ភាព​មិន​ប្រក្រតី​នៃ​ការ​ឃោសនា​បោះឆ្នោត​សម្រាប់​ថ្ងៃ​១០​កក្កដា

0:00 / 0:00

0:00 / 0:00

0:00 / 0:00

មេ​ភូមិ​បក្ស​ប្រជាជន​រង​ការ​ចោទ​ថា​គំរាម​កំហែង​សិទ្ធិ​អ្នក​បោះឆ្នោត

ដោយ អ៊ុក សាវបូរី

ខេត្ត​តាកែវ៖ ក្រោយ​ពី​មាន​ការ​អំពាវនាវ​របស់​គណៈកម្មការ​រៀបចំ​ការ​បោះឆ្នោត​ខេត្ត​តាកែវ កាល​ពី​ថ្ងៃ​ទី៥ ខែ​កក្កដា កន្លង​មក មេ​ឃុំ​ព្រែកផ្ទោល ស្រុក​អង្គរបុរី និង​ឃុំ​កំពែង ស្រុក​ព្រៃកប្បាស ខេត្ត​តាកែវ បាន​បញ្ជា​ឲ្យ​មេ​ភូមិ​គ្រប់​ភូមិ ប្រមូល​អត្តសញ្ញាណប័ណ្ណ និង​លិខិត​បញ្ជាក់​អត្តសញ្ញាណ​សម្រាប់​បម្រើ​ឲ្យ​ការ​បោះឆ្នោត ដែល​គេ​និយម​ហៅថា ប័ណ្ណ​ខៀវ​ពី​ពលរដ្ឋ។ ប៉ុន្តែ​សកម្មភាព​នេះ ត្រូវ​តំណាង​គណបក្ស​សង្គ្រោះ​ជាតិ ចោទ​ថា ជា​ការ​គំរាម​កំហែង​សិទ្ធិ​អ្នក​បោះឆ្នោត។

សូម​ស្ដាប់​សេចក្ដី​រាយការណ៍​របស់​អ្នកស្រី អ៊ុក សាវបូរី ដូច​ត​ទៅ៖

ប្រធាន​ប្រតិបត្តិ​គណបក្ស​សង្គ្រោះ​ជាតិ​អះអាង​ថា​មាន​ការ​គំរាម​ផ្នែក​នយោបាយ​ច្រើន​នៅ​ខេត្ត​កំពត

ដោយ អ៊ុក សាវបូរី

ខេត្ត​កំពត៖ ប្រធាន​ប្រតិបត្តិ​គណបក្ស​សង្គ្រោះ​ជាតិ ស្រុក​ជុំគីរី ខេត្ត​កំពត លោក ង៉ែត ខន ថ្លែង​នៅ​ព្រឹក​ថ្ងៃ​ទី១០ ខែ​កក្កដា ថា មាន​ការ​គំរាម​ផ្នែក​នយោបាយ​កើត​មាន​ជាច្រើន​លើ​គណបក្ស​លោក ក្នុង​ពេល​កំពុង​ធ្វើ​យុទ្ធនាការ​ឃោសនា​រក​សំឡេង​ឆ្នោត។

ករណី​ទាំង​នោះ មាន​ដូចជា មេ​ភូមិ​រារាំង​ក្បួន​ហែ​ក្នុង​ថ្ងៃ​ឃោសនា ជន​ខិលខូច​ផ្ដួល​រំលំ​ស្លាក​គណបក្ស​សង្គ្រោះ​ជាតិ អាជ្ញាធរ​ឲ្យ​ប្រជាពលរដ្ឋ​គូស​សន្លឹក​ឆ្នោត និង​បញ្ហា​ច្រើន​ទៀត។ លោក​ថា បណ្ដឹង​នោះ​ភាគ​ច្រើន​បាន​ដោះស្រាយ​នៅ​គណៈកម្មការ​ឃុំ​រៀបចំ​ការ​បោះឆ្នោត (CEC)។ ប៉ុន្តែ​នៅ​ព្រឹក​ថ្ងៃ​ទី១០ ខែ​កក្កដា ស្លាក​គណបក្ស​សង្គ្រោះ​ជាតិ មួយ​ទៀត ត្រូវ​បាន​ផ្ដួល​រំលំ។ គណបក្ស​នេះ​បាន​ដាក់​ពាក្យ​ប្តឹង​ទៅ​គណៈកម្មការ​ឃុំ​ជំពូវ័ន្ត ដើម្បី​រក​មុខ​ជន​ខិលខូច។

តំណាង​គណបក្ស​ប្រជាជន​កម្ពុជា ខេត្ត​កំពត លោក ភូ តីកុ មិន​ធ្វើ​អត្ថាធិប្បាយ​ទេ​ជុំវិញ​បញ្ហា​នេះ។

អនុប្រធាន​គណៈកម្មការ​ខេត្ត​កំពត រៀបចំ​ការ​បោះឆ្នោត (PEC) លោក អ៊ុង វិសាល ថ្លែង​ថា ក្នុង​យុទ្ធនាការ​ឃោសនា​បោះឆ្នោត​ពី​ថ្ងៃ​ទី២៧ ខែ​មិថុនា មក​ដល់​ត្រឹម​ថ្ងៃ​ទី៩ ខែ​កក្កដា គណៈកម្មការ​ខេត្ត​រៀបចំ​ការ​បោះឆ្នោត​ទទួល​បាន​បណ្ដឹង​ចំនួន​១២។ លោក​ថា បណ្ដឹង​មាន​តែ​គណបក្ស ២​ទេ​ដែល​ប្ដឹង​គ្នា​ទៅ​វិញ​ទៅ​មក គឺ​គណបក្ស​ប្រជាជន​កម្ពុជា និង​គណបក្ស​សង្គ្រោះ​ជាតិ។ លោក​ថា បណ្ដឹង​ចំនួន​៨ ដោះស្រាយ​ចប់​នៅ​គណៈកម្មការ​ឃុំ​រៀបចំ​ការ​បោះឆ្នោត នៅ​សល់​បណ្ដឹង​៤ ទៀត​ដែល​កំពុង​ដោះស្រាយ​បន្ត។

