នៅក្នុងលិខិតចុះថ្ងៃទី១៥ សីហា ក្រសួងព័ត៌មានបានធ្វើការអំពាវនាវអោយពលរដ្ឋខ្មែរទាំងអស់ បន្តរក្សាភាពស្ងប់ស្ងៀម និងបន្តប្រកបរបរចិញ្ចឹមជីវិតជាធម្មតាក្នុងសង្គម។ ការអំពាវនាវនេះ ធ្វើឡើងក្នុងខណៈពេលដែលប្រជាពលរដ្ឋខ្មែរទូទៅ ពិសេសពលរដ្ឋក្នុងក្រុងភ្នំពេញ ដែលកំពុងព្រួយបារម្ភចំពោះអស្ថិរភាពនយោបាយ និងអសន្តិសុខសង្គមកម្ពុជា ក្រោយការបោះឆ្នោត។
ការព្រួយបារម្ភរបស់ពលរដ្ឋ កើតឡើងបន្ទាប់ពីមានការលេចឮថា បក្សប្រឆាំងនឹងដឹកនាំអ្នកគាំទ្ររបស់ពួកគេចេញដើរតាមថ្នល់ ធ្វើបាតុកម្ម និងបន្ទាប់ពីរដ្ឋាភិបាលរបស់ លោក ហ៊ុន សែន ដាក់ពង្រាយកងកម្លាំងសមត្ថកិច្ចត្រៀមទុកជាមុន ដើម្បីរក្សាសណ្ដាប់ធ្នាប់ក្នុងពេលបាតុកម្ម។
ក្រៅពីអំពាវនាវអោយពលរដ្ឋរក្សាភាពស្ងប់ស្ងៀម ក្រសួងព័ត៌មាន ក៏បានអំពាវនាវដល់ប្រព័ន្ធផ្សព្វផ្សាយទាំងអស់ ពិសេសបណ្ដាញទំនាក់ទំនងសង្គមនានា អោយចុះផ្សាយព័ត៌មាន ផ្តល់ព័ត៌មាន ធ្វើអត្ថាធិប្បាយព័ត៌មាន និងចែករំលែកព័ត៌មានដោយផ្អែកតាមភាពពិតជាក់ស្តែង ប្រកបដោយវិជ្ជាជីវៈ លើកកម្ពស់សីលធម៌ និងសេចក្តីថ្លៃថ្នូររបស់ប្រជាជាតិខ្មែរ។ លើសពីនេះទៀត ក្រសួងព័ត៌មាន បានអំពាវនាវអោយប្រព័ន្ធផ្សព្វផ្សាយនានា ជៀសវាងចុះផ្សាយព័ត៌មានដែលមិនមានប្រភពច្បាស់លាស់ ព័ត៌មានដែលមានលក្ខណៈបំប៉ោង បំភិតបំភ័យ ញុះញង់ អុជអាល ប៉ុនប៉ងអោយមានអំពើហិង្សា និងការភ័យខ្លាចក្នុងសង្គម។
ប្រធានក្លឹបអ្នកកាសែតកម្ពុជា លោក ប៉ែន សមិទ្ធិ បានមានប្រសាសន៍នៅថ្ងៃទី១៦ សីហា ថា លោកគាំទ្រចំពោះការអំពាវនាវរបស់ក្រសួងព័ត៌មាន ដែលស្នើអោយអ្នកយកព័ត៌មានទាំងអស់ គោរពវិជ្ជាជីវៈ និងក្រមសីលធម៌របស់ពួកគេ ក្នុងការផ្សព្វផ្សាយព័ត៌មាន។ លោកមានប្រសាសន៍ថា បញ្ហាដែលចោទខ្លាំងក្នុងផ្នែកសារព័ត៌មានសព្វថ្ងៃ មិនមែនលើព័ត៌មានបែបប្រពៃណីទេ តែបញ្ហាដែលចោទ គឺលើព័ត៌មានបែបទំនើបតាមប្រព័ន្ធអ៊ីនធឺណិត ហើយដែលអ្នកប្រើប្រាស់ព័ត៌មានមួយចំនួនមិនបានយកចិត្តទុកដាក់ចំពោះប្រភពព័ត៌មានអោយបានច្បាស់លាស់។
