បក្ស​ប្រឆាំង​រិះគន់​សវនាការ​របស់​ក្រុម​ប្រឹក្សា​ធម្មនុញ្ញ​នៅ​មណ្ឌល​ខេត្ត​សៀមរាប

ក្រុម​ប្រឹក្សា​ធម្មនុញ្ញ បើក​សវនាការ​បណ្ដឹង​តវ៉ា​របស់​គណបក្ស​សង្គ្រោះ​ជាតិ មណ្ឌល​ខេត្ត​សៀមរាប ដោយ​កាត់​ក្តី​តម្រូវ​ឲ្យ​គណៈកម្មាធិការ​ជាតិ​រៀប​ចំ​ការ​បោះ​ឆ្នោត (គ.ជ.ប) ដាក់​ទោស​មន្ត្រី​ក្រោម​ឱវាទ​ខ្លួន​ចំនួន ៧​ការិយាល័យ ដែល​អនុវត្ត​ការងារ​ខុស​នីតិវិធី​បោះ​ឆ្នោត។ គណបក្ស​សង្គ្រោះ​ជាតិ បាន​ខក​ចិត្ត និង​រិះគន់​ចំពោះ​ការ​សម្រេច​ក្តី​នេះ​ថា មិន​អព្យាក្រិត និង​មិន​ឯករាជ្យ។

0:00 / 0:00

អ្នកស្រី កែ សុវណ្ណរតន៍ តំណាង​គណបក្ស​សង្គ្រោះ​ជាតិ នៅ​មណ្ឌល​ខេត្តសៀមរាប បាន​ខក​ចិត្ត​ចំពោះ​សម្រេច​ក្តី​របស់​ក្រុម​ប្រឹក្សា​ធម្មនុញ្ញ ទៅ​លើ​បណ្ដឹង​ជុំវិញ​ភាព​មិន​ប្រក្រតី​នៃ​ការ​បោះ​ឆ្នោត​សភា​អាណត្តិ​ទី៥ នៅ​មណ្ឌល​ខេត្ត​សៀមរាប ថា​មិន​យុត្តិធម៌​ទេ។

អ្នកស្រី​បញ្ជាក់​ថា សវនាការ​របស់​ក្រុម​ប្រឹក្សា​ធម្មនុញ្ញ គឺ​បាន​អនុវត្ត​ផ្ទុយ​បណ្ដឹង​ខ្លួន ដែល​ប្ដឹង​ទាមទារ​ស្នើ​ឲ្យ គ.ជ.ប រៀប​ចំ​បោះ​ឆ្នោត​ឡើង​វិញ​ចំនួន ១៦​ការិយាល័យ​បោះ​ឆ្នោត។ បណ្ដឹង​ស្នើសុំ​រាប់​សន្លឹក​ឆ្នោត​មិន​បាន​ការ​ឡើង​វិញ​ចំនួន ២០០​ការិយាល័យ និង​បណ្ដឹង​ស្នើ​ឲ្យ​ផ្ទៀងផ្ទាត់​ទិន្នន័យ​បោះ​ឆ្នោត​ចំនួន ៧៥​ការិយាល័យ​ឡើង​វិញ។

