លោក ហ៊ុន សែន បានប្រកាសថា ប្រទេសអ្នកមានមិនអាចមើលងាយប្រទេសអ្នកក្របានទេ។ លោក ហ៊ុន សែន ថ្លែងនៅចំពោះមុខអគ្គរដ្ឋទូតសហភាពអឺរ៉ុបប្រចាំកម្ពុជា លោក ហ្សង់ ហ្រ្វង់ស័រ កូតាំង (Jean francois CAUTAIN) ថា កម្ពុជាមិនយកគំរូតាមប្រទេសសហភាពអឺរ៉ុបដែលកាប់ព្រៃឈើអស់នោះទេ។ តែមន្ត្រីអង្គការសង្គមស៊ីវិល ដែលធ្វើការការពារបរិស្ថាននោះ លើកឡើងថា រដ្ឋាភិបាលការពារការកាប់ព្រៃឈើគ្មានប្រសិទ្ធភាពនោះទេ ហើយថា កម្ពុជានឹងមានវាសនាហិនហោចព្រៃឈើដូចសហភាពអឺរ៉ុប នៅពេលខាងមុខ។
លោកនាយករដ្ឋមន្ត្រី ហ៊ុន សែន ប្រកាសថា បទពិសោធន៍របស់សហភាពអឺរ៉ុប ធ្វើឲ្យបាត់បង់ព្រៃឈើអស់នោះ កម្ពុជានឹងមិនយកគំរូតាមនោះទេ។
លោក ហ៊ុន សែន បញ្ជាក់នៅចំពោះមុខលោកអគ្គរដ្ឋទូតសហភាពអឺរ៉ុបនៅកម្ពុជា ក្នុងទិវាជាតិទីក្រុងស្អាតឆ្នាំ២០១៥ នៅថ្ងៃទី២៤ កុម្ភៈ ថា ប្រទេសអ្នកមានមួយចំនួនបានរិះគន់កម្ពុជា ទៅលើគម្រោងសាងសង់ទំនប់វារីអគ្គិសនី និងការកាប់ព្រៃឈើ ចុះប្រទេសមួយចំនួនទៀតធ្វើបរមាណូ ហេតុអីមិននិយាយពីការខូចបរិស្ថានផង៖ «ពួកអឺរ៉ុបកាប់ឈើខ្លួនឯងអស់តាំងពីជំនាន់ណាណោះ រួចមកប្រដៅតែគេ។ …ឯកម្ពុជា មិនធ្វើដូចអឺរ៉ុបទេ កាប់ទាល់តែខ្ទេចព្រៃ មិនធ្វើអ៊ីចឹងទេ យើងដកពិសោធន៍ពីកំហុសរបស់អឺរ៉ុបដែរ។ អឺរ៉ុបមិនកាប់ព្រៃឈើអស់ អូ! ស្មានតែវាលអ៊ីចឹងតាំងពីអើយ!»។
ការថ្លែងរបស់លោក ហ៊ុន សែន នេះ ធ្វើឡើងនៅបន្ទាប់ពីអង្គការឃ្លាំមើលពិភពលោក គ្លបល វីតនេស (Global Witness) បានសម្ដែងការសោកស្ដាយចំពោះការអះអាងរបស់មន្ត្រីជាន់ខ្ពស់ក្រសួងកសិកម្ម រុក្ខាប្រមាញ់ និងនេសាទ ដែលចាត់ទុកថា ការរកស៊ីឈើប្រណីតរបស់លោក ទ្រី ភាព ដែលគេស្គាល់ថា លោកបានកាប់បំផ្លាញព្រៃឈើនៅកម្ពុជា នោះ ថាជាជំនួញស្របច្បាប់។
របាយការណ៍របស់ គ្លបល វីតនេស (Global Witness) ដែលចេញផ្សាយកាលពីសប្ដាហ៍មុន ក៏បានបញ្ជាក់ផងដែរថា ការរកស៊ីឈើរបស់លោក ទ្រី ភាព គឺប្រាសចាកពីអនុសញ្ញាស្ដីពីការហាមប្រាមក្នុងការធ្វើពាណិជ្ជកម្មអន្តរជាតិនៃសត្វព្រៃ និងព្រៃឈើដែលជិតផុតពូជ។
