ផ្ទុយទៅវិញ នៅព្រឹកថ្ងៃទី៦ ខែឧសភា នេះ លោកនាយករដ្ឋមន្ត្រី ហ៊ុន សែន មានប្រសាសន៍ជាសាធារណៈថា លោកនឹងបន្តកាន់តំណែងត្រឹមតែអាយុ ៧៤ឆ្នាំទេ។
នៅក្នុងពិធីបើកការដ្ឋានសាងសង់ផ្លូវជាតិលេខ៤៤ នៅខេត្តកំពង់ស្ពឺ នៅថ្ងៃទី៦ ឧសភា លោក ហ៊ុន សែន មានប្រសាសន៍ថា លោកនឹងដើរតាមគន្លងមេដឹកនាំកុម្មុយនិស្តចិន និងវៀតណាម ដែលមេដឹកនាំទាំងនោះលាចេញពីតំណែងនៅចន្លោះអាយុ ៧៤ ទៅ ៧៦ឆ្នាំ។
លោក ហ៊ុន សែន ដែលពេលនេះមានអាយុ ៦២ ហើយនោះ បន្តថា គណបក្សប្រឆាំងបានរិះគន់ដដែលៗថា លោកកាន់តំណែងយូរឆ្នាំ ប៉ុន្តែការកាន់អំណាចមិនចំណុះលើលោកឡើយ ពោលគឺលើសន្លឹកឆ្នោតរបស់ប្រជាពលរដ្ឋ៖ «ប្រទេសគេជឿនលឿនគេដូរមេដឹកនាំ ខ្ញុំទទួលទៀតហើយ ខ្ញុំធ្វើឲ្យដូចចិន និង វៀតណាម ចាំដល់អាយុ ៧៤ ចាំខ្ញុំចេញ ធ្វើឲ្យដូចចិន។ ខ្ញុំធ្វើពីក្មេង ខ្ញុំធ្វើរដ្ឋមន្ត្រីការបរទេសតាំងពីអាយុ ២៧ ធ្វើឧបនាយករដ្ឋមន្ត្រីតាំងពីអាយុ ២៩ ហើយធ្វើនាយករដ្ឋមន្ត្រីតាំងពីអាយុ ៣២។ អ៊ីចឹងខ្ញុំធ្វើពីក្មេង ឥឡូវមានទាន់ចាស់ឯណា? គ្រាន់តែធ្វើយូរតើ! បើចង់ឲ្យនៅបោះឆ្នោតឲ្យ បើបោះឆ្នោតទម្លាក់ខ្ញុំមានអីនៅ?»។
នៅក្នុងឱកាសនោះ លោក ហ៊ុន សែន អំពាវនាវជាថ្មីឲ្យប្រជាពលរដ្ឋបោះឆ្នោតឲ្យគណបក្សកាន់អំណាច ដើម្បីឲ្យលោកបានធ្វើជានាយករដ្ឋមន្ត្រីជាថ្មីទៀតដែរ។ លោកក៏ប្រកាសព្រមានអង្គការសង្គមស៊ីវិលកុំឲ្យរិះគន់ និងដាក់គំនាបលើ គ.ជ.ប ដែរ ដោយលោកអះអាងថា មានអង្គការក្រៅរដ្ឋាភិបាលជាង ១ពាន់អង្គការដែលគាំទ្រ គ.ជ.ប។
ឆ្លើយតបទៅនឹងបញ្ហានេះ ប្រធានស្ដីទីគណបក្សសង្គ្រោះជាតិ លោក កឹម សុខា មានប្រសាសន៍ថា ការប្រកាសថា នឹងដឹកនាំតំណែងតាមគំរូចិន និង វៀតណាមនេះ ជារឿងគួរឲ្យអាម៉ាស់មួយរបស់បក្សកាន់អំណាច ព្រោះថា កម្ពុជាកាន់លទ្ធិប្រជាធិបតេយ្យ គួរយកគំរូតាមប្រទេសប្រជាធិបតេយ្យ មិនមែនយកគំរូតាមប្រទេសកុម្មុយនិស្តទេ។
លោកបន្តថា ប្រទេសកុម្មុយនិស្តចិន និង វៀតណាម អនុវត្តគោលនយោបាយបក្សតែមួយ តែប្រទេសទាំងពីរគេមិនក៏អនុញ្ញាតឲ្យនាយករដ្ឋមន្ត្រី និងប្រធានាធិបតីរបស់គេកាន់តំណែងលើសពី ១០ឆ្នាំនោះឡើយ៖ «សូម្បីតែមេកុម្មុយនិស្តចិន និង វៀតណាម ធំៗក្នុងពិភពលោកសព្វថ្ងៃហ្នឹង មានចិន និង យួន ហ្នឹង ទោះបីគេទុកគណបក្សតែមួយ ក៏គេដូរប្រធានាធិបតី នាយករដ្ឋមន្ត្រី អ៊ីចឹងហើយបានជីវភាពប្រជាជនចិន យួន ឡើង។ ពីដើមគេទុកមនុស្សម្នាក់ដឹកនាំជីវភាពប្រជាជនគេក្រ អ៊ីចឹងហើយចំណុចដែលគណបក្សប្រជាជនទុកលោក ហ៊ុន សែន ឲ្យដឹកនាំរហូតហ្នឹង នាំឲ្យពលរដ្ឋក្រីក្រ»។
លោកបញ្ជាក់ថា គណបក្សសង្គ្រោះជាតិបានដាក់ចេញនូវគោលនយោបាយកំណត់អាណត្តិនាយករដ្ឋមន្ត្រីត្រឹម ២អាណត្តិ ដើម្បីជៀសវាងការក្រាញអំណាច និងធានាឲ្យមានលទ្ធិប្រជាធិបតេយ្យ។
ការប្រកាសដ៏កម្ររបស់លោក ហ៊ុន សែន នេះ ធ្វើឡើងស្របពេលដែលមន្ត្រីជាន់ខ្ពស់គណបក្សប្រជាជន បានដាក់បេក្ខភាពថ្មីដែលជាកូនចៅ សាច់ញាតិរបស់ខ្លួន ឲ្យធ្វើជាតំណាងរាស្ត្រ។
អ្នកវិភាគបញ្ហានយោបាយសង្ស័យថា ក្នុងចំណោមបេក្ខជនថ្មីជាយុវជនទាំង ១៤ជំនាន់ក្រោយនោះ អាចនឹងមានបេក្ខជនម្នាក់នឹងឈរឈ្មោះជាបេក្ខភាពនាយករដ្ឋមន្ត្រីជំនួសលោក ហ៊ុន សែន ទៀតផង។ ក្នុងចំណោមយុវជនទាំង ១៤នាក់នោះ គឺមានវត្តមានលោក ហ៊ុន មានី កូនប្រុសពៅរបស់លោក ហ៊ុន សែន ឈរឈ្មោះជាអ្នកតំណាងរាស្ត្រនៅខេត្តកំពង់ស្ពឺ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។