មន្ត្រីគណបក្សប្រជាជនកម្ពុជា ថា ខ្លួននឹងមិនដោះលែងលោក កឹម សុខា តាមសំណើរបស់សមាជិកព្រឹទ្ធសភាសហរដ្ឋអាមេរិក ដែលដាក់ឱសានវាទឲ្យដោះលែងលោក កឹម សុខា នៅថ្ងៃទី៩ ខែវិច្ឆិកា ទេ។ ប៉ុន្តែ អ្នកវិភាគលើកឡើងថា ការរក្សាជំហរបែបនេះរបស់រដ្ឋាភិបាលនឹងធ្វើឲ្យប្រទេសកម្ពុជា ខូចឈ្មោះនៅលើឆាកអន្តរជាតិ ហើយសហរដ្ឋអាមេរិក នឹងដាក់ទណ្ឌកម្មមកលើកម្ពុជា។
អ្នកនាំពាក្យគណបក្សប្រជាជនកម្ពុជា ប្រតិកម្មចំពោះការដាក់ឱសានវាទឲ្យដោះលែងលោក កឹម សុខា ថា ជាការប្រមាថធ្ងន់ធ្ងរដល់ឆន្ទៈរបស់ប្រជាជនកម្ពុជា ទូទាំងប្រទេស ហើយក៏ជាសកម្មភាពជ្រៀតជ្រែកចូលកិច្ចការផ្ទៃក្នុងកម្ពុជា។
លោក សុខ ឥសាន សរសេរនៅលើបណ្ដាញទំនាក់ទំនងតេឡេក្រាម (Telegram) របស់លោកថ្ងៃទី៩ ខែវិច្ឆិកា ថា កម្ពុជាជាប្រទេសឯករាជ្យ និងមានអធិបតេយ្យ ដូច្នេះកុំចង់ឲ្យរដ្ឋាភិបាលធ្វើអ្វីតាមខ្លួន ធ្វើដូចជាកម្ពុជា ស្ថិតនៅក្រោមនឹមអាណានិគមរបស់សហរដ្ឋអាមេរិក។
ការលើកឡើងរបស់អ្នកនាំពាក្យគណបក្សប្រជាជនកម្ពុជា ដូចនេះ ស្របពេលសមាជិកព្រឹទ្ធសភាអាមេរិក មកពីគណបក្សសាធារណៈ និងជាអតីតបេក្ខជនប្រធានាធិបតីលោក ថិត គ្រូស (Ted Cruz) ដាក់កំហិតឲ្យរដ្ឋាភិបាលលោក ហ៊ុន សែន ដោះលែងប្រធានគណបក្សប្រឆាំងដ៏ធំនៅកម្ពុជា លោក កឹម សុខា នៅថ្ងៃទី៩ ខែវិច្ឆិកា។ ប៉ុន្តែ អ្នកនាំពាក្យគណបក្សប្រជាជនកម្ពុជាថា មិនត្រឹមតែមិនដោះលែងលោក កឹម សុខ ទេ លោកទាំងថ្លែងឌឺដងថា ថ្ងៃទី១៦ ខែវិច្ឆិកា ខាងមុខ ជាថ្ងៃឱសានវាទដែលរំលាយគណបក្សសង្គ្រោះជាតិចោល។
ករណីចាប់ខ្លួនលោក កឹម សុខា នេះដែរ ឯកអគ្គរាជទូតកម្ពុជា ប្រចាំរដ្ឋធានីវ៉ាស៊ីនតុន សហរដ្ឋអាមេរិក លោក ជុំ ប៊ុនរ៉ុង បានសរសេរលិខិតមួយច្បាប់កាលពីថ្ងៃទី៧ ខែវិច្ឆិកា ឆ្លើយតបទៅសមាជិកព្រឹទ្ធសភាអាមេរិកាំងដ៏មានឥទ្ធិពល និងជាអតីតបេក្ខជនប្រធានាធិបតីមកពីគណបក្សសាធារណរដ្ឋ លោក ថិត គ្រូស ដោយមិនខ្ចីអើពើទៅនឹងការស្នើឲ្យដោះលែងលោក កឹម សុខា ឲ្យបានត្រឹមថ្ងៃទី៩ ខែវិច្ឆិកា ឡើយ បើមិនចង់ឲ្យអាមេរិក ដាក់ទណ្ឌកម្មលើកម្ពុជា។ លោក ជុំ ប៊ុនរ៉ុង ក៏បានបដិសេធទៅនឹងរាល់ការចោទប្រកាន់នានាដែលថា រដ្ឋាភិបាលរបស់លោកកំពុងធ្វើយុទ្ធនាការធ្វើទុក្ខបុកម្នេញមកលើក្រុមអ្នកប្រឆាំងនៅកម្ពុជា។
