ភាព​មិន​ប្រក្រតី​និង​បណ្ដឹង​ទាក់ទង​ការ​បោះ​ឆ្នោត

ប្រជាពលរដ្ឋ​ជា​ច្រើន​បាន​អះអាង​ពី​ភាព​មិន​ប្រក្រតី​នៃ​ដំណើរ​ការ​បោះ​ឆ្នោត​សភា​នីតិកាល​ទី​៥ ថ្ងៃ​ទី​២៨ ខែ​កក្កដា។ ទន្ទឹម​នឹង​នេះ មន្ត្រី​​រៀបចំ​​ការ​បោះ​ឆ្នោត​ខ្លះ ក៏​កំពុង​រង​បណ្ដឹង​ទាក់​ទង​​ទៅ​នឹង​ភាព​មិន​ប្រក្រតី​ទាំង​ឡាយ​នេះ​ដែរ។

0:00 / 0:00

0:00 / 0:00

0:00 / 0:00

0:00 / 0:00

0:00 / 0:00

ប្រជាពលរដ្ឋ​ដែល​ជា​ម្ចាស់​ឆ្នោត​ស្ទើរ​គ្រប់​ទិសទី បាន​ជួប​នូវ​បញ្ហា​លំបាក និង​ភាព​មិន​ប្រក្រតី​ជា​ច្រើន ដូចជា​បាត់​ឈ្មោះ​ពី​បញ្ជី​បោះ​ឆ្នោត ជនជាតិ​វៀតណាម មាន​សិទ្ធិ​បោះ​ឆ្នោត ឬ​ក៏​ទឹក​ខ្មៅ​ជ្រលក់​ម្រាមដៃ​អាច​លុប​លាង​ជ្រះ​ជាដើម។ ទោះ​ជា​យ៉ាង​ណា ការ​អះអាង​នេះ ត្រូវ​បាន​មន្ត្រី​គណៈកម្មាធិការ​ជាតិ​រៀបចំ​ការ​បោះ​ឆ្នោត ឬ គ.ជ.ប បដិសេធ​ចោល។

សូម​ស្ដាប់​សេចក្ដី​រាយការណ៍​របស់​លោក ដែន អយុធ្យា ពី​ទិដ្ឋភាព​នៃ​ការ​តវ៉ា​របស់​ប្រជាពលរដ្ឋ​នៅ​ថ្ងៃ​បោះ​ឆ្នោត៖

ចំណែក​នៅ​ឯ​ខេត្ត​កំពង់ឆ្នាំង មន្ត្រី​គណបក្ស​សង្គ្រោះ​ជាតិ ប្រចាំ​ខេត្ត​នេះ កំពុង​តែ​ប្រមូល​ទិន្នន័យ និង​ឯកសារ​ភស្តុតាង​ទាក់ទង​ទៅ​នឹង​ភាព​មិន​ប្រក្រតី​ដែល​បាន​កើត​ឡើង​ក្នុង​ថ្ងៃ​បោះ​ឆ្នោត​ជ្រើសតាំង​តំណាងរាស្ត្រ​នីតិកាល​ទី​៥ កាល​ពី​ថ្ងៃ​ទី​២៨ កក្កដា ដើម្បី​លើក​មក​ពិភាក្សា និង​វាយ​តម្លៃ​ក្នុង​អង្គប្រជុំ​មួយ ថា​តើ​ត្រូវ​ទាត់​ចោល ឬ​ក៏​ទទួល​យក​លទ្ធផល​នៃ​ការ​បោះឆ្នោត​នេះ។

ទោះ​ជា​យ៉ាង​ណា​មន្ត្រី​គណៈកម្មការ​រៀបចំ​ការ​បោះ​ឆ្នោត​ខេត្ត​កំពង់ឆ្នាំង បញ្ជាក់​នៅ​ថ្ងៃ​ទី​២៩ កក្កដា ថា ដំណើរ​ការ​បោះ​ឆ្នោត​ជ្រើស​តាំង​តំណាងរាស្ត្រ​នីតិកាល​ទី​៥ មាន​ភាព​រលូន ហើយ​គណៈកម្មការ​នេះ​ទទួល​បាន​បណ្ដឹង​ចំនួន ៥​ប៉ុណ្ណោះ ពី​គណបក្ស​នយោបាយ​នានា។

