លទ្ធផល​បោះ​ឆ្នោត​បឋម​ក្រៅ​​ផ្លូវ​ការ​របស់​ខុមហ្វ្រែល

0:00 / 0:00

លទ្ធផល​ជឋម និង​មិន​ផ្លូវការ​នៃ​ការ​បោះ​ឆ្នោត​​ជ្រើសរើស​តំណាង​រាស្ត្រ​អាណត្តិ​ទី​៥ ដែល​​ចេញ​ផ្សាយ​ដោយ​​គណៈកម្មាធិការ​ជាតិ​ដើម្បី​ការ​បោះ​ឆ្នោត​ដោយ​សេរី និង​​យុត្តិធម៌​នៅ​កម្ពុជា ហៅ​កាត់​ថា ខុមហ្វ្រែល (Comfrel) បាន​បង្ហាញ​ថា នៅ​ក្នុង​ចំនួន ១២៣​កៅអី ឬ​អាសនៈ​ក្នុង​រដ្ឋ​សភា គណបក្ស​ប្រជាជន​កម្ពុជា ទទួល​បាន ៦៧​អាសនៈ ខណៈ​ដែល​គណបក្ស​សង្គ្រោះ​ជាតិ ទទួល​បាន ៥៦​អាសនៈ។

នៅ​ក្នុង​នោះ ខេត្ត​ដែល​​គណបក្ស​ទាំង​ពីរ​ទទួល​​បាន​អាសនៈ​ស្មើ​គ្នា​រួម​មាន ខេត្ត​កំពង់ឆ្នាំង មាន​ទាំង​អស់ ៤​អាសនៈ ហើយ​គណបក្ស​ទាំង​ពីរ​ទទួល​បាន ២​អាសនៈ​ដូច​គ្នា។ ខេត្ត​កំពង់ស្ពឺ មាន ៦​អាសនៈ ហើយ​គណបក្ស​ទាំង​ពីរ​ទទួល​បាន ៣​អាសនៈ​ម្នាក់។ ខេត្ត​កំពត មាន ៦​អាសនៈ​ហើយ​គណបក្ស​ទាំង​ពីរ​ទទួល​បាន​ម្នាក់ ៣​អាសនៈ។ ខេត្ត​កំពង់ធំ មាន ៦​អាសនៈ​ គណបក្ស​ទាំង​ពីរ​ទទួល ៣​អាសនៈ​ដូច​គ្នា និង​ខេត្ត​តាកែវ មាន ៨​អាសនៈ គណបក្ស​ទាំង​ពីរ​ទទួល​បាន ៤​អាសនៈ​ដូច​គ្នា។

ចំណែក​ឯ​ខេត្ត​ដែល​គណបក្ស​ប្រជាជន​កម្ពុជា ឈ្នះ​​​គណបក្ស​សង្គ្រោះ​ជាតិ រួម​មាន ខេត្ត​បន្ទាយមានជ័យ ខេត្ត​បាត់ដំបង ខេត្ត​សៀមរាប និង​ខេត្ត​ពោធិ៍សាត់។

ខេត្ត​បន្ទាយមានជ័យ មាន ៦​អាសនៈ ហើយ​គណបក្ស​ប្រជាជន​កម្ពុជា ទទួល​បាន ៤​អាសនៈ និង​គណបក្ស​​សង្គ្រោះ​ជាតិ ទទួល​បាន ២​អាសនៈ។ ខេត្ត​បាត់ដំបង មាន ៨​អាសនៈ ហើយ​គណបក្ស​ប្រជាជន​កម្ពុជា ទទួល​បាន ៥​អាសនៈ និង​គណបក្ស​សង្គ្រោះ​ជាតិ ទទួល​បាន ៣​អាសនៈ។

ខេត្ត​ពោធិ៍សាត់​មាន ៤​អាសនៈ ហើយ​គណបក្ស​ប្រជាជន​កម្ពុជា ទទួល​បាន ៣​អាសនៈ និង​គណបក្ស​សង្គ្រោះជាតិ ទទួល​បាន ១​អាសនៈ។ ខេត្ត​សៀមរាប មាន​ទាំង​អស់ ៦​អាសនៈ គណបក្ស​ប្រជាជន​កម្ពុជា ទទួល​បាន ៤​អាសនៈ និង​គណបក្ស​សង្គ្រោះ​ជាតិ ទទួល​បាន ២​អាសនៈ និង​ចុង​ក្រោយ​គេ​ខេត្ត​ស្វាយរៀង មាន ៥​អាសនៈ​ ហើយ​គណបក្រ​ប្រជាជន​កម្ពុជា ទទួល​បាន ៣​អាសនៈ និង​គណបក្ស​សង្គ្រោះ​ជាតិ​ទទួល​បាន ២​អាសនៈ។

បន្ថែម​លើ​នេះ ​ខេត្ត​ដែល​គណបក្ស​ប្រជាជន​កម្ពុជា ឈ្នះ​​​ដាច់​គណបក្ស​សង្គ្រោះ​ជាតិ រួម​មាន​ខេត្ត​កោះកុង ខេត្ត​មណ្ឌលគិរី ខេត្ត​ព្រះវិហារ ខេត្ត​រតនគិរី ខេត្ត​ព្រះសីហនុ ខេត្ត​ស្ទឹងត្រែង ខេត្ត​ឧត្តរមានជ័យ ខេត្ត​កែប និង​ខេត្ត​ប៉ៃលិន ដែល​ខេត្ត​ទាំង​នេះ​មាន ១​អាសនៈ​ដូចៗ​គ្នា ហើយ​ត្រូវ​បាន​​ឈ្នះ​ដោយ​គណបក្ស​ប្រជាជន​កម្ពុជា ទាំង​អស់។

