មន្ត្រីជាន់ខ្ពស់គណបក្សប្រជាជនកម្ពុជា ប្រកាសថា ពីពេលនេះតទៅ សម្ពន្ធភាពដែលធ្លាប់មានជាមួយលោក ញឹក ប៊ុនឆៃ ត្រូវកាត់ផ្ដាច់ហើយ។ គណបក្សកាន់អំណាចចោទប្រកាន់លោក ញឹក ប៊ុនឆៃ ថាក្បត់សម្ពន្ធភាពជាមួយបក្សកាន់អំណាច ហេតុនេះមិនអាចបន្តឲ្យមានទំនាក់ទំនងតទៅទៀតឡើយ។ ស្របពេលគណបក្សប្រជាជនកម្ពុជា ប្រកាន់ជំហរបោះបង់សម្ពន្ធភាពជាមួយលោក ញឹក ប៊ុនឆៃ មានមន្ត្រីមួយចំនួនត្រូវបានបញ្ចប់មុខតំណែងពីតួនាទីជាទីប្រឹក្សារដ្ឋាភិបាលជាបន្តបន្ទាប់ដែរ។
គណបក្សប្រជាជនកម្ពុជា ប្ដេជ្ញាថានឹងបន្តទៅបញ្ចប់មុខតំណែងមន្ត្រីមួយចំនួនទៀត ដែលជាសមាជិករបស់លោក ញឹក ប៊ុនឆៃ នៅជាទីប្រឹក្សារដ្ឋាភិបាល ឬមន្ត្រីនៅក្នុងតំណែងនៃស្ថាប័នណាមួយ។
លោក សុខ ឥសាន អ្នកនាំពាក្យគណបក្សកាន់អំណាចអះអាងដោយសុទិដ្ឋិនិយមថា រដ្ឋាភិបាលនឹងមិនបន្តសហការជាមួយមនុស្សដែលក្បត់សម្ពន្ធភាពដូចលោក ញឹក ប៊ុនឆៃ តទៅទៀតទេ។ លោកបន្តថា កុំថាឡើយលោក ញឹក ប៊ុនឆៃ សូម្បីមន្ត្រីដែលនៅហែហមជាមួយលោក ញឹក ប៊ុនឆៃ ទាំងអម្បាលម៉ាន នឹងត្រូវបោសសម្អាតឲ្យអស់ពីក្នុងជួររដ្ឋាភិបាល ដោយមិនលើកលែងឡើយ។ លោកបន្តថា « បើមិនទាន់អស់ ក៏ធ្វើទាល់តែអស់ដែរ។ អត់រក្សាទុកតំណែងឲ្យទេ មិនអាចឲ្យស៊ីប្រាក់ខែរាជរដ្ឋាភិបាល ហើយមកវ៉ៃរាជរដ្ឋាភិបាលទេ។ ទោះបីសាមីខ្លួនគាត់ចង់ ឬមិនចង់ក៏ដោយ នេះជាលក្ខខណ្ឌដែលត្រូវតែធ្វើបែបហ្នឹង »។
ការប្រកាសជំហរកាត់ផ្តាច់សម្ពន្ធមេត្រីភាពបែបនេះរបស់មន្ត្រីនាំពាក្យគណបក្សប្រជាជនកម្ពុជា នៅពេលនេះ ធ្វើឡើងក្រោយពេលព្រះមហាក្សត្រ ព្រះអង្គត្រាស់បង្គាប់បញ្ចប់មុខតំណែងមន្ត្រីជាន់ខ្ពស់ចំនួន ១២រូបពីទីប្រឹក្សារាជរដ្ឋាភិបាលកាលពីថ្ងៃទី១៨ កក្កដា បន្ថែមទៀត។ ទីប្រឹក្សាទាំងអស់ដែលត្រូវបានបញ្ចប់មុខតំណែងនេះ មានការលើកឡើងថា គឺជាមនុស្សដែលស្និទ្ធនឹងលោក ញឹក ប៊ុនឆៃ។
ក្នុងព្រះរាជក្រឹត្យរបស់ព្រះមហាក្សត្រដែលចុះហត្ថលេខាដោយលោក សយ សុខា អគ្គលេខាធិការរាជរដ្ឋាភិបាល បានសម្រេចបញ្ចប់មុខតំណែងមន្ត្រីជាន់ខ្ពស់ចំនួន ១២រូបពីទីប្រឹក្សារដ្ឋាភិបាល ដែលមានឋានៈស្មើរដ្ឋមន្ត្រី រដ្ឋលេខាធិការ និងរហូតអនុរដ្ឋលេខាធិការ។
ទាក់ទិនការបញ្ចប់មុខតំណែងមន្ត្រីទាំង ១២រូបពីទីប្រឹក្សារដ្ឋាភិបាលដោយព្រះរាជក្រឹត្យនៅពេលនេះ ត្រូវគេបញ្ជាក់ថា គឺសុទ្ធសឹងតែជាមន្ត្រីដែលស្និទ្ធនឹងលោក ញឹក ប៊ុនឆៃ។
ជំនួយការផ្ទាល់លោក ញឹក ប៊ុនឆៃ គឺលោក ម៉ៅ សុផាន់ណា ទទួលស្គាល់ថា ពិតជាមានការបញ្ចប់មុខតំណែងដូចការលើកលែងនេះ ប៉ុន្តែលោកសុំរក្សាសិទ្ធិក្នុងការបកស្រាយ ដោយត្រូវរង់ចាំការផ្ទៀងផ្ទាត់ព័ត៌មានឲ្យបានលម្អិតជាមុនសិន។
