ក្រសួង​ការងារ​អំពាវនាវ​កម្មករ​កុំ​ឲ្យ​ចូល​រួម​ធ្វើ​បាតុកម្ម​នៅ​ថ្ងៃ​ទី៧​កញ្ញា

គណបក្ស​ប្រឆាំង​បាន​កំណត់​យក​ថ្ងៃ​ទី៧ ខែ​កញ្ញា ជា​ថ្ងៃ​ធ្វើ​បាតុកម្ម​អហិង្សា ដោយ​មាន​បន្ថែម​ការ​ជួប​ជុំ​ស្មិងស្មាធិ៍​ទូទាំង​ប្រទេស ដើម្បី​ទាមទារ​ឲ្យ​បង្កើត​គណៈកម្មការ​ស៊ើប​អង្កេត​ភាព​មិន​ប្រក្រតី​នៃ​ការ​បោះ​ឆ្នោត។ មាន​ស្ថាប័ន​ជាតិ​ធំៗ​ជាច្រើន បាន​ចេញ​លិខិត​បន្តបន្ទាប់ ដើម្បី​ជំរុញ​ឲ្យ​ពលរដ្ឋ​រក្សា​សន្តិសុខ ស្ថិរភាព​សង្គម។

0:00 / 0:00

ស្រប​គ្នា​នេះ ក្រសួង​ការងារ និង​បណ្ដុះ​បណ្ដាល​វិជ្ជា ក៏​បាន​ចេញ​លិខិត​មួយ អំពាវនាវ​ឲ្យ​កម្មករ​ទាំងអស់​កុំ​ស្តាប់​ការ​ញុះញង់​របស់​អ្នក​នយោបាយ ចូល​រួម​ធ្វើ​បាតុកម្ម ដោយ​ត្រូវ​រក្សា​ភាព​នឹងនរ និង​បន្ត​ការងារ​របស់​ខ្លួន​ជា​ធម្មតា។ អង្គការ​ឃ្លាំ​មើល​សិទ្ធិ​ការងារ បញ្ជាក់​ថា កម្មករ​ក៏​ដូច​ពលរដ្ឋ​ទូទៅ​ដែរ គឺ​មាន​សិទ្ធិ​ចូល​រួម​ធ្វើ​បាតុកម្ម​អហិង្សា​ដូច​គ្នា តាម​ច្បាប់​រដ្ឋធម្មនុញ្ញ ហើយ​ស្នើសុំ​ឲ្យ​ស្ថាប័ន​សាធារណៈ ឬ​បុគ្គល​សាធារណៈ ត្រូវ​រក្សា​ជំហរ​ឲ្យ​បាន​អព្យាក្រឹត។

ក្រសួង​ការងារ និង​បណ្តុះ​បណ្តាល​វិជ្ជាជីវៈ អំពាវនាវ​ដល់​អង្គការ សហជីព និង​កម្មករ​និយោជិក និង​និយោជក​ទាំងអស់ ត្រូវ​រក្សា​ភាព​នឹងនរ ស្ងៀមស្ងាត់ កុំ​ចូល​រួម​បាតុកម្ម​តាម​ការ​ញុះញង់ និង​អូស​ទាញ​របស់​អ្នក​នយោបាយ។

ការ​អំពាវនាវ​នេះ ធ្វើ​ឡើង​បន្ទាប់​ពី​គណបក្ស​សង្គ្រោះ​ជាតិ បាន​កំណត់​យក​ថ្ងៃ​ទី៧ ខែ​កញ្ញា ធ្វើ​បាតុកម្ម​អហិង្សា​នៅ​ទីលាន​ប្រជាធិបតេយ្យ ដែល​គេ​ជឿ​ថា កម្មករ​រោងចក្រ​អាច​ជា​កម្លាំង​ចលករ​មួយ​ចូល​រួម​ក្នុង​ហ្វូង​បាតុកម្ម​នោះ។

