ប្រជាពលរដ្ឋមួយចំនួនក្នុងខេត្តកំពង់ឆ្នាំង នៅថ្ងៃទី២១ កក្កដា បញ្ជាក់ថា ការបោះឆ្នោតនៅកម្ពុជា ពេលបច្ចុប្បន្ន គឺធ្វើឡើងដោយមិនសម្ងាត់ ត្រឹមត្រូវ និងយុត្តិធម៌។ សង្គមស៊ីវិលបញ្ជាក់ថា ប្រការដែលម្ចាស់ឆ្នោតយល់ឃើញបែបនេះ គឺផ្អែកទៅលើអ្វីដែលពួកគាត់បានមើលឃើញជាក់ស្ដែង គួបផ្សំនឹងកង្វះខាតព័ត៌មានទាក់ទងនឹងការបោះឆ្នោតនៅតាមមូលដ្ឋានឲ្យបានទូលំទូលាយ ដូចការបោះឆ្នោតជាតិអាណត្តិទី១ ក្នុងឆ្នាំ១៩៩៣។
ប្រជាពលរដ្ឋមួយចំនួនក្នុងខេត្តកំពង់ឆ្នាំង បញ្ជាក់ស្រដៀងគ្នាថា ពួកគាត់នៅតែស្រពិចស្រពិលអំពីរបៀបនៃការបោះឆ្នោត និងមានការព្រួយបារម្ភចំពោះភាពសម្ងាត់ក្នុងការគូសសន្លឹកឆ្នោតរបស់ពួកគាត់ នៅថ្ងៃទី២៨ កក្កដា ខាងមុខ។ ក្ដីបារម្ភនេះ ក៏ព្រោះតែមានមេភូមិ អនុភូមិ ឬចៅសង្កាត់ តាមដានដឹងថា គ្រួសារណាមាននិន្នាការ និងបោះឆ្នោតគាំទ្រគណបក្សណាមួយនោះ។
ប្រជាពលរដ្ឋម្នាក់ឈ្មោះ អុន ចាន់វាសនា រស់នៅឃុំតាំងក្រសាំង ស្រុកទឹកផុស មានប្រសាសន៍ថា បើទោះបីជាអាជ្ញាធរអះអាងថា មិនបានគំរាមកំហែង ឬចូលទៅក្នុងការិយាល័យបោះឆ្នោតដើម្បីតាមដានប្រជាពលរដ្ឋ ក៏ប៉ុន្តែសកម្មភាពតាមដាន និងការប្រើពាក្យសម្ដីមួយចំនួនរបស់អាជ្ញាធរបានធ្វើឲ្យការសម្រេចចិត្តរបស់ប្រជាពលរដ្ឋភ័យខ្លាចរួចទៅហើយ៖ «បើតាមភូមិខ្លះគេដឹង គេអាចដឹង ព្រោះមេភូមិគាត់ប្រកាន់គណបក្សតែម្ដង អ៊ីចឹងគឺគាត់អាចដឹងថា ចំនួនមនុស្សនៅក្នុងផ្ទះនេះគឺអាចបោះឆ្នោតឲ្យគណបក្សនេះអ៊ីចឹង»។
ប្រជាពលរដ្ឋម្នាក់ទៀតឈ្មោះ សេង ចន្ថា រស់នៅសង្កាត់កំពង់ឆ្នាំង ក្រុងកំពង់ឆ្នាំង បានបញ្ជាក់ស្រដៀងគ្នាថា គេច្រើនតែតាមដានទៅលើសកម្មជន ឬសមាជិកគាំទ្រគណបក្សមួយចំនួនដែលខ្លួនចូលរួមក្នុងបក្ស ក៏ប៉ុន្តែមិនបោះឆ្នោតឲ្យគណបក្សរបស់ខ្លួន៖ «មានចលនាអីទៅមើលទៅថាមនុស្សហ្នឹងជាគណបក្សនេះគណបក្សនោះគាត់ដឹង»។
ចំណែកលោក មាស ឆែម រស់នៅសង្កាត់កំពង់ឆ្នាំង ក្រុងកំពង់ឆ្នាំង ដែរនោះ បានបញ្ជាក់ថា លោកនិងគ្រួសារអញ្ជើញទៅបោះឆ្នោតជារៀងរាល់អាណត្តិ ក៏ប៉ុន្តែលោកមិនបានជ្រាបច្បាស់អំពីនីតិវិធីនៃការបោះឆ្នោតអ្វីនោះទេ។
