Opens in new windowមេដឹកនាំគណបក្សសង្គ្រោះជាតិ នៅពុំទាន់មានប្រតិកម្មតបណាមួយ ចំពោះការថ្លែងរបស់ប្រមុខរដ្ឋាភិបាលដែលទាមទារឲ្យ លោក សម រង្ស៊ី បកស្រាយឲ្យបានច្បាស់អំពីពាក្យថា ដើម្បីចាប់ចោរ ត្រូវចូលឲ្យកៀកមេចោរសិននោះ បានន័យថាម៉េចនោះទេ?
ជុំវិញរឿងនេះ អ្នកវិភាគនយោបាយយល់ឃើញថា នៅពេលនេះ អ្នកនយោបាយមិនត្រូវឈ្លោះប្រកែកគ្នាទេ សំខាន់ គឺត្រូវចេះអត់ឱនឲ្យគ្នាទៅវិញទៅមក ទើបជាមធ្យោបាយល្អ ហើយចំណេញដល់ជាតិ។
មេដឹកនាំគណបក្សសង្គ្រោះជាតិ នៅពេលនេះ ហាក់បង្ហាញភាពស្ងប់ស្ងាត់ មិនតបតអ្វីទាំងអស់ និងព្យាយាមថ្នមសុខភាពនយោបាយសម្បើមណាស់ បើទោះជាគណបក្សប្រជាជនកម្ពុជា ព្យាយាមឌឺដង និងផ្លែផ្កាឲ្យម្ដងហើយម្ដងទៀតយ៉ាងក៏ដោយចុះ។
ប្រតិកម្មជាថ្មីឡើងវិញទៀតរបស់ប្រធានគណបក្សប្រជាជនកម្ពុជា និងជានាយករដ្ឋមន្ត្រីផងនៅពេលនេះ គឺលោក ហ៊ុន សែន ទាមទារឲ្យមេបក្សជំទាស់ គឺលោក សម រង្ស៊ី ត្រូវបកស្រាយឲ្យច្បាស់នូវអ្វីដែល លោក ហ៊ុន សែន ចោទថា ប្រធានគណបក្សប្រឆាំងមានភាពមិនស្មោះត្រង់ក្នុងរឿងនយោបាយ ជាមួយនឹងលោក។ លោកនាយករដ្ឋមន្ត្រីដៀមដាម និងថែមទាំងឌឺដងឲ្យគណបក្សប្រឆាំងថា មាត់ផ្អែមណាស់នឹងវប្បធម៌សន្ទនា ក៏ប៉ុន្តែមិនដែលគោរពម្ដងណាទាល់តែសោះលើគោលការណ៍នេះ ហើយថែមទាំងចរចាលេងល្បែងនយោបាយចាប់ដៃជាន់ជើងទៅវិញ។ លោក ហ៊ុន សែន ហៅចរន្តនយោបាយដែលគណបក្សជំទាស់កំពុងតែលេងនៅពេលនេះ ថាជាការចរចាមិនស្មោះត្រង់ ដែលលោកមិនអាចលើកលែងឲ្យបានឡើយ។ លោកបន្តថា «ខ្ញុំចូលចិត្តសន្ទនាណាស់ ព្រោះមួយជីវិតរបស់ខ្ញុំ ខ្ញុំប្រើវប្បធម៌សន្ទនានេះ។ មិនមែនទើបតែកើតក្នុងជំនាន់នេះទេ វប្បធម៌សន្ទនា ខ្ញុំជាអ្នកប្រឹងប្រែងបង្កើត ហើយខ្ញុំជាអ្នកចាប់ផ្ដើមវេទិកា សីហនុ ហ៊ុន សែន»។
ក្រៅពីនេះទៀត ប្រមុខរដ្ឋាភិបាល លោក ហ៊ុន សែន ថែមទាំងប្រតិកម្មថា លោក សម រង្ស៊ី បានប្រមាថលោកទៅនឹងមេដឹកនាំ លោក ម៊ូម៉ា ហ្កាដាហ្វី (Muammar Gaddafi) ហើយថា ព្រោះតែមូលហេតុនេះហើយទើប លោក ហ៊ុន សែន ព្យាយាមរកមធ្យោបាយនាំកូនរបស់ខ្លួនឲ្យស្គាល់កូនរបស់ លោក សម រង្ស៊ី នោះ។
