ព្រះសង្ឃ​ប្រមាណ​៦០០​អង្គ​នៅ​តែ​បន្ត​ចូល​រួម​មហា​បាតុកម្ម​អហិង្សា

ព្រះសង្ឃ​ច្រើន​រយ​អង្គ​បាន​ចូល​រួម​មហា​បាតុកម្ម​អហិង្សា​គណបក្ស​សង្គ្រោះ​ជាតិ កាល​ពី​ថ្ងៃ​ទី១៥ ខែ​កញ្ញា ឆ្នាំ​២០១៣ នៅ​ទីលាន​ប្រជាធិបតេយ្យ បើ​ទោះ​ជា​មាន​សង្ឃ​ប្រកាស និង​សេចក្តី​ណែនាំ​ជា​បន្តបន្ទាប់​របស់​គណៈ​សង្ឃ​នៃ​ព្រះរាជាណាចក្រ​កម្ពុជា មិន​ឲ្យ​ចូល​រួម​ក៏ដោយ។

0:00 / 0:00

ព្រះសង្ឃ​ប្រមាណ​ជា ៦០០​អង្គ និមន្ត​មក​ពី​ក្រុង​ភ្នំពេញ និង​តាម​បណ្ដា​ខេត្ត​មួយ​ចំនួន​នៃ​ប្រទេស​កម្ពុជា បាន​ចូល​រួម​យ៉ាង​សស្រាក់សស្រាំ​ក្នុង​មហា​បាតុកម្ម​អហិង្សា​របស់​គណបក្ស​សង្គ្រោះ​ជាតិ។ ចំនួន​ព្រះសង្ឃ​ដែល​ចូល​រួម​ក្នុង​មហា​បាតុកម្ម​លើក​នេះ នៅ​តែ​មាន​ចំនួន​ច្រើន បើ​ធៀប​ទៅ​នឹង​មហា​បាតុកម្ម​លើក​ទី១ កាល​ពី​ថ្ងៃ​ទី៧ ខែ​កញ្ញា ឆ្នាំ​២០១៣។

ក្នុង​ចំណោម​ព្រះសង្ឃ​ដែល​ចូល​រួម​ខ្លះ​មាន​កាន់​ទៀន ធូប ផ្កា​ឈូក ទង់ជាតិ​ព្រះពុទ្ធ​សាសនា និង​ព្រះសង្ឃ​ខ្លះ​ទៀត មាន​កាន់​បដា​ដែល​សរសេរ​ថា ពួក​យើង​ត្រូវ​ការ​យុត្តិធម៌ សច្ចធម៌ សេរីភាព និង​សន្លឹក​ឆ្នោត​ពិត ជីវិត​ខ្ញុំ ជាដើម។

ព្រះតេជព្រះគុណ គឹម សុត្ថេរ និមន្ត​មក​ពី​វត្ត​មួយ​ក្នុង​រាជធានី​ភ្នំពេញ ដែល​បាន​ចូល​រួម​ក្នុង​មហា​បាតុកម្ម បាន​មាន​ថេរ​ដីកា​ថា ព្រះអង្គ​មាន​សេចក្តី​រីករាយ​ចូល​រួម​ក្នុង​មហា​បាតុកម្ម​របស់​គណបក្ស​សង្គ្រោះ​ជាតិ ព្រោះ​វា​ជា​បាតុកម្ម​អហិង្សា ដើម្បី​ទាមទារ​រក​យុត្តិធម៌​អោយ​ម្ចាស់​ឆ្នោត។ ព្រះអង្គ​បន្ត​ថា ព្រះអង្គ​ចូល​រួម​ដើម្បី​ទាមទារ​សិទ្ធិ​សេរីភាព​អោយ​ប្រជាពលរដ្ឋ​ខ្មែរ​ទាំងអស់ ដើម្បី​អោយ​រួច​ផុត​ពី​ការ​គាប​សង្កត់​របស់​មេ​ដឹក​នាំ​សព្វថ្ងៃ។

