គណបក្សសង្គ្រោះជាតិ បានអះអាងថា គណបក្សប្រជាជនកម្ពុជា កំពុងតែបំផ្លាញការចរចាជាមួយគ្នាតាមរយៈការបើកឲ្យសកម្មជនរបស់ខ្លួនតាមខែត្រមួយចំនួនអុកឡុកមេដឹកនាំគណបក្សសង្គ្រោះជាតិ នៅពេលធ្វើពិធីជួបជុំជាមួយប្រជាពលរដ្ឋ។ គណបក្សសង្គ្រោះជាតិ បានចាត់ទុកសកម្មភាពនេះថា ជាសកម្មភាពចាប់បង្ខំក្នុងការចរចា។
មេដឹកនាំគណបក្សសង្គ្រោះជាតិ បានប្រកាសព្រមានថា គណបក្សសង្គ្រោះជាតិនឹងផ្អាកការចរចាជាមួយគណបក្សប្រជាជនកម្ពុជា ជាបណ្ដោះអាសន្ន ប្រសិនបើគណបក្សប្រជាជនកម្ពុជា នៅតែរំខាន ឬអុកឡុកកម្មវិធីជួបជុំជាមួយប្រជាពលរដ្ឋរបស់គណបក្សសង្គ្រោះជាតិនោះ។
លោក សម រង្ស៊ី ប្រធានគណបក្សសង្គ្រោះជាតិ មានប្រសាសន៍នៅក្នុងសន្និសីទសារព័ត៌មាននៅថ្ងៃទី២០ កុម្ភៈ នៅមុនពេលលោក និងលោក កឹម សុខា ចុះទៅជួបប្រជាពលរដ្ឋនៅខែត្រកំពង់ឆ្នាំងថា ប្រសិនបើលោក និងលោក កឹម សុខា គ្មានសេរីភាពក្នុងការជួបជាមួយម្ចាស់ឆ្នោតនៅខែត្រកំពង់ឆ្នាំងទេ លោកនឹងលុបចោលការចរចាជាមួយគណបក្សប្រជាជនកម្ពុជាវិញ។
ការប្រកាសព្រមានរបស់លោក សម រង្ស៊ី នោះ គឺនៅបន្ទាប់ពីលោក និងលោក កឹម សុខា ជាអនុប្រធានគណបក្សសង្គ្រោះជាតិ មិនបានជួបសំណេះសំណាលជាមួយប្រជាពលរដ្ឋនៅខែត្រព្រៃវែង កាលពីថ្ងៃទី១៩ កុម្ភៈ បានចប់សព្វគ្រប់ ដោយសារមានការរំខានពីអ្នកគាំទ្រគណបក្សប្រជាជនកម្ពុជា និងមានសមត្ថកិច្ចមួយរូបអាម៉េកាំភ្លើងភ្ជង់គំរាមកំហែងទៀត។
នៅក្នុងសន្និសីទសារព័ត៌មាននោះ គណបក្សសង្គ្រោះជាតិបានចាក់ខ្សែវីដេអូ អំពីសកម្មភាពរំខាននិងអុកឡុកពីអ្នកគាំទ្រគណបក្សប្រជាជនកម្ពុជា ឲ្យអ្នកកាសែតមើលពីសកម្មភាពទាំងនោះដែរ។
អនុប្រធានគណបក្សសង្គ្រោះជាតិ លោក កឹម សុខា បានហៅការចរចាជាមួយគណបក្សប្រជាជនកម្ពុជានេះ ថាជាការចរចាចាប់បង្ខំ ពីព្រោះថា គណបក្សប្រជាជនកម្ពុជា បានបង្កើតបញ្ហាគំរាមកំហែងរហូតនៅពេលមានការចរចា។ លោកបានលើកពីករណីបាញ់សម្លាប់នៅស្ពានក្បាលថ្នល់ និងករណីបាញ់ស្ត្រីលក់បាយនៅស្ពានស្ទឹងមានជ័យ ជាដើម។
ប្រធានក្រុមដឹកនាំការចរចាតំណាងឲ្យគណបក្សប្រជាជនកម្ពុជា លោក ព្រុំ សុខា មានប្រសាសន៍ថា ដំណោះស្រាយដែលល្អនោះ គឺការចរចា។ លោកបញ្ជាក់ថា គណបក្សប្រជាជនកម្ពុជា មិនបានប្រើយុទ្ធសាស្ត្រចាប់បង្ខំឲ្យគណបក្សសង្គ្រោះជាតិចូលចរចាអ្វីទេ។
