ស្ពានថ្មីនេះអាចជួយឲ្យប្រជាពលរដ្ឋដឹកទំនិញកសិកម្ម និងទំនិញពាណិជ្ជកម្មក្នុងស្រុក ទៅប្រទេសវៀតណាម។ ទីតាំងស្ពាននេះមានចម្ងាយប្រមាណជាង ១០គីឡូម៉ែត្រពីព្រំដែនកម្ពុជា និងវៀតណាម។
ស្ពានកោះធំដែលមានប្រវែងសរុប ៨០០ម៉ែត្រ និងទទឹងជាង ១៣នោះ សាងសង់ដោយថវិកាកម្ចីសម្បទានពីប្រទេសចិន ចំនួនជាង ១៩លានដុល្លារ ហើយរយៈពេលសាងសង់មានចំនួន ៣៦ខែ។
ប្រមុខរដ្ឋាភិបាល លោក ហ៊ុន សែន បានមានប្រសាសន៍នៅក្នុងពិធីបើកការដ្ឋានសាងសង់ស្ពានកោះធំដែលមានប្រជាពលរដ្ឋចូលរួមជាច្រើនពាន់នាក់ថា គម្រោងសាងសង់ស្ពានកោះធំនេះ គឺផ្ដើមចេញពីទំនាក់ទំនងដ៏ល្អរវាងកម្ពុជា និងចិន ជាដៃគូយុទ្ធសាស្ត្រគ្រប់ជ្រុងជ្រោយចាប់ពីឆ្នាំ២០១០ កន្លងមក៖ «ហើយនៅពេលខាងមុខនឹងដាក់ចេញនូវផែនការសកម្មភាពគ្រប់ជ្រុងជ្រោយ ដើម្បីជោគជ័យនៃភាពជាដៃគូយុទ្ធសាស្ត្រនេះ ហើយសង្ឃឹមថា ទំនាក់ទំនងរវាងកម្ពុជា និងចិន រឹងមាំដូចជាស្ពានបេតុងឆ្លងកាត់ទន្លេរបស់យើង»។
ជាមួយគ្នានេះ ឯកអគ្គរដ្ឋទូតចិន នៅប្រទេសកម្ពុជា លោក ផាន ហ្គងសៀ (Pan Guang Xue) បានមានប្រសាសន៍ជាភាសាចិន ហើយត្រូវបានប្រែសម្រួលជាភាសាខ្មែរថា គម្រោងសាងសង់ស្ពានកោះធំនេះ គឺស្ថិតនៅក្នុងចំណោមគម្រោងសាងសង់ស្ពានចំនួន ៧ នៅប្រទេសកម្ពុជា ក្រោមកម្ចីសម្បទានរបស់ចិន៖ «ស្ពានទី៧ កសាងរួមគ្នារវាងចិន និងកម្ពុជា។ ស្ពានកោះធំ បានបើកការដ្ឋានជាផ្លូវការ។ ខែក្រោយសម្ដេចអគ្គសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា នឹងអញ្ជើញទៅទស្សនកិច្ចជាផ្លូវការទៅកាន់ប្រទេសចិន ពេលនោះភាគីយើងទាំងពីរអាចចុះហត្ថលេខាលើកិច្ចព្រមព្រៀងស្ដីពីឥណទានអំពីគម្រោងនេះ»។
ប្រមុខរដ្ឋាភិបាលកម្ពុជា លោក ហ៊ុន សែន គ្រោងចុះហត្ថលេខាលើកម្ចីសម្បទាននេះ និងគម្រោងមួយចំនួនទៀតជាមួយមេដឹកនាំចិន នៅគ្រាដែលលោកទៅបំពេញទស្សនកិច្ច និងជួបប្រធានាធិបតីថ្មីរបស់ចិន លោក ស៊ី ជិនពីង (Xi Jinping) និងនាយករដ្ឋមន្ត្រីថ្មីរបស់ចិន លោក លី កេជាង (Li Keqiang) នៅដើមខែមេសា ខាងមុខនេះ នៅទីក្រុងប៉េកាំង ប្រទេសចិន។
ប្រធានក្រុមតំណាងរាស្ត្រគណបក្ស សម រង្ស៊ី លោក សុន ឆ័យ បានមានប្រសាសន៍រិះគន់ថា ប្រទេសចិន ចង់ឲ្យរដ្ឋាភិបាលរបស់លោក ហ៊ុន សែន ខ្ចីប្រាក់ ពីព្រោះចិនសម្លឹងឃើញធនធានធម្មជាតិរបស់កម្ពុជា ជាថ្នូរសងឲ្យចិនវិញ៖ «ឬក៏មិនកំណាញ់ឲ្យលោកនាយករដ្ឋមន្រ្តី ហ៊ុន សែន ខ្ចីលុយដ៏សន្ធឹកសន្ធាប់ដើម្បីកសាងសមិទ្ធផលដែលមានតម្លៃថ្លៃ ហើយគ្មានគុណភាព ដែលយើងសង្កេតឃើញថា ចិនកំពុងតែកោរខ្មែរមិនដាក់ទឹក។ សូមជម្រាបដែរថា ចិនកំពុងតែស្រក់ទឹកមាត់នៅពេលដែលគេសម្លឹងឃើញធនធានរ៉ែរបស់ប្រទេសកម្ពុជាយើង។ នរណាក៏ដឹងដែរថា ថ្មីៗនេះ ចិនកំពុងតែមានវិធានការដឹករ៉ែដែកចេញពីខេត្តព្រះវិហារ ដែលគេចំណាយលុយប្រមាណ ១២ពាន់លានដុល្លារអាមេរិក»។
រដ្ឋមន្ត្រីក្រសួងសាធារណការ និងដឹកជញ្ជូន លោក ត្រាំ អ៊ីវតឹក បានថ្លែងនៅក្នុងពិធីបើកការដ្ឋានសាងសង់ស្ពានកោះធំ ថា ស្ពាននេះក្រៅពីមានប្រយោជន៍ក្នុងការឆ្លងកាត់ និងងាយដឹកជញ្ជូនទំនិញវាជាផ្នែកមួយនៃការការពារព្រំដែន និងការពារខ្សែក្រវាត់ព្រំដែនរវាងកម្ពុជា និងវៀតណាមដែរ។
របាយការណ៍របស់ក្រសួងសាធារណការ និងដឹកជញ្ជូន បានឲ្យដឹងថា គម្រោងសាងសង់ស្ពានកោះធំ នេះ គឺជាស្ពានទី២ហើយ ឆ្លងកាត់ទន្លេបាសាក់ បន្ទាប់ពីស្ពានទី១ គឺស្ពានតាខ្មៅ ក្រោមកម្ចីសម្បទានរបស់ចិនដែរ។
រដ្ឋាភិបាលកម្ពុជា មានគម្រោងចំនួនសរុប ១៧ ក្នុងការសាងសង់ស្ពានឆ្លងកាត់ទន្លេមេគង្គ ទន្លេសាប និងទន្លេបាសាក់ ប៉ុន្តែគម្រោងជាក់ស្ដែងចំនួន ៧ កំពុងត្រូវបានអនុវត្តន៍៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។