មិនមែនជាលើកទី១ទេ ដែលលោកនាយករដ្ឋមន្ត្រី ហ៊ុន សែន ប្រកាសឲ្យបង្ក្រាបបទល្មើសព្រៃឈើ និងវិធានការការពារព្រៃឈើនៅកម្ពុជា លោកថែមទាំងប្ដេជ្ញាចិត្តថា លោកនឹងកាត់កលោកចេញ បើសិនជាលោកការពារព្រៃឈើមិនបាន។
ប្រធានអង្គការកិច្ចការពិសេសសិទ្ធិមនុស្សកម្ពុជា លោក អ៊ូច ឡេង មានប្រសាសន៍ថា រដ្ឋាភិបាលមិនអាចការពារព្រៃឈើនៅកម្ពុជា បានទេ ដោយសាររដ្ឋាភិបាលបានវិនិយោគឲ្យក្រុមហ៊ុនឯកជនជាអ្នកកាប់ព្រៃឈើ ដែលក្រុមឈ្មួញទាំងនោះកាប់ព្រៃឈើដោយសេរី។ លោកបញ្ជាក់ថា បច្ចុប្បន្ននេះ គេដឹកឈើចេញតាមច្រកកំពង់ផែអន្តរជាតិកំពង់សោម ក្នុង ១ខែចន្លោះពី ៩០០ ទៅ ១.០០០កុងទឺន័រ៖ «ក្រុមគ្រួសារលោកនាយករដ្ឋមន្ត្រីក៏ស្រលាញ់ព្រៃឈើដែរ ដូចជាផ្ទះលោក ហ៊ុន តូ បានដាំដើមឈើ ផ្ទះលោកនាយករដ្ឋមន្ត្រីជាដើម តែគាត់បែរជាបំផ្លាញព្រៃឈើទៅវិញ ដូច្នេះលោកនាយករដ្ឋមន្ត្រីត្រូវតែពិចារណាក្នុងការការពារព្រៃឈើនេះ»។
កន្លងមកមន្ត្រីការពារបរិស្ថានតែងតែទទួលរងការប្ដឹងផ្ដល់ទៅតុលាការ និងការគំរាមកំហែងពីក្រុមឈ្មួញកាប់ព្រៃឈើ។ លើសពីនេះទៀត មានអ្នកកាសែត និងសកម្មជនការពារព្រៃឈើ ដូចជាលោក ឈុត វុទ្ធី ជាដើម ត្រូវបានគេបាញ់សម្លាប់។
អង្គការធ្វើការលើផ្នែកបរិស្ថាន គ្លបល វីតនេស ដែលមានមូលដ្ឋាននៅប្រទេសអង់គ្លេស បានស្នើរាជរដ្ឋាភិបាលកម្ពុជា ស៊ើបអង្កេតទ្រព្យសម្បត្តិ និងការរកស៊ីឈើរបស់លោកឧកញ៉ា ទ្រី ភាព បន្ទាប់ពីអង្គការនេះបានរកឃើញថា លោក ទ្រី ភាព ជាអ្នករកស៊ីឈើខុសច្បាប់ និងនាំចេញឈើជាច្រើនរយម៉ែត្រគូបក្នុងមួយថ្ងៃទៅក្រៅប្រទេស។
ទាក់ទងនឹងបញ្ហានេះ លោក អ៊ូច ឡេង អះអាងថា ព្រៃឈើនៅកម្ពុជា នឹងមានវាសនាបាត់បង់មិនខុសពីសហភាពអឺរ៉ុបនោះឡើយនៅពេលខាងមុខ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។