អ្នកតំណាងរាស្ត្រគណបក្សសង្គ្រោះជាតិ ២រូប ដែលត្រូវបានបាតុករវាយប្រហារឲ្យរបួសធ្ងន់ បន្តអំពាវនាវឲ្យអាជ្ញាធរស្វែងរកយុត្តិធម៌ជូនពួកគាត់ ខណៈដែលពួកគេកំពុងសម្រាកព្យាបាលក្នុងមន្ទីរពេទ្យនៅប្រទេសថៃ។ ទន្ទឹមនឹងនេះដែរ សកម្មជនការពារសិទ្ធិមនុស្ស ក៏ស្នើឲ្យតុលាការពន្លឿនការស៊ើបអង្កេតដើម្បីធានានូវប្រសិទ្ធភាព និងរកយុត្តិធម៌ជូនជនរងគ្រោះ ដើម្បីបញ្ចៀសនូវវប្បធម៌និទ្ទណ្ឌភាព ឬភាពគ្មានទោសពៃរ៍នៅកម្ពុជា។
លោក ញ៉យ ចំរើន ដែលកំពុងសម្រាកព្យាបាលរបួសនៅក្នុងប្រទេសថៃ បានទទូចឲ្យអាជ្ញាធរ និងតុលាការ បន្ថែមល្បឿនស៊ើបអង្កេតករណីហិង្សាលើរូបលោក ដោយលោកស្នើឲ្យស្វែងរកជនដៃដល់ពិតប្រាកដ និងជនដែលនៅពីក្រោយខ្នងយកមកផ្ដន្ទាទោស។
កាលពីថ្ងៃទី២៦ ខែតុលា តំណាងរាស្ត្រគណបក្សសង្គ្រោះជាតិ ចំនួន ២រូប គឺលោក ញ៉យ ចំរើន និងលោក គង់ សុភា ត្រូវបានបាតុករមួយក្រុមចាប់ទាញចេញពីក្នុងឡាន រួចព្រួតគ្នាវាយរហូតដល់សន្លប់ ខណៈដែលតំណាងរាស្ត្រទាំងពីរកំពុងបើករថយន្តចេញពីរដ្ឋសភា។
ភ្លាមៗបន្ទាប់ពីហេតុការណ៍នេះ តំណាងរាស្ត្រទាំងពីរត្រូវបានបញ្ជូនទៅព្យាបាលនៅប្រទេសថៃ។ មកទល់ពេលនេះ លោក ញ៉យ ចំរើន រៀបរាប់ថា របួសរបស់លោកនៅមិនទាន់ជាសះស្បើយនៅឡើយទេ៖ «ឆ្អឹងជំនីរនៅចុកនៅឡើយ ហើយដើមទ្រូងនិងខ្នងក៏នៅឈឺដែរ។ ដៃបាក់ ហើយឆ្អឹងក្រោមភ្នែកក៏បាក់»។
ក្រោយពីមានព្រឹត្តិការណ៍វាយប្រហារនេះ ក្រសួងមហាផ្ទៃ បានបង្កើតគណៈកម្មការស៊ើបអង្កេតមួយដើម្បីស្វែងរកក្រុមមនុស្សដែលវាយអ្នកតំណាងរាស្ត្រយកមកផ្ដន្ទាទោស។
លោក ខៀវ សុភ័គ អ្នកនាំពាក្យក្រសួងមហាផ្ទៃ ថ្លែងថា កម្លាំងនៅក្រសួងរបស់លោកនឹងធ្វើការសហការជាមួយតុលាការដើម្បីស្វែងរកយុត្តិធម៌ជូនសមាជិកសភាដែលត្រូវបានគេវាយដំនោះ៖ «សមត្ថកិច្ចបានបញ្ជូនសំណុំរឿងជូនស្ថាប័នតុលាការ។ គណៈកម្មការក៏រង់ចាំការណែនាំ ឬយ៉ាងម៉េចទៀត តុលាការលោកនឹងបង្គាប់មកឲ្យសមត្ថកិច្ចលោកចាត់ការបន្ត»។
តាមរយៈមេធាវីរបស់ខ្លួន តំណាងរាស្ត្រទាំងពីរបានដាក់ពាក្យប្ដឹងក្រុមបាតុករទៅសាលាដំបូងរាជធានីភ្នំពេញ នៅថ្ងៃទី១០ ខែវិច្ឆិកា ពីបទប៉ុនប៉ងឃាតកម្មគិតទុកជាមុន និងធ្វើឲ្យខូចខាតទ្រព្យសម្បត្តិដោយចេតនាមានស្ថានទម្ងន់ទោស ព្រមទាំងទាមទារសំណងជាទឹកប្រាក់ម្នាក់ៗចំនួន ១០០លានរៀល។