ក្រសួង​ការងារ និង​បណ្ដុះ​បណ្ដាល​វិជ្ជាជីវៈ ស្នើសុំ​ឲ្យ​កម្មករ​អត់ធ្មត់ ទុក​ឲ្យ​គណបក្ស​នយោបាយ​ទាំង​ពីរ​ដែល​មាន​អាសនៈ​នៅ​ក្នុង​រដ្ឋសភា ដោះស្រាយ​តាម​នីតិវិធី និង​ស្រប​ច្បាប់​ជា​ធរមាន ហើយ​កម្មករ​ទាំងអស់​ត្រូវ​បន្ត​បំពេញ​ភារកិច្ច​តាម​តួនាទី​រៀងៗ​ខ្លួន ចៀសវាង​ការ​ចូល​រួម​តាម​ការ​ញុះញង់​អូស​ទាញ និង​ការ​ឃោសនា​របស់​អ្នក​នយោបាយ ដែល​ធ្វើ​ឲ្យ​បាត់​បង់​សណ្ដាប់​ធ្នាប់​សាធារណៈ ប៉ះពាល់​ដល់​ជីវភាព​របស់​កម្មករ។

យ៉ាង​ណា ប្រធាន​សហភាព​សហជីព​កម្ពុជា លោក រ៉ុង ឈុន ជឿ​ថា លិខិត​អំពាវនាវ​របស់​ក្រសួង​ការងារ នៅ​ពេល​នេះ គ្មាន​ប្រសិទ្ធភាព​ទប់ស្កាត់​ចរន្ត​កម្មករ កម្មការិនី មិន​ឲ្យ​ចូល​រួម​បាតុកម្ម​អហិង្សា ដើម្បី​ទាមទារ​ឲ្យ​មាន​ការ​បង្កើត​គណៈកម្មការ​ពិសេស​ស៊ើប​អង្កេត​ការ​បោះ​ឆ្នោត​នោះ​ទេ៖ «ការ​ចូល​រួម​មហា​បាតុកម្ម​អហិង្សា​នេះ ត្រូវ​បាន​ច្បាប់​ធានា ដូច្នេះ​ហើយ គ្មាន​អ្វី​ដែល​ខុស​ច្បាប់ ហើយ​យើង​គិត​ថា ការ​អំពាវនាវ​បាន​ត្រឹម​តែ​ជា​ការ​អំពាវនាវ​ទេ ប៉ុន្តែ មិន​អាច​ទប់ទល់​នឹង​ចរន្ត​របស់​បង​ប្អូន​កម្មករ និយោជិក ដែល​បម្រើ​ការងារ​នៅ​តាម​បណ្ដា​ខេត្ត និង​នៅ​រាជធានី​ភ្នំពេញ»

សហភាព​សហជីព​កម្ពុជា ដែល​មាន​សមាជិក​ក្នុង​សហព័ន្ធ​ចំនួន​៦ និង​មាន​សមាជិក​គាំទ្រ​ប្រមាណ ៥​ម៉ឺន ៥​ពាន់​នាក់ គឺ​អាច​មាន​សមាជិក​គាំទ្រ​ជា​កម្មករ និង​មន្ត្រី​រាជការ​ជា​គ្រូ​បង្រៀន ដែល​មាន​លំនៅឋាន​នៅ​តាម​បណ្ដា​ខេត្ត​ជិតៗ​ភ្នំពេញ និង​នៅ​តែ​រាជធានី​ភ្នំពេញ ប្រមាណ ២​ម៉ឺន ៥​ពាន់​នាក់ នឹង​ចូល​រួម​ធ្វើ​បាតុកម្ម​អហិង្សា​នៅ​ថ្ងៃ​ទី៧ ខែ​កញ្ញា ខាង​មុខ​នៅ​ទីលាន​ប្រជាធិបតេយ្យ។ រីឯ​កម្មករ និង​មន្ត្រី​រាជការ​ជា​គ្រូ​បង្រៀន​នៅ​តាម​បណ្ដា​ខេត្ត​ឆ្ងាយៗ អាច​នឹង​ចូល​រួម​គាំទ្រ​ពី​ចម្ងាយ។

