គ.ជ.ប​ បើក​កញ្ចប់​សុវត្ថិភាព​ផ្ទៀងផ្ទាត់​លទ្ធផល​ឆ្នោត​នៅ​ក្រចេះ

គណៈកម្មាធិការ​ជាតិ​រៀបចំ​ការ​បោះ​ឆ្នោត (គ.ជ.ប) បើក​កញ្ចប់​សុវត្ថិភាព "ក" ចំនួន ១៣ នៃ​ការិយាល័យ​បោះ​ឆ្នោត​ក្នុង​ឃុំ​មួយ​នៅ​ខេត្ត​ក្រចេះ បង្ហាញ​ឲ្យ​ឃើញ​ថា កញ្ចប់​ទាំង ១៣ នោះ ពោរពេញ​ដោយ​ភាព​មិន​ប្រក្រតី។ ការ​បើក​កញ្ចប់​សុវត្ថិភាព "ក"នេះ ជា​ការ​អង្កេត​បឋម​របស់​ក្រុមប្រឹក្សា​ធម្មនុញ្ញ​ដែល​ធ្វើ​ឡើង​តាម​ពាក្យ​បណ្ដឹង​របស់​គណបក្ស​សង្គ្រោះ​ជាតិ។

0:00 / 0:00

កញ្ចប់​សុវត្ថិភាព "ក" ចំនួន ១៣​កញ្ចប់ យក​មក​ពី​ការិយាល័យ​បោះ​ឆ្នោត​ចំនួន ១៣ នៅ​ក្នុង​ឃុំ​ស្វាយជ្រះ នៅ​ខេត្ត​ក្រចេះ ដែល​ក្រុមប្រឹក្សា​ធម្មនុញ្ញ​បញ្ជា​ឲ្យ​គណៈកម្មាធិការ​ជាតិ​រៀបចំ​ការ​បោះ​ឆ្នោត​បើក​ចំហ​ជា​សាធារណៈ​នៅ​ថ្ងៃ​ទី​២៥ ខែ​សីហា បាន​បង្ហាញ​ថា កញ្ចប់​សុវត្ថិភាព​ចំនួន ៨ ក្នុង​ចំណោម ១៣ ជា​កញ្ចប់​ដែល​ចំហ​មាត់​ស្រាប់ មិន​មាន​សុវត្ថិភាព​ឡើយ។

បន្ទាប់​ពី​ការ​ត្រួត​ពិនិត្យ​កញ្ចប់​សុវត្ថិភាព "ក" ទាំង ១៣ នោះ គេ​រក​ឃើញ​ថា ចំនួន​សន្លឹក​ឆ្នោត​មិន​បាន​ការ​ត្រូវ​បាន​បាត់។ សន្លឹក​ឆ្នោត​មិន​បាន​ការ​ដែល​បាត់​នោះ ត្រូវ​បាន​ចំណេញ​ទៅ​គណបក្ស​តូចៗ​ផ្សេងៗ​ទៀត ដែល​ខុស​ពី​លទ្ធផល​បឋម ដែល​ការិយាល័យ​បោះ​ឆ្នោត​ទាំង ១៣ ប្រកាស​កាល​ពី​ថ្ងៃ​បោះ​ឆ្នោត។

ក្រៅ​ពី​នេះ ក៏​មាន​ករណី​បំពេញ​សំណុំ​ឯកសារ​មិន​គ្រប់​ទម្រង់ ការ​ខុស​គ្នា​រវាង​ទិន្នន័យ​លើ​តារាង​រាប់​សន្លឹក​ឆ្នោត ភាព​ខុស​គ្នា​រវាង​ទិន្នន័យ​សន្លឹក​ឆ្នោត​បាន​ការ និង​មិន​បាន​ការ​ប្រើប្រាស់​ប៊ិច​ពីរ​ពណ៌​សរសេរ​លើ​តារាង​កត់​លទ្ធផល​បោះ​ឆ្នោត និង​បញ្ហា​មួយ​ចំនួន​ទៀត។

តំណាង​គណបក្ស​សង្គ្រោះ​ជាតិ ដែល​ចូល​រួម​ពិនិត្យ​មើល​កញ្ចប់​សុវត្ថិភាព លោក គូយ ប៊ុនរឿន មាន​ប្រសាសន៍​ក្រោយ​ពេល​បើក​កញ្ចប់​សុវត្ថិភាព "ក" ថា ខេត្ត​ក្រចេះ ជា​ខេត្ត​ពិសេស​ជាង​គេ ដែល​ជា​ខេត្ត​ប្រកួត​ប្រជែង ហើយ​សំឡេង​ឆ្នោត​របស់​គណបក្ស​កាន់​អំណាច និង​បក្ស​ប្រឆាំង​ប្រដំប្រសងគ្នា​ទៀត​ផង។

