ព័ត៌មាន​ទាក់ទង​នឹង​ការ​បោះ​ឆ្នោត​សម្រាប់​ថ្ងៃ​៩ កក្កដា

ក្នុង​អំឡុង​ពេល​យុទ្ធនាការ​ឃោសនា​បោះ​ឆ្នោត​ដែល​បាន​ចាប់​ផ្ដើម​ឡើង​ជិត ២​សប្ដាហ៍​កន្លង​មក​នេះ មាន​ព្រឹត្តិការណ៍​ជា​ច្រើន​កើត​ឡើង​នៅ​ទូទាំង​ប្រទេស ជុំវិញ​បញ្ហា​បោះ​ឆ្នោត​នេះ។

0:00 / 0:00

0:00 / 0:00

0:00 / 0:00

0:00 / 0:00

ប្ដី​ប្រពន្ធ​ទាស់​គ្នា​ដោយសារ​និន្នាការ​នយោបាយ​ខុស​គ្នា

ដោយ ហ៊ុំ ចំរើន

ខេត្ត​ស្វាយរៀង៖ ទំនាស់​ក្នុង​គ្រួសារ​គាំទ្រ​គណបក្ស​ខុស​គ្នា​មួយ​បាន​កើត​ឡើង​នៅ​ភូមិ​បុស្ស ឃុំ​ត្រស់ ស្រុក​រមាសហែក ខេត្ត​ស្វាយរៀង។ បុរស​ជា​ប្ដី​គាំទ្រ​គណបក្ស​សង្គ្រោះ​ជាតិ រី​ឯ​ប្រពន្ធ​គាំទ្រ​គណបក្ស​​ប្រជាជន​កម្ពុជា។

កាល​ពី​ថ្ងៃ​ទី​៧ កក្កដា ឆ្នាំ​២០១៣ គ្រួសារ​នេះ​បាន​ផឹក​ស្រា​ស្រវឹង ហើយ​ប្រកែក​គ្នា​រឿង​គណបក្ស​នយោបាយ ​​ដោយ​ប្រពន្ធ​ថា គណបក្ស​ប្រជាជន​មាន​ចែក​អំណោយ ចំណែក​ឯ​គណបក្ស​សង្គ្រោះ​ជាតិ​គ្មាន​អំណោយ​ចែក​នឹង​គេ​សោះ​ចូល​ធ្វើ​អ្វី។ ក្រោយ​ពី​មាន​ការ​ប្រកែក​គ្នា​មក ស្រាប់​តែប្រពន្ធ​ស្រវា​បាន​ដង​ចប​ហើយ​វាយ​ទៅ​លើ​ប្ដី។ បន្ទាប់​មក​បុរស​ជា​ប្ដី​ពិការ​ជើង ក៏​វាយ​ទៅ​លើ​ប្រពន្ធ​ចំនួន ២​អង្កត់​អុស​រហូត​ដល់​សន្លប់​នៅ​នឹង​កន្លែង​តែម្ដង។

បុរស​ជា​ប្ដី​ឈ្មោះ​លោក ពៅ មេ អាយុ​ជិត ៤០​ឆ្នាំ និង​ប្រពន្ធ​ឈ្មោះ​អ្នកស្រី វ៉ា សាមន រស់​នៅ​ភូមិ​បុស្ស ឃុំ​ត្រស់ ស្រុក​រមាសហែក ខេត្ត​ស្វាយរៀង។ គ្រួសារ​នេះ​បាន​រួម​រស់​ជាមួយ​គ្នា​អស់​រយៈពេល​ជាង ១០​ឆ្នាំ​មក​ហើយ​ និង​មាន​កូន​ស្រី​ម្នាក់​អាយុ​ប្រហែល ១០​ឆ្នាំ​ទៀត​ផង។ កន្លង​មក​គ្រួសារ​ប្ដី​ប្រពន្ធ​មួយ​គួរ​នេះ​​ធ្លាប់​ឈ្លោះ​ទាស់​​គ្នា និង​ដុត​ផ្ទះ​ឆេះ​អស់​មួយ​ខ្នង​រួច​ម្ដង​មក​ហើយ។

បច្ចុប្បន្ន​ប្រពន្ធ​ត្រូវ​បាន​អ្នក​ភូមិ​នាំ​ទៅ​សម្រាក​ព្យាបាល​នៅ​មន្ទីរពេទ្យ​បង្អែក ស្រុក​រមាសហែក ខេត្ត​ស្វាយរៀង។ រី​ឯ​ប្ដី​ត្រូវ​អាជ្ញាធរ​ចាប់​បញ្ជូន​ទៅ​ពន្ធនាគារ​ខេត្ត​ព្រៃវែង។

ពលរដ្ឋ​ត្អូញ​ពី​ការ​បាត់​ឈ្មោះ​ពី​បញ្ជី​បោះ​ឆ្នោត

ខេត្ត​តាកែវ-កំពត៖ ការ​បាត់​ឈ្មោះ​ពី​បញ្ជី​បោះ​ឆ្នោត​ជ្រើសតាំង​តំណាង​រាស្ត្រ​នីតិកាល​ទី​៥ ឆ្នាំ​២០១៣ នៅ​ខេត្ត​តាកែវ និង​កំពត កំពុង​តែ​បារម្ភ​ពី​ការ​បាត់បង់​សំឡេង​ចំពោះ​អ្នក​ដែល​នឹង​ផ្ដល់​សន្លឹក​ឆ្នោត​ទៅ​គណបក្ស​ប្រឆាំង។

