ព្រះមហាក្សត្រ​អំពាវនាវ​ឲ្យ​បាតុករ​និង​សមត្ថកិច្ច​កុំ​ប្រើ​ហិង្សា

ព្រះ​មហាក្សត្រ​ ព្រះ​ករុណា​ព្រះបាទ​សម្ដេច ព្រះ​បរមនាថ នរោត្តម សីហមុនី នៅ​ថ្ងៃ​ទី​១៦ កញ្ញា ​ទ្រង់​បាន​អំពាវ​ដល់​ភាគី​ទាំង​ពីរ គឺ​ក្រុម​បាតុករ​ខាង​គណបក្ស​សង្គ្រោះ​ជាតិ និង​កង​កម្លាំង​សមត្ថកិច្ច​ដែល​ដាក់​ពង្រាយ​​ការពារ​សន្តិសុខ និង​បង្ក្រាប​បាតុកម្ម​​ឲ្យ​ឈប់​ប្រើ​ហិង្សា​ដាក់​គ្នា​បន្ត​ទៅ​ទៀត។

0:00 / 0:00

ព្រះមហាក្សត្រ ព្រះករុណា​ព្រះបាទ​សម្ដេច ព្រះ​បរមនាថ នរោត្តម សីហមុនី នៅ​ថ្ងៃ​ទី​១៦ កញ្ញា ​ទ្រង់​បាន​ផ្ញើ​ព្រះរាជសារ​រំលែក​ទុក្ខ​ក្រុម​គ្រួសារ​សព​ប្រជាពលរដ្ឋ​ឈ្មោះ ម៉ៅ សុខចន្ទ អាយុ ២៩​ឆ្នាំ​ មាន​កូន ៤​នាក់ រស់​នៅ​សង្កាត់​​ចាក់អង្រែលើ ខណ្ឌ​មានជ័យ ដែល​បាន​ត្រូវ​​គ្រាប់​កាំ​ភ្លើង​ស្លាប់​ក្នុង​អំពើ​ហិង្សា​មួយ​រវាង​ប្រជាពលរដ្ឋ​ជាមួយ​កង​កម្លាំង​សមត្ថកិច្ច បិទ​ផ្លូវ​​នៅ​ស្ពាន​អាកាស កាល​ពី​យប់​ថ្ងៃ​ទី​១៥ កញ្ញា។

ព្រះរាជសារ​របស់​ព្រះ​មហាក្សត្រ​​​​ចូល​រួម​​រំលែក​ទុក្ខ​ក្រុម​គ្រួសារ​សព​នោះ​​​មាន​ខ្លឹមសារ​ថា៖ "ខ្ញុំ​មាន​ព្រះរាជហឫទ័យ ក្រៀមក្រំ​ជា​ទី​បំផុត និង​សូម​ចូល​រួម​​រំលែក​ទុក្ខ​ជាមួយ​ក្រុម​គ្រួសារ​នៃ​ក្មួយ​ដែល​បាន​បាត់​បង់​ជីវិត និង​ក្មួយៗ​ដែល​រង​របួស"។

​ប្រភព​ប្រជាពលរដ្ឋ​ពី​កន្លែង​កើត​ហេតុ​បាន​អះអាង​ថា បុរស​ឈ្មោះ ម៉ៅ សុខចន្ទ បាន​ត្រូវ​គ្រាប់​របស់​កង​កម្លាំង​សមត្ថកិច្ច​ដែល​បាន​បាញ់​រះ​មក​លើ​ហ្វូង​ប្រជាពលរដ្ឋ​​ដែល​​កំពុង​ព្យាយាម​សុំ​ឲ្យ​សមត្ថកិច្ច​បើក​​របាំង​លួស​បន្លា ​ដែល​​ក្រុម​សមត្ថកិច្ច​ដាក់​រាំង​បិទ​ផ្លូវ​នៅ​ម្ដុំ​ស្ពាន​អាកាស​ក្បាល​ថ្នល់ មិន​ឲ្យ​ប្រជាពលរដ្ឋ​ឆ្លង​កាត់​កាល​ពី​យប់​ថ្ងៃ​​ទី​១៥ កញ្ញា។