មិន​ខុស​គ្នា​ដែរ ប្រធាន​សហជីព​ការងារ​កម្ពុជា លោក អាត់ ធន បញ្ជាក់​ការ​សម្រេច​ចិត្ត​ចូល​រួម​ធ្វើ​បាតុកម្ម ឬ​មិន​ចូល​ធ្វើ​បាតុកម្ម ជា​សិទ្ធិ​របស់​កម្មករ។ លោក​បន្ថែម​ថា ពេល​វេលា​នេះ រដ្ឋាភិបាល ឬ​ស្ថាប័ន​របស់​រដ្ឋ មិន​គួរ​ចេញ​លិខិត​ហាម ឬ​រារាំង​មិន​ឲ្យ​ពលរដ្ឋ​ចូល​រួម​ធ្វើ​បាតុកម្ម ដោយ​អហិង្សា​នោះ​ទេ។ ប៉ុន្តែ វិធី​ដែល​បញ្ចៀស​បញ្ហា​ផ្សេងៗ កើត​ឡើង​ជា​ចៃដន្យ ដូច​ជា​ការ​ប្រើ​ហិង្សា​ណា​មួយ​នោះ គឺ​អ្នក​នយោបាយ​ត្រូវ​ដោះស្រាយ​បញ្ហា​ដែល​សេសសល់​ជា​មុន​សិន៖ «កម្មករ​ខ្លះ​គាត់​ចង់​ចូល​រួម ព្រោះ​គាត់​ជា​ប្រជាពលរដ្ឋ មិន​មែន​កម្មករ​អត់​ធ្វើ​ស្អី​ទេ គាត់​មាន​សិទ្ធិ​បោះ​ឆ្នោត មាន​បេះ​ដូង គាត់​មាន​ទឹក​ចិត្ត គាត់​មើល​ឃើញ នរណា​មិន​ចង់​ចូល​រួម មិន​ចង់​ទៅ នរណា​ភ័យ​ខ្លាច គឺ​ភ័យ​ខ្លាច​ដូច​កម្មករ»

ត្បិត​ប្រធាន​សហជីព​ការងារ​កម្ពុជា មិន​ទាន់​ដឹង​ពី​ចំនួន​ជាក់​លាក់​របស់​សមាជិក​គាំទ្រ​ខ្លួន ចូល​រួម​ធ្វើ​បាតុកម្ម​នៅ​ថ្ងៃ​ទី៧ ខែ​កញ្ញា ប៉ុន្តែ​តាម​ស្មាន កម្មករ​ខ្លះ​អាច​នឹង​សម្រេច​ចិត្ត​ឈប់​ពី​ការងារ ឬ​ព្យួរ​ការងារ​មួយ​រយៈ ចូល​រួម​បាតុកម្ម​នោះ ដែល​ធ្វើ​ឲ្យ​សង្វាក់​ផលិតកម្ម​ក្នុង​វិស័យ​ឧស្សាហកម្ម​កាត់​ដេរ​នៅ​កម្ពុជា អាច​ប៉ះពាល់​ខ្លះ​ដែរ។

តាម​របាយការណ៍​ពី​សមាគម​កាត់​ដេរ​កម្ពុជា មាន​កម្មករ​ក្នុង​វិស័យ​ឧស្សាហកម្ម​កាត់​ដេរ​ជាង ៦០​ម៉ឺន​នាក់ គិត​ត្រឹម​ឆ្នាំ​២០១២។ កាល​ពី​ដើម​ឆ្នាំ​២០១៣ កន្លង​ទៅ សន្ទុះ​កម្មករ​ធ្វើ​បាតុកម្ម បាន​ស្ទុះ​ឡើង​គួរ​ឲ្យ​កត់​សម្គាល់ ងើប​ទាមទារ​ឲ្យ​ថៅកែ​រោងចក្រ​គោរព​សិទ្ធិ​ការងារ​នៅ​កន្លែង​ធ្វើ​ការ និង​ទាមទារ​សុំ​ដំឡើង​ប្រាក់​ខែ​ឲ្យ​បាន ១២០​ដុល្លារ។