អ្នកស្រី កែ សុវណ្ណរតន៍ ឲ្យ​ដឹង​ថា សវនាការ​នៅ​ថ្ងៃ​ទី៥ ខែ​កញ្ញា ទៅ​លើ​បណ្ដឹង​ខ្លួន​នៅ​មណ្ឌល​ខេត្ត​សៀមរាប គឺ​ក្រុម​ប្រឹក្សា​ធម្មនុញ្ញ បាន​ត្រឹម​តម្រូវ​ឲ្យ​ស្ថាប័ន គ.ជ.ប ដាក់​ទោស​ទណ្ឌ​មន្ត្រី​ក្រោម​ឱវាទ​ខ្លួន​ចំនួន ៧​ការិយាល័យ ដែល​អនុវត្ត​ការងារ​ខុស​នីតិវិធី​បោះ​ឆ្នោត គឺ​មិន​អាច​ទទួល​យក​បាន​ទេ៖ «សវនាការ​ទាក់ទង​ទៅ​នឹង​ការ​បើក​កញ្ចប់​សុវត្ថិភាព "ក" ១២​ការិយាល័យ​នៅ​មណ្ឌល​ខេត្ត​សៀមរាប ពី​ថ្ងៃ​ទី៣០ ខែ​សីហា គឺ​ឃើញ​មាន​ភាព​មិន​ប្រក្រតី ៧​ការិយាល័យ​បោះ​ឆ្នោត។ ៦​ការិយាល័យ គឺ​កញ្ចប់​សុវត្ថិភាព "ក" បើក​ចំហ និង ១​ការិយាល័យ​កញ្ចប់​សុវត្ថិភាព "ក" រហែក និង ២​ការិយាល័យ​កញ្ចប់​សុវត្ថិភាព "ខ" មិន​មាន​សោ​ឃ្លុំ និង ៣​ការិយាល័យ​ខុស​ទិន្នន័យ​ធៀប​ទៅ​នឹង​ទម្រង់ ១១០៤ ទម្រង់ ១១០២ និង​ទម្រង់ ១១០៨។ ហើយ​យើង​ឃើញ​សេចក្តី​សម្រេច​របស់​ក្រុម​ប្រឹក្សា​ធម្មនុញ្ញ​ថ្ងៃ​នេះ បាន​សម្រេច​ដាក់​ទោស​ទៅ​លើ​មន្ត្រី​ការិយាល័យ​បោះ​ឆ្នោត។ ក៏ប៉ុន្តែ បែរ​ជា​បង្វែរ​ការ​ដាក់​ទោស​ហ្នឹង ទៅ​ឲ្យ​ស្ថាប័ន គ.ជ.ប ជា​អ្នក​ដាក់​ទោស​មន្ត្រី​ក្រោម​ឱវាទ​របស់​ខ្លួន​ទៅ​វិញ។ ទោស​នេះ​អត់​ធ្ងន់​ទេ ពីព្រោះ​ស្ថាប័ន​ខ្លួន​ដាក់​ទោស​មន្ត្រី​របស់​ខ្លួន»

អង្គ​សវនាការ​នេះ មាន​សមាសភាព​ក្រុម​ប្រឹក្សា​ធម្មនុញ្ញ​ទាំង ៩​រូប ដឹក​នាំ​ដោយ លោក ឯក សំអុល ប្រធាន​ក្រុម​ប្រឹក្សា​ធម្មនុញ្ញ និង​មាន​តំណាង គ.ជ.ប ចូល​រួម​ផង។

អ្នកស្រី កែ សុវណ្ណរតន៍ បាន​ពេបជ្រាយ និង​ប្រដូច​សវនាការ​របស់​ក្រុម​ប្រឹក្សា​ធម្មនុញ្ញ​ពី​ភាព​មិន​ប្រក្រតី​នៃ​ការ​បោះ​ឆ្នោត ដូច​គ្នា​ទៅ​នឹង​សកម្មភាព​ស្ថាប័ន គ.ជ.ប ដែរ។

លោក អ៊ូ វីរៈ ប្រធាន​មជ្ឈមណ្ឌល​សិទ្ធិ​មនុស្ស​កម្ពុជា បាន​ទិតៀន និង​គ្មាន​ជំនឿ​ថា ក្រុម​ប្រឹក្សា​ធម្មនុញ្ញ​អាច​ដោះស្រាយ​បណ្ដឹង​មាន​ភាព​យុត្តិធម៌ និង​មាន​ឯករាជ្យ​ទេ ព្រោះ​សូម្បី​តែ​ប្រធាន​ដឹក​នាំ​ស្ថាប័ន​កំពូល​មួយ​នេះ ក៏​ជា​សមាជិក​គណបក្ស​នយោបាយ។ លោក​ថា ស្ថាប័ន​ក្រុម​ប្រឹក្សា​ធម្មនុញ្ញ នឹង​បន្ត​បាត់​បង់​ការ​គាំទ្រ​ពី​មហា​ជន​ថែម​ទៀត​នា​ថ្ងៃ​អនាគត។