លេខាធិការនៃគណៈកម្មាធិការដើម្បីរៀបចំការបោះឆ្នោតដោយសេរី និងយុត្តិធម៌នៅកម្ពុជា ហៅកាត់ថា ខុមហ្វ្រែល (Comfrel) ប្រចាំខេត្តកំពង់ឆ្នាំង លោក លាភ ប៊ុនលាង មានប្រសាសន៍ថា ភាពស្រពិចស្រពិល និងការយល់ខុសរបស់ប្រជាពលរដ្ឋ គឺបណ្ដាលមកពីខ្វះការអប់រំ និងផ្សព្វផ្សាយឲ្យបានទូលំទូលាយដូចកាលពីពេលបោះឆ្នោតអាណត្តិទី១ ក្នុងឆ្នាំ១៩៩៣៖ «ពេលដែលគាត់ទៅបោះឆ្នោតគាត់មានការភ័យខ្លាច គាត់ព្រួយបារម្ភទាំងការសម្ងាត់ ទាំងការគូសឲ្យអីហ្នឹង គណបក្សផ្សេងៗហ្នឹងវាមិនសូវជាមានលទ្ធផល»។
លោកបន្តថា នៅពេលណាដែលប្រជាពលរដ្ឋមិនយល់ច្បាស់អំពីនីតិវិធីបោះឆ្នោត គឺធ្វើឲ្យពួកគាត់ភ័យខ្លាច និងបារម្ភពីការសម្ងាត់ក្នុងការគូសសន្លឹកឆ្នោតរបស់ពួកគាត់។ ការចុះបង្ហាត់បង្ហាញពីរបៀបគូសសន្លឹកឆ្នោតរបស់គណបក្សនយោបាយដល់ពលរដ្ឋតាមមូលដ្ឋាន គឺជាប្រការមិនល្អ ព្រោះវាធ្វើឲ្យប៉ះពាល់ដល់អារម្មណ៍ និងឆន្ទផ្ទាល់របស់ម្ចាស់ឆ្នោត។
ឆ្លើយតបនឹងបញ្ហានេះ មេភូមិកណ្ដាល សង្កាត់កំពង់ឆ្នាំង លោក ចាន់ មុត មានប្រសាសន៍យ៉ាងខ្លីថា អាជ្ញាធរពុំដែលមានការតាមដាន ឬក៏គំរាមកំហែងអ្វីនោះទេ៖ «ការបោះឆ្នោតហ្នឹង គឺជាសិទ្ធិសេរីភាពរបស់ប្រជាជនយើងម្នាក់ៗ បងប្អូនស្រឡាញ់ខាងណាបងប្អូនគូសខាងហ្នឹង គឺមិនអាចនរណាទៅដឹងថា បងប្អូនស្រឡាញ់ខាងណាអីខាងណាគឺអត់ទេ»។
ប្រធានគណៈកម្មការខេត្តរៀបចំការបោះឆ្នោតខេត្តកំពង់ឆ្នាំង អ្នកស្រី នួន ចាន់នី មានប្រសាសន៍ថា បើទោះបីជាពេលនេះពុំសូវមានវគ្គអប់រំផ្សព្វផ្សាយនៅតាមមូលដ្ឋានផ្ទាល់ ក៏ប៉ុន្តែបច្ចុប្បន្នប្រទេសកម្ពុជា មានប្រព័ន្ធផ្សព្វផ្សាយទូលំទូលាយ ដូច្នេះអ្វីដែលសង្គមស៊ីវិលលើកឡើង គឺខុសពីការពិត៖ «ប៉ុន្តែភាពមន្ទិលរបស់គាត់ដែលថា មានមេភូមិមេឃុំអីទៅឈរនៅក្បែរការិយាល័យបោះឆ្នោតហើយចាំគូសអីនោះ គណៈកម្មាធិការជាតិរៀបចំការបោះឆ្នោតក៏មានសេចក្ដីណែនាំអំពីប្រការហ្នឹងដែរ»។
មន្ត្រីអង្គការក្រៅរដ្ឋាភិបាល និងអ្នកតាមដានដំណើរការបោះឆ្នោតនៅកម្ពុជា បញ្ជាក់ថា ការរៀបចំការបោះឆ្នោតនៅកម្ពុជា មិនទាន់ឆ្លើយតបទៅនឹងស្តង់ដារលទ្ធិប្រជាធិបតេយ្យពិតប្រាកដនៅឡើយ។ នៅគ្រាដែលអង្គការសង្គមស៊ីវិលពុំមានជំនួយ និងលទ្ធភាពគ្រប់គ្រាន់ក្នុងការផ្សព្វផ្សាយ គណៈកម្មាធិការជាតិរៀបចំការបោះឆ្នោត ដែលជាអាជ្ញាធរឯករាជ្យ គួររៀបចំវេទិកាអប់រំ និងផ្សព្វផ្សាយព័ត៌មានឲ្យបានស៊ីជម្រៅ ដើម្បីឲ្យប្រជាពលរដ្ឋម្ចាស់ឆ្នោតចេះប្រើប្រាស់សន្លឹកឆ្នោតក្នុងការអភិវឌ្ឍប្រទេសជាតិ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។