ព្រះតេជព្រះគុណ​ថា ព្រះតេជព្រះគុណ​មិន​ព្រួយ​បារម្ភ​ថា មន្ត្រី​សង្ឃ​ក្នុង​វត្ត​នឹង​ដាក់​ទោស​ព្រះអង្គ បន្ទាប់​ពី​ព្រះអង្គ​ចូល​រួម​មហា​បាតុកម្ម​ឡើយ ហើយ​ព្រះអង្គ​នឹង​ប្ដេជ្ញា​ធ្វើ​បាតុកម្ម​ជាមួយ​គណបក្ស​សង្គ្រោះ​ជាតិ ជា​បន្តបន្ទាប់៖ «បើ​តាម​អាត្មា​ដឹង​នៅ​វត្ត​របស់​អាត្មា​អត់​មាន​ហាម​ឃាត់​អី​ទេ អាត្មា​ភាព​អត់​មាន​ភ័យ​ព្រួយ​អី​ទាំងអស់ រឿង​អាត្មា​គឺ​ផ្សេង សម្ដេច​សង្ឃ​លោក​ស្ថិត​នៅ​ក្នុង​បក្ស អ៊ីចឹង​លោក​អាច​ត្រូវ​តែ​ធ្វើ​តាម​អ្វី​ដែល​គេ​អោយ​ធ្វើ​ហើយ អាត្មា​ភាព គឺ​ផ្សេង​មិន​ដូច​សម្ដេច​សង្ឃ​ទេ គឺ​ស្ថិត​តាម​ការ​យល់​ឃើញ​របស់​អាត្មា​ផ្ទាល់»

ព្រះតេជព្រះគុណ គឹម សុត្ថេរ មាន​ថេរ​ដីកា​បន្ថែម​ថា ធម៌​អហិង្សា គឺ​ជា​គោលការណ៍​របស់​ព្រះពុទ្ធ​សាសនា ដូច្នេះ​ការ​ចូល​រួម​របស់​ព្រះសង្ឃ​ក្នុង​មហា​បាតុកម្ម​អហិង្សា​មិន​បាន​ប្រាសចាក​នឹង​ទ្រឹស្ដី​ព្រះពុទ្ធ​សាសនា​ឡើយ ព្រោះ​វា​ជា​ការ​ទាមទារ​ប្រកប​ដោយ​សន្តិវិធី។

ស្រដៀង​គ្នា​នេះ​ដែរ ព្រះតេជព្រះគុណ វ៉ាត ស្រ៊ី ដែល​និមន្ត​មក​ពី​ខេត្ត​កំពង់ធំ មាន​ថេរ​ដីកា​ថា ចៅ​អធិការ​នៅ​វត្ត ព្រះអង្គ​មិន​បាន​ហាម​ឃាត់​ព្រះសង្ឃ​មិន​អោយ​ចូល​រួម​ធ្វើ​បាតុកម្ម​នោះ​ទេ ហើយ​នេះ​ជា​មូលហេតុ​ដែល​មិន​បណ្ដាល​អោយ​ព្រះអង្គ​បារម្ភ​ថា ព្រះអង្គ​នឹង​ត្រូវ​មន្ត្រី​សង្ឃ​ក្នុង​វត្ត​ដាក់​ទោស បន្ទាប់​ពី​វិល​ត្រឡប់​ទៅ​វិញ​នោះ​ទេ។

តែ​ទោះ​ជា​យ៉ាង​ណា​ក៏ដោយ ព្រះតេជព្រះគុណ វ៉ាត ស្រ៊ី មិន​គាំទ្រ​សង្ឃ​ប្រកាស​របស់​គណៈ​សង្ឃ​នៃ​ព្រះរាជាណាចក្រ​កម្ពុជា ឡើយ៖ «អាត្មា​យល់​ថា សង្ឃ​ប្រកាស គឺ​ជា​ការ​គំរាម​កំហែង​ដល់​សមណ​សិស្ស ឬ​ព្រះសង្ឃ​នៅ​ក្នុង​ព្រះរាជាណាចក្រ​កម្ពុជា របស់​យើង ហាម​ផ្តាច់​មិន​អោយ​ព្រះសង្ឃ​ចូល​រួម អាត្មា​ចូល​លើក​ទី១ ម្តង ហើយ​លើក​ទី២ ម្តង អាត្មា​ចូល ១​ថ្ងៃ ព្រោះ​ស្អែក​ជាប់​រវល់​សិក្សា រៀន​សូត្រ បាន​ចូល​តែ​មួយ​ថ្ងៃ ថ្ងៃ​អាទិត្យ​ហ្នឹង»