លោក​បន្ត​ថា ភាព​មិន​ប្រក្រតី​ទាំង​នេះ អាច​ប៉ះពាល់​ដល់​ការ​បែង​ចែក​អាសនៈ​សភា​នៅ​ខេត្ត​នេះ និង​បញ្ជាក់​ថា សមាជិក​គណៈកម្មការ​រៀបចំ​ការ​បោះ​ឆ្នោត​ខេត្ត​ក្រចេះ អាច​ជាប់​សង្ស័យ​ថា បាន​បន្លំ​ទិន្នន័យ​ទាក់ទង​នឹង​ដំណើរ​ការ​បោះ​ឆ្នោត។ លោក​បញ្ជាក់​ថា គណបក្ស​សង្គ្រោះ​ជាតិ សង្ឃឹម​ថា ក្រុមប្រឹក្សា​ធម្មនុញ្ញ​នឹង​សម្រេច​រឿង​នេះ​ដោយ​យុត្តិធម៌។

កញ្ចប់​សុវត្ថិភាព "ក" ជា​កញ្ចប់​ដែល​ដាក់​ឯកសារ​ដើម​ជា​ច្រើន​មក​ពី​ការិយាល័យ​បោះ​ឆ្នោត ដូច​ជា​ទម្រង់ ១១០១ ជា​កំណត់​ហេតុ​នៃ​ការ​បោះ​ឆ្នោត ទម្រង់ ១១០២ ជា​កំណត់​ហេតុ​នៃ​ការ​រាប់​សន្លឹក​ឆ្នោត ទម្រង់ ១១០៤ ជា​ក្រដាស​លទ្ធផល​បឋម​នៃ​ការ​បោះ​ឆ្នោត និង​ការ​រាប់​សន្លឹក​ឆ្នោត និង​ទម្រង់ ១១០៨ ជា​តារាង​រាប់​សន្លឹក​ឆ្នោត និង​ឯកសារ​មួយ​ចំនួន​ទៀត ដូចជា​បញ្ជី​បោះឆ្នោត​ដែល​ត្រូវ​បាន​ប្រើ​ក្នុង​ថ្ងៃ​បោះ​ឆ្នោត ត្រា​សម្ងាត់ សន្លឹក​ឆ្នោត​ខូច សន្លឹក​ឆ្នោត​មិន​បាន​ប្រើ និង​គល់​បញ្ជី​សន្លឹក​ឆ្នោត​ដែល​បាន​ប្រើ​សន្លឹក​ឆ្នោត​បាន​ការ សន្លឹក​ឆ្នោត​មិន​បាន​ការ និង​ផ្ទាំង​ក្រដាស​ធំ​សម្រាប់​កត់​ត្រា​សំឡេង​ឆ្នោត​ជាដើម។

បន្ទាប់​ពី​រក​ឃើញ​ថា កញ្ចប់​សុវត្ថិភាព​ទាំង ១៣ សុទ្ធតែ​មាន​បញ្ហា​នោះ សមាជិក​ក្រុមប្រឹក្សា​ធម្មនុញ្ញ លោក ព្រហ្ម ញាណវិចិត្រ មាន​ប្រសាសន៍​ថា ការ​បើក​កញ្ចប់ "ក" នេះ ជា​ការ​ធ្វើ​ឲ្យ​មាន​តម្លាភាព និង​បង្ហាញ​ពី​ការ​ពិត។ លោក​បញ្ជាក់​ថា ពលរដ្ឋ​ខ្មែរ​គ្រប់​រូប​ពិត​ជា​អាច​វាយ​តម្លៃ​បាន​ហើយ បន្ទាប់​ពី​ការ​បើក​កញ្ចប់​សុវត្ថិភាព​នេះ ប៉ុន្តែ​លោក​បញ្ជាក់​ថា លទ្ធផល​បើក​កញ្ចប់ "ក" នេះ មិន​ប៉ះពាល់​ដល់​លទ្ធផល​បោះ​ឆ្នោត​ទេ។