ការ​ទាមទារ​របស់​កម្មករ​សុំ​ឲ្យ​បាន​ប្រាក់​ខែ​ខ្ពស់ គឺ​ស៊ី​នឹង​គោល​នយោបាយ​របស់​គណបក្ស​ប្រឆាំង ដែល​បាន​ឃោសនា​សន្យា​ដំឡើង​ប្រាក់​ខែ​ឲ្យ​កម្មករ​ឲ្យ​បាន ១៥០​ដុល្លារ​ក្នុង​មួយ​ខែ ប្រសិន​បើ​គណបក្ស​នេះ​ឈ្នះ​ឆ្នោត។ ប្រធាន​គណបក្ស​សង្គ្រោះ​ជាតិ ដែល​ផ្ដួចផ្ដើម​ឲ្យ​មាន​បាតុកម្ម​ប្រឆាំង​នឹង​លទ្ធផល​បោះ​ឆ្នោត បញ្ជាក់​ថា គណបក្ស​ខ្លួន​ឈ្នះ​បាន ៦៣​អាសនៈ​ក្នុង​រដ្ឋសភា ហើយ​ថា គ.ជ.ប មិន​អព្យាក្រឹត និង​ទាមទារ​ឲ្យ​មាន​ការ​បង្កើត​គណៈកម្មការ​ឯករាជ្យ​ស៊ើប​អង្កេត​ភាព​មិន​ប្រក្រតី​នៃ​ការ​បោះ​ឆ្នោត។ កត្តា​នេះ អាច​ធ្វើ​ឲ្យ​កម្មករ​ដែល​ចង់​បាន​ប្រាក់​ខែ​ខ្ពស់ ដូច​ការ​សន្យា​របស់​គណបក្ស​ប្រឆាំង ហ៊ាន​ចេញ​មុខ​ធ្វើ​បាតុកម្ម។

យ៉ាង​ណា ប្រធាន​ក្រុម​ប្រឹក្សា​សហជីព​ជាតិ​កម្ពុជា លោក សោម អូន បញ្ជាក់​ថា កម្មករ​មិន​ត្រូវ​ចូល​រួម​ធ្វើ​បាតុកម្ម​របស់​គណបក្ស​ប្រឆាំង​ទេ ព្រោះ​បាតុកម្ម​នោះ​មិន​មែន​ជា​បាតុកម្ម​ទាមទារ​ប្រាក់​ខែ​ឡើយ ប៉ុន្តែ ជា​បាតុកម្ម​ដែល​កើត​ចេញ​ពី​អ្នក​នយោបាយ ដែល​ចង់​កេង​ចំណេញ​អ្វី​មួយ។

លោក សោម អូន គាំទ្រ​ទាំង​ស្រុង​ចំពោះ​លិខិត​អំពាវនាវ​របស់​ក្រសួង​ការងារ ដោយ​បញ្ជាក់​ថា ប្រសិន​កម្មករ​ចាក​ចេញ​ពី​រោងចក្រ​ទៅ​ចូល​រួម​ធ្វើ​បាតុកម្ម​នោះ អាច​ប៉ះពាល់​នឹង​សន្តិសុខ​ការងារ​របស់​កម្មករ៖ «កម្មករ​យើង​គួរ​ណា​តែ​ទុក​ឲ្យ​រឿង​ហ្នឹង​ឲ្យ​អ្នក​នយោបាយ​ដោះស្រាយ​ទៅ ហើយ​យើង​ធ្វើ​ការ​ធម្មតា កុំ​ចូល​រួម ព្រោះ​អី​សំខាន់​បំផុត​យើង​ធ្វើ​ការ​ក្នុង​វិស័យ​ឯកជន ប្រសិន​បើ​យើង​នាំ​គ្នា​ចាក​ចេញ​ពី​កន្លែង​ធ្វើ​ការ​មក​ចូល​រួម​ធ្វើ​មហា​បាតុកម្ម អ៊ីចឹង វា​ធ្វើ​ឲ្យ​សង្វាក់​ផលិត​មិន​អាច​ដើរ​បាន អ៊ីចឹង​បើ​មិន​អាច​ដើរ​បាន វា​ពាក់ព័ន្ធ​នឹង​ការ​បញ្ជា​ទិញ អ៊ីចឹង​វា​អាច​នឹង​ប៉ះពាល់​សន្តិសុខ​ការងារ​របស់​យើង»