ដោយ​ឡែក​ខេត្ត-​ក្រុង ​ដែល​គណបក្ស​សង្គ្រោះ​ជាតិ​ឈ្នះ​​គណបក្ស​ប្រជាជន​កម្ពុជា រួម​មាន ខេត្ត​កំពង់ចាម ខេត្ត​កណ្ដាល រាជធានី​ភ្នំពេញ ខេត្ត​ព្រៃវែង និង​ខេត្ត​ក្រចេះ។ ខេត្ត​កំពង់ចាម មាន ១៨​អាសនៈ ហើយ​គណបក្ស​សង្គ្រោះ​ជាតិ​ទទួល​បាន ១០​អាសនៈ និង​គណបក្ស​ប្រជាជន​កម្ពុជា ទទួល​បាន ៨​អាសនៈ។ ខេត្ត​កណ្ដាល​មាន ១១​អាសនៈ ហើយ​គណបក្ស​សង្គ្រោះ​ជាតិ ទទួល​បាន ៦​អាសនៈ និង​គណបក្ស​ប្រជាជន​កម្ពុជា ទទួល​បាន ៥​អាសនៈ។ រាជធានី​ភ្នំពេញ មាន ១២​អាសនៈ ហើយ​គណបក្ស​សង្គ្រោះ​ជាតិ​ទទួល​បាន ៧​អាសនៈ និង​គណបក្រ​ប្រជាជន​ទទួល​បាន ៥​អាសនៈ។

ខេត្ត​ព្រៃវែង មាន ១១​អាសនៈ គណបក្ស​សង្គ្រោះ​ជាតិ​ទទួល​បាន ៦​អាសនៈ និង​គណបក្ស​ប្រជាជន​កម្ពុជា ទទួល​បាន ៥​អាសនៈ និង​ខេត្ត​ក្រចេះ មាន ៣​អាសនៈ ហើយ​នៅ​ក្នុង​លទ្ធផល​ក្រៅ​ផ្លូវ​ការ​របស់​អង្គការ​​ខុមហ្រ្វែល គណបក្ស​សង្គ្រោះ​ជាតិ ទទួល​បាន ២​អាសនៈ និង​គណបក្ស​ប្រជាជន​កម្ពុជា ទទួល​បាន ១​អាសនៈ។

​កាល​ពី​ការ​បោះ​ឆ្នោត​ជ្រើសតាំង​តំណាង​អាណត្តិ​ទី​៤ គណបក្ស​ប្រជាជន​កម្ពុជា ទទួល​បាន ៩០​អាសនៈ គណបក្ស សម រង្ស៊ី ទទួល​បាន ២៦​អាសនៈ គណបក្ស​សិទ្ធិ​មនុស្ស ទទួល​បាន ៣​អាសនៈ គណបក្ស​ហ៊្វុនស៊ិនប៉ិច ទទួល​បាន ២​អាសនៈ និង​គណបក្ស នរោត្តម រណឫទ្ធិ ទទួល​បាន ២​អាសនៈ។

បើ​ប្រៀប​ធៀប​ការ​បោះឆ្នោត​ជ្រើសតាំង​តំណាង​រាស្ត្រ​អាណត្តិ​ទី​៤​ និង​ការ​បោះ​ឆ្នោត​ជ្រើសតាំង​តំណាងរាស្ត្រ​អាណត្តិ​ទី​៥ គណបក្ស​ប្រជាជន​កម្ពុជា បាត់បង់​អាសនៈ​ចំនួន ២៣ គណបក្ស​ហ៊្វុនស៊ិនប៉ិច មិន​បាន​ទទួល​អាសនៈ និង​គណបក្ស​សង្គ្រោះ​ជាតិ​ដែល​កើត​ឡើង​ក្រោយ​ការ​រួម​បញ្ចូល​គ្នា​របស់​គណបក្ស សម រង្ស៊ី​ និង​គណបក្ស​សិទ្ធិ​មនុស្ស​ កើន​ឡើង​បាន ២៧​អាសនៈ ពី ២៩​អាសនៈ​នៃ​ចំនួន​អាសនៈ​របស់​​​គណបក្ស សម រង្ស៊ី​ និង​គណបក្ស​សិទ្ធិ​មនុស្ស នៅ​ក្នុង​អាណត្តិ​ទី​៤។

ក្រៅ​ពី​នេះ​ គណបក្ស​សង្គ្រោះ​ជាតិ​មាន​អាសនៈ​ច្រើន​ជាង​គណបក្ស​ប្រជាជន​កម្ពុជា ក្នុង​ខេត្ត-ក្រុង​ចំនួន​៥ ដែល​ជា​កន្លែង​ដែល​គណបក្ស​ប្រជាជន​កម្ពុជា ធ្លាប់​មាន​អាសនៈ​ច្រើន​ជាង​គេ​​​នៅ​ក្នុង​អាណត្តិ​ទី​៤។ នេះ​បើ​តាម​លទ្ធផល​បឋម និង​ក្រៅ​ផ្លូវការ​របស់​អង្គការ​ខុមហ្វ្រែល៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖

ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។