អ្នក​គាំទ្រ​បក្ស​សង្គ្រោះ​ជាតិ​ម្នាក់​នៅ​ខេត្ត​តាកែវ​ត្រូវ​ចាប់​ឃុំ​ពី​បទ​បៀតបៀន​ក្មេង​ស្រី

ដោយ អ៊ុក សាវបូរី

ខេត្ត​តាកែវ៖ បុរស​វ័យ​អាយុ ៧៥​ឆ្នាំ ឈ្មោះ គង់ ម៉ៅ ជា​អ្នក​គាំទ្រ​គណបក្ស​សង្គ្រោះ​ជាតិ នៅ​ឃុំ​បានកាម ស្រុក​ព្រៃកប្បាស ខេត្ត​តាកែវ ត្រូវ​សមត្ថកិច្ច​ខេត្ត​ចាប់​ឃុំ ចោទ​ពី​បទ​បៀតបៀន​ក្មេង​ស្រី​អាយុ ១៥​ឆ្នាំ បន្ទាប់​ពី​បាន​ហែ​ក្បួន​ឃោសនា​កាល​ពី​ថ្ងៃ​អង្គារ ទី៩ ខែ​កក្កដា ដោយ​ចែក​ខិត្តប័ណ្ណ​ឃោសនា​ទៅ​ក្មេង​ស្រី រួច​បាន​អង្អែល​ស្មា​នាង។

ប្រធាន​ក្រុម​ការងារ​គណបក្ស​សង្គ្រោះ​ជាតិ ស្រុក​ព្រៃកប្បាស លោក ម៉ៅ សុផល បាន​ចោទ​ថា ការ​ចាប់​ខ្លួន​សកម្មជន​គណបក្ស​នោះ​ជា​រឿង​នយោបាយ ដោយសារ​គណបក្ស​សង្គ្រោះ​ជាតិ នៅ​ស្រុក​ព្រៃកប្បាស មាន​អ្នក​គាំទ្រ​ច្រើន។

ស្មៀន​ឃុំ​ខេត្ត​ព្រៃវែង​រង​ការ​ចោទ​ថា​លម្អៀង​ទៅ​បក្ស​កាន់​អំណាច

ដោយ ហ៊ុំ ចំរើន

ខេត្ត​ព្រៃវែង៖ គណបក្ស​សង្គ្រោះ​ជាតិ មាន​មន្ទិល​សង្ស័យ​លើ​ស្មៀន​ឃុំ​ប្រធាតុ ស្រុក​កំពង់ត្របែក ខេត្ត​ព្រៃវែង ថា​លម្អៀង​ទៅ​លើ​គណបក្ស​កាន់​អំណាច។ ស្មៀន​ឃុំ​រូប​នេះ​បាន​អនុញ្ញាត​ឲ្យ​គណបក្ស​ប្រជាជន បិទ​ផ្សាយ​ឃោសនា​រក​សំឡេង​ឆ្នោត​ដាក់​នឹង​របង​ផ្ទះ​របស់​ខ្លួន។

តើ​ការ​អនុញ្ញាត​ឲ្យ​បិទ​ផ្សាយ​ឃោសនា​រក​សំឡេង​ឆ្នោត​ឲ្យ​គណបក្ស​ណា​មួយ​នៅ​របង​ផ្ទះ​ស្មៀន​ឃុំ​នេះ ជា​ការ​ខុស ឬ​ត្រូវ​យ៉ាង​ណា​ដែរ?

សូម​ស្ដាប់​សេចក្ដី​រាយការណ៍​របស់​លោក ហ៊ុំ ចំរើន ដូច​ត​ទៅ៖

ប្រធាន​ភូមិ​ខេត្ត​ស្ទឹងត្រែង​រង​ការ​ប្ដឹង​ទារ​ជំងឺ​ចិត្ត​៤​លាន​រៀល

ដោយ រដ្ឋា វិសាល

ខេត្ត​ស្ទឹងត្រែង៖ មន្ត្រី​គណបក្ស​សង្គ្រោះ​ជាតិ នៅ​ខេត្ត​ស្ទឹងត្រែង បាន​ប្ដឹង​ចោទ​ប្រកាន់​មេ​ភូមិ​នៃ​គណបក្ស​ប្រជាជន ថា​បាន​គំរាម​រារាំង​បំភិត​បំភ័យ​ទៅ​លើ​សកម្មជន​គណបក្ស​នយោបាយ ក្នុង​យុទ្ធនាការ​ឃោសនា​រក​សំឡេង​ឆ្នោត​ផ្ទុយ​ទៅ​នឹង​គោលការណ៍​ណែនាំ និង​នីតិវិធី​របស់​គណៈកម្មាធិការ​ជាតិ​រៀបចំ​ការ​បោះឆ្នោត (គ.ជ.ប)។

សូម​ស្ដាប់​សេចក្ដី​រាយការណ៍​របស់​លោក រដ្ឋា វិសាល ដូច​ត​ទៅ៖

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។