ចំណែកអ្នកវិភាគនយោបាយលោកបណ្ឌិត ឡៅ ម៉ុងហៃ យល់ថា ការប្រកាសជំហររបស់រដ្ឋាភិបាលលោក ហ៊ុន សែន ដូចនេះនឹងធ្វើឲ្យកម្ពុជា រងទណ្ឌកម្មពីសហរដ្ឋអាមេរិក។ លោកថា បើរដ្ឋាភិបាលរងទណ្ឌកម្ម ពីសហរដ្ឋអាមេរិកមែននោះ មិនមែនធ្វើឲ្យខាតបង់តែរដ្ឋាភិបាល ឬសមាជិកជាន់ខ្ពស់រដ្ឋាភិបាលនោះទេ ប៉ុន្តែនឹងធ្វើឲ្យប៉ះពាល់សេដ្ឋកិច្ចកម្ពុជា ប៉ះពាល់ជីវភាពពលរដ្ឋកម្ពុជា មុខមាត់កម្ពុជានៅលើឆាកអន្តរជាតិផងដែរ៖ «»។
លោកបណ្ឌិត ឡៅ ម៉ុងហៃ លើកឡើងទៀតថា ទណ្ឌកម្មសហរដ្ឋអាមេរិក មកលើកម្ពុជា អ្នកដែលប៉ះពាល់ដំបូង គឺមន្ត្រីរដ្ឋាភិបាលជាន់ខ្ពស់ ហើយបើរដ្ឋាភិបាលនៅតែរឹងទទឹង នឹងធ្វើឲ្យប៉ះពាល់ដល់ប្រទេសកម្ពុជា ទាំងមូល ដ្បិតអីសហរដ្ឋអាមេរិក ជាប្រទេសមហាអំណាចយោធា និងសេដ្ឋកិច្ច។
ទន្ទឹមនឹងការទាមទារសមាជិកព្រឹទ្ធសភាអាមេរិក ប្រាប់រដ្ឋាភិបាលលោក ហ៊ុន សែន ឲ្យដោះលែង លោក កឹម សុខា។ កាលពីថ្ងៃទី៣ ខែតុលា ឆ្នាំ២០១៧ ក្រុមសមាជិកព្រឹទ្ធសភាអាមេរិកាំង ដែលមានឈ្មោះបោះសំឡេងល្បីល្បាញមួយចំនួន បានផ្ដួចផ្ដើមរៀបចំឲ្យមានសេចក្ដីសម្រេចលេខ ២៧៩ ដើម្បីថ្កោលទោសទង្វើរបស់រដ្ឋាភិបាលលោក ហ៊ុន សែន។ សេចក្ដីសម្រេចនេះត្រូវបានដាក់បញ្ចូលទៅក្នុងកាលវិភាគលេខ ២៥៧ សម្រាប់លើកយកមកជជែកដេញដោល ក្នុងសម័យប្រជុំព្រឹទ្ធសភាអាមេរិកាំង នៅពេលដ៏ខ្លីខាងមុខនេះហើយ។
ប្រសិនបើ អនុម័តសេចក្ដីសម្រេចលេខ ២៧៩ ស្ដីពីការគូសបញ្ជាក់ឡើងវិញ ពីការប្ដេជ្ញាចិត្តរបស់សហរដ្ឋអាមេរិក ដើម្បីលើកកម្ពស់លទ្ធិប្រជាធិបតេយ្យ សិទ្ធិមនុស្ស និងនីតិរដ្ឋនៅកម្ពុជា តម្រូវឲ្យរដ្ឋាភិបាលអាមេរិកថ្កោលទោស ជាផ្លូវការនូវរាល់ទម្រង់នៃអំពើហិង្សា ផ្នែកនយោបាយក្នុងប្រទេសកម្ពុជា និងជំរុញឲ្យមានការបញ្ឈប់នូវអំពើរំលោភសិទ្ធិមនុស្សនានា ក្នុងប្រទេសនេះជាបន្ទាន់។ សេចក្ដីសម្រេចដដែលនេះ ជំរុញឲ្យលោកនាយករដ្ឋមន្ត្រី ហ៊ុន សែន និងមន្ត្រីគណបក្សប្រជាជនកម្ពុជា បញ្ចប់នូវការធ្វើទុក្ខបុកម្នេញ និងការបំភិតបំភ័យនានា មកលើក្រុមអ្នកប្រឆាំងនៅកម្ពុជា និងជំរុញឲ្យមាននូវបរិយាកាសមួយ ដែលលទ្ធិប្រជាធិបតេយ្យអាចរីកចម្រើន និងលូតលាស់ទៅមុខបានល្អ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។