លោក ប៉ែន សមិទ្ធិ៖ «ក្នុងអំណាចរបស់គាត់ជាស្ថាប័នរបស់រដ្ឋមួយ ការអំពាវនាវហ្នឹងមិនមានអីដែលថាខុសឆ្គងអីទេ ហើយយើងធ្វើការគិតទៅលើការអំពាវនាវហ្នឹងដែរ ប្រសិនណាបើសេចក្តីរាយការណ៍ព័ត៌មានមួយចំនួនធ្វើទៅមិននាំអោយស្រុកទេសមានផលប្រយោជន៍ មានសន្តិភាព ដែលនេះជារឿងមួយដែលអ្នកកាសែតត្រូវតែគិត»។
ព្រមជាមួយគ្នានេះដែរ នៅក្នុងលិខិតចុះថ្ងៃទី១៦ សីហា ឆ្នាំ២០១៣ ពីប្រទេសសិង្ហបុរី (Singapore) ប្រធានគណបក្សខ្មែរអភិវឌ្ឍន៍សេដ្ឋកិច្ច លោក ហួន រាជចំរើន បានអំពាវនាវអោយមានការបោះឆ្នោតឡើងវិញនៅកម្ពុជា ប្រសិនបើដំណោះស្រាយពិតប្រាកដនៅតែមិនអាចរកឃើញ នឹងដែលអាចនាំអោយសង្គមកម្ពុជា ធ្លាក់ក្នុងភាពវឹកវរ អសន្តិសុខ និងអស្ថិរភាព។ លោកថា ការបោះឆ្នោតឡើងវិញ នឹងធ្វើអោយស្ថានការណ៍នយោបាយនៅកម្ពុជា នឹងត្រឡប់ទៅរកភាពដើមវិញ។
លោកនិយាយបន្ថែមក្នុងលិខិតថា ប្រសិនបើការជាប់គាំងផ្នែកនយោបាយចេះតែអូសបន្លាយដោយគ្មានដំណោះស្រាយពិតប្រាកដណាមួយនោះ វានឹងធ្វើអោយវិនិយោគិនបរទេស រួញរាចិត្តមិនចូលធ្វើការវិនិយោគនៅកម្ពុជា។ លោក ហួន រាជចំរើន ក៏បានអំពាវនាវអោយលោកនាយករដ្ឋមន្ត្រី ហ៊ុន សែន និង លោក សម រង្ស៊ី ឈប់ឈ្លោះគ្នាដើម្បីអំណាច ហើយអោយឈប់យកខ្មែរធ្វើជាទាសករនយោបាយរបស់ពួកគេ។
នៅក្នុងព្រះរាជសារ ចុះថ្ងៃទី៧ សីហា ឆ្នាំ២០១៣ ព្រះករុណា ព្រះបាទ សម្ដេច ព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា ព្រះអង្គបានអំពាវនាវអោយពលរដ្ឋខ្មែរទាំងអស់រក្សាភាពស្ងប់ស្ងៀម បន្តប្រកបរបរចិញ្ចឹមជីវិតដោយសុខសាន្ត រក្សាឯកភាព និងសាមគ្គីភាពជាតិ។ ព្រះអង្គក៏បានអំពាវនាវដល់គណបក្សនយោបាយទាំងពីរ គឺគណបក្សប្រជាជនកម្ពុជា និងគណបក្សសង្គ្រោះជាតិ អោយបន្តពិភាក្សាគ្នារកដំណោះស្រាយដោយសន្តិវិធី ចំពោះវិវាទដែលនៅសេសសល់ និងបញ្ហានានាដែលកើតមានក្នុងកំឡុងពេលបោះឆ្នោត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។