទាំងពីរបានអះអាងថា នឹងធ្វើការចរចាទៀតនៅក្រោយពេលមេដឹកនាំគណបក្សសង្គ្រោះជាតិ ត្រឡប់ពីក្រៅប្រទេសវិញ។ លោក កឹម សុខា នឹងមកដល់ប្រទេសកម្ពុជា វិញ នៅយប់ថ្ងៃច័ន្ទ ទី២៨ មេសា ខាងមុខ។
ស្នើសុំទីលានប្រជាធិបតេយ្យឃោសនាបោះឆ្នោតក្រុមប្រឹក្សា
ទន្ទឹមគ្នានេះ គណបក្សសង្គ្រោះជាតិ បានដាក់លិខិតទៅសាលារាជធានីភ្នំពេញ ស្នើសុំទីលានប្រជាធិបតេយ្យ ឬសួនខាងត្បូងវត្តបទុមវតី ដើម្បីជួបជុំធ្វើការឃោសនាបោះឆ្នោតជ្រើសរើសក្រុមប្រឹក្សារាជធានី ខណ្ឌ នៃរាជធានីភ្នំពេញ។ គណៈកម្មាធិការប្រតិបត្តិរាជធានីភ្នំពេញ នៃគណបក្សសង្គ្រោះជាតិ លោក ម៉ន ផល្លា សរសេរក្នុងលិខិតចុះថ្ងៃទី២៣ មេសា ថា គណបក្សសង្គ្រោះជាតិ នឹងធ្វើការជួបជុំតំណាងរាស្ត្រសមាជិក សមាជិកា ក្រុមប្រឹក្សារាជធានី ប្រឹក្សាខណ្ឌ និងសង្កាត់ សកម្មជន និងប្រជាពលរដ្ឋប្រមាណពី ៣ ទៅ ៥ពាន់នាក់ នៅថ្ងៃទី២ ឧសភា ពីម៉ោង ៧ព្រឹក ដល់ម៉ោង ៩យប់។ លោក ម៉ន ផល្លា ក៏បានស្នើសុំការជួបជុំស្រដៀងគ្នានេះដែរ នៅពេលក្រោយៗទៀត ក្នុងយុទ្ធនាការនៃការបោះឆ្នោត។
យុទ្ធនាការឃោសនាបោះឆ្នោតមានរយៈពេល ១៥ថ្ងៃ នឹងចាប់ផ្ដើមពីថ្ងៃទី២ ដល់ថ្ងៃទី១៦ ឧសភា ឆ្នាំ២០១៤។ ចំណែកកាលបរិច្ឆេទនៃការបោះឆ្នោតជ្រើសរើសសមាជិកក្រុមប្រឹក្សារាជធានី ខេត្ត និងក្រុង ស្រុក ខណ្ឌ អាណត្តិទី២ នឹងចាប់ផ្ដើមនៅថ្ងៃអាទិត្យ ទី១៨ ខែឧសភា ឆ្នាំ២០១៤។
មន្ត្រីសាលារាជធានីភ្នំពេញ នៅមិនទាន់បានឆ្លើយតបនឹងសំណើគណបក្សសង្គ្រោះជាតិ នៅឡើយទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។