ប្រភព​អះអាង​ថា ដំបូង​ឡើយ​ក្រុម​​បាតុករ​និង​សមត្ថកិច្ច​បាន​ផ្ទុះ​កំហឹង​ឡើង​ ដោយ​ពាក្យ​សម្ដី​អាក្រក់ៗ​ដាក់​គ្នា​ទៅ​វិញ​ទៅ​មក ហើយ​ក្រុម​បាតុករ​ក៏​បាន​គប់​ដុំ​ថ្ម​ទៅ​លើ​កង​កម្លាំង​សមត្ថកិច្ច ធ្វើ​ឲ្យ​សមត្ថកិច្ច​​ក្ដៅ​ក្រហាយ ក៏​បាន​បាញ់​រះ​មក​លើ​ប្រជាពលរដ្ឋ​​វិញ។ ក្រុម​សមត្ថកិច្ច​​ចោទ​ថា ប្រជាពលរដ្ឋ​ទាំង​នោះ​ជា​ក្រុម​បាតុករ​របស់​បក្ស​សង្គ្រោះ​ជាតិ តែ​បក្ស​សង្គ្រោះ​ជាតិ​បដិសេធ។

ការ​ប៉ះ​ទង្គិច​គ្នា​នោះ ធ្វើ​ឲ្យ​បុរស​ឈ្មោះ ម៉ៅ សុខចន្ទ ស្លាប់​នៅ​នឹង​កន្លែង ​និង​អ្នក​​ផ្សេង​ទៀត​រង​របួស ចំណែក​ភាគី​សមត្ថកិច្ច​ក៏​មាន​​របួស​ខ្លះ​ដែរ។

ស្រប​ពេល​​​​ព្រះមហាក្សត្រ​ចេញ​ព្រះ​រាជសារ​រំលែក​ទុក្ខ​នេះ ខាង​បក្ស​​សង្គ្រោះ​ជាតិ ​និង​រាជរដ្ឋាភិបាល​ក៏​បាន​​ចេញ​សេចក្ដី​​ថ្លែងការណ៍​​ដូច​គ្នា​ដែរ។ ​ភាគី​ទាំង​ពីរ​​បាន​ថ្លែង​សារ​​​​​ទម្លាក់​កំហុស ​និង​​ថ្កោល​ទោស​ដាក់​គ្នា​ទៅ​វិញ​ទៅ​មក​ ចំពោះ​​ករណី​​​ស្លាប់​​​របស់​ប្រជាពលរដ្ឋ​ម្នាក់​នេះ។

សេចក្ដី​ប្រកាស​របស់​គណបក្ស​សង្គ្រោះ​ជាតិ ចុះ​ថ្ងៃ​​ទី​១៦ កញ្ញា បាន​ថ្កោល​ទោស​រដ្ឋាភិបាល ដោយ​ប្រើ​ពាក្យ​ថា អាជ្ញាធរ​ប៉ូលិស​ឃោរឃៅ បាញ់​ប្រហារ និង​វាយ​ដំ​មក​លើ​ពលរដ្ឋ​ដែល​ធ្វើ​ដំណើរ​ឆ្លង​កាត់​​ស្ពាន​អាកាស​ក្បាល​ថ្នល់​នៅ​ពេល​នោះ ​ដោយ​សរសេរ​ថា៖ "គណបក្ស​សង្គ្រោះ​ជាតិ មាន​ការ​សោក​ស្ដាយ​យ៉ាង​ខ្លាំង​ចំពោះ​ការ​ប្រើ​អំពើ​ឃោរឃៅ​ពី​សំណាក់​អាជ្ញាធរ​ប្រដាប់​​អាវុធ​មក​លើ​ប្រជាពលរដ្ឋ​ស្លូត​ត្រង់ ដែល​នេះ​គឺ​ជា​ទង្វើ​រំលោភ​បំពាន និង​ជា​ការ​ប្រមាថ​យ៉ាង​ធ្ងន់ធ្ងរ​ដល់​អាយុ​ជីវិត​ប្រជាពលរដ្ឋ"

ចំណែក​ខាង​ភាគី​រាជ​រដ្ឋាភិបាល គឺ​គណៈ​បញ្ជាការ​សន្តិសុខ​អចិន្ត្រៃយ៍​សម្រាប់​ការ​បោះ​ឆ្នោត ​បាន​ស្ដី​បន្ទោស​​មេ​ដឹក​នាំ​បក្ស​សង្គ្រោះ​ជាតិ​ថា ជា​អ្នក​បង្ក​ហេតុ​នេះ​ឡើង។ រដ្ឋាភិបាល​បាន​ចោទ​បក្ស​សង្គ្រោះ​ជាតិ ថា​មិន​បាន​គោរព​ពាក្យ​សន្យា​ដែល​បាន​ប្រកាស​ថា បក្ស​សង្គ្រោះ​ជាតិ​​សុំ​ធ្វើ​បាតុកម្ម​អហិង្សា​នៅ​ក្នុង​តែ​​រង្វង់​ទីលាន​ប្រជាធិបតេយ្យ តែ​បែរ​ជា​​​ដើរ​ដង្ហែ​ក្បួន​បាតុកម្ម​ចេញ​ឆ្ងាយ​ពី​លាន​ប្រជាធិបតេយ្យ​​​ រហូត​​ធ្លាយ​ដល់​ស្ពាន​អាកាស​ក្បាល​ថ្នល់ ទើប​​​មាន​កើត​ចលាចល​ដូច្នេះ។

