មន្ត្រីស្រាវជ្រាវរបស់អង្គការការពារសិទ្ធិមនុស្សលីកាដូ (Licadho) ប្រចាំខេត្តកំពត បានឲ្យដឹងថា កងកម្លាំងយោធារបស់រដ្ឋាភិបាល ដែលគ្រប់គ្រងដោយលោកនាយករដ្ឋមន្ត្រី ហ៊ុន សែន បានបង្កើនការចល័តរបស់ខ្លួនបន្ថែមទៀត មកកាន់ទីរួមខេត្តកំពត ពីវរព្រំដែនកម្ពុជា-វៀតណាម។
ការបង្ហាញវត្តមានផ្នែកយោធារបស់ លោក ហ៊ុន សែន នេះ ត្រូវបានសង្គមស៊ីវិលដែលឃ្លាំមើលដំណើរនយោបាយរបស់កម្ពុជា ចាត់ទុកថា ធ្វើឡើងគឺចំពេលដែលស្ថានការណ៍បន្តតានតឹង ក្រោយថ្ងៃបោះឆ្នោត និងពុំមែនជាការចៃដន្យនោះឡើយ ដែលថាការពង្រឹងយោធានេះ គឺដើម្បីរក្សាសន្តិសុខរបស់ជាតិនោះ។
លោក យន់ ផល្លី អ្នកស្រាវជ្រាវមកពីអង្គការ លីកាដូ ប្រចាំខេត្តកំពត និយាយថា ក្នុងរយៈពេលប៉ុន្មានថ្ងៃចុងក្រោយនេះ កម្លាំងយោធាទាំងជើងទឹក និងជើងគោក ត្រូវបានគេពង្រាយបន្ថែមទៀតចូលមកទីរួមខេត្តកំពត ប្រមាណ ៦០នាក់ បន្ថែមលើកម្លាំងដែលមានស្រាប់។ លោកបន្តថា កម្លាំងទាំងអស់ត្រូវបានគេយកចេញពីវរការពារព្រំដែនគោក ៦០១ នៅចំណុចទាន់ហន់ និងលក ជាប់ព្រំដែនកម្ពុជា-វៀតណាម ព្រមទាំងវរព្រំដែនទឹកអង្គភាព ២៤១។ លោកបន្តថា ការចល័តនេះធ្វើឡើងយ៉ាងស្ងប់ស្ងាត់ នៅតាមតំបន់គោលដៅសំខាន់ៗរបស់ខេត្ត។
បើទោះជាមានការរឹតបន្តឹងផ្នែកយោធាយ៉ាងនេះក្ដី ក៏ប៉ុន្តែ ប្រជាពលរដ្ឋមួយចំនួននៅក្នុងខេត្តកំពត និយាយថា គេហាក់ពុំមានការភ័យខ្លាចឡើយ ព្រោះភាពតានតឹងផ្នែកនយោបាយនេះ ទុកឲ្យអ្នកនយោបាយជាអ្នកដោះស្រាយវិញ។ ហើយទំនងបញ្ហានេះនឹងមិនប៉ះពាល់ដល់សហគមន៍របស់គេនោះទេ។
ច្រានចោលបញ្ហាដែលថាមានការចល័តកម្លាំងយោធានេះ ស្នងការនគរបាលខេត្តកំពត លោក ថ្លាង ភារិន្ទ អះអាងថា ពុំមានការពង្រាយសមត្ថកិច្ចដូចការរកឃើញនោះឡើយ។
ចំណែកមេបញ្ជាការជើងទឹកវរព្រំដែន ២៤១ លោក ណុប សារឹម ឲ្យដឹងថា គ្រប់កម្លាំងប្រដាប់អាវុធដែលបានដាក់ពង្រាយនេះ ពុំមែនធ្វើឡើងចំពេលស្ថានការណ៍មានភាពតានតឹងទេ។ លោកបញ្ជាក់ថា អ្វីដែលកងទ័ពជើងទឹកដាក់ពង្រាយនៅតាមតំបន់គោលដៅ គឺដើម្បីការពារសុវត្ថិភាព និងសន្តិសុខដល់ពលរដ្ឋ ទៅតាមការព្យាកររបស់ឧតុនិយមអំពីបញ្ហាព្យុះប៉ុណ្ណោះ។
លើសពីនេះ ប្រភេទម៉ារីន របស់កងនាវាចរជើងទឹក ត្រូវគេយកមកសំចតនៅផែខាងមុខសាលាខេត្តកំពត អស់រយៈពេលជាច្រើនថ្ងៃមកហើយ។ ការចតម៉ារីន ដែលពុំធ្លាប់មាននេះ ត្រូវបានពលរដ្ឋនៅខេត្តកំពត សន្និដ្ឋានថា នេះទំនងជាការដាក់ដើម្បីគំរាមក្រុមអ្នកតវ៉ាប្រឆាំងលទ្ធផលឆ្នោត ជាជាងការពារសន្តិសុខ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។