Opens in new windowប្រធានក្រុមប្រឹក្សាជំនុំជម្រះសាលាដំបូងរាជធានីភ្នំពេញ សម្រេចភ្លាមៗ ដោយច្រានចោលការសុំនៅក្រៅឃុំបណ្តោះអាសន្នរបស់លោក ហុង សុខហួរ។ ទន្ទឹមនឹងសវនាការក្នុងពេលជាមួយគ្នានោះដែរ អង្គសវនាការសម្រេចលើកពេលជំនុំជម្រះនេះបន្តក្នុងសប្ដាហ៍ក្រោយទៀត។
បញ្ហានេះ ត្រូវបានមេធាវីការពារក្ដីឲ្យជនសង្ស័យ នៃសមាជិកព្រឹទ្ធសភា របស់គណបក្សជំទាស់ និងអង្គការសិទ្ធិមនុស្ស ប្រតិកម្មចំពោះសេចក្ដីសម្រេចរបស់ក្រុមប្រឹក្សាជំនុំជម្រះរបស់តុលាការក្រុងភ្នំពេញ នៅពេលនេះ ដោយចាត់ទុកថា ធ្វើឡើងមិនសមហេតុផល។
ព្រឹទ្ធសមាជិកគណបក្សប្រឆាំង ត្រូវបានបញ្ជូនទៅឃុំខ្លួននៅពន្ធនាគារវិញភ្លាមៗ តាមរថយន្តប្រភេទ ឡែនដ៍ គ្រីសហ្សឺ (Land Cruiser) ដែលមានសភាពចាស់បន្តិចទៅហើយ ក្រោយពីប្រធានក្រុមប្រឹក្សាជំនុំជម្រះសម្រេចលើកពេលសវនាការដ៏ចម្រូងចម្រាស ទៅថ្ងៃទី៧ ខែតុលា សប្ដាហ៍បន្ទាប់។
សវនាការលើសំណុំរឿងក្ដីតែមួយ ប៉ុន្តែធ្វើឡើង ២វគ្គដាច់ឡែកពីគ្នា ប្រឆាំងលោក ហុង សុខហួរ នេះ គឺសវនាការសុំនៅក្រៅឃុំបណ្ដោះអាសន្ន និងសវនាការមួយទៀត គឺជាសវនាការលើអង្គសេចក្ដី។ នៅនាទីចុងក្រោយ គឺជនសង្ស័យឈ្មោះ ហុង សុខហួរ ត្រូវបានក្រុមប្រឹក្សាជំនុំជម្រះនៃតុលាការក្រុងភ្នំពេញ សម្រេចច្រានចោលការសុំនៅក្រៅឃុំបណ្ដោះអាសន្ន បើទោះជាលោក ហុង សុខហួរ សំអាងថា មានជំងឺលើសឈាម និងធានាតម្កល់ប្រាក់ ២០លានរៀល ព្រមទាំងលិខិតឆ្លងដែនក្តី ក៏តំណាងអយ្យការ លោក សៀង សុខ ជំទាស់ និងចាត់ទុកថា វានឹងនាំឲ្យប៉ះពាល់ដល់នីតិវិធីរបស់តុលាការ និងនាំឲ្យមានភាពវឹកវរដល់សន្តិសុខសង្គម ជាពិសេស ពុំមានឯកសារបញ្ជាក់ថា លោក ហុង សុខហួរ មានជំងឺពីវេជ្ជបណ្ឌិត។
បញ្ហានេះ ត្រូវបានលោក ជូង ជូងី លើកឡើងថា គេពិតជាពិបាករកលិខិតវេជ្ជបញ្ជាពីពេទ្យដែលមានជំនាញណាស់ ដោយសារលិខិតពីរច្បាប់ ស្នើសុំពេទ្យអង្គការលីកាដូ ចុះពិនិត្យសុខភាពលោក ហុខ សុខហួរ ប៉ុន្តែត្រូវបានចៅក្រមស៊ើបសួររបស់តុលាការក្រុងភ្នំពេញ ច្រានចោលរហូត។
បើទោះជាបែបណា មាត្រា ២០៣ នៃក្រមនីតិវធីព្រហ្មទណ្ឌ ចែងថា គោលការណ៍នៃការឃុំខ្លួនបណ្តោះអាសន្ន ជាគោលការណ៍ជនត្រូវចោទ ត្រូវតែមានសេរីភាព។ ក្នុងករណីពិសេស ជនត្រូវចោទអាចត្រូវឃុំខ្លួនបណ្តោះអាសន្នទៅបាន តែក្នុងករណីចោទប្រកាន់ពីបទឧក្រិដ្ឋ និងបទមជ្ឈឹម ដែលច្បាប់កំណត់ផ្ដន្ទាទោសដាក់ពន្ធនាគារស្មើ ឬលើសពី ១ឆ្នាំ។ បញ្ហានេះ ត្រូវបានលោក ជូង ជូងី ចាត់ទុកថា កូនក្តីរបស់ខ្លួនមិនទាន់ត្រូវបានចោទប្រកាន់តាមផ្លូវតុលាការនៅឡើយផង គួរតុលាការពិចារណាតាមការស្នើសុំឲ្យបាននៅក្រៅឃុំបណ្ដោះអាសន្ន ដែលមានកំណត់ដោយច្បាប់។