សូម​ស្ដាប់​សេចក្ដី​រាយការណ៍​របស់​អ្នកស្រី អ៊ុក សាវបូរី៖

គ.ខ.ប​ខេត្ត​ព្រះសីហនុ​កោះ​ហៅ​គណបក្ស​សង្គ្រោះ​ជាតិ​ចូល​មក​ផ្សះផ្សា

ខេត្ត​ព្រះសីហនុ៖ បន្ទាប់​ពី​តំណាង​គណបក្ស​សង្គ្រោះ​ជាតិ បាន​ដាក់​ពាក្យ​ប្ដឹង​បុរស​ម្នាក់ ពី​បទ​រារាំង​យុទ្ធនាការ​ឃោសនា​បោះ​ឆ្នោត​របស់​គណបក្ស​សង្គ្រោះ​ជាតិ នៅ​ខេត្ត​ព្រះសីហនុ អស់​រយៈ​ពេល ២​ថ្ងៃ​មក នៅ​ថ្ងៃ​ច័ន្ទ ទី​៨ កក្កដា គណៈ​កម្មការ​ខេត្ត​រៀប​ចំ​ការ​បោះ​ឆ្នោត ហៅ​កាត់​ថា គ.ខ.ប បាន​បើក​កិច្ច​​ប្រជុំ​​​ជា​សាធារណៈ​មួយ ដើម្បី​ស្វែង​រក​ការ​ផ្សះផ្សា​រវាង​ភាគី​ទាំង​ពីរ។ ក៏​ប៉ុន្តែ​ខាង​ភាគី​គណបក្ស​សង្គ្រោះ​ជាតិ បាន​បដិសេធ​សំណើ​របស់ គ.ខ.ប ដែល​ស្នើ​ឱ្យ​បញ្ចប់​សំណុំ​រឿង​ក្តី​នេះ​ដោយ​ការ​ផ្សះផ្សា។

សូម​ស្ដាប់​សេចក្ដី​រាយការណ៍​របស់​លោក សាន សែល ពី​ខេត្ត​ព្រះសីហនុ៖

ជម្លោះ​បង​ប្អូន​រឿង​បក្ស​នយោបាយ

ខេត្ត​កំពង់ចាម៖ ពលរដ្ឋ​ម្នាក់​នៅ​ខេត្ត​កំពង់ចាម ដែល​គាំទ្រ​គណបក្ស​សង្គ្រោះ​ជាតិ បាន​ចោទ​ប្រកាន់​ប្អូន​ជីទួត​មួយ​ខ្លួន​ឯង​ថា បាន​បំផ្លាញ​ស្លាក​គណបក្ស​នៅ​មុខ​ផ្ទះ​របស់​គាត់ តែ​ប្អូន​ជីទួត​មួយ​បាន​បដិសេធ​ថា គាត់​មិន​ដឹង​រឿង​អ្វី​ទេ។

មន្ត្រី​គណបក្ស​សង្គ្រោះ​ជាតិ ស្រុក​មេមត់ បាន​រៀបចំ​ពាក្យ​បណ្ដឹង​ដាក់​ជូន​គណៈកម្មការ​ខេត្ត​រៀបចំ​ការ​បោះ​ឆ្នោត​ខេត្ត​កំពង់ចាម ​រួច​ហើយ នៅ​ថ្ងៃ​នេះ បន្ទាប់​ពី​គណៈកម្មការ​រៀបចំ​ការ​បោះ​ឆ្នោត​ឃុំ​ទ្រាក មិន​អាច​ដោះស្រាយ​បញ្ហា​នេះ​បាន។

សូម​ស្ដាប់​សេចក្ដី​រាយការណ៍​របស់​លោក យាង សុជាមេត្តា៖

សង្គម​ស៊ីវិល​បារម្ភ​ពី​អំពើ​ហិង្សា​កើត​ច្រើន​នៅ​អំឡុង​ពេល​ឃោសនា​បោះ​ឆ្នោត

អង្គការ​សង្គម​ស៊ីវិល​ឃ្លាំមើល​ការ​បោះ​ឆ្នោត​មួយ​ចំនួន​នៅ​កម្ពុជា ព្រួយ​បារម្ភ​អំពី​ការ​កើត​មាន​អំពើ​ហិង្សា​រីករាល​ដាល​​​ធ្ងន់ធ្ងរ​រវាង​ក្បួន​ឃោសនា​របស់​អ្នក​គាំទ្រ​គណបក្ស​កាន់​អំណាច និង​ក្បួន​ឃោសនា​គណបក្ស​ប្រឆាំង។

ក្តី​ព្រួយ​បារម្ភ​នេះ កើត​មាន​បន្ទាប់​ពី​ក្បួន​ឃោសនា​បក្ស​កាន់​អំណាច​តែង​បាន​រំខាន​ក្បួន​ឃោសនា​របស់​​បក្ស​ប្រឆាំង​ដោយ​គ្មាន​ការ​ហាម​ឃាត់​ពី​ស្ថាប័ន​បោះ​ឆ្នោត ឬ​សមត្ថកិច្ច។

សូម​ស្ដាប់​សេចក្ដី​រាយការណ៍​របស់​លោក ដែន អយុធ្យា អំពី​បញ្ហា​នេះ៖

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។