ជំនួបរកដំណោះស្រាយពីភាពមិនប្រក្រតីនៃការបោះឆ្នោតសភាអាណត្តិទី៥ រវាងក្រុមការងារគណបក្សប្រជាជនកម្ពុជា ដឹកនាំដោយ លោក ព្រំ សុខា និងក្រុមការងារគណបក្សសង្គ្រោះជាតិ ដឹកនាំដោយ លោក សុន ឆ័យ ដែលមានសមាជិកម្ខាងៗចំនួន ៥នាក់ នៅល្ងាចថ្ងៃទី២០ ខែសីហា នាមន្ទីររដ្ឋសភា មិនទាន់មានលទ្ធផលគាប់ប្រសើរទេ។
សេចក្តីប្រកាសរួមមានចុះហត្ថលេខា លោក ព្រំ សុខា ប្រធានក្រុមការងារគណបក្សប្រជាជនកម្ពុជា និង លោក សុន ឆ័យ ប្រធានក្រុមការងារគណបក្សសង្គ្រោះជាតិ ចុះថ្ងៃទី២០ ខែសីហា មានខ្លឹមសារថា ក្រោយពីបានពិភាក្សាគ្នាអស់រយៈពេល ២ម៉ោងរួចមក ក្រុមការងារគណបក្សទាំងពីរបានស្វែងយល់ពីបំណង និងគោលគំនិតរបស់គណបក្សទាំងសងខាង ដើម្បីស្វែងរកការឯកភាពគ្នា។ ប្រកាសបានបញ្ជាក់ថា គណបក្សទាំងពីរនឹងធ្វើសេចក្តីរាយការណ៍ជូនថ្នាក់ដឹកនាំគណបក្សរៀងៗខ្លួន ដើម្បីពិនិត្យលទ្ធភាពបន្តជួបពិភាក្សាគ្នានៅលើកក្រោយទៀត។
ទោះយ៉ាងណា លោក ព្រំ សុខា ប្រធានក្រុមការងារគណបក្សប្រជាជនកម្ពុជា បានចាត់ទុកជំនួបពិភាក្សាគ្នារវាងក្រុមការងារគណបក្សទាំងពីរថា អាចជាសញ្ញាឈានទៅរកការឯកភាពគ្នានៅជំនួបលើកក្រោយ ទោះបីជំនួបលើកនេះមិនទាន់ទទួលបានជោគជ័យក្តី។ លោកបន្តថា ជំនួបលើកនេះត្រូវរង់ចាំការសម្រេចពីថ្នាក់ដឹកនាំជាមុន មុននឹងឈានដល់ការសម្រេចលើកិច្ចការផ្សេងៗនាថ្ងៃខាងមុខ។
មិនខុសគ្នាទេ លោក សុន ឆ័យ ប្រធានក្រុមការងារគណបក្សសង្គ្រោះជាតិ ក្រោយកិច្ចប្រជុំបានបញ្ចប់ មានការខកចិត្តដែលក្រុមការងារគណបក្សទាំងពីរមិនអាចរកដំណោះស្រាយពីភាពមិនប្រក្រតី ដែលកើតមានក្នុងពេលបោះឆ្នោតបាន។ ប៉ុន្តែ លោក សុន ឆ័យ មានជំនឿថា ក្រុមការងារគណបក្សទាំងពីរនឹងអាចទម្លាយភាពទាល់ច្រកនេះក្នុងជំនួបលើកក្រោយ។
ទាក់ទិនបញ្ហានេះ លោក កែម ឡី អ្នកស្រាវជ្រាវការអភិវឌ្ឍសង្គម និងជាអ្នកវិភាគឯករាជ្យ មិនមានជំនឿថា ក្រុមការងារគណបក្សសង្គ្រោះជាតិ និងគណបក្សប្រជាជនកម្ពុជា អាចសម្របសម្រួលគ្នា ជុំវិញលទ្ធផលបោះឆ្នោតជាតិនេះបានទេ ដរាបណាគ្មានជំនួបរវាងមេដឹកនាំគណបក្សទាំងពីរជួបពិភាក្សាគ្នា ដើម្បីរកដំណោះស្រាយនោះទេ។
លោកបញ្ចេញទស្សនៈថា បើសិនជាជំនួបរវាងក្រុមការងារគណបក្សប្រជាជនកម្ពុជា និងគណបក្សសង្គ្រោះជាតិ ជាជំនួបផ្ដើមដោយមេដឹកនាំគណបក្សទាំងពីរ អាចមានផ្សះផ្សា និងរកដំណោះស្រាយបានខ្លះ។
កាលពីថ្ងៃទី៩ ខែសីហា ក្រុមការងាររបស់គណបក្សសង្គ្រោះជាតិ និងគណបក្សប្រជាជនកម្ពុជា បានជួបប្រជុំគ្នានៅមន្ទីររដ្ឋសភាម្តងរួមមកហើយ ដើម្បីរួមគ្នាបង្កើតគណៈកម្មការត្រួតពិនិត្យពីភាពមិនប្រក្រតីនៃការបោះឆ្នោតជាតិ ប៉ុន្តែ កិច្ចប្រជុំនេះមិនមានលទ្ធផលទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។