ទោះ​យ៉ាង​ណា​ក៏ដោយ នាយក​ប្រតិបត្តិ​នៃ​អង្គការ​តម្លាភាព​កម្ពុជា លោក ព្រាប កុល មាន​ប្រសាសន៍​ថា ការ​រក​ឃើញ​ពី​ភាព​មិន​ប្រក្រតី​នៅ​ខេត្ត​ក្រចេះ អាច​ឲ្យ​គេ​សង្ស័យ​ថា នឹង​មាន​ភាព​មិន​ប្រក្រតី​នៅ​កន្លែង​ផ្សេង​ទៀត ដែល​មិន​អាច​មើល​រំលង​បាន។

ទាក់ទង​នឹង​បញ្ហា​នេះ មិន​មាន​មន្ត្រី​គណៈកម្មាធិការ​ជាតិ​រៀបចំ​ការ​បោះ​ឆ្នោត​ចេញ​មុខ​និយាយ​ជាមួយ​អ្នក​កាសែត​នោះ​ទេ។ មន្ត្រី​ខ្លះ​ដែល​អង្គុយ​ចាំ​បើក​កញ្ចប់​សុវត្ថិភាព "ក" នោះ មាន​មុខ​ស្ងួត ជ្រួញ​ចិញ្ចើម​មុខ​ឡើង​ខ្មៅ និយាយ​ក៏​មិន​សូវ​ចេញ​ថែម​ទៀត។ នៅ​ពេល​ដែល​មន្ត្រី​គណបក្ស​សង្គ្រោះ​ជាតិ លើក​ឡើង​ពី​ចំណុច​ខុស​ឆ្គង​ម្តង ១​ការិយាល័យៗ មន្ត្រី គ.ជ.ប បាន​ចេញ​មុខ​បដិសេធ​ភ្លាមៗ ប៉ុន្តែ​ត្រូវ​ស្ងាត់​មាត់​ទៅ​វិញ ដោយសារ​សមាជិក​ក្រុមប្រឹក្សា​ធម្មនុញ្ញ​ហាម​មិន​ឲ្យ​តវ៉ា។

ផ្អែក​តាម​នីតិវិធី​ច្បាប់ ក្រុមប្រឹក្សា​ធម្មនុញ្ញ​នឹង​ពិនិត្យ​លម្អិត​លើ​បណ្ដឹង​គណបក្ស​សង្គ្រោះ​ជាតិ លើ​បញ្ហា​នេះ​ជា​បន្ត​ទៀត មុន​នឹង​ចេញ​សេចក្ដី​សម្រេច​នៅ​ថ្ងៃ​ខាង​មុខ។

ប្រតិកម្ម​របស់ គ.ជ.ប

គណៈកម្មាធិការ​ជាតិ​រៀបចំ​ការ​បោះ​ឆ្នោត បាន​ធ្វើ​សន្និសីទ​កាសែត​មួយ កាល​ពី​យប់​ថ្ងៃ​ទី​២៥ ខែ​សីហា ដើម្បី​បំភ្លឺ​ចំពោះ​ការ​ចោទ​ប្រកាន់​ថា កញ្ចប់​សុវត្ថិភាព "ក" មាន​ភាព​មិន​ប្រក្រតី។

លោក ទេព នីថា អគ្គលេខាធិការ គ.ជ.ប មាន​ប្រសាសន៍​ដោយ​បំភ្លឺ​ចំពោះ​ការ​រិះគន់​របស់​គណបក្ស​ប្រឆាំង​ដែល​ថា កញ្ចប់​សុវត្ថិភាព "ក" មាន​ភាព​មិន​ប្រក្រតី​នោះ គឺ​ជា​កំហុស​បច្ចេកទេស​និង​មិន​ធ្វើ​ឲ្យ​ប៉ះពាល់​ដល់​លទ្ធផល​បោះ​ឆ្នោត​ទេ។

សូម​ស្ដាប់​​នាទី​វេទិកា​អ្នក​ស្ដាប់​វិទ្យុ​អាស៊ីសេរី នៅ​យប់​ថ្ងៃ​អាទិត្យ ទី​២៥ ខែ​សីហា ឆ្នាំ​២០១៣ អំពី​លទ្ធផល​នៃ​ការ​បើក​កញ្ចប់​សុវត្ថិភាព “ក” ផ្ទៀងផ្ទាត់​លទ្ធផល​ឆ្នោត​នៅ​ខេត្ត​ក្រចេះ៖

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖

ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។