ក្រៅពីនេះ ប្រធានក្រុមប្រឹក្សាជំនុំជម្រះ លោក រស់ ពិសិដ្ឋ សម្រេចលើកពេលសវនាការដោយមានការខ្វែងគំនិតគ្នាលើចំណុចខ្លះជាមួយមេធាវីការពារក្ដីរបស់លោក ហុង សុខហួរ ផង បន្ទាប់ពីច្រានចោលការសុំនៅក្រៅឃុំរួច។ ចំណុចដែលមិនស្របគ្នាមុនបញ្ចប់សវនាការគឺក្រុមមេធាវីរបស់លោក ហុង សុខហួរ ស្នើឲ្យលើកយកតែការសន្និដ្ឋានបានហើយ សម្រាប់សវនាការសប្តាហ៍ខាងមុខនេះ ប៉ុន្តែប្រធានក្រុមប្រឹក្សាជំនុំជម្រះ លោក រស់ ពិសិដ្ឋ ជំទាស់ដោយសំអាងថា នៅមានចំណុចខ្លះទៀត ដើម្បីដេញដោយលបន្ត ដូចជាមានសាក្សីជាសមត្ថកិច្ចជាដើមក្នុងការដាក់បន្ទុក។
នៅក្នុងបន្ទប់សវនាការមានសាក្សីដែលជាក្រុមសមត្ថកិច្ចប្រឆាំងភេរវកម្មរបស់រដ្ឋាភិបាលដែលមានឋានៈរហូតដល់ថ្នាក់ឧត្តមសេនីយផ្កាយបីផង ចូលរួមដែរ។
ពាក់ព័ន្ធរឿងនេះ លោក ជូង ជូងី ជាមេធាវីម្នាក់ក្នុងចំណោមមេធាវី ៥នាក់ផ្សេងទៀត ដែលការពារក្ដីឲ្យលោក ហុង សុខហួរ ឲ្យដឹងក្រោយពីបញ្ចប់សវនាការកាលពីព្រឹកថ្ងៃទី២ តុលា ថា លោកនឹងនៅតែតតាំងដើម្បីដោះបន្ទុកកូនក្ដីរបស់ខ្លួនឲ្យរួចផុតការចោទប្រកាន់តាមផ្លូវតុលាការ។
លោកថា ឯកសារជាវីដេអូ សម្រាប់ដាក់បន្ទុកដែលស្នើដោយព្រះរាជអាជ្ញារង លោក សៀង សុខ ប្រឆាំងលោក ហុង សុខហួរ នេះ លោកនៅពុំទាន់អស់ចិត្តនៅឡើយទេ ពោលគឺត្រូវទាមទារឲ្យមានការផ្ទៀងផ្ទាត់ឡើងវិញនៅសវនាការបន្ទាប់ទៀត៖ «ខ្ញុំនៅត្រូវការឲ្យតុលាការបង្ហាញមួយសា ឬក៏ពីរសាទៀត ពីព្រោះខ្ញុំទើបតែឃើញមួយលើក។ ដូច្នេះខ្ញុំអត់មានវិនិច្ឆ័យច្បាស់លាស់»។
លោក ហុង សុខហួរ សមាជិកព្រឹទ្ធសភាថ្លែងប្រាប់អ្នកកាសែតក្រោយចេញពីបន្ទប់ជំនុំជម្រះថា លោកពុំបានញុះញង់ដូចការចោទប្រកាន់របស់តុលាការឡើយ។ ផ្ទុយទៅវិញ អ្វីដែលលោកបានបង្ហាញអំពីភាពមិនត្រឹមត្រូវនៃឯកសារស្ដីពីកិច្ចព្រមព្រៀងរវាងរដ្ឋកម្ពុជា ក្នុងឆ្នាំ១៩៩៧ ជាមួយវៀតណាមនោះ គឺសម្រាប់ជាការពិចារណារកខុស និងត្រូវប៉ុណ្ណោះ៖ «ខ្ញុំបានពន្យល់តុលាការច្រើនអំពីបញ្ហាតុលាការចោទថា ការញុះញង់។ មិនមានការញុះញង់ទេ គឺការពន្យល់ឲ្យសកម្មជនឲ្យទាំងអស់យល់អំពីបញ្ហា»។
លោក ហុង សុខហួរ ត្រូវបានចៅក្រមស៊ើបសួរលោក កៅ វណ្ឌី សម្រេចចោទប្រកាន់ ៣បទល្មើស បន្ទាប់ពីចាប់ខ្លួនកាលពីថ្ងៃទី១៥ ខែសីហា រួច ក្រោយពីលោក ហ៊ុន សែន ប្រតិកម្មភ្លាម ហើយចោទប្រកាន់ថា ក្បត់ជាតិ។ សមាជិកព្រឹទ្ធសភារូបនេះ ត្រូវប្រឈមមុខនឹងបទចោទក្លែងឯកសារសាធារណៈ ប្រើប្រាស់ឯកសារក្លែង និងបទញុះញង់នាំឲ្យមានភាពវឹកវរ និងអសន្តិសុខសង្គម។
