លោកនាយករដ្ឋមន្ត្រី ហ៊ុន សែន ចាត់ទុកថា បក្សប្រឆាំងមានទស្សនៈចម្លែកៗទាក់ទងនឹងរបៀបធ្វើការរបស់គណៈកម្មាធិការជាតិរៀបចំការបោះឆ្នោត (គ.ជ.ប)។ ការបញ្ជាក់នេះ ធ្វើឡើងនៅថ្ងៃទី២៧ ខែឧសភា ចំថ្ងៃដែលគ.ជ.ប ប្រកាសលទ្ធផលបោះឆ្នោតជ្រើសតាំងសមាជិកក្រុមប្រឹក្សារាជធានី ខេត្ត ខណ្ឌ ក្រុង ស្រុក។
លោកនាយករដ្ឋមន្ត្រីថ្លែងរិះគន់បក្សប្រឆាំងថា គណបក្សមួយនេះធ្លាប់តែមិនពេញចិត្តនឹងគណៈកម្មាធិការជាតិរៀបចំការបោះឆ្នោត។ ប៉ុន្តែ បក្សនេះបែរជាទទួលយកលទ្ធផលជ្រើសតាំងសមាជិកក្រុមប្រឹក្សា ដែលរៀបចំដោយ គ.ជ.ប ដដែលទៅវិញ។ លោកបន្តថា លោកកោតសរសើរចំពោះដំណើរការបោះឆ្នោតជ្រើសតាំងក្រុមប្រឹក្សា ដែលទើបតែបញ្ចប់នាពេលថ្មីៗ ហើយក៏សូមសរសើរចំពោះគណបក្សនយោបាយទាំងអស់ដែលចូលរួមផងដែរ។ តែ អ្វីដែលចម្លែកបំផុតក្នុងស្រុកខ្មែរនោះ គឺគណបក្សដែលធ្លាប់រិះគន់ គ.ជ.ប បែរជាទទួលយកលទ្ធផលបោះឆ្នោតទៅវិញ៖ «អ្នកដែលមិនពេញចិត្តនឹងគណៈកម្មាធិការ បែរជាចូលមកបោះឆ្នោតដដែលៗ ថាមិនចូលចិត្តរឿងវាអាចឹង វាឆ្ងល់ដែរ អាហ្នឹងវាមិនមែនជាសារនយោបាយអីទេ ប៉ុន្តែរឿងចម្លែកៗនៅស្រុកខ្មែរ វាមានដែរ មិនមែនមានតែនៅស្រុកថៃ នោះទេ»។
ក្រៅពីចំអកឲ្យបក្សប្រឆាំង លោក ហ៊ុន សែន ក៏ថ្លែងប្រៀបធៀបការបោះឆ្នោតរបស់កម្ពុជា និងការបោះឆ្នោតនៅបរទេសទៀតផង។ លោកបន្តថា ប្រទេសថៃ ព្រះមហាក្សត្រទទួលស្គាល់ទាហានដែលធ្វើរដ្ឋប្រហារថាស្របច្បាប់។ ចំណែកឯអ៊ុយក្រែន បោះឆ្នោតបណ្ដើរ លើកទ័ពប្រុងច្បាំងបណ្ដើរ ចុះហេតុអ្វីបានជាកម្ពុជា បោះឆ្នោតចប់ មហាក្សត្រឡាយព្រះហស្តលេខាហើយ បែរជានៅមានបញ្ហាដដែលនោះ? លោកបញ្ជាក់ថា បញ្ហានៅកម្ពុជា មិនមានអ្វីធំដុំឡើយ។
ទោះយ៉ាងណាក៏ដោយ ប្រមុខដឹកនាំរបស់គណបក្សប្រឆាំង លោក សម រង្ស៉ី និងលោក កឹម សុខា បានធ្វើសន្និសីទកាសែត កាលពីថ្ងៃទី១៨ ខែឧសភា ដោយប្រកាសពីជោគជ័យរបស់គណបក្សសង្គ្រោះជាតិ ក្នុងព្រឹត្តិការណ៍បោះឆ្នោតជ្រើសរើសក្រុមប្រឹក្សាកន្លងទៅ។ មេដឹកនាំបក្សប្រឆាំងបញ្ជាក់ថា ការបោះឆ្នោតនេះអាចទទួលយកបាន តែគណបក្សនេះនៅតែទទូចឲ្យមានការកែទម្រង់ គ.ជ.ប ឲ្យទៅជាស្ថាប័នធម្មនុញ្ញ ហើយបក្សសង្គ្រោះជាតិ ក៏នៅតែមិនទទួលស្គាល់លទ្ធផលបោះឆ្នោតជ្រើសតាំងតំណាងរាស្ត្រកាលពីឆ្នាំ២០១៣ ដដែល។
លទ្ធផលបណ្ដោះអាសន្ននៃការបោះឆ្នោតជ្រើសតាំងសមាជិកក្រុមប្រឹក្សារាជធានី ខេត្ត ក្រុង ស្រុក ខណ្ឌ បង្ហាញថា គណបក្សសង្គ្រោះជាតិ និងគណបក្សប្រជាជនកម្ពុជា កើនសំឡេងឆ្នោត និងកើនអាសនៈក្រុមប្រឹក្សាដូចគ្នា។ សំឡេងឆ្នោតទាំងនោះបានមកពីគណបក្សរាជានិយមហ៊្វុនស៊ិនប៉ិច និងគណបក្សជាតិនិយម ដែលសម្ដេចក្រុមព្រះធ្លាប់ដឹកនាំ។
ចំណែកឯអគ្គលេខាធិការគណៈកម្មាធិការជាតិរៀបចំការបោះឆ្នោត លោក ទេព នីថា ធ្លាប់ថ្លែងក្នុងសន្និសីទកាសែតថា គ.ជ.ប មិនតបនឹងបក្សប្រឆាំងឡើយ បើទោះជាបក្សប្រឆាំងចោទ គ.ជ.ប ថា លម្អៀង ហើយទទួលយក ឬបដិសេធលទ្ធផលបោះឆ្នោតក៏ដោយចុះ ព្រោះនេះជាសិទ្ធិរបស់បក្សប្រឆាំងប៉ុណ្ណោះ។
គណៈកម្មាធិការជាតិរៀបចំការបោះឆ្នោត គ្រោងនឹងប្រកាសលទ្ធផលផ្លូវការនៃការបោះឆ្នោតជ្រើសតាំងក្រុមប្រឹក្សានៅវេលាម៉ោង ៧ និង ៣០នាទីយប់ថ្ងៃទី២៧ ខែឧសភា តាមរយៈទូរទស្សន៍ជាតិ និងវិទ្យុជាតិកម្ពុជា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។