មេធាវីការពារក្ដីឲ្យតំណាងរាស្ត្រទាំងពីររូប គឺលោក ជូង ជូងី។ លោកឲ្យដឹងថា មកដល់ពេលនេះ ពាក្យបណ្ដឹងត្រូវបានអយ្យការអមសាលាដំបូងរាជធានីភ្នំពេញ បញ្ជូនទៅដល់ដៃចៅក្រមស៊ើបសួរហើយ៖ «ពាក្យបណ្ដឹងហ្នឹងនៅក្នុងសំណុំរឿងជាមួយចៅក្រមស៊ើបសួរ ហើយចៅក្រមស៊ើបសួរកំពុងតែសិក្សានីតិវិធីហ្នឹងហើយ»។
ក្រោយពីលោកនាយករដ្ឋមន្ត្រី ហ៊ុន សែន អំពាវនាវឲ្យជនដៃដល់ចេញមុខមកទទួលទោស ជនសង្ស័យចំនួនបីនាក់បានស្ម័គ្រចិត្តចេញសារភាពថា ពួកគេបានប្រើអំពើហិង្សាលើអ្នកតំណាងរាស្ត្របក្សប្រឆាំង។ បន្ទាប់មក ពួកគេត្រូវបានតុលាការបញ្ជូនទៅឃុំខ្លួនបណ្ដោះអាសន្ន នៅពន្ធនាគារព្រៃស កាលពីថ្ងៃទី៤ ខែវិច្ឆិកា ក្រោមបទចោទហិង្សាដោយចេតនា មានស្ថានទម្ងន់ទោស និងបទធ្វើឲ្យខូចខាតទ្រព្យសម្បត្តិដោយចេតនាមានស្ថានទម្ងន់ទោស។
មន្ត្រីសិទ្ធិមនុស្សស្នើថា តុលាការគួរពង្រឹងប្រសិទ្ធភាពការងារ ដោយស្វែងរកជនដៃដល់ពិតប្រាកដឲ្យឃើញ ដើម្បីរកយុត្តិធម៌ជូនជនរងគ្រោះ។
ប្រធានផ្នែកបច្ចេកទេសស៊ើបអង្កេតនៃអង្គការសិទ្ធិមនុស្សលីកាដូ (LICADHO) លោក អំ សំអាត ថ្លែងថា ករណីនេះ ប្រសិនបើអាជ្ញាធរមិនអាចស្វែងរកជនដៃដល់ពិតប្រាកដមកផ្ដន្ទាទោសនោះទេ វានឹងធ្វើឲ្យមានវប្បធម៌និទ្ទណ្ឌភាព ឬភាពគ្មានទោសពៃរ៍នៅកម្ពុជា ហើយរឹតតែធ្វើឲ្យស្ថានភាពរំលោភសិទ្ធិមនុស្សនៅកម្ពុជា កាន់តែអាក្រក់ថែមទៀត៖ «រាល់ករណីតែងមានគណៈកម្មការកើតឡើង ដូចជារឿងព្រឹត្តិការណ៍ស្ពានអាកាសក្បាលថ្នល់ ព្រឹត្តិការណ៍វត្តស្ទឹងមានជ័យ ព្រឹត្តិការណ៍វ៉េងស្រេង សុទ្ធតែបង្កើត ដើម្បីស៊ើបអង្កេតស្រាវជ្រាវ។ ប៉ុន្តែការប្រើវប្បធម៌នៃការបង្កើតហ្នឹង បើយើងមើលទៅលើលទ្ធផលនៃការស្រាវជ្រាវស៊ើបអង្កេត មិនទាន់មានឃើញមានជនណាមួយត្រូវបាននាំមកផ្ដន្ទាទោសតាមផ្លូវ ច្បាប់នោះទេ»។
កាលពីថ្ងៃទី១ ខែវិច្ឆិកា អង្គការសង្គមស៊ីវិលចំនួន ២០ បានចេញសេចក្ដីថ្លែងការណ៍រួមមួយ ដោយអំពាវនាវដល់រាជរដ្ឋាភិបាល បញ្ចប់នូវវប្បធម៌និទ្ទណ្ឌភាពក្នុងប្រទេសកម្ពុជា។ ពួកគេស្នើថា ជនប្រព្រឹត្តរំលោភសិទ្ធិមនុស្ស គួរត្រូវនាំខ្លួនមកទទួលទោស។
ក្រសួងមហាផ្ទៃ កាលពីថ្ងៃទី៤ ខែវិច្ឆិកា បានចេញលិខិតណែនាំដល់អភិបាលខេត្ត និងកម្លាំងសមត្ថកិច្ចនៅតាមខេត្ត រាជធានី ទាំងអស់ ពង្រឹងការពារសន្តិសុខ និងសុវត្ថិភាពដល់អ្នកនយោបាយ អ្នកការទូត និងអ្នករកស៊ី ដោយមិនប្រកាន់និន្នាការ។ យ៉ាងណា អ្នកនយោបាយបក្សប្រឆាំងនៅតែបារម្ភពីសន្តិសុខ សុវត្ថិភាពរបស់ពួកគេ ជាពិសេសក្នុងពេលដែលកម្ដៅនយោបាយកំពុងតែកើនឡើងខ្លាំងថែមទៀត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។