ជុំវិញការបញ្ចប់មុខតំណែងមន្ត្រីជាន់ខ្ពស់ក្នុងជួរគណបក្សខ្មែររួបរួមជាតិ ជាបន្តបន្ទាប់ក្នុងដំណាក់កាលចុងក្រោយនេះ ត្រូវបានលោក ម៉ៅ សុផាន់ណា បញ្ជាក់ថា នឹងមិនធ្វើឲ្យប៉ះពាល់ដល់ដំណើរការរបស់គណបក្សនេះឡើយ។ ជាងនេះទៀត គណបក្សខ្មែររួបរួមជាតិ នឹងកាន់តែខ្លាំង ហើយរឹងមាំជាងមុន ជាពិសេសបក្សនេះនឹងមិនមែនជាបក្សដែលបង្កើតឡើងសម្រាប់បំបែកសំឡេងរបស់គណបក្សនយោបាយណាមួយ ដូចការចោទប្រកាន់នោះថែមទៀតផង។ លោកបន្តថា « យើងធ្វើអ្វីមួយព្រោះគណបក្សខ្មែររួបរួមជាតិ គឺបេសកកម្មបម្រើជាតិ ហើយម្យ៉ាងគោលនយោបាយរបស់គណបក្សខ្មែររួបរួមជាតិ គឺបង្រួបបង្រួមទេ អត់បានវាយប្រហារ អត់បានបំបែកបំបាក់និន្នាការគណបក្សណាទេ »។
អតីតឧបនាយករដ្ឋមន្ត្រីកូតាមកពីគណបក្សរាជានិយមហ៊្វុនស៊ិនប៉ិច គឺលោក ញឹក ប៊ុនឆៃ រងការចោទថា បានលួចទាក់ទងដោយសម្ងាត់តាមទូរស័ព្ទជាមួយលោក អេង ឆៃអ៊ាង ក្នុងអំឡុងពេលបោះឆ្នោតឃុំ-សង្កាត់។ ប៉ុន្តែព័ត៌មានស្ដីពីការចោទប្រកាន់នេះ ត្រូវបានលោក ញឹក ប៊ុនឆៃ បកស្រាយថា ពុំមែនជាការពិតទេ។ មានមន្ត្រីជាន់ខ្ពស់មួយចំនួន ត្រូវបានព្រះមហាក្សត្រត្រាស់បង្គាប់បញ្ចប់មុខតំណែងពីទីប្រឹក្សារដ្ឋាភិបាលជាបន្តបន្ទាប់រួចមកហើយ រួមទាំងលោក ញឹក ប៊ុនឆៃ ផ្ទាល់ ក្រោយពីជួបរឿងអាស្រូវមួយនេះ។
អ្នកជំនាញផ្នែកអភិបាលកិច្ច និងវិទ្យាសាស្ត្រនយោបាយ លោកបណ្ឌិត ចាន់ វិបុល យល់ឃើញថា ថ្វីបើការបញ្ចប់មុខតំណែងមន្ត្រីមួយចំនួនរបស់គណបក្សខ្មែររួបរួមជាតិ គាប់ជួនរឿងរ៉ាវដែលបានកើតមែន បញ្ហានេះអាចជាការមើលឃើញរបស់រដ្ឋាភិបាលក្នុងន័យទីប្រឹក្សាស្អេកស្កះច្រើនហួសហេតុ ជាជាងរឿងនយោបាយ។ លោកបន្តថា « ខ្ញុំគិតថាវាអាចជាការគាប់ជួនដែរ ប៉ុន្តែខ្ញុំមិនចាត់ទុកថាជារឿងនយោបាយអ្វីទេ ហើយខ្ញុំចាត់ទុកនេះជារឿងបែបបទរដ្ឋបាលដែលទាក់ទងការទុកចិត្តរបស់រដ្ឋាភិបាល មន្ត្រីរដ្ឋាភិបាលទៅលើមន្ត្រីមួយចំនួនដែលបំពេញមុខងារ។ ដូច្នេះខ្ញុំឃើញថា នេះជាចំណុចចាប់ផ្ដើមមួយដែរ ហើយប្រសិនបើការធ្វើបែបនេះបញ្ចប់ទីប្រឹក្សាផ្សេងៗទៀតដែលលោកលើកថា អាចប្រយោជន៍ទៅដល់ប្រជាពលរដ្ឋ និងអាចសន្សំថវិការដ្ឋ យល់ឃើញថាជាចំណុចល្អ »។
យ៉ាងនេះក្ដី លោកបណ្ឌិត កែម ឡី កាលពីនៅមានជីវិត ធ្លាប់រិះគន់ថា រដ្ឋាភិបាលសព្វថ្ងៃក្បាលធំ ខ្លួនតូច ជាពិសេសអតិផរណាងារជាទីប្រឹក្សា ថ្នាក់ឧត្ដមសេនីយ៍ពាក់ផ្កាយព្រោងព្រាត និងងារជាឧកញ៉ា ជាដើម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។