សមាជិករដ្ឋសភាពីគណបក្សប្រជាជនកម្ពុជា សម្រេចលើកដៃអនុម័តជាឯកច្ឆន្ទដើម្បីឲ្យតុលាការបន្តលើសំណុំរឿងមេដឹកនាំគណបក្សប្រឆាំងលោក កឹម សុខា ខណៈសមាជិករដ្ឋសភាបក្សប្រឆាំងចាត់ទុកថា ការប្រជុំករណីនេះជាទង្វើខុសច្បាប់។
ការសម្រេចអនុម័តបន្តនីតិវិធីរបស់តុលាការលើករណីលោក កឹម សុខា ធ្វើឡើងក្នុងកិច្ចប្រជុំវិសាមញ្ញរបស់រដ្ឋសភានៅថ្ងៃទី១១ កញ្ញា ដែលមានតំណាងរាស្ត្រពីបក្សកាន់អំណាចចំនួន ៦៧រូប ខណៈអវត្តមាន ១រូប គឺលោកនាយករដ្ឋមន្ត្រី ហ៊ុន សែន។
តំណាងរាស្ត្រគណបក្សសង្គ្រោះជាតិ បានពហិការចូលរួមប្រជុំ និងនាំគ្នាជួបជុំថ្លែងសារនៅមុខពន្ធនាគារត្រពាំងផ្លុង ខេត្តត្បូងឃ្មុំ ទីដែលលោក កឹម សុខា កំពុងជាប់ឃុំ ក្រោយសមត្ថកិច្ចចាប់ខ្លួនភ្លាមៗទាំងកណ្ដាលអធ្រាត្រឈានចូលថ្ងៃទី៣ កញ្ញា។
បក្សប្រឆាំងចាត់ទុកថា ការប្រជុំវិសាមញ្ញរដ្ឋសភានៅថ្ងៃនេះ ជាទង្វើខុសច្បាប់ ហើយពួកគេទាមទារឲ្យដោះលែងលោក កឹម សុខា ជាបន្ទាន់ ខណៈពួកគេអះអាងថា លោក កឹម សុខា នៅជាប្រធានគណបក្សសង្គ្រោះជាតិដដែល៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។