ដូច​គ្នា​ដែរ លោក​បណ្ឌិត ហង្ស ពុទ្ធា នាយក​ប្រតិបត្តិ​អង្គការ និកហ្វិច (NICFEC) ក៏​បាន​រិះគន់​សវនាការ​របស់​ក្រុម​ប្រឹក្សា​ធម្មនុញ្ញ ថា​មិន​ទាន់​បំពេញ​ការងារ​ឲ្យ​បាន​ពេញ​លេញ និង​មិន​ទាន់​អព្យាក្រិត​ទេ ជុំវិញ​បណ្ដឹង​ដែល​គណបក្ស​ប្រឆាំង​បាន​ប្ដឹង​ពី​ភាព​មិន​ប្រក្រតី​នៃ​ការ​បោះ​ឆ្នោត​សភា​អាណត្តិ​ទី៥ នេះ៖ «យើង​មើល​ថា ក្រុម​ប្រឹក្សា​ធម្មនុញ្ញ​ដូច​ជា​ពុំ​បាន​បំពេញ​តួនាទី​ឲ្យ​បាន​ពេញ​លេញ​នៅ​ឡើយ។ ក្នុង​នោះ បណ្ដឹង​របស់​គណបក្ស​ប្រឆាំង ដែល​មាន​ករណី​ជាច្រើន ក្រុម​ប្រឹក្សា​ធម្មនុញ្ញ​លោក​អង្កេត​តែ​ករណី​តិចតួច​ទេ។ ដូច្នេះ ធ្វើ​ឲ្យ​បក្ស​ជំទាស់​គ្មាន​សេចក្តី​សម្រេច និង​សកម្មភាព​អង្កេត​របស់​ក្រុម​ប្រឹក្សា​ធម្មនុញ្ញ ដើម្បី​បង្ហាញ​នូវ​ការ​មិន​ឯកភាព មិន​យល់​ស្រប​ទៅ​នឹង​អ្វី​ដែល​ជា​ដំណោះស្រាយ។ អ៊ីចឹង ខ្ញុំ​គិត​ថា ក្រុម​ប្រឹក្សា​ធម្មនុញ្ញ​ពុំ​ទាន់​បាន​បំពេញ​តួនាទី​ពេញ​លេញ​នៅ​ឡើយ​ទេ»

​តំណាង​បក្ស​សង្គ្រោះ​ជាតិ មណ្ឌល​ខេត្ត​សៀមរាប បាន​ដាក់​ពាក្យ​ប្ដឹង​ស្នើ​ឲ្យ​មាន​ការ​បោះ​ឆ្នោត​ឡើង​វិញ នៅ​ក្នុង​ការិយាល័យ​ចំនួន ១៦ និង​ស្នើ​​រាប់​​សន្លឹក​ឆ្នោត​​មិន​បាន​ការ និង​ផ្តល់​សុពលភាព​លើ​សន្លឹក​ឆ្នោត​មិន​បាន​ការ​ចំនួន ២០០​ការិយាល័យ ព្រម​ទាំង​បាន​ស្នើ​ឲ្យ​​​ផ្ទៀងផ្ទាត់​សន្លឹក​​ឆ្នោត​​ចំនួន ៧៥​ការិយាល័យ​ឡើង​វិញ។ ប៉ុន្តែ ក្រុម​​ប្រឹក្សា​ធម្មនុញ្ញ បាន​លើក​​​យក​តែ ១២​ការិយាល័យ មក​ដោះស្រាយ ហើយ​មន្ត្រី​បក្ស​ប្រឆាំង​អះអាង​ថា បាន​អនុវត្ត​ផ្ទុយ​ពី​ពាក្យ​បណ្ដឹង​ខ្លួន​​ថែម​ទៀត៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖

ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។