បើទោះជាបែបណា ការតតាំងកាលពីព្រឹកថ្ងៃទី២ តុលា នៅក្នុងអង្គសវនាការ គឺភាគីម្ខាងៗប្រឹងប្រែងស្ទើរអស់ពីលទ្ធភាពរៀងៗខ្លួន។ ការជំនុំជម្រះដែលប្រើពេលជិត ៤ម៉ោង ទាំងតំណាងអយ្យការលោក សៀង សុខ និងក្រុមប្រឹក្សាជំនុំជម្រះដែលមានលោក រស់ ពិសិដ្ឋ ជាប្រធានក្រុមប្រឹក្សាព្យាយាមលើកសំណួរដើម្បីដាក់បន្ទុកលោក ហុង សុខហួរ រហូតជំរុញឲ្យតំណាងអយ្យការ លោក សៀង សុខ សម្រេចស្នើអង្គសវនាការបញ្ចេញឯកសារជាវីដេអូ របស់លោក ហុង សុខហួរ ប្រមាណ ១១នាទីថែមទៀតផង។
ដោយឡែក ក្រុមមេធាវីដែលការពារឲ្យលោក ហុង សុខហួរ វិញ ក៏ព្យាយាមជំទាស់ម្តងជាពីរដងរហូតបង្ហាញថា តុលាការមិនត្រូវកាត់ក្ដីលុះដោយអគតិទាំង ៤ប្រការ មាន កាត់ក្ដីព្រោះភ័យខ្លាច ព្រោះតែវង្វេង ព្រោះតែកំហឹង និងព្រោះតែទឹកលុយ នោះឡើយ។
ពាក់ព័ន្ធរឿងនេះ លោក សុខ ឥសាន មន្រ្តីនាំពាក្យគណបក្សប្រជាជនកម្ពុជា យល់ឃើញថា អ្នកដែលចាញ់គឺកម្រដែលទទួលស្គាល់លទ្ធផលរបស់ខ្លួនណាស់។ ជាងនេះទៀត អ្វីដែលលោក ហុង សុខហួរ ក្លែងឯកសារនោះ គឺជាបទល្មើសដែលពុំអាចលើកលែងឲ្យបានឡើយ៖ «ធម្មតាទេ អ្នកចាញ់មិនដែលទទួលស្គាល់ការចាញ់របស់ខ្លួនទេ។ អ្នកជាប់គុកមិនដែលទទួលស្គាល់ ទោះចោរ ឬចោរប្លន់ក៏ដោយ ចោរលួចក៏ដោយ មិនដែលទទួលស្គាល់ថា យី! អញបានប្រព្រឹត្តខុស គេកាត់ទោសវាសមសមហេតុសមផល មិនដែលអ៊ីចឹងទេ»។
លោក ហុង សុខហួរ បានពន្យល់នៅក្នុងអង្គការសវនាការថា ឯកសារដែលផ្សព្វផ្សាយកាលពីថ្ងៃទី១២ មុនថ្ងៃចាប់ខ្លួនកាលពីថ្ងៃទី១៥ សីហា នោះ គឺអក្សរដែលមានពណ៌ដិត លោកពុំបានកែច្នៃ ឬប៉ះពាល់អ្វីសូម្បីបន្តិចឡើយ ផ្ទុយទៅវិញឯកសារដែលបានស្រាវជ្រាវឃើញចាប់តាំងពីឆ្នាំ២០០៦ ហើយទើបផ្សព្វផ្សាយកន្លងទៅនេះ គឺគ្រាន់តែយកពីប្រភពដើម ហើយផុសចូលទំព័រហ្វេសប៊ុក (Facebook) របស់លោក សម រង្ស៊ី ដោយពុំមានការកែប្រែអ្វីទាំងអស់។
នៅក្នុងអង្គសវនាការ ប្រធានក្រុមប្រឹក្សាជំនុំជម្រះលោក រស់ ពិសិដ្ឋ និងតំណាងអយ្យការ លោក សៀង សុខ ព្យាយាមជជីកដេញដោលអ្នកដែលនៅពីក្រោយនៃការផលិត និងផ្សព្វផ្សាយវីដេអូ នេះបន្ថែមទៀត ក៏ប៉ុន្តែត្រូវបានលោក សុង ហុងសួរ បដិសេធថា ពុំមានអ្នកផ្ដួចផ្ដើមគំនិត ឬពាក់ព័ន្ធបន្ថែមទៀតទេក្នុងសំណុំរឿងនេះ ។ នៅក្នុងអង្គសវនាការ មានការលើកឡើងពីរបាយការណ៍របស់វិទ្យុអាស៊ីសេរី ម្តងជាពីរដង រហូតមានឯកសារជាវីដេអូ ដែលជាឯកសារដាក់បន្ទុករៀបចំដោយតំណាងអយ្យការថែមទៀតផង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។