មុនមួយថ្ងៃនៃការប្រារព្ធថ្ងៃខួប៧ មករា របស់គណបក្សប្រជាជនកម្ពុជា អនុប្រធានគណបក្សសង្គ្រោះជាតិ លោក អេង ឆៃអ៊ាង ចោទប្រកាន់ថា ថ្ងៃ៧ មករា ឆ្នាំ១៩៧៩ ជាថ្ងៃដែលវៀតណាម ឆក់ឱកាសលើកទ័ពចូលត្រួតត្រាកម្ពុជា យកលេសជួយសង្គ្រោះ។
លោក អេង ឆៃអ៊ាង សរសេរនៅហ្វេសប៊ុក (Facebook) របស់លោកថ្ងៃទី៦ ខែមករា ដោយប្រកាសមិនទាន់ទទួលស្គាល់ថា ថ្ងៃទី៧ មករា ជាថ្ងៃជ័យជំនះរបស់ខ្មែរ។ អនុប្រធានគណបក្សប្រឆាំងរូបនេះនិយាយថា ទិវាដែលជាជ័យជំនះសម្រាប់ខ្មែរទាំងមូល គឺទិវាដែលកម្ពុជាបានឯករាជ្យ បង្រួបបង្រួមជាតិ ផ្សះផ្សាជាតិ ឯកភាពជាតិ ប្រជារាស្ត្រខ្មែរទទួលបានភាពរីករាយ ភាពសុខដុមរមនា ដូចជាទិវា៩ វិច្ឆិកា ឆ្នាំ១៩៥៣ និង ២៣ តុលា ឆ្នាំ១៩៩១។
ការប្រកាសមិនទទួលស្គាល់ថ្ងៃ៧ មករា ជាថ្ងៃជ័យជំនះរបស់ខ្មែរពីសំណាកគណបក្សប្រឆាំងនៅពេលនេះ ខណៈគណបក្សកាន់អំណាចព្រមានថា នឹងចាត់វិធានការផ្លូវច្បាប់លើជនទាំងឡាយណាមិនទទួលស្គាល់ថ្ងៃទី៧ មករា ថាជាថ្ងៃជ័យជំនះរបស់កម្ពុជា។
អាស៊ីសេរី មិនអាចសុំប្រតិកម្មតបពីក្រុមមន្ត្រីអ្នកនាំពាក្យគណបក្សប្រជាជនកម្ពុជា បានទេ នៅថ្ងៃទី៦ ខែមករា ដោយអ្នកទាំងនោះបដិសេធអត្ថាធិប្បាយជាមួយអាស៊ីសេរី។
យ៉ាងណាក៏ដោយចុះ អនុប្រធានគណបក្សប្រជាជនកម្ពុជា និងជារដ្ឋមន្ត្រីក្រសួងមហាផ្ទៃ លោក ស ខេង និយាយនៅខេត្តបាត់ដំបង ប្រាប់ឲ្យពលរដ្ឋគ្រប់រូបត្រូវតែចងចាំថ្ងៃ៧ មករា ជាថ្ងៃជ័យជំនះរបស់ខ្មែរ។ លោកអះអាងថា អ្នកស្នេហាជាតិដឹកនាំដោយថ្នាក់ដឹកនាំគណបក្សប្រជាជនកម្ពុជា បានរំដោះប្រជាពលរដ្ឋចេញពីរបប ប៉ុល ពត ហើយថ្ងៃនេះបាននាំមកនូវសមិទ្ធផលយ៉ាងច្រើនដល់ប្រទេសកម្ពុជា និងប្រជាពលរដ្ឋខ្មែរ។
ទាក់ទងការយល់ផ្សេងនៃថ្ងៃទី៧ មករា ពីសំណាក់គណបក្សកាន់អំណាច និងគណបក្សប្រឆាំងនៅពេលនេះ អ្នកសិក្សាការអភិវឌ្ឍសង្គម លោកបណ្ឌិត មាស នី យល់ថា មិនមែនជាចម្លែកអ្វីទេខណៈកម្ពុជា កំពុងមានការបែកបាក់ជាតិតាមរយៈការរំលាយគណបក្សប្រឆាំងដែលមានអ្នកគាំទ្រជាង ៣លាននាក់ចោលដូចនេះ។ លោកបណ្ឌិត មាស នី បន្តថា ខណៈថ្ងៃ៧ មករា ត្រូវបានគេយល់ផ្សេងៗគ្នាដូចនេះ ពិបាកនិយាយថា ថ្ងៃ៧ មករា ជាថ្ងៃបុណ្យជាតិណាស់៖ «»។
គណបក្សប្រជាជនកម្ពុជា នឹងប្រារព្ធខួប ៧ មករា លើកទី៣៩ នៅមជ្ឈមណ្ឌលកោះពេជ្រ ដែលមន្ត្រីគណបក្សនេះអះអាងថា នឹងមានអ្នកចូលរួមជាង ៥ម៉ឺននាក់។ ក្រៅពីអនុប្រធានគណបក្សប្រឆាំងប្រកាសមិនទទួលស្គាល់ថ្ងៃទី៧ មករា។ គណបក្សសង្គ្រោះជាតិ ប្រចាំទីក្រុងឡុងប៊ិច រដ្ឋកាលីហ្វ័រញ៉ា សហរដ្ឋអាមេរិក គ្រោងធ្វើបាតុកម្មអហិង្សាដ៏ធំមួយប្រឆាំងថ្ងៃ៧ មករា នៅសប្ដាហ៍ក្រោយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។