លោក ព្រុំ សុខា បញ្ជាក់ថា ឥឡូវនេះ ខាងគណបក្សប្រជាជនកម្ពុជា និងគណបក្សសង្រ្គោះជាតិ កំពុងពិភាក្សាអំពីសមាសភាពគណៈកម្មការចម្រុះ តែការជួបគ្នាជាថ្មីនោះ មិនទាន់កំណត់កាលបរិច្ឆេទនៅឡើយ។
លោក កឹម សុខា បានបញ្ជាក់ថា មូលហេតុដែលថ្នាក់ដឹកនាំគណបក្សសង្គ្រោះជាតិចុះទៅតាមខែត្រនីមួយៗនោះ ដោយសារតែគណបក្សសង្គ្រោះជាតិគ្មានទូរទស្សន៍ផ្សព្វផ្សាយដូចគណបក្សប្រជាជនកម្ពុជា ដូច្នេះគណបក្សសង្គ្រោះជាតិ ត្រូវតែចុះជួបប្រជាពលរដ្ឋ ដើម្បីផ្សព្វផ្សាយពីការវិវឌ្ឍន៍នយោបាយ និងដំណើរការនៃការចរចាជាដើម។
សាស្ត្រាចារ្យច្បាប់នៃមហាវិទ្យាល័យនីតិសាស្ត្រ និងវិទ្យាសាស្ត្រសេដ្ឋកិច្ច លោកសាស្ត្រាចារ្យ ប៊ុន សេង មានប្រសាសន៍ថា នៅក្នុងស្ថានភាពនយោបាយដូចនេះ គណបក្សទាំងពីរត្រូវតែបន្ទន់ឥរិយាបថរៀងៗខ្លួន ដើម្បីឈានទៅដល់ការចរចាទទួលបានជោគជ័យ។ លោកបញ្ជាក់ថា គណបក្សប្រជាជនកម្ពុជា ឬអាជ្ញាធរមូលដ្ឋាន ត្រូវតែបញ្ចប់ការរំខានយាយី បើកទូលាយឲ្យគណបក្សសង្គ្រោះជាតិ ជួបជុំគ្នាបានសេរីឡើងវិញ។
អ្នកវិភាគបានលើកឡើងថា ទោះបីនៅក្នុងស្ថានភាពបែបណាក៏ដោយ គណបក្សសង្គ្រោះជាតិ មិនត្រូវបញ្ឈប់ការចរចានោះទេ ផ្ទុយទៅវិញ សកម្មភាពរំខានយាយីណាមួយពីសកម្មជនគណបក្សប្រជាជនកម្ពុជានោះ គឺកាន់តែធ្វើឲ្យគណបក្សនេះថយប្រជាប្រិយភាពរបស់ខ្លួនទៅវិញទេ។
ការជួបសំណេះសំណាលរបស់ថ្នាក់ដឹកនាំគណបក្សសង្គ្រោះជាតិ លោក សម រង្ស៊ី និងលោក កឹម សុខា ជាមួយអ្នកគាំទ្រនៅខេត្តកំពង់ឆ្នាំង ពុំមានបញ្ហាប្រឈមខ្លាំងទេ នៅរសៀលថ្ងៃទី២០ ខែកុម្ភៈ បើទោះជាមានកងកម្លាំងអាជ្ញាធរជាច្រើនត្រូវដាក់ពង្រាយក្នុងខេត្តនេះក្តី។ មេបក្សប្រឆាំងទាំងពីរ បានថ្លែងទៅកាន់អ្នកគាំទ្ររបស់ខ្លួនជិត ៣ពាន់នាក់ថា គណបក្សសង្គ្រោះជាតិនៅតែរក្សាជំហរក្នុងការទាមទារឲ្យមានការស៊ើបអង្កេត ឬបោះឆ្នោតឡើងវិញមុនអាណត្តិ ហើយបញ្ជាក់ថា ការចរចាលើកទី២នេះ គឺគ្រាន់តែជាការចរចាផ្នែកបច្ចេកទេស ដើម្បីកែទម្រង់ការបោះឆ្នោត មិនមែនជាចរចារឿងនយោបាយនោះឡើយ។
សូមស្ដាប់សេចក្ដីរាយការណ៍ផ្ទាល់របស់លោក ជិន ជេដ្ឋា ពីខេត្តកំពង់ឆ្នាំង ដូចតទៅ៖
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។