វិទ្យុអាស៊ីសេរី ពុំអាចសុំប្រតិកម្មពី លោក សម រង្ស៊ី បានភ្លាមទេជុំវិញរឿងនេះ ដោយទូរស័ព្ទចូលតែពុំមានអ្នកទទួល នៅថ្ងៃទី២២ កញ្ញា។
ដោយឡែកអ្នកនាំពាក្យ និងជាអ្នកតំណាងរាស្ត្រគណបក្សសង្គ្រោះជាតិ លោក យឹម សុវណ្ណ វិញ បានបដិសេធថា លោកពុំមានលទ្ធភាពធ្វើអត្ថាធិប្បាយជំនួសឲ្យ លោក សម រង្ស៊ី បានទេ។
បើទោះជាបែបណា ប្រតិកម្មជាថ្មីទៀតរបស់ លោក ហ៊ុន សែន នៅពេលនេះ ដែលព្រមានលុបចោលវប្បធម៌សន្ទនា និងគំរាមឈប់និយាយអ្វីទាំងអស់ជាមួយ លោក សម រង្ស៊ី ធ្វើឡើងមុនមួយថ្ងៃប៉ុណ្ណោះ នៃការជួបគ្នាជាថ្មីទៀតរបស់គណបក្សទាំងពីរ លើរបៀបវារៈកំណែទម្រង់ច្បាប់បោះឆ្នោតជ្រើសរើសក្រុមប្រឹក្សាឃុំ-សង្កាត់ និងបទបញ្ជាផ្ទៃក្នុងរដ្ឋសភា។
ពាក់ព័ន្ធរឿងនេះ អ្នកវិភាគនយោបាយយល់ឃើញថា បើអ្នកនយោបាយនៅតែពាក់មុខយក្សដាក់គ្នាដូចនេះ អ្វីដែលខាត គឺជាតិ និងពលរដ្ឋទៅវិញ។
លោក រស់ រ៉ាវុធ បណ្ឌិតវិទ្យាសាស្ត្រនយោបាយ មានប្រសាសន៍ថា ការប្រកាន់ជំហរតែរៀងៗខ្លួនដូចនេះរបស់អ្នកនយោបាយខ្មែរ នឹងមិនធ្វើឲ្យកម្ពុជា ចំណេញអ្វីទេពីការប្រកួតប្រជែងរកឈ្នះរៀងខ្លួននេះ។ ផ្ទុយទៅវិញ លោកចាត់ទុកថា ប្រទេសកម្ពុជា កាន់តែស្រាល និងមើលងាយក្រោមក្រសែភ្នែកបរទេស ជាពិសេសប្រទេសជិតខាងកម្ពុជា។ លោកបន្តថា «ក្នុងបរិបទនេះ ខ្មែរមិនគួរណាឲ្យមានការប្រេះឆា ឬក៏ជាន់ពន្លិចនយោបាយរវាងខ្មែរ និងខ្មែរ ឬក៏ជម្លោះរវាងខ្មែរ និងខ្មែរទៀតទេ ចាប់ពីថ្ងៃនេះទៀតនោះ»។
បើទោះជាបែបណា លោកនាយករដ្ឋមន្ត្រី ហ៊ុន សែន អះអាងថា វប្បធម៌សន្ទនានេះ គឺលោកជាអ្នកបង្កើត ហើយវប្បធម៌ដូចនេះ គឺមិនមែនទើបតែកើតឡើងនៅពេលនេះទេ។ លោក ហ៊ុន សែន អះអាងថា វប្បធម៌សន្ទនានេះ គណបក្សប្រជាជនកម្ពុជា ដែលគ្រប់គ្រងរដ្ឋាភិបាល អាចធ្វើទៅបានជាមួយបក្សនយោបាយដទៃទៀត ដោយមិនចាំបាច់តែជាមួយគណបក្សសង្គ្រោះជាតិ មួយនោះឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។