សេចក្ដី​ថ្លែងការណ៍​របស់​​រដ្ឋាភិបាល​ចុះ​ថ្ងៃ​ទី​១៦ កញ្ញា សរសេរ​ថា៖ "ក្នុង​ស្ថានការណ៍​បែប​​នេះ គណបក្ស​សង្គ្រោះ​ជាតិ ត្រូវ​ទទួល​ខុស​ត្រូវ​ចំពោះ​ព្រឹត្តិការណ៍​ទាំង​ឡាយ​​ដែល​​បាន​កើត​ឡើង។ គណៈ​បញ្ជាការ​សន្តិសុខ​អចិន្ត្រៃយ៍​សម្រាប់​ការ​បោះឆ្នោត សូម​ថ្លែង​អំណរគុណ និង​កោត​សរសើរ​ចំពោះ​អាជ្ញាធរ និង​កងកម្លាំង​មាន​សមត្ថកិច្ច​ទាំង​អស់​ដែល​បាន​លើក​កម្ពស់​ស្មារតី​បំពេញ​ភារកិច្ច​ ដោយ​ការ​ទទួល​ខុស​ត្រូវ​ខ្ពស់ និង​ប្រកាន់​នូវ​ភាព​អត់ធ្មត់​ដល់​កម្រិត​ខ្ពស់"

នៅ​ពេល​ដែល​បក្ស​នយោបាយ​និង​រដ្ឋាភិបាល​ឆ្លើយ​ទម្លាក់​កំហុស​ដាក់​គ្នា​ចំពោះ​ការ​ស្លាប់​របស់​ប្រជាពលរដ្ឋ​នេះ ព្រះមហាក្សត្រ​​បាន​ចេញ​ព្រះរាជសារ​​អំពាវនាវ​ដល់​ក្រុម​បាតុករ​ និង​កង​កម្លាំង​ប្រដាប់​​អាវុធ​ទាំង​អស់​​ឲ្យ​ឈប់​ប្រើ​អំពើ​ហិង្សា​ដាក់​គ្នា​ត​ទៅ​ទៀត។

ព្រះរាជសារ​សរសេរ​ថា៖ "ខ្ញុំ​សូម​អំពាវនាវ​យ៉ាង​ទទូច​ចំពោះ​ជន​រួម​ជាតិ​ទាំង​មូល ដែល​ជា​ក្រុម​បាតុករ និង​ក្រុម​សមត្ថកិច្ច សូម​បញ្ឈប់​​ការ​ប្រើ​អំពើ​ហិង្សា​តាម​រូបភាព​ណា​ក៏ដោយ​ ដូច​ជា​ការ​គប់​ដុំ​ថ្ម និង​ការ​ប្រើ​អាវុធ​ដែល​បណ្ដាល​ឲ្យ​បង​ប្អូន​​ទាំង​អស់​គ្នា​រង​របួស ឬ​បាត់​បង់​ជីវិត និង​បណ្ដាល​ឲ្យ​មាន​គ្រោះថ្នាក់​​កាន់​តែ​ធ្ងន់ធ្ងរ​ដល់​សង្គម​ជាតិ​យើង​ទាំ​ង​មូល។ សូម​បង​ប្អូន​ជន​រួម​ជាតិ​ជា​ទី​ស្រឡាញ់​របស់​ខ្ញុំ ងាក​មក​ប្រកាន់​យក​ប្រពៃណី​អហិង្សា ខិតខំ​យោគយល់​គ្នា រាប់​អាន​គ្នា​ជា​ខ្មែរ​ដូច​គ្នា មេត្តា និង​អត់​ធ្មត់​​ជា​អតិប្រមាណ​​ដើម្បី​បញ្ចៀស​អស្ថិរភាព​នៃ​ជាតិ​យើង"

​បន្ថែម​លើ​នេះ ព្រះ​មហាក្សត្រ​បាន​ក្រើន​​រំលឹក​ដល់​​ជន​រួម​ជាតិ​ទាំង​អស់​ ឲ្យ​​រក្សា​ភាព​ថ្លៃ​ថ្នូរ និង​ភាព​ស្ងាត់​ស្ងៀម ទម្រាំ​​បញ្ហា​នយោបាយ​ត្រូវ​បាន​ដោះ​ស្រាយ​ដោយ​សន្តិវិធី​និង​ដោយ​សេចក្ដី​ថ្លៃថ្នូរ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖

ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។