សូម​ស្ដាប់​សេចក្ដី​រាយការណ៍​របស់​លោក ជិន ជេដ្ឋា ពី​ខេត្ត​កំពង់ឆ្នាំង៖

នៅ​ខេត្ត​រតនគិរី មន្ត្រី​រៀបចំ​ការ​បោះ​ឆ្នោត​នៅ​ខេត្ត​នេះ ត្រូវ​បាន​មន្ត្រី​គណបក្ស​សង្គ្រោះ​ជាតិ​ចោទ​ប្រកាន់​ថា បាន​អនុវត្ត​ការងារ​ផ្ទុយ​ទៅ​នឹង​ច្បាប់​ស្ដីពី​ការ​បោះ​ឆ្នោត​ជ្រើសតាំង​តំណាងរាស្ត្រ។ មន្ត្រី​រៀបចំ​ការ​បោះ​ឆ្នោត​ទាំង​នោះ មិន​បាន​ប្រកាន់​ជំហរ​អព្យាក្រឹត ហើយ​លំអៀង​ទៅ​រក​គណបក្ស​ប្រជាជន​ក្នុង​ថ្ងៃ​បោះ​ឆ្នោត​ជាតិ​នីតិកាល​ទី​៥​នេះ។

មន្ត្រី​រៀបចំ​ការ​បោះ​ឆ្នោត​ខេត្ត​រតនគិរី មួយ​រូប កំពុង​ប្រឈម​មុខ​ទៅ​នឹង​ការ​ប្ដឹង​តាម​ច្បាប់​បោះ​ឆ្នោត ក្នុង​បទ​ចោទ​ប្រកាន់​ថា បាន​បំពេញ​តួនាទី​មិន​ត្រឹមត្រូវ​តាម​ច្បាប់​បោះ​ឆ្នោត។

សូម​ស្ដាប់​សេចក្ដី​រាយការណ៍​របស់​លោក រដ្ឋា វីសាល៖

ចំណែក​ឯ​បេក្ខជន​តំណាង​រាស្ត្រ​គណបក្ស​សង្គ្រោះ​ជាតិ ខេត្ត​ស្វាយរៀង​ ក៏​បាន​ប្ដឹង​ចោទ​ប្រកាន់​មន្ត្រី​គណៈកម្មការ​ឃុំ​រៀបចំ​ការ​បោះឆ្នោត ដែល​បាន​បង្ក​ឲ្យ​មាន​ភាព​មិន​ប្រក្រតី​កើត​ឡើង​ក្នុង​ការិយាល័យ​បោះ​ឆ្នោត​លេខ ០៣៣៧ នៅ​ភូមិ​ស្វាយ សង្កាត់​ចេក ក្រុង​ស្វាយរៀង កាល​ពី​ថ្ងៃ​ទី​២៨ កក្កដា ដែរ។

មន្ត្រី​គណបក្ស​សង្គ្រោះ​ជាតិ នៅ​ខេត្ត​ស្វាយរៀង ចោទ​ប្រកាន់​ថា គណៈកម្មការ​ឃុំ​រៀប​ចំ​ការ​បោះ​ឆ្នោត​មាន​​ឧបករណ៍​លាង​សំអាត​ម្រាម​ដៃ​ផ្ដល់​ឲ្យ​ប្រជាពលរដ្ឋ​ដែល​បាន​បោះ​ឆ្នោត​រួច ដើម្បី​ឲ្យ​ពួកគាត់​លាង​សំអាត​ម្រាម​ដៃ​បន្ទាប់​ពី​បោះ​ឆ្នោត។

សូម​ស្ដាប់​សេចក្ដី​រាយការណ៍​របស់​លោក ហ៊ុំ ចំរើន ពី​ខេត្ត​ស្វាយរៀង៖

ប្រជាពលរដ្ឋ​នៅ​ភូមិ​កំពង់ចម្លុះខាងកើត ឃុំ​ពាមជីលាំង ស្រុក​ត្បូងឃ្មុំ ខេត្ត​កំពង់ចាម បាន​អះអាង​ថា មេភូមិ​និង​អនុ​ភូមិ​កំពង់ចម្លុះខាងកើត បាន​ហៅ​ប្រជាពលរដ្ឋ​អោយ​ចូល​ព្រះវិហារ​វត្ត​កំពង់ចម្លុះ ដើម្បី​ចែក​លុយ​ដែល​គណបក្ស​ប្រជាជន​កម្ពុជា បាន​សន្យា​ថា អោយ​ពលរដ្ឋ​ម្នាក់ ១​ម៉ឺន​រៀល កាល​ពី​មុន​ពេល​បោះ​ឆ្នោត ហើយ​អោយ​ប្រជាពលរដ្ឋ​ស្បថ​ថា​ស្លាប់​មួយ​ចំហៀង​ខ្លួន ប្រសិន​បើ​ពួកគេ​មិន​បាន​បោះ​ឆ្នោត​អោយ​គណបក្ស​ប្រជាជន​កម្ពុជា។ តែ​មេ​ភូមិ​និង​អនុ​ភូមិ​បដិសេធ​ថា ពួក​គាត់​មិន​បាន​បង្ខំ​អោយ​ពលរដ្ឋ​ស្បថ​នោះ​ឡើយ។

សូម​​​​ស្ដាប់​សេចក្ដី​រាយការណ៍​របស់​លោក យាង សុជាមេត្តា ពី​ខេត្ត​កំពង់ចាម៖

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖

ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។