ចំពោះ​គំនិត​ប្រធាន​ផ្នែក​កម្មវិធី​ការងារ​នៃ​មជ្ឈមណ្ឌល​អប់រំ​ច្បាប់ សម្រាប់​សហគមន៍ លោក មឿន តុលា យល់​ថា កម្មករ​មាន​សិទ្ធិ​ពេញ​លេញ​ក្នុង​ការ​ចូល​រួម​ធ្វើ​បាតុកម្ម។ លោក​បញ្ជាក់​ថា ការ​អំពាវនាវ​មិន​ឲ្យ​កម្មករ​ចូល​រួម​បាតុកម្ម គឺ​ជា​ការ​រំលោភ​សិទ្ធិ​នយោបាយ​របស់​បុគ្គល ហើយ​ស្នើសុំ​ឲ្យ​ស្ថាប័ន​សាធារណៈ ឬ​បុគ្គល​សាធារណៈ ដែល​មាន​ចរិត​លម្អៀង ត្រូវ​រក្សា​ជំហរ​ឲ្យ​បាន​អព្យាក្រឹត៖ «ក្នុង​នាម​ជា​ម្ចាស់​ឆ្នោត ក្នុង​នាម​ជា​ម្ចាស់​ប្រទេស គាត់​មាន​សិទ្ធិ​ពេញ​លេញ​ចូល​រួម​ធ្វើ​បាតុកម្ម​ជាមួយ​គណបក្ស​សង្គ្រោះ​ជាតិ នៅ​ពេល​ខាង​មុខ។ ដូច្នេះ ក្រសួង​មិន​អាច​ទៅ​ហាមឃាត់​មិន​ឲ្យ​ចូល​រួម​ធ្វើ​បាតុកម្ម​បាន​ទេ អា​ហ្នឹង​ជា​សិទ្ធិ​ស្រប​ច្បាប់​របស់​គាត់​តែ​ម្តង»

គណបក្ស​ប្រឆាំង​បាន​កំណត់​យក​ថ្ងៃ​ទី៧ ខែ​កញ្ញា ជា​ថ្ងៃ​ធ្វើ​បាតុកម្ម​អហិង្សា ដោយ​មាន​បន្ថែម​ការ​ជួប​ជុំ​ស្មិងស្មាធិ៍​ទូទាំង​ប្រទេស ដើម្បី​ទាមទារ​ឲ្យ​បង្កើត​គណៈកម្មការ​ស៊ើប​អង្កេត​ភាព​មិន​ប្រក្រតី​នៃ​ការ​បោះ​ឆ្នោត។ បាតុកម្ម​លើក​ដំបូង​នេះ គម្រោង​អាច​មាន​មនុស្ស​ចូល​រួម​ប្រមាណ​ជាង ២​ម៉ឺន​នាក់។ ច្បាប់​រដ្ឋធម្មនុញ្ញ​ត្រង់​មាត្រា​៣៧ បាន​ចែង​ថា ពលរដ្ឋ​ទាំង​ពីរ​ភេទ​មាន​សិទ្ធិ​ធ្វើ​កូដកម្ម​បាតុកម្ម​ដោយ​សន្តិវិធី ត្រូវ​យក​មក​អនុវត្ត​នៅ​ក្នុង​ក្របខ័ណ្ឌ​នៃ​ច្បាប់។ គម្រោង​ធ្វើ​បាតុកម្ម​អហិង្សា​នេះ ក្រុម​កង​កម្លាំង​ប្រដាប់​អាវុធ​ជាង ២​ពាន់​នាក់ ត្រូវ​បាន​ហ្វឹកហាត់​ពី​របៀប​បង្ក្រាប​ក្រុម​បាតុករ​ជា​ចំហ ស្រប​ពេល​ដែល​ក្រុម​បាតុករ​ច្រើន​ពាន់​នាក់ ក៏​ត្រៀម​យុទ្ធសាស្ត្រ​បង្វឹក​ឲ្យ​អារម្មណ៍​ស្ងប់ និង​សង្កត់​ចិត្ត​ឲ្យ​ធ្ងន់ កុំ​ឲ្យ​ប៉ះ​ទង្គិច​ជាមួយ​សមត្ថកិច្ច៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖

ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។