រដ្ឋសភាបានបញ្ជូនញត្តិដែលទទួលបានពីក្រុមនិស្សិតទៅឲ្យលោក កឹម សុខា ប្រធានស្តីទីគណបក្សសង្គ្រោះជាតិ កាលពីថ្ងៃច័ន្ទ ទី២១ ខែមីនា ដើម្បីឆ្លើយបំភ្លឺ។
លិខិតរបស់រដ្ឋសភាបញ្ជាក់ថា ញត្តិនោះធ្វើឡើងដោយលោក ស្រី ចំរើន ដែលអះអាងថា ជាតំណាងយុវជន និងនិស្សិត ស្នើសុំឲ្យលោក កឹម សុខា ឆ្លើយបំភ្លឺចំពោះខ្សែអាត់សំឡេងឆ្លងឆ្លើយស្នេហាដែលគេសង្ស័យថា សំឡេងរបស់ភាគីខាងបុរស គឺជាសំឡេងរបស់លោក កឹម សុខា។
កាលពីចុងខែកុម្ភៈ កិច្ចសន្ទនាស្នេហាដែលគេលួចថតតាមទូរស័ព្ទ ត្រូវបានម្ចាស់គណនីហ្វេសប៊ុក (Facebook) ឈ្មោះ រឿងពិត CNRP យកមកផ្សព្វផ្សាយ ដោយអះអាងថា ជាសំឡេងរបស់លោក កឹម សុខា និយាយជាមួយស្រីកំណាន់របស់លោក ដែលមានជាច្រើនវគ្គបន្តបន្ទាប់រហូតមកដល់ពេលនេះ។
វិទ្យុអាស៊ីសេរី ពុំទាន់អាចសុំការបំភ្លឺតបជុំវិញរឿងនេះពីលោក កឹម សុខា ឬមន្ត្រីគណបក្សសង្គ្រោះជាតិនៅឡើយ កាលពីថ្ងៃច័ន្ទ ទី២១ មីនា។ ប៉ុន្តែកន្លងមក គណបក្សនេះបានប្រកាសមិនឆ្លងឆ្លើយពីករណីនេះឡើយ ដោយបញ្ជាក់ថា ទុកពេលគិតគូរពីបញ្ហាសំខាន់ផ្សេងៗ ដែលជាអាយុជីវិតរបស់ជាតិ និងប្រជាពលរដ្ឋម្ចាស់ឆ្នោតវិញ។
លិខិតដែលចុះហត្ថលេខា ដោយអគ្គលេខាធិការនៃរដ្ឋសភាលោក ឡេង ប៉េងឡុង ចុះថ្ងៃទី២១ ខែមីនា ក៏បានសុំឱ្យលោក កឹម សុខា ពិនិត្យពិចារណា និងផ្ដល់នូវការបំភ្លឺតាមសំណើឲ្យបានឆាប់តាមការគួរ ប៉ុន្តែលិខិតនោះពុំបានកំណត់ថា ត្រូវឲ្យលោក កឹម សុខា បំភ្លឺនៅថ្ងៃណាមួយជាក់លាក់នោះទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។