លោក ញឹក ប៊ុនឆៃ ឧបនាយករដ្ឋមន្រ្តី និងជាអគ្គលេខាធិការគណបក្សហ៊្វុនស៊ិនប៉ិច មានប្រសាសន៍បញ្ជាក់អំពីការទាមទារនេះ៖ «ខ្ញុំទទួលស្គាល់ថា មានភាពមិនប្រក្រតីនៅកន្លែងមួយចំនួនដែលទាមទារឲ្យមានការពិនិត្យឡើងវិញ។ សុំឲ្យមានគណៈកម្មការមួយដែលឯករាជ្យ។ ខ្ញុំមិនកំណត់ថា សមាសភាពមកពីណាទេ តែចង់បានគណៈកម្មការនោះឯករាជ្យ អព្យាក្រឹត។ ទី១ បើរកអ្នកអព្យាក្រឹតនោះបានវាល្អ តែបើរកមិនបានទេ ក៏រកបានគណៈកម្មការចម្រុះពីនេះពីនោះ។ ប៉ុន្តែចង់បានអ្នកឯករាជ្យមែនទែនទៅត្រួតពិនិត្យអារឿងទាំងអស់នោះ»។
សេចក្ដីថ្លែងការណ៍ចុះកាលបរិច្ឆេទថ្ងៃទី២៩ កក្កដា តែចែកផ្សាយនៅថ្ងៃទី៣០ កក្កដា បានសរសេរបន្ថែមថា គណបក្សហ៊្វុនស៊ិនប៉ិច សូមប្រកាសនូវជំហរម៉ឺងម៉ាត់របស់ខ្លួនក្នុងការទាមទារនេះ ដើម្បីឲ្យសមស្របទៅតាមការទាមទារ និងឆន្ទៈរបស់ប្រជារាស្ត្រម្ចាស់ឆ្នោត។
ការទាមទារបង្កើតគណៈកម្មការត្រួតពិនិត្យឯករាជ្យរបស់គណបក្សហ៊្វុនស៊ិនប៉ិចនេះ បានកើតមានក្រោយពីគណបក្សសង្គ្រោះជាតិបានទាមទារឲ្យបង្កើតគណៈកម្មការស្រាវជ្រាវ និងពិនិត្យមើលភាពមិនប្រក្រតីដែលកើតមាននៅក្នុងការបោះឆ្នោតដូចគ្នានេះដែរ។
លទ្ធផលបណ្ដោះអាសន្នរបស់គណៈកម្មាធិការជាតិរៀបចំការបោះឆ្នោត បានឲ្យដឹងថា គណបក្សប្រជាជនបានទទួលសំឡេងគាំទ្រច្រើនជាងគណបក្សសង្គ្រោះជាតិ។ ប៉ុន្តែគណបក្សសង្គ្រោះជាតិបានបដិសេធមិនទទួលស្គាល់លទ្ធផលនេះឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។