គណៈ​សង្ឃ​នៃ​ព្រះរាជាណាចក្រ​កម្ពុជា ទាំង​ពីរ​គណៈ បាន​ចេញ​ព្រះរាជ​សង្ឃ​ប្រកាស​កាល​ពី​ថ្ងៃ​ទី៥ ខែ​កញ្ញា ឆ្នាំ​២០១៣ ហាម​មិន​អោយ​ព្រះសង្ឃ​ទូទាំង​ប្រទេស​កម្ពុជា ចូល​រួម​ក្នុង​សកម្មភាព​បាតុកម្ម និង​បញ្ជា​អោយ​មន្ត្រី​សង្ឃ​គ្រប់​លំដាប់​ថ្នាក់​មាន ព្រះចៅ​អធិការ ជាដើម អោយ​គ្រប់គ្រង​វត្ត​អារាម​អោយ​ល្អ​ប្រសើរ និង​ទប់ស្កាត់​សកម្មភាព​គ្រប់​រូបភាព​ដែល​ប្រឆាំង​នឹង​ច្បាប់​រដ្ឋ និង​សាសនា។ ហើយ​នៅ​ថ្ងៃ​ទី១២ ខែ​កញ្ញា ឆ្នាំ​២០១៣ គណៈ​សង្ឃ​នៃ​ព្រះរាជាណាចក្រ​កម្ពុជា បាន​ចេញ​សេចក្តី​ណែនាំ​បន្ថែម​អោយ​មន្ត្រី​សង្ឃ​គ្រប់​លំដាប់​ថ្នាក់ បន្ត​អនុវត្ត​អោយ​បាន​ខ្ជាប់ខ្ជួន​នូវ​ព្រះរាជ​សង្ឃ​ប្រកាស​នោះ។

ក្នុង​ពេល​ថ្លែង​ទៅ​កាន់​ហ្វូង​បាតុករ​នៅ​ទីលាន​ប្រជាធិបតេយ្យ កាល​ពី​ព្រឹក​ថ្ងៃ​ទី១៥ កញ្ញា លោក សម រង្ស៊ី និយាយ​ថា ព្រះសង្ឃ​ក៏​ជា​ពលរដ្ឋ​ដែរ ដូច្នេះ​ព្រះសង្ឃ​មាន​សិទ្ធិ​ចូល​រួម​សម្រេច​វាសនា​ប្រទេស​ជាតិ ដូច​ពលរដ្ឋ​ដទៃ​ទៀត។ លោក​ថា ក្នុង​ប្រវត្តិសាស្ត្រ​របស់​ប្រទេស​កម្ពុជា ព្រះសង្ឃ​បាន​ផ្តល់​គំរូ​ល្អ​ជា​អ្នក​តស៊ូ និង​អ្នក​ស្នេហា​ជាតិ៖ «អាចារ្យ ហែម ចៀវ លោក​បាន​ដឹក​នាំ​ព្រះសង្ឃ​ច្រើន​រយ​អង្គ​កាល​សម័យ​បារាំង ប្រឆាំង​បារាំង កាល​ពី​ឆ្នាំ​១៩៤២ កុំ​តែ​ព្រះសង្ឃ​លោក​ចេញ​ព្រះ​ភ័ក្ត្រ ពេល​នោះ​មិន​ដឹង​ជា​បារាំង ជិះ​ជាន់​យើង​ប៉ុណ្ណា​ទេ ដូច្នេះ​សូម​ថ្លែង​អំណរ​ព្រះគុណ​ប្រគេន​ចំពោះ​ព្រះសង្ឃ ដែល​លោក​មាន​ព្រះទ័យ​អាណិត​អាសូរ​ពុទ្ធ​បរិស័ទ សត្វ​លោក​ទាំងអស់ ជួយ​សង្គ្រោះ​សត្វ​លោក​ទាំងអស់»

ជា​ការ​កត់​សម្គាល់ ព្រះសង្ឃ​បី​អង្គ​នៅ​រាជធានី​ភ្នំពេញ ត្រូវ​បាន​ព្រះ​គ្រូ​សូត្រ​ស្តាំ​វាយ​អោយ​មាន​របួស កាល​ពី​ថ្ងៃ​ទី៧ ខែ​កញ្ញា ឆ្នាំ​២០១៣ នៅ​ពេល​ដែល​ព្រះសង្ឃ​ទាំង​បី​អង្គ​នោះ រៀប​ចំ​ចេញ​ដំណើរ​ទៅ​ចូល​រួម​មហា​បាតុកម្ម​គណបក្ស​សង្គ្រោះ​ជាតិ។ តែ​មួយ​ថ្ងៃ​ក្រោយ​មក ព្រះ​គ្រូ​សូត្រ​ស្តាំ​អង្គ​នោះ បាន​សម្ដែង​អាបត្តិ​ទទួល​កំហុស​តាម​វិន័យ​ព្រះពុទ្ធ​សាសនា និង​បាន​សន្យា​ថា ព្រះអង្គ​នឹង​ផ្តល់​សិទ្ធិ​សេរីភាព​ពេញ​លេញ​អោយ​ព្រះសង្ឃ​ទាំង​បី​អង្គ​នោះ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖

ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។