គណបក្សសិទ្ធិមនុស្សធ្វើសមាជវិសាមញ្ញផ្លាស់ប្ដូរលក្ខន្តិកៈមួយចំនួន រួមទាំងប្ដូរប្រធានគណបក្សដើម្បីបើកផ្លូវឲ្យលោក កឹម សុខា ទៅបំពេញតួនាទីជាអនុប្រធានគណបក្សសង្គ្រោះជាតិស្របច្បាប់។
លោក កឹម សុខា បានប្រកាសលាលែងចេញពីតួនាទីប្រធាននៅក្នុងសមាជក្នុងគណបក្សរបស់ខ្លួននៅព្រឹកថ្ងៃទី៣១ ខែមីនា។ រីឯលោក សឺន ស៊ូប៊ែរ្តិ៍ ធ្លាប់ជាប្រធានគណៈកម្មការនាយក និងលោក ប៉ែន សុវណ្ណ ប្រធានគណៈកម្មការវិន័យរបស់គណបក្សសិទ្ធិមនុស្សក៏បានលាលែងពីតំណែងព្រមគ្នាផងដែរ។
លោក កឹម សុខា៖ «ខ្ញុំលាលែងពីប្រធានគណៈកម្មការប្រតិបត្តិ ជាប្រធានគណបក្ស។ ឯកឧត្តម សឺន ស៊ូប៊ែរ្តិ៍ លាលែងពីប្រធានគណៈកម្មការនាយក លោក ប៉ែន សុវណ្ណ លាលែងប្រធានគណៈកម្មការវិន័យសូមប្រកាសលាលែងពីពេលនេះតទៅបងប្អួន»។
លោក កឹម សុខា បានពន្យល់ពីមូលហេតុនៃការលាលែងពីប្រធានគណបក្សសិទ្ធិមនុស្សដោយហេតុផលតែមួយគត់ គឺដើម្បីបំពេញបេសកកម្មថ្មីជាប្រវត្តិសាស្ត្រក្នុងតួនាទីជាអនុប្រធានគណបក្សសង្គ្រោះជាតិជាមួយលោក សម រង្ស៊ី។ គណបក្សសង្គ្រោះជាតិក៏គ្រោងធ្វើសមាជបញ្ចូលរូបលោក កឹម សុខា ជាអនុប្រធានស្របច្បាប់នៅថ្ងៃទី៧ ខែមេសា ខាងមុខនេះដែរ។
ក្រោយពីលោក កឹម សុខា ប្រកាសលាលែង លោក ប៉ុល ហំម ដែលត្រូវតែងតាំងបន្ទាន់ជាប្រធានដឹកនាំសមាជនោះ សម្រេចប្រកាសជ្រើសរើសលោក សឺន ស៊ូប៊ែរ្តិ៍ អតីតប្រធានកម្មការនាយកឲ្យធ្វើជាប្រធានគណបក្សសិទ្ធិមនុស្សថ្មី ដោយមានសមាជិក សមាជិកាជិត ២ពាន់នាក់មកពីបណ្តាខេត្តចំនួន ១៥ លើកដៃគាំទ្រ។
លោក សឺន ស៊ូបែរ្តិ៍ ដែលត្រូវជ្រើសរើសជាប្រធានគណបក្សសិទ្ធិមនុស្ស បានសន្យាថា នឹងដឹកនាំសមាជិកសមាជិកាគណបក្សឲ្យបានល្អ ក្នុងគោលដៅជួយបម្រើដល់ប្រជាពលរដ្ឋខ្មែរទូទៅ។ ប៉ុន្តែលោកហាក់បង្ហាញពីភាពគ្មានជំនឿចិត្តចំពោះការទាញប្រជាប្រិយភាពគាំទ្រដូចប្រធានគណបក្សចាស់ គឺលោក កឹម សុខា នោះទេ៖ «មិនហ៊ានជំនួសឯកឧត្ដម កឹម សុខា អតីតប្រធាននេះ ដោយសារតែមិនមានប្រជាប្រិយភាពដូចឯកឧត្ដម កឹម សុខា»។
ទោះជាយ៉ាងណា លោក កឹម សុខា ថ្លែងស្នើឲ្យសមាជិកគណបក្សសិទ្ធិមនុស្សបន្តគាំទ្រលោក សឺន ស៊ូប៊ែរ្តិ៍ និងចាត់ទុកថា ការគាំទ្រលោក សឺន ស៊ូប៊ែរ្តិ៍ គឺជាការគាំទ្ររូបលោកក្នុងស្មារតីប្រជាធិបតេយ្យតែមួយ៖ «បេះដូងជាតិតែមួយ បេះដូងប្រជាធិបតេយ្យតែមួយ រឹងមាំដូចគ្នាបងប្អូន។ ជាក្ដីសង្ឃឹមរបស់សកម្មជនរបស់គណបក្សសិទ្ធិមនុស្សយើងទាំងអស់ កឹម សុខា សឺន សូប៊ែរ្តិ៍ តែមួយទេបងប្អូន»។
ក្រៅពីជ្រើសរើសប្រធានគណបក្សសិទ្ធិមនុស្សថ្មីគណបក្សនេះ ក៏នៅបានជ្រើសរើសសមាជិកគណៈកម្មការនាយកចំនួន ៣១រូប។ លោក គៀត សុគន្ធ អាចនឹងត្រូវជ្រើសរើសជាអនុប្រធានគណបក្សសិទ្ធិមនុស្សនៅពេលខាងមុខ។ ចំពោះលោក កឹម សុខា បើទោះបីជាលាឈប់ពីប្រធានគណបក្សសិទ្ធិមនុស្ស ប៉ុន្តែមិនមែនមានន័យថា លោកត្រូវបានបាត់បង់សមាជិកភាព ឬជាតំណាងរាស្ត្រក្នុងរដ្ឋសភាសព្វថ្ងៃនេះទេ។
តាមបទបញ្ជាផ្ទៃក្នុងរដ្ឋសភា សមាជិកភាពសភាណាមួយផ្លាស់ប្ដូរគណបក្សនយោបាយក្រោយអំឡុងពេល ៦ខែ មុនសភាថ្មីមកជំនួស មិនត្រូវរុះរើ ឬផ្លាស់ប្ដូរតំណាងរាស្ត្រថ្មីមកឲ្យជំនួសតំណាងរាស្ត្រចាស់ដែលផ្លាស់ប្ដូរនោះឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។